حين البأس

كيف يحدث هذا كل مرة ؟

2011-11-04T07:02:00.001-07:00

المؤمن القوي خير وأحب إلي الله من المؤمن الضعيف .. ما بالنا بغير المؤمن اصلا أو غير المسلم

كنا خير امة عندما كنا نامر بالمعروف وننهي عن المنكر

قبل ان تتهمني بالمزايدة

أنا ازايد بالفعل ... أزيد علي نفسي وعلي كرامتي .. وازايد علي الآخرين .. فالمرة التي زايدت فيها علي نفسي شاركت

في ثورة عظيمة انتظر الأيام بفارغ الصبر كي احكي لابنتي عما فعلته انا وزملائي .. فهو الشيئ الوحيد فى حياتي الذي صنعته

بنفسي كاملا متكاملا .. فخري بحق استطيع سرده بسعادة وزهو لا يوصفان.

لم ادخال فى معارك من ذلك النوع ابدا ولكن كنت دائما اعيش فيه واحلم به واصارح نفسي فى خوف ماذا ستفعل عند المواجهة؟

جائت الإجابة قاسية فى معارك الكر والفر الليلية يوم 26 و 27 يناير

جاءت من ضابط فى مثل سني بالقرب من نقابة الصحفيين عندما كنت اتلمس السبيل إلي هناك جاءت قاسية .. جاءت كالسياط

غادرة .. ارتني كيف نفسي وكيف حالي وما هو حجمي الطبيعي.. عندما ركضت مع الراكضون تجري ورائي سبابه كالذئاب

تنهش فى عرضي .. شعب جبنات وخولات وولاد وسخة ... كم اكره هذا الرجل

ماكنت احلم به عشته بالفعل

في ذلك اليوم لم استطع النظر فى وجه ابنتي .. وشعرت انها تستحق ابا افضل مني واني لا استحق زوجتي .. لا لا .. لا

استحق اي امرأة علي الإطلاق .

لم اكن الوحيد الذي ركض .. لكن هذا لم يكن فيه من العزاء الكافي لمواساتي

كنت اعلم ان علاجي الوحيد هو الانتقام .. ولكن ولسوء الحال لم اكن اعلم كيف سانتقم .. والافظع من ذلك كنت اعرف اني لا

املك قوة وقدرة الانتقام فلا املك مثلا الذهاب إلي اقرب قسم شرطة ومواجهة اي ضابط والانتقام منه

فكنا نفعل فى المدارس ان حدثت خناقة بيننا وبين طالب من مدرسة اخري نذهب لتلك المدرسة ونضرب اي فرد منها فنكون بذلك اخذنا

بثأرنا .. ولكن ذلك ايام المدرسة حيث كان سلاحنا الوحيد توكة الحزام .. أما والآن فالموضوع أكبر بكثير

انتهي ذلك المشهد من راسي عندما رايت بام عيني ضباط الأمن المركزي والعساكر وهما يركضون للوراء مفزوعين ..رفعت راسي

للاعلي كأي امتع ناظريا .. وانا القيهم بالحجارة فى مشهد اقرب لمشاهد الانتفاضة الفلسطينية لكي اصاب ببعض شظايا الخرطوش

لاشعر بالم بسيط فاسقط علي الارض مثل الشهداء ولكن لا اري دما ولا ألما كافيان حتي يهرع إلي الشباب بالقرب مني لاسعافي لاني

زي القرد ومافييش حاجة!!

لأقف ثانية واتمتع بذلك المشهد من جديد وهم ينسحبون وتختفي تلك الصورة خلف غطاء كثيف من الغاز المسيل للدموع.

لتعاودني مرة اخري الآن .. لأني لا اظن ان ابنتي سترغب فى الاستماع إلي بعد عشر سنوات من الآن اذا استمر حال الثوة كما

هي الآن

وبالرجوع لموضوع المزايدة

اتذكر حوار مع صديقة قبل الثورة حول وقفات خالد سعيد والأثر منها فتلجمني بحجتها القوية وتحكي لي عن بهاء صابر بفخر شديد

كيف واجه احد ضباط الداخلية واوقع قبعته و و و لاقاطعها قائلا انتي مش عارفة بهاء ده ايه .. فتسارع بالقول ارجل من ناس كتير علي فكرة .. اكم من رجال ملحتون متدينون يستطيعون تكرار ما فعل ... لانقطع عن محاوراتها لاجل

لنتقابل وتعرفني باحد الشباب واقول له لن يحدث شيئ حتي يقود البرادعي أي مظاهرة ونكون نحن الوقود لها ليقول لي بمنطق عجيب

انا مش مستعد اكون وقود لحد ومش هانتسني حد علشان يعملنا حاجة .. لم افهم كلامه إلا بعد صلاة الجمعة يوم 28 يناير فى امبابة

فوق الكبري وانا أري خلفي الحشود الهائلة .. ولا أري اي احد من النخب او حتي نشطاء سلالم النقابات

اقول لنفسي هذا قبل ان تحدثني "نفسي" عن علاء ومنال و بداية معرفتي بعالم التدوين وقصصهم وقصص آخرين

لن اخطا مرة اخري فهو فعل ما لم نسمع به يوما ما

أري الآن بمنظور مختلف كليا

اري ناشط "مطول شعره" "علماني" "مطرقع" فعل ما لم يتسطع فعله الكثير من المؤمنين والمتدينين

كيف يحدث هذا كل مرة؟

افيونتي اليومية .. جبهة التهييس الشعبية

2010-12-02T04:16:00.000-08:00

علي فكرة أنا فيا شئ لله كده، كنت حاسس انهم هايلغوا حاجة فى البلد ... وكنت حاسس انهم هايلغوا الشعب .. بس الحمد لله عدت علي خير ... المرة الجاية يبقوا يلغوه علي رواقة ... هما بحمد الله وباحمد عز مفجر ثورة التوريث الى أبوه لسه ميت من يومين، لغوا الانتخابات قصدي لغوا الترشيح علي الانتخابات ،، ييييييي هما لغوا حاجة كده مش مفهومة بس متعلقة بالنخاع الشوكي بتاع الانتخابات

وأهو الراجل جابها من الآخر علي كبر أهو .. وقال ايه احنا الى كنا خايفين يتقلب ويسيبنا لجمال ... كده نطمن انه هايدفنا كلنا ابن اللذينه ده، وبأه مجلس الشعب كله حزب وطني ونسوان لا معارضة فيها ولا اخوان والله حلوة والله وايه ... ومن غير تزوير أصل البلطجة والعنف وتسويد الورق والحاجات دي كلها الى حصلت لا تؤثر علي العملية الانتخابية تؤثر فقط علي القب والجاهز الهضمي والتنفسي ... امال ايه الى ممكن يؤثر نفسي اعرف ... والكلامنجية يقولولك ده الحجم الطبيعي للاخوان والمعارضة والحاجة الساقعة فى نفس الوقت لا ونسبة المشاركة حاجة وتلاتين فى المية من 40 مليون قفا هههههههه

واكبر قفا هو السيد البدوي صعبان عليا قوي .. وشباب الاخوان الى تعبوا وعدوا علينا فى البيوت صعبانين عليا برده ... ومحمد مفيد صعبان عليا وهو رايح ينتخب ويبطل صوته مراقب اللجنة يهبشه ويقوله مش فيه ناس أولي بالصوت بتاعك ده .. مال اهلك انت هو انت صحيح هاتفهم احسن منه .. فعلا تلامة وغتاتة المصريين مش علي حد أبدا بس هو السؤال التاني ليه الناس ماتقفش الفلوس من المرشحين وينتخبوا حد تاني ولا بيحصل كده فعلا والحزب الوطني هو برده الى بيفوز .. لا دي أنا أقع فيها والله مش ممكن يعني توصل لكده سحر يعني ولا ايه

واحمد عز يقولك اهم حاجة فى الانتخابات هي خطة مواجهة الاخوان .. هو انتم محتاجين خطة ولا نيلة ... ولا كان ليها لازمة الزفة الزفرة بتاعة الدي جي ووجع القلب والازعاج والخايلة الكدابة فى العيد الكبير واليفط والمصاريف ... ده من غير يافطة واحدة .. من غير يافطة واحدة ممكن تعملوا الى انتم عاوزينه .. يالا تتعوض فى الانتخابات الجاية انشاء الله يديكم انتم طولت العمر احنا ممكن نتشل فى استفتاء الرئاسة السنة الى جاية ، طب ما نعملكم توكيل عادي يعني مافيهاش حاجة ولا بالاش خالي البلد تاخد اجازة يوم من نفسهامن وجع قلب وزحم المدارس واهو رزق برده .. امال البلطجية الغلابة ياكلوا منين والحرامية المساكين يشتروا مطاوي منين نفسي افهم .. حد يفهمني الى حصل ده حصل ازاي .. بس عادي عادي اربع فرخات ودجاجة وماحدش فاهم حاجة مقطع من " اغنية سعد حاحة اغبياء عين شمس"

سؤال صغير كده الجيش بتاعنا فين والله واحشنا قوي .... البهوات الى مفيمين الفيرنا والتيمبرا والكرولا 95 بيهببوا ايه ... نسوانهم قاعدين فى نادي الجلاء .. حلو نادي الجلاء مافيهوش حاجة .. بس مافيش منشور يوحد ربنا يهدد ولا يوعد بكسر الياء الحكومة يقولهم احنا هنا ..
طب ماحد يزور منشور كده ويمضيه حتي باسم الظباط الفُشار عادي يعني .. ايه يعني ماعندهمش مشاكل
مستشفي غمرة وحدايق القبة ونوادي المدرعات والاشارة والمشاة مكفية معاهم خلاص .. اكلوا وحلوا ولاد الهرمة وسيابنا للمر .. بكرة يشربوا ويشيلوا ابح

ناس مش لاقية مستشفيات وبياخدوا من الغلابة ضرايب علشان يبنوا ليهم نوادي ومستشفيات

ده الى بيعيا بيتعالج فيهم حسب رتبته مع انهم فى النهاية كلهم المفروض يعني جنود

وطبعا ماحدش يقولي الحزب الوطني فيه إصلاحيين مابقاش خلاص لا الشعب ولا الحزب ولا حاجة ياريت نفكنا من الحوار ده ...لان لو فيه عضو شريف وصاحب مبدا فى الحزب الوطني المفروض كان قدم استقالته .. والى قال ان الامن المركزي الجناح العسكري للحزب الوطني كداب وعوض لان وزارة الداخلية كلها مليشيا تبع الحزب الوطني وحرس مسلح لقصر الرياسة

سايبنا لشوية حرامية وقوادين وبرشمجية وتجار مخدرات ... ده فيه لواءات بتعمل عصابات مسلحة لسرقة العربيات ــ ولاد هرمة ــ والي يبكي انه بيبقي خارج من خدمة مكافحة سرقة السيارات .. ده الى بيعوز حشيش نضيف بيوصي ظابط شرطة معروفة يخلصله المصلحة دي

الجدع الشهادة لله عامل شغل فى آخر أيامه يتحسد عليه والله ... بسك السيد البدوي علي الدستور والمصري اليوم والشروق مش محتاجين بسبسبة ... و سافر قطر ظبطها والجزيرة بقت بسم الله ما شاء الله بقت حاجة مشرقة ... والمذيعيين الى كانوا بيظيطوا ويسخنوا لما حد بيشتم بقوا يقفلوا عليهم التليفونات ويألفلموا بعديها .. والعربية والحرة تتفرج عليها كانك بتفرج علي قناة النيل للأخبار معتز رفعوله السلك الى ماشي عليه أكتر واكتر ... وطبعا لبني وشريف هي عسل وهو عامر .. البنية بتلبسلي فراشة بمبمي
اما الشيئ العجيب فهي مني الشاذلي بقيت مش فاهمها .. بقت متحفظة شوية يمكن حاسسها متوترة حبتين جايز ... بس الناهية ان مش دي مني الى انا بعرفها .. حاسس ان عليها ضغوط جامدة حبتين مش ده ادائها والغريب انه مأثر علي طلتها .. ماحدش كتير ممكن يحس بكده
أنا بس الى بحس بكده وكلام نوارة عنها زعلني منها شوية .. لان مدونة نوارة بقت بصراحة افيونتي اليومية
بس خلاص

لقد الفنا القرف

2010-11-24T22:44:00.000-08:00

يعني حلو يعني لما يولوعوا فى البلد ولا تحصلهم حاجة لا سمح الله .. هايبنسطوا يعني ولا احنا هاننبسط .. طب ما

يرمونا فى الصحرا احسن ... ويقعدوا هما هنا مع نفسهم ونرجع مرة تانية لمرحة الجمع والالتقاط !!!

ولا يبقي فيه لا جوامع ولا كنايس ولا تراخيص ولا نيلة، نرجع نبني بالطين وناكل من الفخار ــ ولا مانكلش احسن زي ما هما عايزين يعني ــ نتعلم فى الكتاتيب واتعشت علي كده

ويقعدوا هما فى التجمع والشيخ زايد والعروبة والقطامية والقرية الذكية .. بس هو فيه حد يسيب مصر ويقعد فى الأرياف بشوقهم يا عم خالص خليهم براحتهم

ولو عاوزين ضرايب بقي ياخدوها معيز وغنم ودره وشعير ويحكموا نفسهم باه ولا يجيبوا شعب من بره يحكموه ...ويا ناكر خيري بكره تعرف زمني من زمن غيري

طب مايفتحوا بابا الهجرة طالما حنا جاحدين خيرهم كده .. عاوزين يربونا يودونا الجزائر ولا السودان ولا نروح عوم لايطاليا احسن

عادي يعني

بس فكرت فى فكرة دلوقتي حالا

احنا نخلينا زي ما احنا

بس نهد الجوامع والكنايس وكل واحد يصلي مع نفسه ... ونقطع البطايق .. ونرمي بوتجازات وسخانات المصانع الحربية ويبقي كده ضربنا عصفورين بحجر واحد يصدروا الغاز براحتهم لإسرائيل علشان مش هانستعمل لا غاز طبيعي ولا انابيب .. لا ده كده ييبقي اكتر من عصفور لان مش هايبقي فيه خناقات ولا قتلي بسبب طوابير الانابيب ونعتمد علي البواجير بتاعة زمان فى الطبخ ووتسخين المية ... ولو قفشوا علي البواجير نقضيها ظلطتين واقلب ... احنا بطلنا نزعل حد مننا خلاص

بالنسبة للتلاجات والتكييفيات ولمض النور فمبقاش ليه عازة خلاص لاننا خلاص هانقعد في خيم فى الهواء الطلق و أي كلب معدي هايتاكل ، ولو حمار هايتسلخ ولو قطة هاتتدفن مطرحها ... من النهاردة مافيش شعب هما بس الي شعب .. . تصفيق
ونرجع نشرب المية من الطرمبات وماسمعش بطل يقولي مجاري ولا بتاع خلاص منها وإليها نعود و علشان كمان ما يجييش حتت اثيوبي يشخط فيهم ويعايرهم ويقولهم هاخد منكم ماية النيل ومش هاتعرفوا تعمل منتجعات ولا قصور ... ياخدو هما ماية النيل يملوا بيها حمامات السباحة وبحيرات الجولف فى مارينا الساحل والسخنة واحنا مع نفسنا ولا يشغلوا بالهم بينا خالص

وطبعا هانحتاج لا تليفزيونات ولا فضائيات ولا كمبيوترات ولا جرايد ولا نت ولا أي حاجة من دي خالص .. كله هاينام من المغرب ويصحي الفجر .. ومش عاوز شغل بنات حد فيهم ينطق و يقولي أنا ماقدرش افطر غير عيش وجبنة رومي مسخنين فى المايكروويف ولا الكيتشين ماشين بتاعي بيوجعني ولا الهاجص ده .. هاتتعور فيها ... زمن الللل خلاص انتهي ماحدش باه فاهم حاجة

و أتخنها بنت هايبقي جهازها باجورين وطقم فخار من مصر القديم خمس قطع احجام مختلفة وحلتين نحاس وطشط ألمونيا وانبسطوا الراجل هايجوز اربعة فمش هايبقي فيه مشكلة عنوسة خالص .. والنسوان هاتتهد وتتلقح فى البيوت لا شغل ولا يحزنون ولازحمة ميترو ع الفاضي

ايه تاني ايه تاني

نشتغل باه علشان الايد البطالة نجسة الرجالة تقتل الحيوانات الضالة وترعي الغنم والمعيز والجواميس وكده والحريم تطبخ وتضرب العيال
ماحدش يقولي طب مانشتغل عند الكبارات
الكبارات هايجيبوا عمال من بنجلاديش ونيبال هاياخدوا 400 جنيه لوكشة واحدة ولا حاوجة لأشكالنا الوسخة
ولما ييجوا سياح يبقوا يتفرجوا عللينا فى حديقة الحيوانات المفتوحة الى بقينا عايشين فيها
واظن بعد كده يبقي عدنا العيب وازح

حد ليه شوق في حاجة تاني

أو فيه حاجة تاني ممكن تتعمل اصلا

بطريقتهم واسلوبهم ده عاوزين يرجعونا لورا لورا كتييييير قوي

،
خلاص يشدوا كوبس الكهرباء

ييعرفوا يوقفوا عجلة الزمن والتقدم الانساني والحضاري
قدروا يعملوا كده كام سنة وهايقدروا يعملوا كده لكام سنة قدام 30 أو 70 أو 100 سنة يبقوا كام دول فى عمر الانسانية كلها

لو عرفوا الى قبليهم يضللوا الدنيا ويضلموها يبقوا هايعرفوا يضللونا ويجهلونا

بالأساليب الزبالة البيئة الدي جي الى عربية نص نقل الى بيلف فى الشوارع علشان ناجح محمد جلال وبشعبان عبد الرحيم وباحمد عز وجمال مبارك بتقطيع يفط الاخوان فى الشوارع والحواري وبوسترات جملة اسماعيل فى جاردن سيتي والمنيرة

بالدم الملوث وبقطر الصعيد وبخالد سعيد وعماد الكبير

بالخوف والرعب والقهر والظلم وبالمشي جنب الحيط

بالعبارة وطرق الموت والدائري والميكروباصات والتكاتك والميترو الى يقرف

بالمرتب الى بيبكتونا عليه وبالعيال وبلقمة العيش بالكدب فى التليفزيونات واسامة سرايا والدقاق ووعبد الله كلام وبيستك نو

بمعارضة مخصية متنقية ع الفرازة وقنوات حمضانة اصحابها مصلحجية

بتعليم فاشل جاهل وبشباب جامعي محصلته من دراسته سالب واحد وبفكر مشوه وثقافة سطحية تليفزييونية حورتجيه

بتامر حسني ولا حماقي ولا عمرو دياب بهيفاء وغادة عبد الرازق وخالد يوسف وعبير صبري

بالزحمة والخنقة والغلا والقرف والمرض

بالرشوة والسمسمرة والمصلحة والعمولات والهدايا التطنيش بالتصريح والتلميح والتهديد والتخويف

بالدين ولا بقلة الدين

بالحجاب ولا بالبادي وبحجاب علي بادي

بجلبية ولا ببنطلوان سقط

بايه بالظبط

هايعملوا ايه تاني ؟ طب ممكن يعملوا ايه اكتر من كده؟

انشكحوا .. وانكشحوا

لقد الفنا القرف

أمناء الجنة وحراس النار

2010-07-15T02:14:00.000-07:00

من منا يملك من نفسه شيئا، الحياه كلها حكم واقدار ، انت مخير ولكن كتب عليك فى الأصل اختيارك، كل الأشياء والأحداث والتفاصيل مقدرة بقدرة الله وموزونة بمقياس عدله العدل، حتي الجنة لن ندخلها بعملنا لكن برحمة من الله عز وجل، ـ انشاء الله يعني ـ ، فالله وحده هو الذي يعلم كيف ستكون خاتمتنا

وحكمة الله ليس لها حدود مثل رحمته، فدائما اقف عاجزا أمام حكمة الله فى مصيبة اتخيلها انها فاجعة الفجائع، وفجاة تشع من وسط الفاجعة رحمة من رحمات الله ويرزق قلوبنا من الصبر والسلوان ما يجعلنا مذهولين من أنفسنا ، ونتسائل كيف لا نجزع؟ كيف لا نموت؟ كيف لا يحدث لنا شيئا؟

ومن هنا أتسائل عن الفرق بين البلاء والابتلاء، فهل لو قدر الله لنا المرور بأزمة معينة فهل معني ذلك ان هذا بلاء وغضب من الله ، ألم يقل رسول الله صلي الله عليه وسلم ان ما من شوكة يشاك بها الإنسان إلا وتحط به خطية من خطاياه يوم القيامة بمعني الحديث الشريف

فكيف نجترأ علي الله ويقول بعض الناس بغير علم ان الفيروس الغريب الذي اصاب الدكتور نصر أبو زيد هو عقاب من الله تعالي ولا يعنيني كتابات الرجل فهو فى ذمة الله تعالي وما ادرانا لعل الله جاوز بهذا المرض عن سيئات هذا الرجل وكلنا عيوب وخطايا

الطاغية صدام حسين فعل ما فعل ونطق الشهادتين فهنا حسابه عند ربه هل نقول بغير علم انه فى النار او فى الجنة

الغرقي فى البحر الذين لعنهم شيخ الأزهر السابق ورفض اعتبارهم شهداء هل علم من الله ما لا نعلم؟ كيف أصدر حكمه؟ هل نماشيه؟ هل نخوض فيما خاض العالم الكبير

فأنا أخطئت فى حق خالد سعيد تماما كما أخطئ الشخص الذي حلل لي لماذا لا يريد التضامن معه ولا يجد شفقة فى ميتته ويجد عذرا لقتله، ولكن عذري لنفسي ان عدم تضامني الانساني معه فى الاول كان لسبب آخر غير سببه، فسبب هذا الشخص ان أي حد يموت ميته كهذه فلابد وانه يستحق تلك الميته، وهذا التعذيب، ويري أن هذا هو القصاص العادل من الله فى حق هذا الشاب ، وانه ولا بد وان عاش هذا الشاب عيشة فاجرة يستحق عليها الموت، ولن يرزقه الله هذه الميته إلا بسبب أعماله الفاجرة، ناسيا وغافلا ان الله عز وجل ـ وباستخدام نفس منطقه أيضا ـ لن يرزق فاجر مثل هذا الكم من التضامن والدعاء بظهر الغيب.

كما فى حادثة انتحار الشاب من أعلي كوبري قصر النيل انهالت اللعنات من كل حدب وصوب ولا نعلم كيف تكون خاتمتنا ولا نعلم كيف كانت خاتمته ، ولنا فى الصحابة الذين ظنوا ان رجلا فى غزوة من غزوات رسول الله قد نال الشهادة فإذا بمعلم الأمة الحبيب المصطفي يقول لصحابته الكرام انه فى النار وهو كما يترائي للجميع شهيد نال الشهادة فى سبيل الله فإذا به لم يستطع تحمل آلام جراحه فأجهز علي نفسه

والمرأة التى عصت ربها و التى قال عنها رسول الله ( صلي الله عليه وسلم ) انها تابة توبة تكفي أهل السماء والأرض

ثم ناتي نحن ونُدخل من نريد النار ونُدخل من نريد الجنة

مضحكات .. مبكيات

2010-04-08T04:58:00.000-07:00

جلس خالد الحندي بجلبابه الأبيض الناصع وعبائته الفخيمة وسبحته الملعلطة بجوار محمود سعد الأنيق والأسد مرتضي منصور وشبله احمد منصور بجوار الضبع أحمد شوبير علي أنها جلسة صلح بين فصيلين أبدع فيها مرتضي منصور بالورقة والقلم ومناديل الكيلانيكس علي الهواء، ولم يستطع ان يجاريه شوبير فطلاقة مرتضي منصور ليس لها حدود فافترسه مرتضي باستمتاع وتلذذ، وأجهز عليه بدم بارد إلي الأبد فأقترح ان يضم السيد عمرو موسي الشيخ خالد الجندي والإعلامي محمود سعد لجامعة الدول العربية لعلهم يستطيعوا أن يُجلسوا فتح بجوار حماس علي طاولة المفاوضات، لكن بشرط أن تكون علي الهواء

ذهب الغضنفر ابن الغضنفر أحمد زكي بدر غازيا مدرسة حكومية فى حلوان فقتل المدير والوكيل والناظر وجرح عشرة مدرسين وأسر مجموعة من التلاميذ وسبي المدرسات، وظهر مع معتز ومع مني ( يابخته ) وبدا مزهوا لأقصي درجة وشعرنا معه بقوة حجته وصرامة شكيمته وكمال شياكته واناقته، وبعد يومين ظهر فى معية السيد مشعل الوزير والنائب عن حلوان التي بها المدرسة والمدرسين متوسطا فى مؤتمر صحفي للعفو عن الناظر والمدرسين والطلاب ليرضخ أخاه فى الله وزميله فى الوزارة أخيرا لطلبات مشعل معقبا معلش هاتنزل المرادي لكن اعمل حسابك المرة الجاي مش ممكن تنزل الأرض أأأأأأأبداً ، فأقترح أن ينضم السيد مشعل إلي نفس صاحبيه مرتضي منصور وشوبير فى لجنة الجامعة العربية علي ان يتحقق نفس الشرط البائت

ذهبت مرغما إلي استاد المقاولون العرب مشاهدا لماتش باهت وممل جمع الأهلي بالمقاولن وكانت اول مرة أهذب فيها إلي الإستاد بعد المرة الخالدة الذكر التي جمعت بين منتخبي توجو وانجولا حيث ذهبت طامعا لبيع التذاكر المجانية ولم أجد أصلا أي متفرج عن شاري لتلك التذاكر، فنظرت متاملا لاحوال مشاهدي المباراه الذين تكبدوا عناء الذهاب إلي هذا الاستاد الشاق والهاتف وحرقة الدم ودفع تذكرة الدرجة الثالثة ـ خماشر جنيه لوكشة واحدة ـ فذهب بخيالي متفلسفا ومتحذلقا ومسفسطا لماذا لم تشارك تلك الجماهير فى إضراب السادس من إبريل او أي اعتصام او مظاهرة أخري، لماذا لم تهتف مدافعة عن حق أو رافضة لباطل والسؤال الأهم لماذا ذهبت انا الآخر لمشاهدة تلك المباراة

أن يبيت موظفون وعائلاتهم فى الشارع ونراهم بأعيننا كل يوم ويعلم بهم المسئومين ولا يفعلوا شيئا

أن يفترشوا الأرض يوم شم النسيم والرئيس فى فترة نقاهته فى شرم الشيخ

أن يضرب الشباب ويتحرش بالنساء وتتحول وسط البلد إلي ساحة معركة ونزال

أن يستقدموا حماقي للغناء فى جامعة عين شمس فى نفس يوم الإضراب وأن لا يخجل ولا يخشي من الافصاح عن تلك المؤامرة الهزلية

أن يعلم الشعب كل هذا وأكثر

ان أظل أنانيا مكتفيا بالحديث فى مدونتي مرددا صدي صوتي وصوت غيري ولا أفعل شيئا مثلي مثل غيري

فهو الشئ الحقيقي الذي يستحق البكاء من اجله

وللنتظر ما هو أسوء ولننظر فصل جديد من مسرحيات يقوم ببطولتها

شوبير ومرتضي

لكح والبردعي

طلعت السادات واحمد عز

أو حتي الأسواني وحسن نافعة

فلن أصدم فى أي شخص يظهر فى أي إعلام

طبعا ماعدا مني :)

أحداث حزينة - 1

2010-03-18T00:47:00.000-07:00

قُبل الطعن فى قضية اختطاف ربة منزل من منزلها وتناوب عشرة كلاب الاعتداء عليها، وصرح محامي الكلاب بان السيدة هي التى دفعتهم لارتكاب الجريمة لما كانت ترتديه من ملابس، وهو قول ان سمعته من صاحبه لقتلته، وان كنت قاضي وسمعته من محامي وانا من علي المنصة لكان كفيل لي لرفض الطعن.
المصري اليوم بتاريخ 17/3

طالب يطعن زميلة بمطواه ، ويأتي أهل القتيل ويقتحموا المدرسة وينفذوا قصاصهم بأيديهم داخل المدرسة وامام التلاميذ والمدرسين فهي الغابة بعينها

يعقد حزب الوفد صفقة مع الحزب الوطني بموجبها يحصل علي23 مقعد من مقاعد برلماننا الموقر ، وينكر رفعت السعيد علي البرادعي عدم تحمسه للأحزاب، فهو التبجح بعينه والوقاحة بوجهها

أن نرمم الآثار والمعابد اليهودية ونسمح " للإسرائيليين" الاحتفال علي أرضنا وتحت حمايتنا، وهم يدمرون المسجد الأقصي ويهودون القدس ويطردون أهله ويضمون الآثار الإسلامية إلي تراثهم المزعوم فهو العهر والعري بذاته

أن يعلن الديكتاتور وابن الديكتاتور وأمين عام حزب الديكتاتور أن لا نية لتعديل الدستور فهي منتهي الصراحة والبجاحة وإعلان منهم عن الاستعلاء والاستغناء عن الشعب المقهور

ان يعلم " الشعب المصري" أنه ظل يأكل طيلة عشرون عاما من ري مياه الصرف الصحي وغير الصحي ومياه المجاري ولا يحرك ساكنا ولا يسكت متحركا فهو بمثابة إعلان وفاة هذا الشعب

أن نري بأعيننا كل صحاب العمال وهم يفترشون شارع القصر العيني ويبيتون فى العراء ونمر بسيارتنا وأقدامنا علي أحلامهم وآمالهم وحقوقهم ولا نفعل شيئا فهو منتهي الجبن والأنانية والتبلد والتوحش

حزين اني من هذا الجيل

لأ بأه .. احنا هانتسلم من أولها

2010-03-08T01:52:00.000-08:00

ولأن «الجمعية الوطنية من أجل التغيير» ليست كيانا قانونيا مصرحا به، وبالتالى ليس له عنوان بريدى يمكنه استقبال البيانات الموقعة من جانب المواطنين، فمن المتوقع أن تظهر صعوبات جمة تحول دون توليد آليات ضغط جماهيرية كافية لحمل النظام على الاستجابة إلى مطالب التغيير. غير أنه يمكن التغلب، فى تقديرى، على هذه الصعوبات بإحدى وسيلتين، الأولى: أن يبادر الشباب، بشكل طوعى ودونما انتظار توجيهات من أحد، بتشكيل لجان شعبية فى القرى والأحياء والنجوع تتولى طبع المطالب وتوزيعها ثم إعادة جمعها بعد توقيعها وفقا للآليات التى يرونها مناسبة كى يسهل بعد ذلك حصرها.

ده جزء من مقال للدكتور حسن نافعة فى المصري اليوم بتاريخ 7 / 3/ 2010

أنا بحب وبحترم الراجل ده جدا، ومقدر قيمته الاكاديمية والعلمية والأدبية والسياسية وكل حاجة فيه

بس مش فاهم يعني الشباب مفروض عليهم يعملوا ايه تاني

المدونين عملوا الى عليهم ودفعوا التمن .. الى اطرد من شغله والى أخدله علقة والى اتحجز فى القسم والى اضرب والى هددوه في بيته

وبرده الشباب هما الى عملوا كفاية والغد والجبهة

و هما الى عملوا 6 إبريل 4 مايو وخلي عندك صوت وخلي عندك دم وغيرها

و هما الى عملوا للاخوان كيان وقيمة ونشاط

وهما برده الى مش لاقيين شغل والى بيتقبض عليهم والى بيبادروا والى بيتحركوا والى بيحركوا النخبة كمان .. وبعض النخبة كانت بتبلغ عنهم وكبار الصحفيين بتمص دمهم وشغلهم وشقاهم وتعبهم ومعروفين بالأسم وموجودين فى الويظطة دي صحاب الوشوش المحروقة المزيفة

والنخبة هي الى بتكتب فى الجرايد وتطلع فى التليفزيون وتبلغ عليهم الأمن وبتنظر عليهم

أنا بقولها بكل صراحة وكل وضوح

لو سمحتم انزلوا معانا

انزلوا احمونا

نفسنا نشوفكم من غير ميكروفون ولا كاميرا

ببتتحركوا معانا ووسطينا

جميل انكم تكتبوا البيان التأسيسي والأهداف والرؤى والخطط .. لكن حتي كمان الآليات بخلتم بيها علينا .. لا عيب .. عيب وحرام والله

لو عاوزين تعملوا لجان .. علشان انا عارف انكم بتحبوا اللجان زي عنيكم .. اعملوا وترأسوا اللجان دي كمان يالا ..
اللجان حلوة فى حد ذاتها بس لما تُفعل آليات عملها .. وتبقوا انتم كمان ضمن تروسها .. مش تبقوا الايد الى بدوس علي زر التشغيل ونبقي احنا وقودها

وأهم لجنتين .. أو الى اللجنتين الى هايشتغلوا

اللجنة حقوقية وتبقي مليانة محامين ويبقوا شغالين بجد

ولجنة إعلامية وطبعا تبقي مليانة إعلاميين مش محتاجة زكاوة... يغطوا تحركات الشباب والمحامين مش يغطوا

تحركات النخبة

علشان الشباب لما يتكلم مع الناس ويقنعهم وينزل بيهم للشهر العقاري ويطلع موظف غلبان ومديره الجبان ومايرضوش يوثقوا عريضة المطالب ، المحامين يشتغلوا ويعملوا اثبات حالة ويلبطوا ويظيطوا والإعلاميين تصور

واحنا نظيط والإعلاميين تصور واحنا نظيط

لأن الحكومة مابتخافش غير من الجرصة والفضيحة

والموظفين مابيخافوش غير من الى بيفهم فى القانون

وبكده الناس تتشجع اكتر واكتر واكتر وتحس بالامان ونقلل المخاطر ويبقي شغل بجد وفى النور وقدام الناس

ولأن لازم بأه النخبة الى بيقولوا عليها دي تنزل باه معانا الشارع وتبقها زيها زينا
لانها بتعرف تكلم واحنا بنعرف نكلم هي بتعرف تكتب واحنا بنعرف نكتب هي بتعرف نفكر واحنا بنعرف نفكر

وكمان الناس لما تشوف النخبة الى بتطلع فى التليفزيون وتقعد ترغي وتكلم فى الدستور وغيره ومش عاجبها النظام تبقي قدامهم وجنبهم ووراهم

كده الناس تثق فيهم وتمشوا وراهم

لان الى مخلي الناس مش ببتتحرك هي عدم ثقتهم فى النخبة دي

وبعد كده تيجي باه نقطة "تشكيل لجان شعبية فى القرى والأحياء والنجوع تتولى طبع المطالب وتوزيعها ثم إعادة جمعها "بعد توقيعها
وبلاش حركات قفل الموبايل والحركات دي

وارموا بياضكم وورونا أمارة

فضفضة

2010-02-25T03:04:00.000-08:00

بحب محمد جمعة قوي

ممكن يكون بحبه اكتر من بنتي

هو ده الى كان نفسي يبقي أخويا

واد طيب وجدع ورجولة كده

غير انه مش خبيث خالص

الواد ده صعب قوي يتلوث بأي حاجة حتي بشرب الشيشة ، وحتي والمبسم فى ايده برده وشه بريئ جدا

فاعمل مهما تعمل يا جمعة برده مش هاتكون وحش

بتبسط قوي لما مفيد يكلمني فى البيت ويقولهم ممكن اكلم منذر

بحب الاسم ده قوي بيفكرني بحاجات جميلة عملتها

و بحاجات أكتر ممكن أعملها ورا الاسم ده

كان نفسي أنزل الهجانة

وأنزل اعتصام عمال طنطا للكتان

وأسافر العريش أصور السيول واتكلم مع الناس هناك

كان نفسي أبقي فى استقبال البرادعي و نفسي أكون فى الحملة بتاعته

نفسي أعمل حملة لتنظيف الشوارع والارتقاء بأخلاقيات الشارع وزيادة الوعي المروري فى القاهرة .. أي خدعة

نفسي أعمل حاجة لأطفال وبنات الشوارع .. ده حلم عمري بجد

نفسي أعمل خلية إرهابية لإرهاب ظباط الشرطة، كل منطقة وليها قسم ، نعمل تحريات ونعرف أسماء ظباط الشرطة مين فيهم الكويس ومين الوحش
والوحش نلبه نخطفه ونديله علقة سخنة ممكن يرتجع عن أفعاله ولا حاجة أو حتي لو مارتجعش يبقي أخدنا بطارنا

نفسي كل ما أشوف حاجة غلط أتكلم، لاني كل ما بسكت كل ما بحس بالضعف والشراسة والغل فى نفس الوقت

نفسي أجيب ولد وأسميه منذر وولد تاني وأسميه فاروق

نفسي أشتري حته أرض وأزرعها فاكهة وخضار ويبقي عندي بهايم و أقضيها زراعة واعمل شجرة ياسمين واقعد

تحتيها وجنبيا امي وعيالي ناكل فطير بسكر مع كوباية الشاي المتين وانشاالله الدنيا تولع بعد كده مش مهم

مش عارف معنديش طموح لأي حاجة .. ومانفسيش فى أي حاجة .. ومش معقول أكون حققت كل حاجة

قبل ماتجوز كنت بقول لنفسي: لما أتجوز مش هاسيب فرض

امي بتقولي اني محسود ههههههههههه

ومراتي بحس ان نفسها تقولي: انت مش أول واحد أبوه يموت

صحيح امال لو كان مات وأنا صغير شوية كنت عملت ايه

قبل ما يموت بحوالي خمس سنين

كنت بصحي كل يوم الصبح وأقول ياتري أبويا عايش ولا هادخل عليه الأودة ألاقيه مات

عاش طول عمره يقولي انه مش هايعيش كتير وانه هايموت قريب
عاااااااااااااااااااااااااااااااا

هههههههههه بقيت جبلة .. مش عارف ممكن يحصلي ايه تاني حلو أو وحش

والله ربنا كارمني آخر كرم وأنا في خير ونعمل ماحدش فيها

وبرده متالم لفراق أبويا ومحتاج لربنا بس مش عارف ليه مش راضي أروحله

مش عارف مالي .. ايه معقولة تكون دي خاتمتي

ادعولي بأه

هو فيه ايه يا عم الحاج؟

2009-12-27T05:52:00.000-08:00

مين الضحية مصر ولا الجزائر؟

مين هايرشح نفسه فى انتخابات الرئاسة حسني ولا ابنه ولا ابنه التاني ولا البرادعي ولا عمرو موسي ولا أيمن نور؟

مممكن ماتش كورة يعمل كده؟

ينفع تشتغل الأغنية دي فى ماتش كورة ..أصله ماعداش علي مصر .. أصله ماعداش علي مصر .

هل ينفع بلد يقتحم حدود بلد تاني؟

طب هل ينفع البلد التاني تبني جدار فولازي تحت الأرض ؟

طب هل ينفع البلد الأولاني يحفر أنفاق للبلد التاني؟

طب هل ينفع البلد التاني تشارك فى حاصر البلد الأولاني؟

بتحب مصر؟

بتحب العرب؟

بتحب السعودية؟

بتحب أمريكا؟

بتحب إسرائيل؟

بتحب الجزائر؟

لو بتكره هاتكره الجزائر أكتر من إسرائيل ولا إسرائيل أكتر من الجزائر؟

ينفع حد يكره إسرائيل ويكره الجزائر ويكره أمريكا؟

عباس ولا حماس؟

هل حماس غلطانة؟

المفروض حماس تعمل ايه؟

لو ظابط لسعك علي قفاك تقدر تعمله ايه؟

لو هاتنزل مظاهرة تنزل ضد الجزائر ولا ضد إسرائيل؟

لو اضربت واتف عليك وحد زعقلك بالفرنساوي وخفت وواحد هوشك بسكينه من بعييييييد وقلعت فانلة بدلك وعلمك خوفا منه؛ ممكن تحكي ده من غير ما تتكسف وانت راجل البعيد طويل عريض وشحط قد الحيطة ..؟

طب ممكن تنزل مظاهرة علشان ماتش كورة؟

تعرف ايه عن علاء مبارك؟

ليه التبس علينا الخيط الأبيض من الخيط الأسود للدرجة دى؟

ليه احنا مشوهين للدرجة الدي؟

ليه مش عارفين مصير بلدنا رايح لفين؟

بتحب جمال مبارك ؟ وليه؟

بتكره جمال مبارك ؟ وليه؟

لو اترشح جمال مبارك وكسب جمال مبارك ممكن تعمل ايه؟

ليه بيتكلم شوبير ومصطفي عبده ومدحت شلبي والغندور ورجب حميدة؟

ليه عارفين يضحكوا علينا بالطريقة دي؟

علي فكرة شكلنا هانفضل كده مدة طويلة

ايه الى ممكن يحصل يفوقنا؟

والى معتمد إن إسرائيل وأمريكا من تحاربنا يبقي غلطان لأن إسرائيل وأمريكا مش هاتحربنا... لأنهم محققين مكاسب أكبر بكتير من حربهم لينا وعلشان هما عارفين لو حاربونا هايفوقونا.

صحيح إسرائيل ايه وأمريكا ايه .. قصدي حماس والجزائر ؟

تييييييييييييييييييييييييييييييت

بأه كل ده علشان الأوبرا .. الله يرحمه

2009-08-12T12:34:00.000-07:00

أنا ضعيف جدا أمام الرغبات الانسانية، وللأسف عندي قدرة هائلة لإعطاء أي مبرر لأي حد، يعني ممكن ادي مبرر لشارون أو بوش، علشان انا لا أؤمن بالشر المطلق، وأؤمن ان الإنسان لا يولد شريراً، وأؤمن او مش راضي أصدق ان فيه واحد ممكن ينزل من بيته علشان يعذب فى خلق الله زي كلاب الشرطة مثلا

الكلام ده يصح فى حالات اسثنائية ضيقة .. يعني ممكن نتفهم مبررات الناصريين عن الفترة الناصرية الى امتلئت بيها السجون والمعتقلات بالمعذبين

بس فى النهاية ده بيبقي فى نطاق الأشخاص الى بيبقي عليهم مسئولية ضخمة، وفى فترة زمنية محددة محاطة بالمخاطر والتهديدات

زي الشباب الى بيهاجر وبيموت غرقان علي سواحل الموت، بنفهم ليه بيعمل كده، فيه شيئ أقوي واكبر وأهم من الموت بيحركه، هو كبير عنده ممكن يكون مش كبير عندنا أو مش مهم عندنا بس ده مايفرقش معاه

لكن مع البشر العاديين ، لازم نبقي حموليين شوية علي رأي امي، صبوريين شويتين، مش أنانيين، مش طماعين، زي ما بنشوف حقوقنا لازم نشوف حقوق الآخرين، زي ما بنشوف رغباتنا لازم نشوف رغبات الآخرين وهكذا

هاحكي عن تجربتي لما سافرت العمرة، ودي كانت اول مرة ليا خارج القطر المصري كله، وأول مرة أروح السعودية، وبصراحة من الى كنت بسمعه عنها كرهت السعودية وخوفت من أهلها قبل ما أروحلها، ومن الى بشوفه من اهلها لما بقابلهم فى شغلي خلوني اكرهم أكتر، إلا من رحم ربي

المهم أول ما نزلت مطار جدة حسيت بالاهانة لما سحبوا مننا جوازات السفر فى انتظار تسليماها للكفيل

بجد اهانة ... حسيت اني تحت رحمة من لا يرحم، اني مش بني آدم، ان ماليش أي حقوق، واني فى انتظار ما سيفعله بي الكفيل او ما ستعطيه لنا الحكومة السعودية، فى انتظار المجهول .. نفس احساس الطفل التائه بالظبط .. ودي كانت أول غُصة

نزلت علي المدينة وطول الوقت حاسس بغربة، إلا فى مكانين المسجد الحرام والمسجد النبوي، دول المكانين الى استريحت فيهم ، حتي تصرفات السعوديين داخل الحرم مقززة، السعودي بيدفعك دفع، قرفان منك .. زهقان منك .. حاسس انك واخد مكانه .. انه المفروض يصلي فى المكان الى انت بتصلي فيه بالذات، مافيش لا ذوق ولا مجاملات ولا ابتسامات، معندهمش من فضلك ولا لو سمحت ولا حضرتك ولا بعد اذنك ولا ممكن ولا شكرا ولا جزاكم الله خيرا ولا أي حاجة

عمري ما روحت أي مسجد فى مصر وفردت رجلي، هناك بيفردوا رجهليم فى وش بعض عادي جدا

واحد كان معاه سبح بيوزعها فى المسجد الحرام، بيوزع بطريقة غير آدمية بالمرة، بيرمي ويحدف ويشوط بيوزع بمنتهي الكبر

كنت راكب مع سواق تاكسي واحد قدامه راح داخل يمين من غير اشارة راح قال بمنتهي القرف والكبر ما هو مش سعودي ، قلتله يعني وانت عرفت منين، يعني لو سعودي ماكانش عمل كده وايه الفرق يعني ودخلت شمال، قالي يا حاجي قصدي بدوي، مابقتش عارف أرد عليه أقوله ايه بصيتله من فوق لتحت وقلتله بس بس ماتغلطش أكتر من كده

ماكنتش بلاقي راحتي غير فى الحرمين بس، غير كده كنت حاسس بغربة لا محدودة، وخايف من الناس، لأني مش معايا أي حاجة تثبت اني أي حاجة

فى آخر صلاة فجر ليا فى المسجد الحرام، قابلت مصري وانا بملا جيركن زمزم قالي انت من حلمية الزيتون .. قلتله آه .. قالي أصلي لما كنت بروح لعمي كنت بشوفك هناك .. جه معاد الإقامة، قلتله بتشتغل هنا قالي آه قلتله منين قالي من حلوان قلتله بقالك كتير هنا قال ستين يوم وعنينا دمعت مع بعض .. قلتله يا عم ما تفكك م البلد دي وترجع .. قالي لما احجج امي الأول واستأذن علشان شغله وسلمنا علي بعض ومشي
ماعندهمش غير الحرمين يكفيهم ويكفينا للكن من غير الحرمين ماعندهمش حاجة

حتي البيوت مافيهاش بلكونات .. ازاي عايشين من غير بلكونات .. بلدهم وهما حريين فيها .. بس مافيش قهاوي ولا نوادي ولا وسط البلد ولا طلعت حرب ولا جاد ولا فلفلة ولا تريموف وسفير والمهندسين والهرم والحلمية وعين شمس والقصر العيني ولا مترو ولا اوتوبيسات ولا ميكروباصات ولا ألف مسكن وعباس العقاد ومكرم عبيد ولا العتبة والموسكي والحسين والنيل والمنيل ولا شمسنا ولا أرضنا ولا جونا

علشان كده هبة نجيب صعبانة عليا .. بس أبوها صعبان عليا أكتر

آه يا بلد مالكيش حبيب

2009-08-09T08:31:00.000-07:00

كنت قررت اني ماكتبش خواطر تاني، علشان بصراحة أنا اتعقدت من مهني والبوهي بيكتبوا شعر جاامد جدااااااااااااا، فعلشان نتفق من الأول أهو .. دي خواطر ولا يمكن أن تخضع لأي قواعد أدبية أو علمية او نحوية أو حبشتكانية حتي

ببساطة كان نفسي أبقي شاعر، وأعرف أعبر عن الى جوايا بجمل منسقة منظمة موسيقية، أصل أنا بحب الشعر جدا وخصوصا الزجل الى مليان موسيقي والى بيتغني لوحده زي بتاع الفاجومي

وبكره الشعر العامي الحر الى مافيهوش أي نوع من انواع الموسيقي

يعني الناهية دي أمزجة، بس أنا حمص .. ده مش شعر ده دقن J)، واعتراف أنا لا أملك أي موهبة فى هذا المجال، وزي ما عمري ماهكون رسام زي ما كنت بحلم عمري ما هاكون شاعر، بحب الرسم جدا لكن أنا أصلا مش بعرف أمسك القلم وخطي سيئ جداااا، الحمد لله ان فيه كيبورد لاما كنا اترفدنا من زمان

وعلي فكرة بتخنق جدا كل ما بقرا الخواطر القديمة الى كتبتها ، أنا بعتذر عن الهذيان الي أنا كتبته زمان ده بصراحة

وكنت كمان هابطل أكتب فى المدونة خالص علشان اتعقدت من ناس جامدة جدا بتكتب زي شقير والقاضي وعبد الغفار ومحمد شلبي ومفيد طبعا وأحمد سمير وشمس الدين ومحمود وعمرعزت ورامز وأسامة وميض هما مايعرفونيش ومش بعلق عندهم تقريبا لكن بتابع مدوناتهم باستمرار عقدوني وكنت هابطل والله، بس قلت أكتب بالعامية كده، لقيت ناس جامدة آخر حاجة ـ حلوة آخر حاجة دي ـ علي رأسهم نوارة وبنت خيخة الأخيرة دي بتهلكني من الضحك وسكوت هانصوت، لقيت نفسي مش باضيف حاجة غير لنفسي

فقلت أعمل زي جمعة وانا ماشي علي خطي جمعة الى نفسي أقوله هاقوله فى مدونتي حد ليه شوق فى حاجة .. والى ليه شوق فى حاجة يقابلني فى التعليقات

دايما ببدأ كلامي بسؤال

والكل بيفتي بالإجابة

ناس شايلة م الهموم جبال

وده بيسأل عن الجنابة

ما الكل فينا بأه عنده حال

وماحدش سائل عن الغلابة

بس أنا سالت عن البلد
بعد ما مت من ألف عام
بس زعلت من الى كان
أصل اتشوه المكان
والبشر والذكريات
والحاجات والمحتاجات
والقهر والخرس والسكات
فيه ايه يا ناس .. في ايه حصل
اغتصبوا بنت من البنات
قدام كل أصنام البشر
اغتصبوا وطن
وسط أنين الطين

والخضرة والشجر
ملعون أبوا ده بشر
ملعون أبو ده بلد
قلت ده يبقي أنهى بلد
قالوا دى البلد الى مالهاش حبيب

وحد قال ده بلد ملعون

ابن كلب كئيب
قلت يا ناس ده حتي يبقي عيب

انسي

احنا فى الزمن العجيب

زمن عبارة قطر الصعيد

والدم الملوث والحب المسرطن

والحديد

والحاكم ابن الحاكم

الى فى القصر قعيد

فقد ما فقد ولسه عمره مديد

واعتبر وما اعتبر

ولا اعتبر

ان فيه شعب أو وطن

من خيره مستفيد

آه يا بلد مالكيش حبيب

البلد دي ماحدش بيحبها

2009-08-02T10:43:00.000-07:00

صحيت من نومي وركبت المترو وأنا بفكر فى بني آدم واحد بس، اسمه حسين سالم، قريت عنه شوية وسمعت عنه كتير، جبت المصري اليوم و قريت مقال بلال فضل، وعليها والحقد الطبقي نقح عليا اكتر علشان كان بيتكلم عن أحمد عز، روحت علي صفحة مساحة رأي فى المصري اليوم لقيت مقال د. حسن نافعة عن قضية سياج والمليارات الضخمة الى الدولة ممكن تدفعها من فلوسنا يا مواكيس وذكر حسين سالم تاني، بس و الدم راح غلي فى نافوخي أكتر لما قريت انهم باعوا 650 ألف متر فى طابا بجنيه ونص أو دولار ونص ، وافتكرت حلقة الطبعة الأولي بتاعة امبارح لما اتكلم عن الوليد ابن طلال لما أخد 100 ألف فدان فى توشكي بسعر بخس جدا وبدون وضع أي جدول زمني للزراعة، وبشروط مجحفة علي الجانب الحكومي.

حسيت ان حد ضاحك عليا، حسيت ان حد ضاربني علي قفايا، حسيت ان حد هزقني قوي فى نص الشارع، وبيقولي لو راجل وابن راجل تعمل حاجة، لو كنت دكر تعمل حاجة، حسيت ان مراتي وبنتي بيتفرجوا عليا وانا بتهزق وبتشتم وباخد بالجزمة القديمة علي دماغي ، حسيت انه مش خايف مني أو مش خايف من رد فعلي ، وبيقولي اشرب من البحر اخبط راسك فى الحيط، لو تعرف تعمل حاجة وريني نفسك ، لاقيت نفسي فى تحدي حقيقي، فى امتحان للرجولة والشجاعة.

ازاي مش خايفين مننا وهما بيبيعوا طابا، ازاي مش مكسوفين وهما بيدوا للوليد ابن طلال 100 ألف فدان، وماضيين علي عقد بيلزمهم انهم يمدوله كل المرافق والخدمات، وبيعفيه من استخدام العمالة المصرية

مين ابن الكلاب الى قبل علينا كده ووافق علي كده

أصلي روحت مدينة الشروق أشوف أرض مع واحد صاحبي، حسيت بعدها ان الواحد قليل قوي، بتاخد حتت أرض 200 متر حد أقصي وبتبتني علي 75% منها وتسورها قبل تاريخ معين وترمي الأساس قبل تاريخ معين وتطلع بالدور الأول قبل تاريخ معين، وعيش حياتك مع الماية والصرف والكهرباء والغاز، وأمن حديدك وأسمنتك بمعرفتك، كل أرض فيها غفير ومعاه سلاح

ولاد ميتين الكلب

واحنا ساكتين

بعدين تخيلت نفسي بقتل حسين سالم ورفاقه

بعديها علطول تخيلت امي ومراتي وبنتي ممكن يحصلهم ايه

تخيلت حاجة أقل من كده بكتير، اني ضعيف لدرجة اني ماستحملش قرصة ودن ممكن تقصيني عن شغلي

او بياته فى حجز او حتي ترحيلة فى بوكس

أنا ضمن القطيع. يا مقطوع منك له

يا بلد مالكيش حبيب

خواطر من ضربة شمس

2009-07-27T10:46:00.000-07:00

ما بين طرفة عين وانتفاضتها يغير الله من حال إلي حال

شوفوا

صدام حسين

هشام طلعت مصطفي

من منا يأمن مكر الله

ويا وراث مين يورثك

اوعي تقول خلاص ضحكت لانك أول ما هاتقولها هاتشوف هايحصلك ايه

هو احنا عايشين ليه

هايحصل ايه لما نموت

يا تري الراجل المتشرد المجنون الى شفته النهاردة قصة حياته ايه

مش ممكن يكون كان راجل محترم ومر بموقف صعب ولا حاجة

طب يا تري الناس الى فى دور المسنين وهما فى عمري كده كانوا يتخيلوا انهم يحصلهم كده

هو أنا ممكن يحصلي كده

يا تري مستخبي ايه

طب هو ليه قالوا لو علمتم الغيب لاخترتم الواقع

طب هو ليه ربنا حرم الانتحار .. اكيد نفسك تعرف الاجابة يا جمعة

هو احنا هانورد علي جنة بمناظرنا دي

طب هو ليه ربنا بيرزقنا بالرغم من اننا بنعصاه ... يبقي بيحبنا .. طب بنعمل معاه كده ليه

هو احنا هانعيش فى القبر ازاي .. أو يعني الوقت هايمر علينا ازاي

طب هي ايه سكرات الموت

خايف احب بنتي

أصل أبويا كان بيحبني قوي .. وأنا ماكنتش مقدر حبه وخوفه عليا كده

وانا بقيت أخاف علي نفسي، أصلي بقيت بحب بنتي زيادة عن اللزوم وبقيت أخاف عليها لاتنخبط ولا تقع مني وانا بلاعبها

ماكنتش بخاف كده علي عيال اخواتي

مش متخيل اليوم الى ممكن بنتي فيه تعدي الشارع أو تروح المدرسة لوحديها. . أو المُدرسة تضربها ولا تزعل مع زميلتها

لغاية لما اتجوزت كان أبويا بيقلق عليا . وأنا ماكنتش متخيل ان فيه أب ممكن يقلق علي راجل بيشتغل من بدري ومتجوز وقرب يخلف، وكان بيتخانق معايه علشان قافل الموبايل ومش عارف يطمن عليا

كنت بستغربه قوي

قد ايه وحش الحساس ده احساس انك مش مقدر حب الآخرين ليك ولا مقدر قلقهم.. أصل معناه كده انك مش بتحبهم قد ما هما بيحبوك

طلعت أنا الغبي

دلوقتي والله لو نمت ع البورش ماحدش هايسأل عني ولا يعبرني بالجزمة القديمة

شفت ناس كتير كانوا أغنيا جدا وأقويا جدا وف لحظة وثانية وقعوا ومافيش فى جيوبهم حق المواصلات

والى بيموت وهو فى عز شبابه

وعاوز بعد كده حد يفكر فى حسني مبارك

كل واحد فيه الى مكفيه

ماحدش هايعمل حاجة غير اتنين مش هاقول عليهم خليهم فى البوست الى جاي

قال يعني

أديني ماطولتش يا مفيد :))

الإخلاص

2009-07-15T13:21:00.000-07:00

الإخلاص

هي كلمة السر، ومفتاح الحل لجميع مشاكلنا، فإذا اختفي الإخلاص من العمل يختفي منه السداد والتوفيق، ويشوه كامل العمل .

يعمم ذلك علي الأعمال كلها، حقيرها وعزيزها، أهونها وأخطرها ، وكم من الأعمال هين وهو عند الله عظيم .

فالموظف إذا أخلص عمله لله وحده بعد ما ارتضاه لنفسه عملا، فعليه أن يؤديه كما يُرضي الله تعالي دون النظر إلي المقابل المادي أو المعنوي الذي يتلقاه من رب عمله ، أو ممن يقدم لهم خدماته، اما وانك وقد شعرت بان عملك هذا لا يلبي لك طموحاتك، وأصبحت تؤدي عملك فقط تحت رقابة من رؤسائك فإذا ذهبت الرقابة ذهب العمل، أو قلت " علي قد فلوسهم " أو أديت عملك مقابل رشوة أو هدية أو مقابل مصلحة أو مجاملة لعزيز أو خوف من قوي ذو نفوذ، ولم تؤد عملك لفقير أو غلبان او مسكين، فهنا وهنا فقط نري حال مثل حالنا، ونري حياة مثل تلك التي نحياها فى بلدنا الكئيب.

يستوي هذا كما قلت علي كافة الأعمال

ما بالنا بالدعاة والمصلحين والناشطين والسياسيين والمثقفين والإعلاميين والصحفيين والمهتمين بالاعمال الخيرية ورجال النخبة والحكم " والمناضلين"

ولنا مع المناضلون وقفة، فالنضال الآن أصبح مجانا، بمدونة وجروب علي الفيس بوك وبكام صورة مأخوذة من مظاهرة علي سلم نقابة الصحفيين، أقصاها لفة فى البوكس ورمية فى طريق القطامية أو القاهرة الجديدة، وتنهال اللقاءات الصحفية مع المراسلين الأجانب ومراسلين برامج التوك شو المختلفة، تواكبها حملة دعائية علي الإنترنت، نصبح بعدها أصحاب كلمة ودعاه لإضرابات واعتصامات، ووقود للوكالات الأجنبية المشبوهة التى تقدم العروض للسفر والتدريب فى الخارج.

لا أدري فى أي مرحلة من هذه وجد الإخلاص وأي مرحلة اختفي منها، ولن أسمح لنفسي أن أفتش فى نوايا العباد، او أن أنصب نفسي قاضيا أو حاكما علي غيري.

ولكن وإن كنت معارضا لحسني مبارك وعائلته وحاشيته، فلن أجعل من ذلك مبررا لأساق من أناس يتسابقون إلي الفتنة سبقا، أو يتمنون لأنفسهم شهرة أو مالا أو جاها من نضالهم، أو ينظرون بحسد للمفتونين ويتمنون أن يكونوا مثلهم، وينتهزون الفرص ليكونوا مكانهم.

لن أسمح لنفسي أن أكون تحت عباءة مناضل لا عمل له سوي النضال، أو حتي اكتسب عمله من النضال.

أما من ينتظرون ويتمنون التمويل، ويتمنون مراسلة وكالات الصحافة المشبوهة للتدريب أو أي كان مسماها، فهؤلاء ليسوا مناضلين مثلهم مثل مبارك وآله وصحبه، اخشي منهم علي مصر أكثر من خشيتي علي مصر من مبارك وآله وصحبه.

إذا أردتم مساعدة الناس فساعدوا أنفسكم أولا، ابحثوا لأنفسكم عن عمل شريف يكفيكم سؤال الوكالات الأجنبية ، وتكفونا شر النزول فى إضرابات قد تقصينا من أشغالنا، حتي تظهروا فى نهاية اليوم باسم المنسق العام لحركة كذا وأمين عام جماعة كذا وأدمين فى جروب كذا، تلقون البيانات وتجرون اللقاءات، ونحن الذين نتعرض للخطر الحقيقي، ونتعرض للزيف المؤكد، ونخدع بالشعارات البراقة الكاذبة.

أيها "المناضلون" الصغار، أريحونا وانضموا للحزب الوطني حتي لا نحارب علي جبهتين.

أما أنا فسأفعل كما نصح رسول الله ( صلي الله عليه وسلم) و قال فى حديثه الشريف عندما سأل عن كيفية التصرف فى زمن الفتن، فقال الزم دارك وأغلق عليك بابك، فسالزم داري ولن أذهب إلي البورصة إلا إذا اشتقت للذكريات الجميلة التى جمعتني بصحبة الخير والبركة صحبة أبناء مصر والمدونين المحترمين الذين أحسبهم علي خير.

فتكفيني مدونتي ، انتظارا إلي النزول مع الجماهير الحقيقية حينما تري هي حتمية النزول، فاتمني أن اكون من السابقون الأولون

* لقد آثرت استخدام كلمة مفتونين، فلم أستطع كتابة الكلمة المناسبة فى هكذا حالات

فما قرأته فى أبناء مصر يشعرني بخوف حقيقي

يا رب

2009-05-15T13:10:00.000-07:00

سبحان الله

الإنسان ده عجيب قوي .. وعايش حياة عجيبة قوي

أنا خايف قوي

ومش عارف أعبر عن الى أنا فيه

عارف ان المؤمن مش بيخاف من لقاء ربنا لان عمله صالح وان المؤمن مش بيخاف من الموت علشان متشوق للجنة

حاسس اني هاخش النار

وأنا بعمل ايه يدخلني الجنة .. وهل أنا استحق رحمة ربنا أصلا

الصلاة فرضا لو كنت مواظب عليها فمش فى المسجد .. فمش فى وقتها ومش بديها كمان وقتها وبسرح وبفكر فى حاجات هبلة

الذكر ممكن أذكر ربنا وتعدي واحدة وأبص عليها وانا بذكر ربنا تخيلوا

غير الفرجة علي التليفزيون غير الغيبة غير النميمة غير انى أكيد مش بار بامي

ده صحابي شال امه المريضة وعمل بيها عمرة ودار حولين الكعبة والصفا والمروة ولما سأل هل بكده أكون اديت امي حقها قالوله لأ ... أنا فين من ده

أنا فين من الصدقة وأعمال الخير والبر والمشي فى حوائج الناس .. خلي الشغل ينفعني بأه يوم ما أقابل ربنا .. خلي مراتي وبنتي وامي ينفعوني لما ربنا يقولي ليه ما أنفقت فى سبيل الله

حتي الشغل بيتحكم فيه الأهواء والانطباعات الشخصية

الطالب ده بيتنك ياخد علي دماغه الطالب ده بيتذلل يبقي نتشفي فيه .. لازم يقدم فروض الطاعة والولاء

كنت فاكر انه لما يموت القيامة هاتقوم .. عقارب الساعة هاتقف هايحصل حاجة عظيمة

علي أقله مش هاكل مش هاشرب مش هاجوع أصلا مش هاشتهي حاجة

أول يوم ما أكلتش تاني يوم أكلت من غير مخلل ولا فراخ تالت يوم ماردتش أخد حاجة مسكرة

دلوقتي باكل وبشرب وبشتري الأكل الى بحبه وباكل حاجات مسكرة

كنت فاكر اني هافضل أبكي طول العمر بس خلاص بقيت أمسك نفسي .. لا وكمان ابتسمت وضحكت

كنت فاكر انى هانزل معاه القبر ولا علي الأقل هابات هناك .. شوية والشمس أكلت دماغنا وأصدقائنا تعبوا بعدين أهلنا تعبوا بعدين أحبائنا تعبوا بعدين احنا كمان تعبنا

كنت فاكر انه مش هايموت

أستغفر الله العظيم عمري ما شفته فى موقف ضعف .. كنت حاسه أقوي من أي حاجة

يوم ما مرض كان يوم موته

كان بيطلع من المنظار علي المطبعة

70 سنة شغل متواصل

70 سنة عطاء

ادا كل الناس وماحدش اداله حاجة

كل الناس اعتمدت عليه وعمره ما اعتمد علي حد يعمله حاجة

صبرت نفسي انى عمري ما هاعمل حاجة غلط

أنا فعلا بقيت بتقي ربنا أكتر من الأول وبقيت بخاف من ربنا أكتر من الأول بس برده بغلط

بغتاب بنم بزعق بتعصب ببخل مش بقدر دايما علي غض البصر

بعمل الغلط وأنا عارف اني هاتحاسب عليه وان ربنا شاهد عليه وان ربنا شايفني

هاقف قدام ربنا ازاي

معقولة عايشين الحياة القاسية دي قوي

اختبار ربنا صعب قوي

ادانا العقل وعرض علينا الأمانة وقبلنا بيها وقبلناها بظلم وجهل وغرور وكبر .. عرض علينا الفتن النساء والأموال والأبناء والأحباء .. حرم علينا قتل أنفسنا .. حرم علينا اننا نقطع ورقة الامتحان .. لو قطعت ورقة الامتحان يبقي هاتطرد من المدرسة يبقي مش هاتتعلم يبقي هاتطرد من رحمة ربنا و للأبد
آخر سورة الكهف فيها آية مرعبة ما معناها .. ان فيه ناس سعيها هايضل فى الحياة الدنيا وهم يحسبون أنهم يحسنون صنعا وهما دول الأخسرين أعمالا

يا نهار أبيض ايه الرعب ده

وخلقنا الإنسان فى كبد

يوم يفر المرء من أخيه وامه وأبيه وصاحبته وبنيه .. ممكن يحصل ده

هاتمر بينا سكرات الموت .. وسؤال القبر وينكشف عننا الحجاب .. وضمة القبر والسؤال

العيلة كلها كانت حوالين أبويا والدكاترة والممرضين وماحدش قدر يخفف عنه حاجة

دلوقتي أنا حاسس بأبويا

حاسس انه كان نفسه يقولي انه شايف مكانه من الجنة انشاء الله

حاسس انه كان نفسي يوصيني ويقولي انه بيمر دلوقتي بسكرات الموت وانى لازم أعمل صالحا علشان يخفف عليا

والله حاسس انه كان نفسه يقولي كده

كان نفسي أعيش معاه أكتر من كده

أصله خلفني وهو عنده 45 سنة

خلفني وهو كبير

كان بيحبني قوي

كان بيخاف عليا قوي

كان بيسأل عليا علطول

كان بيديني فلوس علشان أتفسح

والله كان بيقولي أنا عاوزك تخرج وتتفسح مع صحابك وتصرف

كان يقولي نفسي أشوفك تلبس وتقلع وتحلق دقنك وتحط برفان .. نفسي لما تنزل من البيت يقولي محمد خرج

لمع الجزمة

كان بيلمعلي الجزمة

كان بيبعد هدومي للمكوجي

يوم سبوع جمال ابن داليا قبل ما يموت العيلة كلها كانت موجودة وكلهم كانوا بياكلوا وداليا واقفة علي الحوض

زعقلهم كلهم واتخانق مع ماما وقالهم بأه عمالين بتاكلو وسايبين البنت الوالدة هي الى واقفة وانتم عمالين بتاكلوا

أنا أبويا مات مرتين

لا اكتر من كده بكتير

طول عمره وهو يقولي انه هايموت

من وانا صغير وهو يقولي انها خلفني علي كبر وانه لما هايتم خمسة وخمسين سنة هايموت زي أبوه

أصل ابوه مات صغير وامه ماتت صغيرة فكان حاسس انه هايموت صغير برده

عرفت انه هايموت قبل خمس شهور من الوفاة

كنت أنا الى سبت رقم تليفوني فى المستشفي

اتحمل كتير قوي

من مات مبطونا فهو شهيد .. يارب يكون شهيد

الدنيا مالهاش طعم

كنت بجري جري علشان أحكيله ايه الى حصل فى الشغل ومين سلم عليه ومين قابلني وكان يعرفه

مش قادر أنساه

أصلي لابس جلبيته
نايم علي سريره
لابس دبلته
راكب عربيته
فى نفس مكان شغله

بقابل صحابه وزمايله يوميا

بصلي فى نفس المسجد الى كان بيصلي فيه
بمشي فى نفس الطريق الى كان بيمشي فيه

بس بمشي فيه لوحدي
لما كنت بتاخر فى الشغل كان بيتصل بيا وماكنتش برد يقوم يتصل بيا يرد عم سيد يقولي حرام عليك رد علي أبوك

مرة بعد الوفاة عملها عم سيد وقالي تليفون علشان يا أستاذ محمد قلتلها بابا قعدنا انا وهو نعيط

نفسي أروحله بأه

ده احنا هانشوف أيام سودا

2009-04-07T23:16:00.000-07:00

ليه فشل الإضراب بتاع السنة دي

طب بتاع السنة الى فاتت هل نجح؟
لا مانجحش .. هو نجح فى المحلة لكن فى القاهرة وبقيت مصر كلها ماكانش فيه إضراب أصلا

طب ازاي نجح فى المحلة الى هما عمال وماعندهمش نخب سياسية وقيادات حزبية و لاعندهم نقابة الصحفيين ولا نقابة المحامين ولا مجلس الدولة .. نجح ليه هناك وفشل فى القاهرة؟ الى هي فيها كل الحاجات الى فاتت دي

يبقي الى بيخلي أي إضراب ينجح هما الناس الحقيقيين الى تعبانيين ..مش النخبة ولا رموز المعارضة ولا قيادات الاحزاب
الناشطين أخوهم هايحركوا كوادر تعرف تهتف.. تعرف تصور ... تعرف تكلم ... ممكن يكونوا دروع بشرية .. يقفوا فى الصفوف الأولي علشان يكون شكلهم حلو .. ولما يتسجن الناس الغلابة يبقي فى وسطهم كوادر فاهمة تقدر ترد علي زبالين الشرطة .. لكن الحشو الأساسي هما الناس .. وقود الإضراب هم الناس الى بجد.
طب ليه الناس مش بتتحرك؟
ممكن يكون ماعندهمش مشاكل تخليهم يتحركوا .. ماتخلنيش أقولك كلمة وحشة L

جايز ولو كده يبقي لامؤاخذة كل واحد يحط صرمة قديمة ومايفتحش خاشمه بكلمة

لكن الى يغيظ ان كل الناس مطحونين وقرفانين وزهقانين ومخنوقين وتعبانين وشقيانين وجوعانين ومتبهدلين وقرفانين تاني بس مش بيعملوا حاجة
الغريبة ان اليوم ده أطلقوا عليه يوم الغضب .. علي فكرة الغضب كلمة جميلة ليها وقع ع الودن كده لوز .. غ ض ب كلها حروف سخيفة كده وانت بتقولها تغتضب ولو يوم فرحك
بس الناس مغضبتش ولا حتي عيطت
طب هل الناس مش غضبانة مممكن أقولك نفس الكلمة الوحشة الى فوق علي فكرة ... الناس اكيد غضبانين لكن المشكلة انهم مش بيعبروا عن الغضب ده

يعني مثلا لو مراتك بتصبحك بعلقة وتمسيك بعلقة .. اكيد هاتزعل .. كلنا بنزعل الحقيقة J لكن فى النهاية لازم تاخد موقف .. مش تضرب عن الأكل .. يعني تبقي انت الى شقيان وطلعان تربنتينك وجايب خيرات ربنا .. ومراتك تصبحك وتمسيك .. والموقف الى تاخده انك ماتكلش من الاكل الى انت جايبه .. دي ما هتصدق يا عم الحاج .. نسوان هم انت هاتقولي .. ده انت تبقي راجل لامؤاخذة ... الصح انك تضرب مش مراتك طبعا .. ممكن تقرا المدونة فى أي وقت .. هو فيه حد أصلا يقدر يضرب مراته .. دي تنقطع ميت حته وتاكلها القطة السودة لو حصل كده .. لا أنا قصدي يعني انك تضرب عن مجايب الأكل أصلا

طاخ طيخ طوخ

الناهية علشان مفيد بيقولي اني مش بعرف أكتب وانى بطول فالفكرة بتوه مني
انا كنت موافق ان أصحاب المعاشات يحتلوا ميدان التحرير ومش مهم لو ماروحتش الشغل او اتاخرت ساعة او ساعتين أو حتي أربعة .. وان الصيادلة يقفلوا صيدلياتهم .. حتي لو مالقتش دوا لهيام .. ولو الاطباء قفلوا عيادتهم ماعنديش مشكلة ان أستحمل أي ألم او اغور فى داهية
علشان احنا لازم نطبل أنانيية وضعف وجبن شوية .. يبقي الى مش اناني والى مش ضعيف ولا جبان من حقه انه يطالب بحقه وانا مازعلش لما يعمل كده .. مش المفروض نستني ان الخيرات تتنزل علينا من السما .. ولا نقوم ونصبح نلاقي مبارك عمل انتخابات نزيهة وطلع الناس من السجون .. والى بيسرق يبطل سرقة .. والوزرا والمسئولين المأنتيخن يبطلوا انتخة ويشتغلوا زي بقيت مخاليق ربنا .. ونلاقي الشرطة بطلت تضرب الناس علي قفاها .. وألاقي اختراع جديد بدل البامبرز ويكون مش غالي

لازم آخد موقف علشان آخد حقي

ولازم لما أحس ان فيه فئة من الشعب مظلومة انى أقف جنبها وأساندها بكل ما اوتيت من قوة

مش أسيب الى غرق غرق ولا الى اتحرق اتحرق ولا الي بيتهان يتهان ولا الى اغتصب اغتصب

والله الدور جاي علينا كلنا

والله لا يخدونا من بيوتنا عاطل بباطل

والله لنشوف أيام سودا

يا عالم يا سو

فانا مش هشارك فى أي إضراب غير لما يشارك فيه سواقين هيئة النقل العام ومش مهم الكمسرية علشان بيبقوا رخمين شوية .. وسواقين مترو الانفاق لازم يشاركوا وشباب هندسة وتجار ونظم معلومات الى شغالين فى البنزينات .. والناس الى مخنوقة من ظباط الشرطة لازم يشاركوا .. وطلبة الجامعة لازم يفكهم باه من تامر وحماقي ويركزوا فى هياف وإلياس قصدي يركزوا فى منير واسكندريلا .. ياعم يركزوا فى خدمة البلد ... والعنمل والفلاحين والفقرانين والبوابين والى عندهم عربيات والى بيركبوا مواصلات .. وسكان العشوائيات وهانبقي نضحي بسواقين الميكروباظ ونسيبهم يتخانقوا مع سواقين التاكسي

بس أهم ناس سواقين النقل العام ومترو الأنفاق .... ماهينجحش اضراب من غيرهم

ويالا باه بالسلامة كفاية عليكم كده

انهم يستحقون أكثر من إعدام - 2

2009-04-01T23:44:00.000-07:00

كم كان مؤلما ومفجعا ذلك الخبر .. وكام كانت تفاصيله اكثر إيلاما .. هكذا هي دائما حوادث الاغتصاب .. تُصيب النساء بالخوف .. وتملئ قلوب الرجال بالرعب .. نعم بالرعب .. فمن يأمن علي نسائه الآن؟ .. فلقد أصبح محظورٌ عليك التواجد فى الميادين الكبري فترة الأعياد .. وحذاري كل الحذر ان تذهب بصحبة زوجتك إلي السينما وقت الذُروة .. وإن كانت تعمل فلا تجعلها تقود السيارة بمفردها لأنها سوف تُحَمل بكمية من السباب لا يقدر علي حملها أبلد الرجال .. ونبه عليها كل التنبيه ألا تركب سوي عربة السيدات فى مترو الانفاق... وإلا قد تأتي لك فى نهاية اليوم وقد شقت رأسها نصفين .. واجعلها تغير مسار طريقها إن كانت تسير بجوار مدرسة ثانوية او إعدادية بنين وفي وقت خروج هؤلاء الطلبة .. فالرجال ينالون حظهم مثل النساء تماما من هؤلاء الطلبة وإن كان بشكل مختلف؛ قد يصابون من أثر المشاجرات الطاحنة التى تحدث علي أبواب تلك المدارس ولا تسلم النساء والسيدات الكبيرات عذرا عن الفتيات الصغيرات من تحرشاتهم وألفاظهم المجزعة

.
كل هذا واكثر يمكن تجنبه باكثر من وسيلة ، أو علي الأقل يمكن احتماله والأجر والثواب عند الله تعالي عز وجل، ولكن ماذا ان قام أحد الرجال وأبي علي زوجته ان تتعرض لتلك المهازل اليومية، وقرر أن تظل حبيسة المنزل، ويذهب هو إلي

عمله وفى بطنه شادر من البطيخ الصيفي المسرطن اللذيذ، فهل سيأمن علي زوجته عند إذن؟

لا!!!! لا!!! لا!!!

لماذا هل لان البطيخ أصبح مسرطن؟

لا برده

أيها الرجال إليكم الخبر

قد تغتصب زوجاتكم فى منازلكم وعلي فراشكم أو علي أي مكان آخر وأنتم فى اعمالكم.

قد تغتصب وانت تظن أنها تعد لك الطعام، أو تنشر لك الغسيل.

قد تغتصب فى نفس اللحظة التى تفكر فيها أنك ستسكن إليها اليوم ويفيض بعضكم إلي بعضا

.
قد تغتصب وأنت تتذكر كيف كانت ليلتكم الأولي

.
أيها الرجال قد تخطف زوجاتكم من بيوتكم، وعلي مرأي ومسمع ومشهد من الجيران والبواب وأصحاب المحلات

والسائرين فى الشارع ، ولا ينتفض أحد للدفاع عنها، ولا لنجدتها.

أيها الرجل قد تغتصب زوجتك من عشرة أشخاص وعلي الطين وفي عز البرد

.
أيها الرجل صدق أو لا تصدق ق قد يقوم عشرة أشخاص بجرجرة زوجتك من بيتك مرورا بالشارع وانتهائاً بفراش الاغتصاب، ويراها كل العوام فى عز الضهر ولا يفعلون لها شيئاً.

أيها الرجل صدق أو لاتصدق ، تلك المراة التى نتحدث عنها وضعتها وليدها الثالث من أسبوع فقط قبل حدوث تلك الجريمة، أي أنها ليست صغيرة السن وانها بالتاكيد مترلهة الجسد.

أيها الرجال قد يحدث ذلك لزوجاتكم اللاتي لا يعملن. ولا يراهن غريب.

أيها الرجل صدق او لا تصدق حدثت تلك الواقعة فى محافظة فى الأرياف فى الفلاحين يعني!!!

أيها الرجل تخيل ماذا يمكن أن يحدث من عشرة رجال مع امراة فى حقل زراعي.

ماذا هوالمشهد الذي تراه الآن؟

أيها الرجل أوقن أنه لن يشفي غليلك حتي وإن علمت بان هؤلاء العشرة قد حكم عليهم بالإعدام شنقا.

أيها الرجال لا تتعجبوا مما حدث .. فهناك من رجال الشرطة من فعل أمر من ذلك وفي مركز توقيف للشرطة أتي بزوجة أحدهم وأخته وامرهم بخلع ملابسهم وهدد الرجل باغتصابهم واغتصابه حتي يعترف بسرقة ماشية.

أيها الرجال سحقا لكم فانتم من تُظلمون، وأنتم من تظلمون وانتم من تسكتون عن الظلم

.
يا رجال الشرطة أنتم السبب فلتذهبوا جميعكم أنتم ووزيركم إلي الحجيم.

انهم يستحقون أكثر من إعدام

2009-03-19T00:45:00.000-07:00

طبع قبلة علي جبينها ، وأطل برأسه ينظر إلي وجهها كأنه يراه لأول مرة أو كانه سيراه لآخر مرة، حتي تنحنحت وبدلال وبحياء الأنثي

اطلقت آهة من التوجع وأرادت أن تعدل من جلستها النائمة، حتي تنهي الموقف سريعا بدلا من ان تاخذ المشاعر زوجها أكثر من ذلك، ثم قامت امها لتقول لزوج ابنتها ما سالتش عن بنتك يعني، يرد سريعا لا شوفتها كويسة وبخير المهم امها، تقوله يعني ما سالتش هي فين ... يقولها يعني هاتكون راحت فين راحت المدرسة مثلا، تقوله مش تطمن علي بنتك يا راجل .. خالتها اخدتها تخرم ودنها علشان نلبسها الحلق الى جابولها جدهاف، جدها جاب الحلق ادفع انت مصاريف الخرم باه .. وتمتلئ الغرفة بالضحكات

هي مازلت تتألم من أثر الولادة القيصرية فلديها اثنان آخران وزوج شقيان طيلة النهار .. غير الطفلة الرضيعة .. وامها عجوز .. لا تقوي علي خدمتها طيلة العمر .. فماذا قد يفعل والدها من دون والدتها غير اخوتها التي لا تنتهي طلباتهم .. لابد ان أتحامل علي نفسي .. ماحدش بيشيل حد .. وتحمل سبت الغسيل تدخله فى نهاية الغرفة ،، تخرج ترتدي إسدالها .. وعليه الروب الجديد الذي اهداه لها اخت زوجها الملئي بالألوان المبهجة فهو أبيض وبه ورود بمبي كم تعشق هذا اللون .. تقوم بمسح أحبال الغسيل أولا .. ثم تسرح بعيدا .. فيما سوف تعده اليوم من طعام لزوجها .. فتقوم بعمل جرد سريع لأصناف الطعام فتتذكر ما هو موجود وما ينقصها

تفيق علي يد تتحسس وجهها ، تشعر باليد أكثر فاكثر كأنها تريد ان توقظها .. تفتح عينيها فتري السماء كانها اطبقت عليها .. تشعر ببرودة شديدة تسري فى اطرافها فى انحاء جسدها .. تتحسس زراعها .. تجده عاري من الملابس .. يتملكها الخوف من كل جوانبها .. تحاول النهوض .. تتكئ بمعصمها علي الأرض تجده منزلق من أثر الطين .. تشمئز بشدة .. فتشعر بالطين من أسفلها .. ترفس بأرجلها .. تفرك بقدميها فى الطين .. فالطين لزج ممزوج بالماء ورائحة القيئ والبول يبعث بشعور مقزز وهو يلامس ظهرها .. تستشعر وكان الطين قد ابتلعته .. تشعر به فى جوفها .. تضع يد علي فخذها واليد الاخرى علي اعلي صدرها فتجدهما عاريان .. تحاول الصراخ فلا يخرج صوت .. تحاول إخراجه بالقوة .. تحاول التنفس تفتح فمها بقوة كأنها تريد ان تبتلع الهواء .. أو كأنها تريد أن تفتح طريق لتخرج روحها منه .. وعندما تفشل يشغي عليها

انهم يستحقون أكثر من إعدام

اللهم أرنا الحق حقا وارزقنا اتباعه وأرنا الباطل باطلا وارزقنا اجتنابه

2009-03-18T01:09:00.000-07:00

كل ما يحصل مصيبة وأشوف ردة فعلنا عليها أستغرب قوي
أيام العدوان علي غزة
كلنا كنا بنحمل مشاعر متناقضة متضاربة
زعلانين من الضرب الى شغال فى غزة
وف نفس الوقت محملين حماس المسئولية علشان الصواريخ الى بتضرب بيها إسرائيل
وبرده زعلانين من الضعف بتاعنا وتخاذلنا الرسمي والشعبي
زعلنا من ردة فعل حسني مبارك علي مجزرة غزة، وف نفس الوقت زعلنا برده من العرب الى طلعوا فى مظاهرات ضد مصر
تابعنا الجزيرة بشغف غير عادي وكنا مبهورين وسعداء بيها جدا، بس كان ضغطنا بيترفع لما كانت بتعيد وتزيد فى مواقفنا وتصريحاتنا المخذلة وبتكررها بمناسبة وبدون مناسبة
كرهنا أبو الغيظ وتصريحات أبو الغيظ وقناة النيل الدولية قناة مصر الحمصية وأداؤهم وشكلهم وريحتهم ونَفسهم ، والاغرب اننا كان نفسنا فى حد يضحك علينا

كنا بنتمني وزير خارجية مطأطأ كده يضحك علينا ويأكلنا الحلاوة، ويعمل شوية حركات ويدي كام تصريح ناري ترابي مائي ويحسننا اننا بنحارب إسرائيل من أسبوعين تلاته كده

ويا سلام لو قناة أو حتي ترعة تليفزيونية تردد الأباطيل بتاعة وزير الخارجية المطأطأ ده

والله كان نفسنا فى حد يضحك علينا ويكذب علينا .. عمركوا شفت شعب نفسه يضحك عليه

ماكنش نفسنا فى حد يقولنا لقد أعذر من أنذر، ويتباهي ويتفشخر بان مصر أفشلت قمة الدوخة

ماكانش نفسنا نشوف القفا الى لزق علي مبارك لما ليفني جت زارت مصر قبل يومين من عدوانها علي غزة، لا وكمان ايه اعلنت من علي منبر وزير الخاجرية ومن قصر الرياسة المصري انها هاتسحق حماس
ماعندوش كرامة الجدع ده
طب احنا وطظ فينا ولا نفرق معاه بترمسة لكن كرامته هو قدام الناس دي كلها

ويا سلام علي القفا التاني الى لزق علي قفاه الكريم لما أعلن انه علي شفا التوصل لإتفاق تهدئة، يقوم ييجي أولمرت ولامؤاخذة مديه الكريمة ويعلن إنه لا فتح للمعابر إلا بالإفراج عن الجندي الأسير

طب كبروا الراجل قدام ناسه يا جدعان ... لو عندكم هفق لكن وسط عيلته وناسه هو ريسهم .. هو اللي مأكلهم هو .. هو الى مشربهم هو .. حسني يا حسني

طب بلاش قدامنا .. تعملوا كده قدام سوزي.. تقول عليه ايه دلوكيت .. الراجل كبر وهفق وبأه ملطشة .. ارحموا عزيز قوم ذل

علشان كده انا اتخنقت مننا .. ازاي نجمع بين الشيئ ونقيضه .. ازاي نجمع ما بين الأفكار المتناقضة دي كلها .. مش بكلم علي النخب .. لكن بكلم علي الناس العادية الى لما تكلمها وتقولها يرضيك سكوتنا عن الى بيحصل يرد يقول لا طبعا حرام وكفر و و و و .. بس حماس والفلسطينيين هم السبب مش قد الحرب بيضربوا صواريخ ليه .. طب مش شايف سبب لضربهم للصواريخ دي .. يقولي غباء وعلشان يبانوا هما الى بيقاموا والباقي خاين .. أقوله بيضربوا الصواريخ علشان يتفك الحصار علشان مش لاقيين ياكلوا وتتفح المعابر .. يقولي هي غزة يعني مالهاش حدود غير مع مصر أقوله البحر ومتحاصر ولو علي حدودهم مع إسرائيل إذا كانت مصر قافلة عليهم ومش مخلياهم يبيعوا ويشتروا يبقي اليهود هما الى هايبعيوا ويشتروا معاهم يقولي واحنا الحيطة المايلة بتاعتهم ماتشطروش علي الحمار يتشطروا علي البردعة.. تفضل تهاتي ويتوجع قلبك.

فيه دعاء بحبه قوي ونفسي يستجاب ألا وهو الله أرنا الحق حقاً وأرزقنا اتباعه وأرنا الباطل باطلاً وأرزقنا اجتنابه
احنا لا شايفين الحق حق ولا شايفين الباطل باطل

صعبان عليا حالي

2009-03-16T04:01:00.000-07:00

صعبان عليا حالي، أغنية شعبية تلاقي جمعة بيحبها

هو مش حالي الى صعبان عليا .. لكن الفكرة الذهبية بتاعة أبناء مصرهي الي صعبانة عليا

كنت بتفرج فى يوم علي مني .. حد يسالني ويقولي مين مني .. طبعا مني الشاذلي .. هو فيه ميت مني يعني .. ومني الشاذلي دي بالنسبة لي هي الست .. لانها ست بما تحمله الكلمة من معاني وعبر وعظات لأي ( إمرأة) أخري يدور بخاطرها أنها ست

المهم مش هاطول علشان لو مراتي فى يوم من الأيام عرفت طريق المدونة ماتخنقنيش .. أصلها قربت تكره مني وقناة دريم كلها والساعة عشرة كمان
فلما بتيجي الساعة عشرة من هنا ألاقي البيت اتقلب من هنا، وفجاة أحس انى بقيت فى كافتيريا ينزل شوب بيبسي بالتلج مشبر .. أقول قشطة هاتبقي سهرة زي الفل مع مني .. تكتم غيظها وتجيبلي باكو شمعدان الشبح ... يا عيني يا عيني .. تاكلهولي يا سلام يا سلام .. بعدين فجاة تقولي انت كلمت عمو النهاردة .. أقولها آه طبعا .. طب سألت علي ماما .. أقولها ليه هي عيانة.. هي بتعيا أبدا .. تجز علي سنانها وتقولي مش مامتي انا مامتك انت .. أحرج كده وأقولها وماله نكلم الاتنين .. جبرا للخواطر ودفعا للشرائر.. عبال ما أكلمهم ألاقي معلقة أيس كريم فى بوقي و وفجاة ألاقيها بتقولي الله الفيلم ده حلو قوي ده الى مش عارف بيحصل فيه ايه وايه فى لحظة وثانية ألاقي القناة اتقلبت علي أي قناة أفلام أجنبي وكان الله بالسر عليم

نرجع لمني وف يوم خطة المدام بائت بالفشل الذريع نظراً للنفاذ السريع للحاجات الحلوة، لقيت مني مستضيفة دكتور فى الجامعة وكام شاب لووز بيتكلموا عن حركة جديدة اسمها مش عارف حركة 14 فبراير .. مصر أولا .. و المؤسسين ليها زعلانين من الناس الى طلعت فى مظاهرات ضد مصر أيام حرب غزة، وكلامهم موجه ضد الإخوان بالأساس ، ورافعين شعار مصر أولا، وهو شعار حق يراد به باطل من وجهة نظري ، المهم لما اتكلموا كمان مع مني حسيت انهم بيتكلموا فى امانة الشباب فى الحزب الوطني مثلا .. نفس البوئين ونفس الشعارات ونفس الخطاب بتاع الحزب الوطني المعادي للمعارضة ومصدر الاخوان فى الوش

المهم وانا بتفرج حسيت بحسرة، ان فكرة فكسانة زي دي تطلع مع مني، وفكرة تانية زي أبناء مصر تتاقل بالدهب يتردم عليها بالتراب من أصحابها، لو اتعرضت الفكرة دي فى منبر زي ده كانت لمت مريدين بالمئات علي الأقل، لكن احنا أصلا ماكانش هدفنا نطلع فى برامج .. كان بس هدفنا اننا نشتغل من سكات مش جنب الحيط لا ده جوه الحيط وماحدش يسمعلنا حس علشان نستمر، وفعلا عملنا شغل حلوقوي، الفكرة كانت تستاهل والناس يستاهلوا ان الواحد يشتغل معاهم ويعرض نفسه للخطر علشان خاطر الفكرة الذهبية الى آمن بيها والى فى الآخر أشوف فكرة زي دي بتتعرض مع مني ويتقالي من عضو مؤسس وعزيز فى أبناء مصر لما قلتله هل عملت كل الى نفسك فيه فى أبناء مصر رد وقالي بعدم اكتراث لا طبعا .. بس فى النهاية أبناء مصر دي مظلة زي أي مظلة وهلاقي مظلة تانية أشتغل فيها

رحت قلبت مني وقلت لمراتي تجيبلنا طبقين جيلي بالموز واتفرجنا علي فيلم غباء فى غباء لجيم كاري ع الفوكس موفي

لن أنسي لكم هذا الموقف .. الي هايقولي قول كلمة هابطحه

2009-03-04T03:18:00.000-08:00

طبعا قرفان من الى حصل امبارح، امبارح كان ايه يعني، امبارح حفل توقيع كتاب هما انثي، انا أصلا قلت ماقابلش حد وانا فى حالتي دي، سايب شغلي والإضافي ومراتي تعبانة وعند الدكتور، وأبويا فيه الى فيه وورايا شغل هاستلمه من المطبعة وأروح حفل توقيع.. لا وايه كمان أقول كلمة ... انا أقول كلمة ينعل ديك امر الديك علي فكرة

وطبعا اول ما ايناس لطفي قدمتني وقالت بس منذر، ماتتخيلوش التصفيق الحاد، وقعدوا يبرئو يبرئو يبرئو لدرجة ان كنت خايف علي جوهرة عنيهم لتقع من مكانها وإلا التصفيق ايديهم اتبرت وإلا الانصات مش ممكن كأن علي رؤوسهم الطير، تجمدوا وتخشبوا كده، قوم ايه انا فى وسط ده كله أنسي الكلام الى كنت هاقوله

احيه يا أبو سوسو أحيه ،، اختك هاترقص وانت هتمز يا أبو سوسو
غطوني وصوتوا غطوني وصوتوا
ايه ده .. انا ايه الى وداني مكان زي ده

متنيل مابقتش اتابع مدونات زي الاول، انزل ليه هاتعرف علي مين، طبعا اعتمدت علي الاخ مفيد وماعبرنيش، كل شوية يجيلوا واحد يقوله انا مندهش ويخلع التاني يعرف نفسه يقوله انا مجنون ويخلع ويسيبني طيشة لغاية ماجم حبايبي واخواتي وصحابي من أبناء مصر ... هم الى سيحوا الجليد شوية

لازم الى ينزل تجمع للمدونين يبقي متابع للمدونات يبقي بيقرا مدونات علشان يبقي عنده شغف انه يتعرف علي ده ودي وعلشان يقدر يستمتع بالناس الموجودة

أي نعم حسيت ان فيه مدونين رجالة صيع ، صيع صيع يعني، مش عارف مش راضية تركب معايا مدون بيشرب سجاير وبيكلم لغة شوارع ويدون

أينعم انا عارف ان التدوين مش محتاج مؤهلات بس برده مش عارف أستسيغ حاجة زي كده

كان تامر جمال بيشرب سجاير بس كنت بحسه ابن ناس ومؤدب وعند فكر

مش عارف هاتفهموني ولا لأ ولا بخبط ولا لأ بس علي فكرة مش مشكلة

كمان فيه حاجة، كان فيه راجل قليييييييييييييط جدا ومخنق جدا وراسم نفسه بطريقة غريبة وام سماعة البلوتوث – بتنرفز منها قوي – ويمشي يا أرض انهدي ما عليكي قدي ، وطلع فى الآخر صاحب دار نشر، امال لما يبقي زي الحاج مدبولي الله يرحمه هايبقي عامل ازاي ، وواحدة تانية برده صاحبة دار نشر مخنقة كده، هي العالم حصل فيها ايه

بس أرجع وأقول انا الغلطان

وكمان مفيد بعد ما خلصت الناس الى تتكلم ومشيت مها واحمد عبد الفتاح والساعاتي، مابقاش حد اعرفه غير مفيد

قبل ما هاشرد لمفيد بعد شوية أحب أقول اني شوفت سلمي انور الى كان نفسي أشوفها وعندها حضور طاغي كما توقعت وكلمتها كانت قوية جدا هي وشمس الدين وطبعا انا بس نسيت اسمي والله الى هايقولي اعمل حاجة زي كده تاني هابطحه ... ينعل .... يحرق .. ايه الي فكرني تاني

نرجع لمفيد سابني ملطوع زي قرد قطع ماعرفش حد وهو عارف ان واقف لوحدي زي قرد قطع ماعرفش حد وقعد يتعرف علي ناس اول مرة يعرفهم أنا مندهش وانا مجنون .. بس أرجع وأقول ان انا كان لازم ماروحش معاه فى حته غير لما يكون جمعة معايا هو الى فاهمني، بس معلش غلطة وتتعوض

وشوفوا الغلاسة بعد ماستنيته قد ايه رجع قالي انا هاركب من هنا لامبابة .. بيهزر البيه .. ماشي يا مفيد .. بس قطعت نفسه قعدنا نزق سواق تاكسي عطلان من مطلع كوبر الجلاء لغاية كوبري قصر النيل .. أحسن يا مفيد ... وطلعنا علي عبد المنعم رياض لقي الميكروباصات زحمة .. ده ذنبي يا مفيد علي فكرة

لا وبكلمه فى موضوع مهم هو الى فتحه يسيبني ويعمل نفسه مشغول فى قراية ماعرفش ايه .. ولما أهبش فيه يقولي انا كنت قاصدها علشان اعرف انت بقيت عصبي ولا لأ .. طب ما أي حد هايتعمل فيه كده هايتعصب .. حاجة عجيبة والله

بس خلاص .. حاجة تقرف

الصنم

2009-03-02T01:40:00.001-08:00

الصور من تصميم يساري مصري الجامد جداً

ما أنت إله ولن تكون أبدا كذلك

إنما أنت صنم ولست علينا بمالك

عجبوا واستنكروا عندما تحدثنا عن مرضك

فماذا قد يفعلوا إن قلنا ممماتك

ماذا إن قلنا أنك تأكل وتشرب وتشعر

ويخرج الريح من فضلات غذائك

أيعلقون لنا حينها المشانق

إن لاح على خاطرنا مشهد فنائك

أسيبنون لك قبرا يطوفون حوله

ونرى بأعيننا من يسبح بأسمائك

أحينها يتمجدون بإنجازاتك

ويقولون هذا هو ملك الممالك

أم سيبولون عليك

ويصنعون صنما جديدا

يبنوه من نفس أحجارك

أيتخيلون يوم يلتف ساقك

إلى ربك يومئذ مساققك

حين يضمك قبرك

ويزول عنك طغيان سلطانك

وينهال على وجهك التراب

وأنت بثوب أبيض غير مخيط

أملاكٌ سيلقنك أم سيذهب

كما ذهب عنك شيطانك

أيجول فى خاطرهم هذا اليوم

أم يظنون أن الشمس لا تشرق بغيابك

وأن السماء التى تقلنا سمائك

ما أنت إله ولن تكون أبدا كذلك

إنما أنت صنم ولست علينا بمالك

الصور من تصميم يساري مصري الجامد جداً

مجنون عاااااااااا

2009-02-24T04:24:00.000-08:00

مش عارف ليه حاسس بغربة، كان دايما جمعة يتكلم ويقول حاسس بغربة .. ماكنتش بفهمه .. او ممكن أكون كنت بفهمه غلط ... لكن انا حاسس بغربة .. حاسس انى كائن غريب .. مش هامثل وهاقول اني ملاك وسط شياطين .. لكن علي الأقل مش عارف أكون بنى آدم .. حاس انى لسه ابن امبارح .. حاسس انى لسه مولود طفل رضيع .. لسه بيشوف الناس بيتعامل معاهم .. طول عمري كنت خايف من يوم زي ده .. علشان كده عملت حسابي وخرجت للدينا واشتغلت من أولي جامعة مع انى مش محتاج للشغل .. واتبهدلت وانا فى غني عن البهدلة .. بس تقريبا ماجابش نتيجة
حاسس انى أول مرة أركب ميكروباص أو أركب ميترو أو أول مرة أسوق لوحدي واول مرة أشتري حاجة .. أول مرة اتكلم مع الناس .. اول مرة أمشي وسط الناس.. حاسس انى أول مرة اعدي الشارع .. مش عارف ممكن يكون زاد الموضوع ده لما عرفت ان أبويا عيان .. يمكن يكون علشان بقالي كتير بعيد عن ربنا أكيد .. القرب من ربنا بيخلي الواحد قوي .. بيحسس الواحد انه مش لوحده

الناهية ان جمعة بيبهت عليا .. كل ما أدخل أقراله حاجة يبهت عليا

علشان كده نفسي أفضفض

أنا مريت بفترات ممكن أسميها جوهرية أو انتقالية أثرت فى حياتي .. اولهم لما سقطت فى اختبارات الكلية الحربية .. عارفين العيل الصغير الى لما حد يساله نفسك تطلع ايه؟ يقولك ظابط .. انا كنت كده .. حتي فى الثانوية العامة لما كنت بختار بين أدبي وعلمي .. ماكانش عندي نبوغ فى مادة بعينها أخويا قالي ماتحيرش نفسك شوف انت عاوز تدخل كلية ايه وساعتها هاتعرف تدخل علمي ولا ادبي، ساعتها زادت حيرتي ومابقتش عارف انا عاوز ايه .. ولقيت نفسي بقول عاوز ادخل الكلية الحربية ، ده حتي وانا فى اعدادي قدمت فى الثانوية الجوية .. وأبوياعمل البدع علشان ماقدمش وفعلا خلاني مقدمش .. ودخلت أدبي وخلصت الثانوية وقدمت فى الحربية وسقطت .. ساعتها الدنيا اسودت فى عنيا .. حسيت بقمة الضياع وانا داخل كلية التجارة حسيت انى فعلا مستقبلي ضاع واني هاشحت وانى مش هلاقي شغل واني قليل قوي وده كان أول تحول فى حياتي

التحول التاني لما دخلت الكلية ؛ ماكنتش بحضر ولا بذاكر غير هي ليلة الامتحان بس كنت بشتغل فى مكتبة ابن عمتي جنب الجامعة .. كنت بروح أدفع المصاريف واطلع الكارنيه واذاكر ليلة الامتحان واخش امتحن وانجح .. وفى سنة تانية جبت تقدير ومشيت كده لغاية سنة رابعة .. وماتوقعتش أبدا انى ممكن أسقط فى رابعة بالرغم من انى كنت بتوقع كل سنة قبل كده ان أسقط الا اني فى السنة دي ماتوقعتش انى اسقط أبدا .. وهنا كان التحول التاني قضيت السنة الى سقطت فيها فى جحيم .. بالرغم من ان البيت ماحملنيش المسئولية او ضغط عليا أو ... أو.. ده كان أبويا بيهون عليا .. بس انا عندي حته جلد الذات .. كنت بعاقب نفسي بنفسي كنت بشتغل ليل نهار وباكل فى الشغل علشان ماكلش من اكلهم .. كنت بحس ان مش مستحق للقمة بتاعتهم، ولما دخلت التدوين كنت بفضل طول اليوم علي النت وماكنتش بقعد معاهم ، وبعدت عن كل صحابي الى كنت اعرفهم قبل كده .. لا أرد عليهم ولا أقابلهم ،تعبت قوي فى الفترة دي وتعبت كل الناس الى حواليا

ودخلت التدوين فى نص السنة الى سقطت فيها .. والحمد لله استعدت كتير قوي من ثقتي فى نفسي .. بس حصل الى بوظ كل حاجة وهو بختصار انى مريت بقصة حب فاشلة جدااااااااااااااااا أفقدتني الثقة فى نفسي تقريبا لغاية دلوقتي

بالرغم من ان اشتغلت فى مكان مرموق نوعا ما .. واتجوزت انسانة مرموقة برده والحمد لله

إلا إني حاسس انى غير جدير بالقمم

والإحساس ده هايموتني
حد ممكن يقول ارضي بالى ربنا كتبه .. وانت أحسن من غيرك و و و

بس أنا حاسس ان الموضوع بعيد عن الرضا من عدمه

عقلي بيقول انى شغلي دلوقتي احسن من مليون ظابط وفيه مزايا كتير جدا ومافهوش عيوب الحياة العسكرية و و و
وعقلي بيقولي وبيدلني علي انى مانفعش للبنى آدمة الى اختارتها .. وان مراتي أحسن وانسب حد ليا

بس مش عارف أرضي

دايما حاسس انى الى اخترته لنفسي هو الأحسن .. مع انى عارف ان الى ربنا قدره ليا هو الأحسن والانسب والأفضل .. مش عارف أجمع بين عقلي ومشاعري

ازاي أنا عارف ومتأكد ان وضعي فى شغلي احسن من الظابط بكتير وحاسس انى قليل

ولا انا سطحي ومبهور الدبابير الدهبي ونفسي أتنك علي الناس واتعالي عليهم

ليه بتمحك فى بدلة ولا فى دبورة ولا فى كارنيه .. ليه مادخلش علي الدنيا بصدري ويقاتل يا مقتول .. ليه مستني انى أفرض احترامي علي غيري بخوفهم من مظاهر فارغة .. ليه حاسس ان الناس مش هاتحترمني غير لما يعرفوا انى ظابط .. ليه عندي العقدة دي .. ليه حاسس انى مش هاعرف آخد حقي من الناس غير لما يخافوا مني .. مش عارف ليه حاسس انى عندي عقدة نقص .. مش عاوز أتلكك بظروف البلد وأقول هي السبب لأن مش كل الناس كده
ممكن يكون الحب أعمي وماحدش بيختار الى بيحبه لكن ليه دايما بعوز الشيئ ونقيضه .. ليه عاوز الناس تلف حوالين نفسها علشان يرضوني

عاوز مراتي تبقي رغاية بس لما ترغي أقولها ايه الرغي ده علي شرط انها ماتزعلش .. وعاوزها فى نفس الوقت هادية ولما تسكت أقولها ايه الملل ده وبرده ماتزعلش

علشان كده الى يخلص البوست يبعتلي علي الميل عنوان ورقم تليفون أقرب دكتور نفساوي

لو لم اكن مصريا لوددت ان أكون ؟

2008-12-17T02:43:00.000-08:00

كل الأشياء تدعوا للإحباط

ومافيش حاجة مضمونة

مافيش منطق .. ولا بديهيات ولا مسلمات

يعني.. واحد زائد واحد بيساوي اتنين .. مع ناس ممكن يساوي ملايين وناس تانية ممكن مايسوش حاجة، يساوي صفر

ماحدش حاسس بالامان ولا بالاطمئنان

الغابة مثلا معروف ايه هي احكامها وقوانينها ، ومعروفة كمان عناصرها ومعروفة ادوارهم ووظائفهم، مثلا فيه أسد ونمر وديب وتعلب وفيه غزال وجاموس وبقر وحمير .. معروف مين المفترس ومين الفريسة .. مثلا الغزالة طبعا واكيد مش عاوزة تتاكل فبتدافع عن نفسها قدام الأسد بالجري والهرب من وشه، ولما بقيت الحيوانات يشوفوا مشهد المطاردة ده ماحدش بيستغرب وكل واحد بيبقي منتظر دوره .. فى الغابة معروفة طبيعة الأشياء وقانونها فطري وبديهي ومسلم بيه ، ورغم من كده عمر ما الغزالة حاولت تبقي أسد .. وعمر ما الضبع حاول يبقي أسد ولا الغزالة حاولت تطور قدرتها ومهارتها انها تبقي أسد

أنا حاسس اننا فى غابة بس قوانينها مش قوانين غابة .. يعني يمكن كنت أستريح لو حسيت ان ربنا خلقني غزالة أو أسد ، علي الأقل كنت هاعرف دوري ووظيفتي كويس ومش هاقفز عليها .. بس ازاي نيعش لو الناس كلها كانت اسد .. والى مش أسد بيحاول بكل الطرق والكباري انه يبقي أسد

ببلطجة بفتونه بنفوذ بسلكان بهمبكة بقلة أدب .. المهم يعمل ضوافر وأنياب يدافع بيها عن نفسه وعن منطقة نفوذه
مش عارف هل أنا قادر أوصل الي أنا حاسس بيه ولا لأ

والأسد فى مصر لاما يبقي ظابط أو وكيل نيابة او مستشار أو دبلوماسي أو أي حاجة من الحاجات الى بتخض دى ،علشان يبقي أسد لازم يبقي كارنيه لامؤاخذة .. او يبقي غني جدا وبعلاقاته يخلي البشر يعملوله ألف حساب، ويقدر لو وقع فى مشكلة أو لو وُضع فى أي صراع انه يدافع عن نفسه ويأذي خصمه .. يقدر يجيب حقه وماحدش يدوسله علي طرف ويبقي ماشي مطمن ومامن نفسه .. والنوعين دول ماشيين مع بعض ماحدش بيشوفهم او بيتعامل معاهم كتير مش بيختلطوا بينا مش بيركبوا مواصلاتنا ولا بيمشوا فى شوارعنا .. راكبين عربيتاهم المتفيمة والى عليها النمر السودا .. متعلمين لابنجمة لا بلوحة سودة عليها قبة برلمانية او نسر او حتي دبور

كل الناس بتستخبي ورا شعار ورا لوجو يحميها
ولو علي دول يبقي مقدور عليهم بنوسع عادي وربنا يبعدنا عنهم وبيعدهم عننا
بس الاخطر ان بقيت البشر المطحون برده عاوز يبقي اسد ... بيحاول يدرب نفسه علشان يبقي أسد

تقريبا نسيوا انا احنا مش فى غابة وان احنا مش حيوانات
مش قادرين يعيشوا مع بعض بمنطق التكافل ، لازم منطق الافتراس

بتخيل لو اتحطيت فى موقف وكنت فيه خصم مع حد مسنود هايعمل فيا ايه

ده فى مرة مع سواق ميكبروباص خبط عربيتي عند قسم السلام وجبتله امين شرطة وكان يعرف الى مسرحه طلعه مش غلطان ... ولولا انى استقتلت فيها وأصريت انى اعمل محضر قدام الرائد ماكنش خلاه يصلحلي العربية علي حسابه
بس لو ماكنش مع سواف ميكروباص لو كان مع الباشا أبو عيون الى رخمنا علي بعض فى غياب أي عنصر أمني محايد .. ولو موجود ولقي خصم برنس بعربية ستة متر والى قدامه شاب مطحون بحته فيات هايعمل ايه

مين ممكن يخلق امان وعدل فى الشارع

الكافتيريا الى فتحت قدام بيت أبويا العيال الى شغالة فيها بيبيعوا حشيش وبانجو للشباب جوه العربيات وبيركنوا عربيتهم فى أي حته فى الشارع مكان عربياتنا احنا .. فتحول الشارع الى كان اهدي ما يمكن لوكر مخدرات ولعب بالعربيات وضاق الشارع الواسع وباه كل يوم فيه خناقة .. والشارع الي كان بينام من العشا بأه يصحي المغرب وينام الفجر
مين فى البلد ممكن يجيب حقه بما يرضي الله وبالقانون من غير ما يجور علي حق حد
مين حاسس ان ممكن يجيله حقه من غير واسطة ولا محسوبيه ولا نفوذ
مين بيحكم بين الناس بالعدل

أنا شايف ان فساد الاوضاع فى مصر خرج بره دايرة الكبار وباه مترسخ فينا احنا كمان ، باه فى كل ذرة فى كل نسمة هوا .. فيه فساد وظلم وقهر وخوف

سلوك الشرطة المصرية صايبني بذعر حقيقي

بجد انا حاسس انى عندي مرض نفسي زي فوبيا من الشرطة

حالة عدم منطقية الأحداث وعبثية الحوادث ولامعقولية الامور تصيبني بالخوف

بس انا عاوز اعرف مين خايف ومين حاسس بالأمان

الحادثة بتاعة نادي الصيد مأثرة عليا قوي ، أنا بعدي من هناك كتير الدكتور الى بيعالج أبويا عيادته هناك، لو الموقف ده حصل معايا، كان ممكن يحصل ايه ، انا مش خايف من الموت انا خايف من الاهانة والبهدلة والتنكيل، أنا عارف انه غلط انى أقول خايف بس أنا فعلا كده، ليه كل واحد بيحاولي نفسه بطريقته هو، ليه الناس شايلة فى عربياتهم مسدسات صوت وكرابيج وشوم وحديد، ليه واحد صاحبي شايل ترسانة أسلحة فى عربيته، استعداداً لأي خناقة فى الشارع مع تاكسجي ولا سواق ميكروباص او سواق ملاكي برده معاه نفس الترسانة

سألت مرة عبقرينو علشان كان فى الامارات قلتله لما بتحصل هناك حادثة ايه الى بيحصل ، هل بينزلوا يسمكوا فى بعض زينا؛ قالي لأ طبعا الاتنين بيقفوا يطمنوا علي بعض يتصلوا بالشرطة تيجي تحقق ويتصلوا بشركات التامين والى ليه حق بياخده ، والكل بيبقي مطمن ومتامن عليه

انا نفسي فى كده

حزنت تاني لما اتفرجت علي العاشرة مساء لما كانت مستضيفة علماء من الطاقة الذرية .. مهندسين واطباء بيطريين وبشريين وخريجين علوم معاهم ماجستير ودكتوراه ومتاكله حقوقهم ، وكان فيه مهندسة عاملة دكتوراه فى الطاقة الذرية والاشعاع والحاجات الغريبة دي بتقول ان مرتبها 1600 جنيه، حاجة عملتلي صدمة، وزعلانة علشان اكلوا منها درجة وظيفية كانت هاتوصل مرتبها لـ أربع تلاف جنيه ، ايه التهريج ده ، واحدة مهندسة خريجة هندسة 5 سنين عملة دبلومة وماجستير ودكتوراه وأبحاث فى الطاقة الذرية وتكنولوجيا الاشعاع بتقبض 1600 جنيه فى الشهر بعد عشرين سنة شغل ، حاجة يعني تخرج من الملة، دول بياعين كروت الشحن بيقبضوا اكتر منها، مندوبين المبيعات وخدمة العملاء الى بيردوا علي التليفونات بيقبضوا اكتر من كده، فيه موظفين عندنا فى الشغل بياخدوا المرتب ده بالدولار وخريجين تجارة مابيعملاش حاجة غير انهم قرايب الكبار .. الكبار قوي

ده مش اسمه قهر وكبت وظلم وفساد ، ليه اسم تاني .. انا مش عارف ألاقي توصيف حلجاة زي كده .. بجد مش لاقي

نفسي أخرج كل الى جوايا بس مش عارف اخرجه

بجد انا قرفان وساخط وزهقان ونفسي أغور من وش البلد المقرفة دى، جايالي حالة من عدم الانتماء الخطيرة ، فعلا بتمني أهج من البلد دي وأعيش فى أي بلد محترمة، أسمع عن سويسرا انها محترمة بس ازاي أسافر هناك ، وخصوصا بعد ما اتجوزت فى الأيام الضنك دى

يارب اصلح حالنا بأه، وهيأ لنا من أمرنا رشدا

ابن خلدون المدرسة والرمز

2008-11-26T03:58:00.000-08:00

أنا طالع من مدارس حكومي ابتدائي وإعدادي وثانوي مأصل يعني .. كل مرحلة اختلفت عن التانية من حيث تعاملنا مع المدرسين وتعامل المدرسين معانا .. فى ابتدائي كانت أبلة سامية مسكانا من أولي ابتدائي لغاية خامسة ابتدائي .. كانت نعم المعلم كانت شديدة جدا وعندها ضمير جدا جدا .. كانت بتدينا كل المواد .. تقريبا كنا بنقعد معاها أكتر من قعادنا مع أمهاتنا .. كانت بتابعنا فى المذاكرة اكتر من أهالينا .. كانت بتهتم بنضافتنا الشخصية .. ضوافرنا ، الساندويتشات ، المناديل، أسباب الغياب، حالتنا الأسرية .. كان عقابها شديد جدا .. كانت تمسك خدودنا تفركها بصوابعها التخينية .. وبدراعها القوي المليان علي ضهرنا .. كانت تمسك البنات من شعرهم تمسح بيهم بلاط الفصل .. لو لقت منها حاجة غلط .. كان عقابها قاسي جدا .. امتحان الشهر مثلا لو الدرجة من أربعين لو واحد جاب من 30 لى37 تكمل الباقي ضرب بالعصاية علي بطن ايديه ... لو جاب من 20 إلي 30 يبقي علي ضهر ايديه لو أقل من عشرين كان بتمد علي رجليه .. ماكانش عندها واسطة .. كنا متفوقين وشاطرين وبنجاوب وبنذاكر وبنخاف منها وبتحبنا .. ولما بتضربنا كانت بتحبس دموعها .. كانت بتضربنا الصراحة زي أي أم بتضرب عيالها علشان يذاكروا أو علشان مايبقوش مهملين .. أنا اختي الكبيرة كانت بتعمل فيا اكتر من كده، والأهالي كانوا بيشجعوا المدرسة علي الضرب

وكانت بتهزر معانا وتمسك واحد واحد تعرف منه هياكل ايه النهاردة .. ومرة جبتلها حمامتين كانت عمتي عملتهم وقعدت تتريق علينا علشان عمتي عاملة الحمام بخلطة المحشي .. كانت تعرف والدتي، وتعرف أمهات باقي الطلبة .. الى كان بيخاف منها البليد الى مش عامل الواجب والى حل وحش فى الامتحان وجاب درجات وحشة
كنا بنخاف من أبلة الحكيمة .. كانت ست مليانة وقصيرة وسمرة وملامحها حادة جدا وكشرية جدا وفظة جدا .. وكمان كانت بتدينا حقن .. كذا مرة بنت تعمل علي نفسها من كتر خفها من الحكيمة دى .. هي فعلا كانت مرعبة .. احنا كنا بنخاف من أبلة سامية لكن عمر ما حد عمل علي نفسه علشان خايف منها قوي كده .. كان خوف مختلف

فى إعدادي المدرسة كبرت أكتر دخل فيها مستويات كتير.. وكنا احنا كمان كبرنا .. وقل عدد المدرسات .. علشان احنا مدرسة ولاد وإعدادي وحكومي وفي عين شمس كمان .. فكان عدد المدرسات قليل جدا ونادر للغاية
شفت بعيني بعد ما كنت بسمع عن المدرسين الى بيستقصدوا الطلبة علشان ياخدوا دروس خصوصية .. ماكناش بنتجاوز مع المدرس .. إلا ما ندر .. كنا بنتجاوز مع طلبة كلية التربية الى كانوا بيدربوا عندنا .. كنا ممكن نتجاوز مع مدرس النشاط، كان عقليا وذهنيا فيه حاجة غلط .. كمان بعض المدرسين كانوا بيضربونا بعنف واضح وشديد .. وشفت كذا طالب اتعور واتبطح أو اتكسرت أو اتجزعت ايديه بقصد أو بدون قصد، بسبب عصاية جت غلط علي ايديه بدل بتيجي علي وشه .. طالب ياخدله شلوت لوز يجلي وييجي فى أطراف صوابعه تتجزع او بطنه او ضهره
حالة واحدة كان فيه عيل صايع وكان أكبر مننا سنا وحجما، فالمدرس جاي يضربه اخد منه العصاية ومسكوا فى بعض .. كنا بٍنِضرب كتير فى إعدادي .. كتير قوي .. أي مدرس بيعدي يلاقي دوشة يدخل مذنب الفصل كله ومدي كل واحد كام عصاية .. احنا كنا معتادين علي الضرب بسبب أو بدون سبب.. عمر ما واحد امتنع عن الضرب أو استنكر او رفض عن حق او بدون وجه حق .. وعمري ما شكيت المدرس لاهلي لانه ضربني بدون سبب، وعمر ما حد اشتكي لاهله وهما ناصروه

عرفت فى مدرسة الحرية الإعدادية من أول يوم ليا فيها معني الشعار المقيت "السيئة تعم والحسنة تخص"، شفت كمان التحرش الجنسي ، فى آخر سنة عملوا فترة تانية فى المدرسة بيحضر فيها بنات مهني فكانوا بيدخلوا فى مواعيد خروجنا وتخيلوا طلبة فى إعدادي متلاحمين مع آنثات ، شفت مهازل والطلبة عملوا مهازل لا يمكن ذكرها فعلا لا يمكن ذكرها، وكمان كان جنبينا مدرسة النعام التجارية، كان بيحصل مش تحرش كان بيحصل هتك عرض والله .. علي قارعة الطريق قدام كل الناس

اما فى ثانوي كترنا أكتر واكتر واكتر.. شفت طلبة بتشتم مدرسين، وبتضرب مدرسين، وبتكسر ازاز عربيات مدرسين، وبتمسك فى خناق مدرسين، وبتف علي مدرسين، وبتبجح فى مدرسين .. وشفت مدرسين بيخافوا من الطلبة
ماكناش بنقول للمدرس يا أستاذ كنا بنقولهم يا بيه ويا باشا ، وشفت مدرسين يضربوا طلبة ويخافوا يقولوا لطلبة تانين بطلوا كلام .. شفت مدرسين بتسهزئ بالطلبة الضعفا أو الطيبين أو الطلبة العاديين علي حساب الطلبة البلطجية .. كتينا فى ثانوي وهربنا من المدرسة وقعدنا علي قهاوي وماحضرناش وجتلنا جوابات رفد وفصل من المدرسة ومكناش بنحضر الحصص .. كان لازم نعيش كده فى المدرسة دى علشان كانت غابة .. الطلبة كانت بتتخانق بالسنج والمطاوي جوة حوش المدرسة، والمدرسين كانوا بيفترجوا علينا .. كنا بنتخانق مع المدارس التانية .. فاكرين فيلم المصارع، أول مايتفتح باب المدرسة كنا نلاقي طلبة المدرسة التانية مستنينا قدام البوابة بالشوم والعصيان والجنازير وتضرب فى أي حد وتعور أي حد
كان كل فصل فى المدرسة عبارة عن دولة مستقلة ليه جيش دفاع وهجوم وبيعمل غارات .. فى وقت الفسحة كان فصلنا يعمل غارة علي الفصل الى جنبينا ونضرب الى قاعد فى الفصل ونبوظ الشنط ونرمي الى فيها .. والغنيمة كانت عبارة عن خشب او دكك نضيفة وهكذا .. والفصل التاني يرد علي الغارة .. ويتكون جيش أكبر عبارة عن جيش مبني يعمل غارة علي المبني التاني وهكذا .. ونفس الغنايم ونفس الخناقات .. كنا بنملي أكياس بلاستيك ماية ونحدفها علي بعض فى الحوش بيبقي عبارة عن حمام سباحة ونطلع من فوق المباني ونحدف اكياس علي كل الناس .. الحمام كان عبارة عن غُرزة .. 3 سنين مادخلتش فيهم الحمام ولا مرة كان بيحصل فى الحمام شرب سجاير وبانجو .. كانت الطلبة بتشرب السجاير فى الفصل .. المدرسين كانوا عارفين كل ده واكتر .. الضرب ساعتها كان قليل قوي .. كان المدرس بيفرض احترامه فقط بشخصيته لا اكثر .

وصل الامر اننا أكتر من مرة نولع فى المدرسة .. طبعا كان ورا المباني زبالة لا يحصي لها،وطبعا 75% من الطلبة بتسجر فمرة حصلت انهم رموا أعقاب السجاير مولعة نزلت ع الزبالة ولعت فى فصول مبني الزراعة

ولما كنت فى مبني العزبة المهيب فى تالتة ثانوي كنا فى الدور الثاني والدور كان عبارة عن فصلين حصلت كام غارة متبالدة ما بين 3/16 و 3/17 تسببت فى حريق الفصلين وماتبقي فيها من خشب وكسر البابين والتوليع فيهم ورمي الخشب الوالع فى الشارع

كنا بنروح المدرسة بعد الحصة الأولي وماكناش بنشيل حاجة معانا لا شنطة ولا كتابة ولا كراسة وحتي قلم .. وماكانش فيه زي مدرسي وطبعا ولا طابور صباح .. وفى الفسحة كنا نجري علي البوابة الحديد نفضل نزق فيها لغاية ما الجنزير والقفل يتكسر ونطلع نجري

كنا الصبح نتجمع ومنخليش حد يدخل الفصول علشان ماتجيش ورقة غياب أصلا
حاولوا مرة ماينزلوناش فسحة . فجه شارون وقفل بوابة المبني من تحت بالجنزير، راح تجمع الفصلين معبرين عن أروع صور تكاتف قوي الشعب العامل وأروع صور الوحدة الأدبية بين جناحي الأمة طلبة ادبي تخصص علم نفس مع طلبة أدبي تخصص فلسفة، مرددين هتافات افتح يا ابن الو تيييييييت افتح يا ابن الو تيييييت وفتحوا بوابة المبني عنوة، وجاء باكيا شارون يعدد مآثار والدته العظيمة التى انجب هذا الغزال الشارد .. شارون ده نيك نيم لمدرس العربي بتاعالفصل الى قدامنا وزماليه المدرسين كانوا بيقولوا عليه كده .. ييجي مدرس يسأل علي المدرس الى بعده أو الى قبله فيقولنا مين الى ببعدي شارون ولا مستر طارق فالطلبة ترد شارون بمنتهي البساطة والليونة

مدرس الإحصاء لما شافني مرة فى الفصل ماعرفنيش .. وكان هايطلبلي الأمن فاكرني طالب من مدرسة تانية سنة كاملة عمره ماشافني .. بس انا أرحم من غيري يه ناس تانية ماسمعش بيها خالص .. والى خلاه يشفوني اني جالي جواب فصل علشان غبت 43 يوم مع اني غبت اكتر من كده

المحترم الى زيي ماكانش بيحضر الى ما نذر
شفت كل ده واكتر.. كان كل يوم كان فيه جديد وعجيب فى الوقت نفسه.. فى مدرسة ابن خلدون
لكن ماشفتش مدرس موت طالب .. ولا أبويا شاف الى أنا شفته .. ولا أنا عاوز ابني ولا بنتي يشوفوا الى أنا شفته أو إلي إسلام شافه

احنا بقينا وحشين قوي

2008-11-12T03:09:00.000-08:00

حاجة تقرف .. كل ما آجي ادخل المدونة وأقول اكتب بوست جديد... أشوف البوست القديم والصورة الى فيها الجدع المكتئب ده .. أكتئب وأقفلها وامسح الى كتبته

حاجة تقرف بجد .. مافيش فايده اغير لون المدونة واديها وش بلاستيك أبيض فى أبيض أقرف منها برده لا والغريبة الاختبار الى عملته بتاع انت شبه مين من قادة العالم ألاقي نفسي هتلر .. هتلر .. آخر حاجة أتخليها اني يكون فيا من هتلر .. غريب قوي الموضوع ده

بس ممكن كنت اتمني من اعماقي ومعميعي انى اكون هتلر .. آه اكيد .. هو ده الاوحتمال الوحيد

لا فيه اوحتمال تاني يكسف انى أكون جاوبت علي أي بتنجان فى البتنجان .. أصل الاختبار ده بالعنجليزي وانا فى العنجليزي .. ماقلكمش يعني .. حاجة بسم الله ما شاء الله مشرفة قوي ... أحقر من أووووووول إيننننننجليييش أووووووول ظا طايم

الناهية يعني

البلد زي ما هية مقرفة والدنيا زحمة وخنقة وقرف وكل الناس زهقانة وقرفانة مش طايقة الهدوم الى عليها ، وبتخانق دبان وشها .. كإن الناس نازله تخنق فى بعض وتغلس فى بعض وكل واحد بيطلع الكبت بتاعه فى وش التاني

ده بيبان قوي فى المواصلات ، وخصوصا فى المترو .. اياك تلمس الى جنبك او تخبط فيه او تزقه ولو زقه خفيفة او تفكر او تحاول تفكر أو تقف جنب واحد بيفكر يسند علي الى جنبك .. تخيل .. شوف ازاي .. أصل المترو ده عاوزله بوست لوحده .. خليه علي جنب

كمان الناس مش طايقة كلمة من بعض .. تحسهم مجانين، كل واحد مستني حكه علي مراخيره علشان يطلع عليه كل احباطاته الخاصة والعامة

قلة الذوق باه الطابع العام فى التعامل ما بين المصريين .. عدم الاحترام وقلة الذوق والغباء والوحاشة والكبر والانانية .. كانك عايش فى غاااااااااابة .. فى الشغل غابة فى الشارع غابة

حتي وانت محترم وزبون وبتشتري من محل تلاقي البياع ولا صاحب المحل بيتنك عليك وبيكلمك من طراطيف طراطيف مراخيريه علي ايه مش عارف .. هو مين الى بينفع مين ولا بيشغل مين .. الحال اتقلب علي الآخر .. غير السرقة والغش

الناس والله بقت علي آخرها .. والى بيطلوه من بعض بياخدوه بمنتهي الانانية وبمنتهي قلة الذوق

لو بتسوق هاتكره السواقة من الشر الى باه فى الناس، السواقة دى شر وبلطجة ، علشان تسوق محتاج عربية حديد فى حديد وتبقي مش بتاعتك أو سارقها .. وتبقي قليل الادب ولسانك وسخ وشمحطجي وشكلك معفن علشان تمشي مرتاح

أو محتاج تبقي باااااااااااااااااااااااااااااارد جدااااااااااااااااااااااااا .. والي يشتمك تقوله الله يسامحك .. والى يكسر عليك .. يكسر عليك هي خلاص وراك الديوان .. والى يقف فجأة عاااادي جدا .. عادي جدا .. عمرك يعني ماعملتها ولا ايه .. والى ماشي فى نص الشارع وبيكلم فى النوبايل ايك تزعجه أو تضايقه بزمارتك المقرفة

ولو علمها مثلا ولف يمين او لف شمال فجأة من غير اشارة .. اعرف انه بيعمل بنصيحة "الإشارات تكشف نواياك لاعادائك إياك أن تستخدمها" وتعرف معلومة مهمة تانية انه ليه اكونت علي الفيس بوك .. ولو مشي عكس الاتجاه اياك تحتج او تقف فى وشه انت هاتعمل فيها مصلح اوجتوماعي ولا ايه

ولو بتمشي علي رجليك مش هاتعرف تمشي .. ليه قولي ليه؟ لأن الرصيف فيه مطبات طالع نازل .. نازل طالع .. وكل محل ماجر الحته الى قدامه .. وفارش فيها بضاعته .. والقهاوي كمان فارشة برة كراسي وشيشة وطاولة وشتايم وصوت عالي حاجة تشرح القلب

هاتنزل تمشي فى الشارع طبعا طبعا هاتلاقي عربيات وموتسيكلات وناس تانية كتير ماشيين فى كل الاتجاهات التمتنتاشر

فالناس بقت تعمل ايه، كل واحد ماشي فى طريقه لا بيبص يمين ولا بيبص شمال.. لا الراكبين عربيات بيخافوا ع الناس .. ولا الناس بتاخف علي نفسها او من العربيات

الحاجة الأهم ان أي مواطن باه عرضه انه يفقد كرامته فى أي وقت من أي نسان .. لان الناس بقوا نوع واحد بس بلطجية لاما بلطجية بنفوذهم .. أو بلطجية علشان ماعندوش حاجة يخاف عليها او منها

الموضوع ما بقاش قتل وسرقة وفساد وعدم حرية وديكتاتورية .. الموضوع ان وحاشة النظام تحولت لسلوك باه واقع بين المصريين وباه حقيقة بشعة بنعيشها كلنا

وأكبر دليل التحرش بتاع جامعة الدول العربية، تحول التحرش الى بيمارسه النظام علي الشعب لتحرش الشعب بالشعب لانهم اتعودوا علي التحرش، وعلي البلطجة

استغربت قوي فى بوست قبل كده لما غليت أسعار البنزين، والمصريين ماتحركوش ولا عملوا اي حاجة علقت سكوت هانصوت تعليق جميل وقالت ان كلنا بقينا فاسدين .. وكلنا عارفين نعمل مصالح رغم علو الأسعار .. السعر هايغلي على الطبيب هايزود الفيزيتا هايغلي علي البقال هايغش وهايغلي بضاعته هو كمان، هايغلي علي الموظف أبو مرتب أقله لو قلنا مش هايرتشي بس مش هايشتغل زي الأول .. وهايهرب من الكومسري .. ومش هايقطع تذكرة المترو ويخش ورا حد ، المهم انه هايعمل اي حاجة تعوض عليه غلا الأسعار ده

الغلظة والفظاظة والجليطة باه العنوان الرئيسي للتعامل فيما بينا .. استعراض القوة والعنف والغضب

كل ما ههو سيئ فى الطباع أصبحنا نملكه نحن معشر المصريين

رسالة 1 إلى اخي الذي لم تلده امي

2008-10-15T02:41:00.000-07:00

حبك كما السم فى العسل
كتفاحة آدم أخرجته من نعيم
إلى واد من نار مشتعل
كطفل تاه فى البرارى
بين الوحوش الضالة
ووصل للطريق
أما النهاية إلى طريقه لا تريد ان تصل

كربان سفينة
وسط محيط هادر
وأبراج الموج تضربه بقوة
بينما الدفة لأوامره لا تمتثل

مالك يا قلب
لنت كما الماء
وهونت كبيت العنكبوت
ورضيت بحب بلا أمل
*
*
حبك كما السم فى العسل
أراه لذيذا
ولكن يحمل بين طياته كل معانى الالم
كمراهق يستمنى شهوته
فيشعر بلذته
يضاجع كل نساء الدنيا
فى غفوته
وما ينال إلا ما قد حلم

*
*
كحبيب احب من ابغضه
فلا ينل من الحب إلا قسوته
ولا يذق من الحب إلا غيرته
وهذا ما قد حصل
*
*

حبك كما السم فى العسل
تتذوقه فتقول يا ألله
وكلمة أحبك تقولها .. فتنتشى بها
ولكن لا تنتظرها
فلن تنطقها أبدا شفتاه
كإن نطقها سيكون قد أثم
وهذا ما قد قسم
*
*
حبك كما السم فى العسل
تقترب منه فيدنوا لك
يهيئ لك امتلاكه
فرائحته سكنت بين الأضلع
وغشاها الدم
وأصبحت فى حكم تكوين العظم
فتمثل أمامك لحما ودم

فتهم .... وتهم .... وتهم
ويراق العسل أمامك
ويذهب العسل لمن هو أولى وأهم
ولا يبقى لك إلا السم
لم يبقى لى إلا السم
فالعسل ذهب لمن هو أولى وأهم
ولم يبقى لى إلا السم
ولن يبقى لى إلا السم

انتهت

عذرا قد كتبتها فى وقت تخيلت فيه أنى الوحيد الذي يمكن أن يتعرض لهكذا أمر

ولم أكن اتوقع أن يتعرض غيري لنفس الأمر

وإن تعرض لن يكون بمقدار هذا الألم

ولكن

وجدت أن حالي ومصيبتي قد تكون أخف حملاً ووطأةً وألماً من غيري

عذرا لم أكن أريد نشرها على الملأ

كنت أريد أن أحتفظ بها لنفسي وفي نفسي

فلقد أندمل الجرح وإن ترك جرحا غائراً فى القلب تمخض عن ندبة ولمحة حزن لا تخطئها العين

فأصعب لحظات العمر لحظات الألم والضعف والضياع والهوان على من تحب وتعشق

ولكن لعلها تكون مواساة لاخ أعرفه أو لا أعرفه

فيعلم أن هنالك إنسان ما قد تعرض لما تعرض له

واستمرت حياته ولم تتوقف بألمها بفرحها ... بمرها بعسلها

مرت وتمر ولن تتوقف عند أحد أو لأحد

فلا أحد يستحقك

أخي الحبيب انت بشر من غير هذا البشر

أهو كله حرس

2008-09-16T01:30:00.000-07:00

تصميم يساري مصري

مفيد شهبندر اللوز أبو العبدين مرداش ينزل البوست ده على أبناء مصر وقالى بالحرف ابقى انشره على مدونتك المهجورة الى الناس نسيتها

أنا نسيتها بس غصب عنى أصلا ، وعاوز أثبتله انها مش مهجورة بأه .. مش مهجورة قوي يعنى

ومش عارف أثبتله ازاي بس لسه ماسرحش فيها العناكب على الأقل ها يا مفيد

ماشي لن انسي لك هذا الموقف يا مفيييييييييييييييييد

وإليكم البوست خليه يعمل مجال شوية علشان يتحسر ويندم أيما ندم انه مانشرش البوست ده على أبناء مصر .. كانت هاتعدي أبناء مصر بالبوست ده

يالا هو الخسران :(

يتحسر الكثيرون على أيام كمال الشاذلى ويوسف والي وصفوت الشريف، الحرس القديم التى كانت أعظم مصائبهم تتمثل فى رشوة للقبول فى إحدى الكليات العسكرية، حادث تصادم فى الصعيد، إنقلاب اوتوبيس فوق كوبرى السيدة عائشة، مبيدات مسرطنة أو خضروات مشعة، ولكننا الآن لا نقدر على أثمان الخضروات المظلمة أو حتى المضيئة منها.

أما الآن فقد لمعت على يد مبارك "الابن" أسماء أتت بما لم يأت به احد من قبل، أتت بما لا عين رات ولا أذن سمعت ولا خطر على قلب بشر.

لم يخطر على قلب بشر أن يذهب إلى مستشفى ليتبرع بالدم فيخرج مصاب بأمراض خطيرة.

ولم يخطر على قلب بشر أن يسمع بموت ألف شخص حرقا وغرقا والجانى مجهول ، ويأتى الحكم بالبراءة يوم مبارة لكرة القدم.

لم يخطر على قلب بشر أن يسمع بان ذكر مصري يصرف على انثى 12 مليون دولار، ويغريها بـ 50 مليون دولار لتعود له، ثم يدفع 2مليون دولار لقتلها، والمصريين يقبعون فى الفقر والجهل والجوع والظلم والمرض وطوابير العيش.

لم يخطر على قلب بشر أن ياتى إنسان ويحتكر "خردة" ويقف حائلا بين الشباب وتحقيق أحلامهم فى الزواج وبناء مأوى للعيش.

لم يخطر على قلب بشر بأن تتحول القوات المسلحة لمعول هدم وترويع لأهل البلد؛ تزيل المباني وتطرد وتشرد الأهالي.

لم يخطر على قلب بشر أن تنتزع الرحمة من قلوب ضباط الشرطة؛ ليقوم ضابط شرطة ـ وظيفته توفير الأمن والحماية للمواطن ـ بتعذيب مواطن آخر وترويعه، وهتك عرضه دورن رحمة او شفقة ليتحول جهاز الشرطة كله لمؤسسة تعذيب ولترسيخ استبداد فرد قُدر له حكم الوطن.

لم يخطر على قلب بشر ان نبتلى بسي السيد طنطاوي شيخ مشايخ السلطان ومشايخ الفتاوي والفرقعات الإعلامية.

لم يخطر على قلب بشر أن تكون كل بطانة جمال مبارك من الفاسدين والقتلة، فمن أحمد عز لهاني سرور لخميس فريد لمحمد أبو العينين لطلعت مصطفى وممدوح سالم ومن الواضح ان القائمة ممتدة.

ألا يوجد إلا احمد عز او كمال الشاذلى؟ أم اننا لا نستحق إلا هما؟ ألا يملك الحزب وجوها أخر؟

ما هذا؟ أعتصر ذاكرتى وأنقب فى الأحداث لأبحث عن الشرفاء فى هذا الحزب؟ أيمتلك هذا الحزب شرفاء؟ فليدلنى أحدكم عن شريف هناك، وبالله عليكم لا تدلونى على صفوت الشريف

ليلة البيبى دول .. ليلة سينمائية ساخنة جدا بالمنشطات

2008-06-26T08:32:00.000-07:00

أبناء مصـــــــــــــــــر

تُصر شركة "جود نيوز" على تقديم سينما من نوع خاص، فكانت رائعتها الأولى فيلم " عمارة يعقوبيان" ثم توالت الأعمال من فيلم "العندليب" إلى "مرجان أحمد مرجان" حتى "ليلة البيبى دول".

تُصر أيضا على تقديم توليفة من النجوم فى كل عمل، وتُصر على الإبهار من خلال إنتاج ضخم جدا، وتُصر أيضا على جودة النص الأدبى، تُصر على أشياء قلما تجدها مقدمة من شركات أخرى.

فيلم "ليلة البيبى دول" يتحدث عن صاحب شركة سياحة مقرها الولايات المتحدة، يُصاحب فوج أمريكى جاء فى زيارة رسمية لمصر يدعوا إلى السلام وذلك من خلال إقامة مشروعات اقتصادية وثقافية مشتركة فى المنطقة، ولكن ينتظره فى مصر هجوم إرهابى... تلك هي كل القصة!!

ولكن رُسم من خلالها عشرات القصص، التى تتناغم وتتداخل وتتصارع وتتجادل وتناظر وتقارع وتهاجم وتدافع، لتقدم وجهات النظر المختلفة، والدوافع المتعددة المتناقدة للمسلم الإرهابى والمسلم المسالم الحقيقى، والأمريكى العنصرى، والأمريكى النصف عنصرى والأمريكى الجمهورى والأمريكى الديمقراطى، قدم عينات كثيرة ليست مصرية فقط بل وعالمية أيضا.

فحكى لنا كيف تحول عوضين (نور الشريف) من مراسل لإحدى وكالات الأنباء العالمية إلى إرهابى، وكيف تحول الرجل الذى أحب صحفية يهودية ناشطة سلام إلى شخص يسعى إلى قتل أي أمريكى أو يهودى، فلقد تعرض عوضين فى سجن أبو غريب لكل أنواع التعذيب حتى وصل الأمر إلى اغتصابه وفقده لرجولته، وتعرض حبيبته الصحفية ناشطة السلام الإسرائيلية (غادة عبد الرازق) الذى قد اتفق على الزواج منها إثناء تغطيتهم الحرب على العراق للقتل دهسا تحت دبابة إسرائيلية.

وقدم أيضا سائق التاكسى المصرى الذى يستقبل صباحه بشرب زجاجة (دوا كوحه)، الرجل المغيب العشوائى الذى يستمع لشعبان عبد الرحيم "انا بكره إسرائيل"، ويروى أن اليهود قتلوا أخوه المجند الشاب على الحدود، كضرورة لسرد تلك الواقعة، فنشعر أن صناع الفيلم يريدون توثيق كل صغيرة وكبيرة؛ إن خدمت الخط الدرامى وحتى إن لم تخدمه.

الفيلم حمل أيضا وجهات نظر المطبعين المصريين من رجال الأعمال، الذين لا يهمهم سوا كنز الأموال، ويغضون الطرف عن أطماع السياسة الأمريكية والإسرائيلية.

حمل أيضا وجهات نظر المواطن الأمريكى "الجمهورى المحافظ"، الذى يرى أن العرب والمسلمين لديهم جينات كره لجميع البشر، فهو يعتقد أن المسلمين يكرهون المخالفين لهم بالفطرة، بينما يرى المواطن الأمريكى "الديمقراطى" أن السبب وراء هذا الكره هو السياسة الخاطئة لإدارة بوش الجمهورية، وإن كان يتفق مع الجمهوريين أن المقاومة تعد إرهابا!!

الفيلم قدم أيضا وجهة النظر حول فلسطين ، وجهة نظر العربى المسلم ووجهة نظر الأمريكى، فالأمريكى يرى لا مانع من العيش فى سلام ـ أي سلام ـ وإقامة وطن للفلسطينيين على بعض من أرض فلسطين التاريخية، ولا داعى للحرب أو القتل، بينما يرى العربى أن الوطن كالمرأة لا يمكن تقاسمه بين رجلين، فترد الأمريكية (ليلى علوى) ولا يمكن أن يستحوذ عليه رجل واحد.

وذلك كان ذروة الحوار بين الجانبين، وتجسيدا حقيقيا لكتب ومقالات ودراسات حول طبيعة الصراع بينهم، ولكن تلك الحوارات قُدمت كما أنك تشاهد برنامجا تسجيليا، أو كأنك فى ندوة كل محاضر له الكلمة ويرد عليه المحاضر الآخر، أو كأنك تشاهد نشرة أخبار أو برنامج إخبارى يقارع فيه الضيوف الحجة بالحجة، ويُقحم فيه الصور الأرشيفية وشهادة الشهود لتبيان قوة منطق كل ضيف، وليس أمام فيلم سينمائى يعتمد على حبكة درامية محكمة تصل بك الأحداث رويدا رويداً إلى ذروتها، من خلال شخوص أحكمت نسجها بمزيج رائع متداخل من الواقعية والإيهام يساعد فى كل ذلك الكاميرا والموسيقى.

الفيلم أشبه بتوثيق لحوادث كثيرة، مثل جرائم أبو غريب، الذى لا أخفى إعجابى الشديد بل إنبهارى بالديكورات بل وحتى الممثلين الذين كانوا أشبه بالجناه الحقيقيون ... الحادى عشر من سبتمبر جاء إخراجه اكثر من رائع وواقعى جدا، كما وثق الفيلم قمع الشرطة المصرية للمتظاهرين على سلم نقابة الصحفيين.

وقد حاولت تلك المشاهد أن تضرب عدة عصافير بحجر واحد .. أن توثق الحدث، وتعطى نبذة تاريخية عن الشخوص، وتخدم الدراما، الأمر الذى أضر بالفيلم جدا لأن سيناريو الفيلم لا يتحمل كل ذلك فخرجت أغلب الشخوص دون بناء متماسك، وأصبح هذا فيلم أشبه بفيلم وثائقى .. ضيوف يحاورون بعضهم البعض، وعدة فلاشات باكات يؤديها بعض الممثلين فى مشاهد تحاكى الواقع.

أما المظاهرات الفلسطينية فلقد وجدتها مصطنعة ولم تقدم جديد، هُم هُم بعض الفتية وبعض ناشطى السلام يرتدون الشالات الفلسطينية يرشقون جنود الاحتلال بالحصى، ولكن زاد عليه بعض المشاهد التمثيلية فها هي ليلى خورى "غادة عبد الرازق" تحاجج ضابط شاب إسرائيلى فتنكسر عينه أمامها وذلك وسط معركة طاحنة بين الجانبين وهي بمنتهى الإطمئنان وبابتسامة جميلة تنتصر عليه فينهزم متواريا خلف عينيه المهزومة المنكسرة.

موسيقى المبدع ياسر عبد الرحمن جاءت أكثر من رائعة، وخفت من وطأة الجمل الإخبارية التقريرية، فأصبحت تعيدنا مرة أخرى وتذكرنا بأننا أمام فيلم سينمائى لا أمام برنامج تليفزيونى أو أمام فيلم وثائقى.

ولي تساؤل لماذا أصر "عوضين" على تنفيذ انتقامه من مدير سجن أبو غريب بالرغم من أن مدير السجن (جميل راتب) قد أفرج عنه بعد علمه بما حدث له، بل وقدم الذين فعلوا تلك الأفاعيل للمحاكمة؟

الفيلم كل الفيلم خدم "البيبى دول" الذى اشتراه (محمود عبد العزيز) لتمضية سهرة حمراء مع زوجته (سولاف فواخرجى) فهو يُمنى نفسه كل عام بتلك الليلة وعندما تحين اللحظة ـ بالرغم من استعانته بمنشطات وبشوربة الزو الخطيرةـ يحدث ما لم يكن على البال، فتحدث أحداث 11 سبتمبر أو غزو العراق أو أحداث فلسطين أو عمل إرهابى يمنعه من النزول أو إنجاب أطفال، ولكن فى نهاية الفيلم وفى سطور صغيرة ينتصر حسام "محمود عبد العزيز" على عجزه وينجب أطفال كُثر عن طريق التلقيح الصناعى وفقط.

جاء أداء الممثلين أكثر من جيد فأداء "محمود عبد العزيز" كان ساحرا بمعنى الكلمة ، رأينا "سولاف فواخرجى" فى ثوب جديد، ووجدنا حسا كوميديا رائعا بلا تصنع أو استخفاف، "نور الشريف" لا يحتاج لعمل جديد يُضاف إلى رصيده لتأكيد موهبته ونجوميته وحضوره الطاغى أمام الكاميرا،"محمود حميدة" جسد ضابط الشرطة كما ينبغى، "سائق التاكسى" الذى حتى نهاية الفيلم لم أعرفه فاكتشفت انه الفنان الشاب صاحب الجملة المشهورة "شهيصنى" فى فيلم مرجان أحمد مرجان، بالطبع جاء أداء "جمال سليمان" راقى بمعنى الكلمة وراسخ وغير مهتز، كل الأبطال كان يلزمهم بناءا جيدا متماسكا أو سيناريو محكم أكثر من تلك الفلاش باكات لترسيخ أداؤهم أكثر وأكثر، وإظهار موهبتهم الحقيقية.

بينما جاء أداء الممثلين المصريين الذين جسدوا شخصيات أمريكية، مصطنعا إلى حدا كبير، فمازلنا نقدم الخوجاية على أن شعرها أصفر وعينيها زرقاء "فليلى علوى" مهما بلغ أداؤها لم تقنعنى للحظة أنها أمريكية، و"جميل راتب" رغم وسامته وملامحه الأوروبية وعربيته الركيكة لم يقنعنى للحظة انه أمريكى.

الجديد أن الفيلم قدم لنا ـ كعرب ـ واقعة الهولوكوست فقدم لنا المبرر الأمريكى لدعم إسرائيل، فسارة "ليلى علوى" ناشطة السلام الأمريكية اليهودية روت ما تعرضت له أسرتها على أيدى النازية الألمانية!!

جاء أيضا مشهد راقص أسطورى لعلا غانم وهي فى إحداى الملاهي الليلية ببغداد إثناء الغزو الأمريكى للعراق ، وهى تنهشها أيادى العرب والأمريكان على حدا سواء وتصورها عدسات وكالات الأنباء لينتهى المشهد بانتحار جندى أمريكى وهروبها وسط القصف، ليجسد رمزية فجة مقحمة مع موسيقى سيمفونية تصنع نشاذا مع الواقعية الجامدة التى صاحبتنا طوال مشاهدة هذا الفيلم.

فيلم ليلة البيبى دول فيلم ساخن جدا بالمنشطات باهظة الثمن، فليلة واحدة من فيلم البيبى دول، لا يكفى لمسح أثر عشر أفلام من أفلام السُبكية.

تاج مفيد

2008-04-23T12:37:00.001-07:00

مفيد ربنا يكرمه عشقلى تاج لوز لوزجى مانجالاوز

طبعا مفيد ماينفعش حد مايمشيش كلمته

التاج سهل جدا وفـ نفس الوقت بسيط وعميق وغميق .. تاج تعشيق بجد

التاج عبارة عن 10 أسئلة صعبة أو بتدور فى الذهن

1 - نفسى أدخل فى نفسيات كل البشر وخصوصا ظباط الشرطة، أو الطلبة الى بيقدموا فى كلية الشرطة، وأعرف السبب الحقيقى ورا تقديم كل واحد فيهم فى الكلية دى، يا ترى فعلا عاوزين يحمونا .. يعنى مثلا مثلا هيثم جارى الى فى الشارع الى أبوه جابله نيو اكسنت فاضى لما دخل المخروبة والى بيضرب شعره جيل .. والى كنت بقفشه عند باب حقوق عين شمس بيقف يزغلل الحريم بالدبورة الدهبى .. مسعتد انه يحمينا .. بلاش يحمينا .. يحمى نفسه أصلا .. لا بجد بلاش هيثم .. امشى يا هيثم .. أي حد تانى بيقدم فى كلية الشرطة ليه؟ .. يعنى بيبقى فاهم انه هايدخل الكلية دى علشان يخدمنى ويخدمنا .. وان كل وجوده فى الحياة وكل وظيفته فى الدنيا دى انه يحمينى وانه يخلى باله منى ..وانه مايعرضنيش لأي خطر .. مش وظيفة رجل الأمن برده وظيفة خدمية بالدرجة الأولى ؟

2 – ليه عامل النظافة الى عندنا فى الشغل أو الى فى أي شغل بيشتغل 12 ساعة وبيبذل مجهود عضلى وبدنى كبيييييير جدا بيقفش ـ يعنى بيقبض ـ أقل من أي موظف عندنا برده أو فى أي حته تانية بيشتغل 6ساعات أكتر من نصهم نميمة وفطار وتليفونات وشاي وتفخيد ؟ اوزاي بيتحدد قيمة الأجر؟ على أي أساس يعنى؟

3 – ليه دايما كوبرى اكتوبر والقصر العينى مردومين عربيات ؟

4 – ليه الريس قاعد فى الحكم لغاية دلوقتى؟ صحيح هو مرتب الريس كام؟

5 – هو الريس فاكر نفسه كويس .. يعنى فاهم انه ريس جدع .. عادل، ومحترم ومنغنغ شعبه وكده ، هل عارف انه هايتحاسب عن كل واحد فينا ، مممممممم ، طب بلاش دى ، هل فاكر اننا بنحبه .. اوعوا يكون عارف اننا بنكرهه ومش طايقينه ويبقى ولا همه ... ده احنا نبقى هفأ قووووووووووى ....... اخييييييه :(

6 – ليه فى قاعدة الحمام دايما بيفضل شوية مية .. ومش عاوز حد يضحك ولا يتريق بجد مش عارف ولما كنت صغير كنت بفضل أسأل السؤال ده .. وكنت بسال أسأل تانية كتييييييييير

:))
7 – لو كنت اتولدت مسيحى .. هل كنت هافضل مسيحى؟ يعنى كنت هابقى مقتنع بديانتى وبدافع عنها زي ما أنا دلوقتى .. أعتقد إن الإجابة آه .. بس كده يبقى أكيد فياحاجة غلط .. طب بلاش دى .. حاجة رنت فى دماغى حالا خلتنى اصدع .. لو كنت اتولدت فى إسرائيل يهودى .. هل كنت هاكره العرب والمسلمين زيهم كده .. ولو دخلت الجيش هناك كنت هاقتل الأطفال الفلسطينيين ... مممممممم الموضوع باين عليه كبير؟

8 – ليه حماس دخلت الانتخابات وهي عارفة انها هاتكسب .. وهي برده عارفه ان كل الدنيا مش بتطقيها وهاتجيب عليها واطيها لما هاتكسب .. نفسى أعرف الفايدة من دخولها الانتخابات وسايبانها المقاومة .. يا ترى حسبتها ازاي .. يعنى ايه هيا المكاسب حصلت للشعب الفلسطينى أو للقضية بعد دخولهم للانتخابات .. طب كانوا متوقعين الخسائر الى حصلت دى كلها .. طب كانوا متوقعين ان هايحصل ضرب بينهم وبين فتح .. طب الى حصل على الحدود بينا وبينهم فى رفح ده يصح.. طب لو عندهم متفجرات وبلدوزارات وحاجات كده .. توجهه لفين، لرفح المصرية ولا للجدار العازل .. انا عارف انهم لو هوبوا نحية السور ده هيتروقوا .. هما بيبقوا قاعدين فى بيوتهم وبيتروقوا .. بس فيه ناس بُعدا اصطادت فى الماية العكره .. وأصلا أصلا وده كان كله ليه ؟ وأصلا ليه تبقى كل الخصومة مع مصر .. آه مصر شاركت فى الحصار علشان كلنا عارفين مين الى فى قصر العروبة .. بس لازم نحسب حساب للشعب الى بياخد على قفاه من هنا ومن هناك .. علشان مايفقدوش الدعم الشعبى

9 – ازاي الواحد يبقى زي عز .. وأصلا ازاي عز باه عز ؟

10 – ليه كل ما ييجى حد يحب الاخوان .. يعملوا حاجة فيكره الاخوان .. ليه الجماعة دى بتخسر محبيها؟

ممممممم انا عاوز أسأل حاجات كتير

- لو حسنى مبارك قال انا ماشى ، وعملنا انتخابات حرة ونزيهة .. مين هايكسب .. تعالوا مانقولش أشخاص علشان مافيش حد على السطح ينفع .. هو أكيد فيه ناس كتير تنفع .. بس الى ينفع قاعد فى بيتهم .. زي لما ييجى حد ينوى يخطب مثلا ويفضل يبص على البنات وبيبقوا موزز بصراحة .. ولما عنيه تزغلل على بادى ولا حاجاة كده .. يقوم ييجى حد بيفهم كده يقوله يا بنى بنات الناس قاعدين فى البيت مش الى انت ريلت عليها فى الشوارع دى .. برده الى ينفع يبقى ريس قافل على نفسه بابه ولم يلوث بوساخة السياسة ..

ممممممم نرجع تانى لو الريس ساب الحكم ومثلا كسب الاخوان .. المعارضة هاتبقى عاملة ازاي ... طب الاخوان هايبقوا عندهم استعداد انهم يتخلوا عن الحكم حالة وصولهم إليه لو الشعب بعد كدا رفضهم .. طب كوادر الاخوان .. مش هايبقوا زي مطبلاطية الحزب الوطنى .. وزي أي حد ييجى مثلا وينتقد حماس أو ينتقدهم .. طب مش المعارضة هاتبقى فى قمة شراستها .. بصراحة كده .. مش فيه ناس بتكره الاخوان عمااااااااااااااااااااااااااااااااا .. وشايفة ان كل البلاوى بسبب الصحوة الدينية السبعينية لما خرجوا من السجون ولما الناس رجعت من الخليج الوهابى على رأي الأسوانى .. طب لو اليسار كسب أو الليبراليين كسبوا مش الاخوان هايبقوا فى قمة شراستهم وهايتهموهم بالكفر والزندقة؟

- ليه الاخوان بتعمل مظاهرات كبيرة جداااااااااااا علشان العراق وفلسطين وغزة ومش بتعمل للزيت والسكر والعيش .. ووالله والله دى مش مزايدة؟

– ليه المتدين بيبقى دايما متناقض .. والناس بتكشف تناقضه ده بسرعة وبتحسبه عليه قوى .. مش طبيعى ساعات ان الواحد يبقى فيه الخير والشر .. مرة يصلى ومرة تانية يكسل .. مرة يبقى شيخ .. ومرة تانية مايسبش بنطلون يعدى من غير ما يبص عليه؟

- ليه فيه شقة فى عين شمس 120 متر بس، بـ 200 ألف جنيه محارة وحلقان .. طب وطالما الأسعار غالية كده .. والغنى قبل الفقير بيشتكى ليه الناس قادرين يشتروا شقق وعربيات وحاجات كده؟

– ليه لما بكلم مع أي حد عن احوال البلد بيبقى ساخط جدا وبيعيط ويفضل يقولى كل الأسعار الى غليت.. ويبقى شوية شوية وهايقولى مماعكش 200 جنيه لاول الشهر .. ولما أجيبله سيرة إضراب ولا احتجاج ولا عبر عن رأيك .. يحور ويقولى يا عم انا فاضى.. العيال والدروس والاقساط والولية وأبويا الى مات وامى الى فى الجيش وحوارات فاشلة كده .. يبقى اشرب كمان وكمان وتستهال كل الى يجرالك

- فاضل ايه علشان كل المصريين يتحركوا ... يعنى مثلا هايتحركوا لو قفشنا الريس بيحط سم فى النيل مثلا .. وقال كده.. "بأه فيه حوارات كتيرة من الشعب ده .. وأنا زهقت منه وخلاص وقررت انى هاسمه" .. فجه حد وصوره بموبايل وكان مدون برده، وهو بيرمى سم فى النيل ومعرى شعر شوزان ومخليها عمالة تدعى علينا علشان نموت ولا نروح فى دوكة .. هل ساعتها ممكن نتحرك .. ولا هاتتحبس إسراء .. واختى تتصل بيا ملهوفة وتقولى انها اتفرجت على معتز الدمرداش وعرفت ان فيه حد اسمه إسراء وتقولى اوعى تكون تعرفها .. أقوم أقولها للأسف للأسف ماحصليش الشرف أنا اطول

- يعنى ايه مازوشية .. محمد هانئ زميلنا فى أبناء مصر كان كاتبها فى ميل وبعتهولى .. فاتكسفت أسأله .. فقلت أسألكم انتم؟

– ليه مش كل الناس زي محمد جمعة وميدو مجدى ومفيد

آخر حاجة علشان زهقت .. - يعنى ايه شكرا؟

وده عنوان البوست القادم انشاء الله

قال يعنى وتابعونا وحاجات كده .. صحيح هو ليه مابقاش حد بيعلق .. حسبى الله ونعم الوكيل فيك يا جمعة

صحيح مبروك لمهنى والبوهى على فكرتهم الرائعة مدونات مصرية للجيب

التاج باه أبعته لكل الناس بجد .. ياريت فعلا أي حد يلاقيه ويعجبه ياخده وش بس يبقى يقولى علشان أتابعه

يا تطبطب يا تقطف يا مسهوك

2008-04-04T02:55:00.000-07:00

أول تعليق جالى على التدوينة الى فاتت من د. أجدع بنوته بتقولى فيه شوف ازاي نثأر وأنا معاك .. السؤال ده أحرجنى قوى ... وخوفنى قوى .. وقلت فى سرى ايه يا جدعان هو الموضوع بجد ولا ايه، لا مش أنا الى هاشيل الليلة لوحدى .. ولا أعرف حد :)

بس بجد مش عارف ان كنت قادر للاشتراك فى آلية للثأر ولا لأ .. بس الى أنا عارفه كويس وعاوزه وواثق فيه ومؤمن بيه ونفسى فيه إنى أثأر ... إنى أشوف الى بيحصلنا بيحصل لطواغى النظام

أصل أكتر حاجة بكرهها ، التبلد .. التبلد بيخنق قوووووووووووى وبعد ما بيخنق بيطلب معاك انتقام والانتقام يطلب زي ما يطلب ... بالذات لما تبقى انت تعبان والنظام يبقى عارف انك تعبان .. وبتعيط وبتبربر وبتتألم .. عارف كل الحاجات دى وعادى برده .. ولا يطبطب عليك لا ده ممكن يقولك مال شكلك مقرف كده والبربور على وشك .. روح اغسل وشك كده هو أنا قاطع عليكم الماية ولا إيه .. عالم معفنة ، مخهم صغير .. مش فاهمين الى بيحصل .. لو كانوا مكانه كانوا عملوا كده .. معلش بكرة الصغير يكبر

المهم أنا عارف إزاي نثأر .. الثأر مرتبط بالتغيير .. والتغيير بييجى من طريقين .. لاما بالطريقة الصعيدى بالقوة والحديد والنار وما شابهها من انقلاب عسكرى يقوم بيه حته عقيد وممكن كمان يكون مقدم .. وفى لحظة وثانية يبقى رئيس جمهورية ويطلع عقد الدنيا ونواقصها كلها فينا

لاما بطريقة غاندى مثلا .. زي عدم الامتثال للأوامر والعصيان المدنى والاضرابات والاعتصامات السلمية .. وعدم استخدام العنف بل ورفضه مع الاستعداد لتنفيذ العقوبة .. يعنى هايعدموا الشعب كله ولا هايسجنوه مثلا

كنا بنكلم من فترة أنا ومجموعة أصدقاء .. عن أفضل طريقة من طرق التغيير .. فانقسمنا فريقين .. واحد عاوز يغير بالقوة يروح على الروس الكبيرة يقطفهم ... ويطبق النظام الى هو عاوزه .. وتعالوا نقدم حسن النية .. ونفرض إن الجدع ده هايبقى زي ولد فال بتاع موريتانيا .. هايعمل فترة انتقالية كام سنة ودستور جديد وانتخابات حرة ونزيهة مايشاركش فيها خالص .. ويرجع العسكر لثكناته ... وتبتدى نهضة حقيقية .. وتبقى الدنيا كلها بتتغير والشعب شاكت .. شالوا جيلى والشعب ساكت جابو الجوهرى والشعب ساكت مافيش استقرار سعادتك .. مرة يحمد ربنا .. ومرة يسب الدين ويقول حسبى الله ونعم الوكيل .. وكمان لو ضمنا واحد من الى هايعملوا التغيير ده مش هانضمن الشلة كلها .. ده الواحد لما بيشم الورقة أم 200 جنيه دى بيزنهر كده وبيبان على مشيته .. أمال لو بقوا على عرش مصر هايعملوا ايه

ألا صحيح الورقة أم 200 جنيه دى لا بنعرف نشيلها وبيصعب علينا نصرفها زي البيت الوقف كده .. بس بتصرف .. تيجى ويبقى يحلها الحلال

المهم

الفريق التانى كان مثالى شوية .. طبعا أنا كنت على رأسه .. عمال يقول لازم الناس هي الى تعمل التغيير .. علشان تقدر تحافظ عليه.. لازم الشعب يتربى ويتعلم، والحرية تمشى فى عروقه زي الدم .. علشان مايبقاش لعبة فى ايد شوية عسكر مخهم أضيق من راس الابرة .. والاعتصامات والاضرابات والعصيان المدنى هو الحل .. ولازم الناس كلها تشارك فيه .. وكل واحد عاوز يحسن حاله وحاسس ان النظام هو السبب فى الى هو فيه لازم يشارك فى العصيان المدنى ده .. والناشطين الى زينا لازم ينشروا الثقافة دى .. حتى الشباب الى عاوز يغير بالقوة لازم يجرب يساعد الناس قبل ما يروح ع الروس الكبيرة ..

بس بعد شوية ..حسيت انى غلطان .. الأسرع اننا نقطف الروس الكبيرة .. علشان الشعب ده مات .. أصل لما المرتبات تفضل زي ما هي .. وأسعار السلع الأساسية تزيد 200 المية يبقى الشعب ده تمام التمام وغنى وعنده فلوس وأطيان فى البنك .. ازاي شايل أطيان فى البنك مش عارف .. بس الأكيد مش فارق معاه غلو الأسعار .. ولما يشوف عماد الكبير متعشق فيه عصاية .. ومايعملش حاجة ويبربر الموضوع ده .. يبقى الشعب ده لامؤاخذة بيتكيف من الحاجات دى .. يبقى الشعب خلاص شذ وباظ وانحرف خلاص .. ولما تكلمه يكلمك بكل بجاحة ووقاحة غير معهودة ويقولك ده زواق ميكروباااااااااااظ وبلطجيييييييييى ياما روع الناس .. فليه ما تيييييييييييييييييييت ويتربى

فآجى أنا وأقوله بأه يا تييييييييييت يتيييييييييييت ده انت إلى تيت و ابن تيت وشعبك الى هو شعبى شعب ابن ستين تيييييييييييت

وأحب أقوله شكرا يا عم الشعب كتر خير خيرك .. خليك متكيف زي ما انت .. مش هانقطع عليك تظبيطك ... بس سيب الى عاوز يعمل يعمل من غير ما تسفسط عليه ولا تنظر عليه ولا ترجع عليه

البوست الجاي هاحكيلكم على موقف حصل معايا .. خلانى أقول كده .. وكمان نكون شوفنا يوم 6 أبريل حصل فيه ايه

أدينى مش رايح الشغل لما نجيب آخر الناس دى معانا

القناعة الراسخة ... الثأر

2008-03-14T00:23:00.000-07:00

عندى قناعة قديمة قوى، بتأكد من صحتها بمرور الوقت ألا وهي: لكي نشعر بآلام الآخرين ـ أي آلام ـ لابد من تذوق هذه الآلام، بمعنى .. إننا علشان نشعر بمعاناة الفقرا الحقيقيين، الى هما فعلا مش لايقين ياكلوا .. وبيصحوا الصبح ومافيش فى جيوبهم ولا مليم، ولا عندهم تلاجة أصلا علشان يبقى فيها أكل .. ويا عالم هاياكلوا فى اليوم ده ولا لأ .. على فكرة هو ده الجوع الحقيقى .. مش جوع الصيام.

فعلشان نحس بالمعاناة دى، ونحاول بكل إخلاص وصدق تغيير واقعهم ومساعدتهم بكل ما يلزم ذلك من وقت وجهد ومال وأعصاب ..... علشان ننتصر على التبلد والبرود الى جوانا ... لازم نمر بالى مروا بيه .. لازم نخوض التجربة كما هي .. لازم نعيش عيشتهم .. ونحس إحساسهم ، وقتها بس فعلا ممكن تبقى قضيتهم قضيتنا وألمهم ألمنا وحزنهم حزننا .. وقتها بس هيبقى كل شاغلنا وكل تفكيرنا إننا نغير واقعهم ده.

مع إن المفروض يكفى الشعور الإنسانى .. لازم يبقى متأصل من جوانا مساعدة المحتاجين .. مش نساعدهم إلا لما نمر بظروفهم

فاللامبالاة حجبت الرؤى . والتبلد كسى القلوب .. وعدم الاهتمام احتل العقول وسيطر عليها

فببص ع الحكومة وأشوف هي بتتعامل مع الشعب إزاي .. لقيت إنها بتتعامل مع الشعب كتقارير تنمية بشرية .. كأرقام إحصائية جوفاء .. هو لما يطلع تقرير يقول إن الفقر وصل 60 % من الشعب المصرى .. هايتأثروا قد ايه .. هما مايعرفوش ايه مظاهر الفقر دى، من جوع وحاجة ومرض وجهل وأمية وتخلف وكره وتعصب وجريمة وألم

لما رئيس الوزراء أيام مشكلة الضرايب العقارية يصرح ويقول ان الحكومة مالهاش دراع علشان يتلوى، ومالكمش حاجة عندى، والى ليه شوق فى حاجة، وفى نفس الوقت فيه موظفين حكوميين محترمين معتصمين نايمين هما ومراتتهم وعيالهم فى الشارع علشان كام مئة جنيه، ده نسميه ايه .. تبلد ممكن برود جايز فساد أكيد كفر يعنى قلة ادب وسفالة مغلطناش

ده يوصلنى لثقافة الثأر الى بحبها اوى .. والانتقام الى بموت فيه .. والتشفى الى ربنا يتوب عليا منه .. يبقى لما أتمنى انى أشوف رئيس الجمهورية هو ومراته وعياله ومعاه كل الوزرا والكبرات نايمين فى الشارع وأشوف مبارك وهو بقاله أسبوع ماستحماش وريحته فاحت وعمال يجعر .. وتبقى مراته ست تخينة رابطة شعرها وتراب الشارع لزق على وشها وشعرها طالع من الأشرب ومنكوش .. وعياله لابسين شباشب مقطعة وصوابع رجليهم طالعة لبرة ، غير ان رجليهم وسخة وسودة ومقلحفة .. ويبقوا نايمين فى الشارع فى عز البرد وفى أيام مفترجة علشان فقرا وجعانين ومش لاقيين ياكلوا .. ولايأكلوا عيالهم .. ويعدى عليهم مسئولين ليل نهار بعربيات مصفحة ست متر.. محبوسين جوه ازازهم الى بالكهربا والهوا المكيف الى مش بيخليهم حتى يسمعوا صوت ماتور المخروبة الى راكبينها .. أكيد لو مروا بالظروف دى .. أكيد هايعملوا حاجة وهايحاولوا يساعدوا الناس دى

الثأر ... الى بتمناه لمبارك ومسئومى الحزب الوطنى .. انهم يعيشوا معاناة الناس الحقيقية .. المعاناة الى نكروها .. المعاناة الى مهتموش بيها .. المعاناة الى عملوها بمنتهى الغطرسة واللامبالاة والتبلد .. العدل يقتضى انهم يناموا فى الشارع .. انهم يجوعوا .. انهم يضربوا .. انهم ينتهك أعراضهم .. عيالهم يتعلموا ومايلاقوش شغل .. لازم يدوقوا المراارة دى .. يتعالجوا فى مسشفيات حكومى .. ويشوفوا بيحصل ايه هناك .. يقفوا فى طوابير العيش ..

الثأر يقتضى كل ذلك وأكثر

فهمى الآن ليس التغيير .. فالتغيير لا يعنينى الآن اكثر من الثأر

ستاير

2008-03-07T01:44:00.000-08:00

قفلت بابك بالستاير

ع الى داخل والى خارج

والمخارج والمعابر

والبيبان دى حيطة سدة

بالمدافع والخناجر

فى وجه غزة

ده وضع فاجر

م اللمامة م الحثالة

اليهود ... الصهاينة

ده حيطة قايلة للسقوط

ده عمارة قايلة للهبوط

فوق الأكابر

والعدو فى نفسه شر

واخوانا قاعدين فى الحر

غرام وهيام

فى العدو المكابر

والحبيب والصديق

والمصلح والأديب

فى السجون والعنابر

والدنيا رايقة للسياحة

مصر ليهم استراحة

جواسيس وليلة

زنا وأباحة

فى مصر الجثارة

قوى وإثارة

وملهى ليلى

فى حته ضلمة

وبلاها فلاحة

فى وش غزة

ده تبقى عزة

ده كفر وتناحة

من الغبى التيس

الى عاملى رئيس

ومخه عاوزله جراحه

يبطله ده التناحة

يفكره بالأصالة

والوطن الرسالة

بالعافية أو بالراحة

مغامرات حباصة فى الهايكستب

2008-02-26T11:56:00.000-08:00

كان نفسى يبقى بوست كوميدى .. لكن هاتيجى منين الكوميديا

المهم أنا أخدت تأجيل 3 سنين من كام شهر كده .. وعلشان آخد التأجيل ده ، عملت أربع مشاوير .. ومن الأربع مشاوير قدرت أحدد إزاي المصريين ـ الى هما إحنا يعنى .. وصلوا للى هما فيه ، سواء من رضا بالذل والمهانة والتخلف والهمجية الخوف والجبن والسلبية .. وشفت بعينى مثال حي وعينة عريضة من مستقبل همجى .. سلبى .. جبان .. وضعيف

من موقفين حصلوا يوم الكشف الطبى

الاول
صاحى بدرى .. تلاتة الفجر .. مجهز شنطتى فيها كمية ساندويتشات معتبرة وعصاير على كام كتاب .. صليت الفجر وتوكلت على الله روحت على هناك مافيش تلت ساعة وكنت واصل .. لقيت شوية شباب ماشيين فى الصحرا كده مشيت معاهم .. لأنى ماكنش لسه جت الأوتوبيسات الى بتوصل لغاية بوابة الكشف الطبى .. المهم مشيت مسافة زي من العباسية كده للتحرير ... المهم لقيت طابور ما شاء الله طوييييييييييييييييييييل جدا .. أطول طابور ممكن حد يشوفه فى حياته، يتكون من حوالى 300 نفر .. المهم وقفت وراهم .. ومحاولتش أفكر ازاي الناس دى سبقتنى لأنى كنت متوقع انى هابقى ألو واحد واصل هناك !!

المهم

فضل الناس توصل وتوصل ويقفوا ورايا وهكذا .. لغاية ما جه أوتوبيس ولحظنا العثر .. تتفتح البوابة مع مجية الأوتوبيس ده .. قوم إيه .. العيال الى فى الأوتوبيس يجروا ع البوابة علطول .. ومش يقفوا فى الطابور .. طبعا الأوتوبيس محمل ييجى 80 واحد على الأقل ده كان فيه ناس متشعبطة على رفارف الكاوتش .. المهم بأه الى فى الاوتوبيس بيجروا والى واقفين فى الطابور بيجروا .. يمين بيجرى شمال بيجرى .. قدام بيجرى .. طب الى واقف قدام بيجرى ليه نفسى أعرف !!!

أسفر هذا الحادث عن كسر ساقين .. وثلاث ايدين

المهم جمعنا الطابور تانى ووقفنا فى انتظار فتح البوابة من جديد .. قوم إيه برده .. تتفتح البوابة مع مجية أوتوبيس جديد .. ويتكرر نفس السيناريوا

حينها اضيقت عيناي .. وأنا أرى تلك الرعاع الهائجة .. كأنها تهرب من نيران ضارية .. وكم تمنيت حينها أن أرتدى حزام ناسف، وأفجر نفسى وسط الرعاع الهائجة

تخيلوا كده شباب جامعى فى مقتبل العمر يحمل هذا القدر من الهمجية واللا نظام

ماكانش هايحل الموقف ده .. غير شوية عساكر بحزمة و وشوم وعصيان يعيدوا النظام بنعال جزامهم .. مش بقولكم عينة من الطرفين .. آه ما احنا غنم ورعاع نساق كما يساقون

ما علينا

الموقف التانى .. واحنا فى غرفة الكشف الطبى .. ودى غرفة كبييييييييييييييييرة جدا ... واقفين حفاة شبه عراة .. تخيلوا شكلنا بعد يوم مرهق .. طويل من الفجرية لغاية خمسة ستة المغرب ، حمل كم سخافات غير عادى وقلق غير طبيعى .. وانتظار طويـــــــــــــل ممل بدون هدف.. اتوضينا بمية معدنية وفيه ناس تيممت .. تخيلوا المنظر .. كل واحد فينا واقف زنهار عريان حافى يجر هدومه وشنطته وورقه .. ويجر أيضا هموم ثقيلة ومستقبل يبحث عن مفتاحه وكلمة سره .. والأخطر والذى لم اكن اتوقعه انه يجر كرامته التى من اليسير جدا أن يتخلى عنها عند أقرب محك

الى حصل .. شاب رقيع ضحك ضحكة رقيعة .. زي بتاعة مدرسة المشاغبين .. رنت طبعا فى الصالة الواسعة .. وكان معدى عسكرى، سمع الضحكة دى .. وبصراحة ضحكة تستفز أي حد .. دخل العسكرى وفضل يوجه إهانات لصاحب الضحكة .. وأنا لو كنت أعرف الى ضحك ده كنت ظبطه راجل تانى .. المهم العسكرى وجه إهانات لصاحب الضحكة يندى لها الجبين .. إهانات تمس شرفه وعرضه .. تذكر أمه وأخته وامراته .. تمس ذرات رجولته وكرامته المتبقية والمتبعثرة .. تمس حاجات خطيرة جدا .. وتمس المحيطين بيه برده .. المهم العسكرى بعد ما شتم .. ولقى الناس بتدارى على الى عمل العملة .. قال انه يعاقبهم .. آه والله يعاقبهم .. وازاي باه .. قال انه يذنبهم، وفعلا قالهم اقفوا وماحدش يقعد غير لما ييجى الباشا الدكتور

الأخطر من العقاب .. انهم مالتزموش بالعقاب .. وياريت مالتزموش وبس .. دول عملوا حركة من أسوأ ما يمكن .. لما مشى العسكرى قعدوا هما .. وكان كل ما يعدىخيال حد يقوموا يقفوا

تخيلوا كده شباب طول بعرض عريان وحافى .. شعر راسه قصير قـــــوى، وتحت مناخيره شنب وفى صدره شعر كتيييييييييييير .. ورجليه برده فيها شعر .. وعنده عضلات .. وممكن تلاقى دبل فضة فى الايد اليمين أو الشمال .. هاذولا يسموا رجال، فسيولوجيا رجال مكتملين النمو والاحساس، وعرقيا رجال مصريين شرقيين وحوش سبوعة .. دول باه كانوا بيخافوا من خيال العساكر .. كل ما حد يعدى يقفوا .. ولما ما يلاقوش حد بيدخل الأوضة يقعدوا تانى

مش عارف لما شفت مناظرنا كده .. تخيلت يوم القيمة .. لما نقف قدام ربنا خارجين من القبور .. هانكون حفاة عراة غُبر شُعث .. شايلين ذنوب ثقييييييييييييييييلة جدا ومحرجة جدا .. يا ترى خوفنا من ربنا هايبقى زي خوفنا يوم الكشف الطبى ولا هايبقى زي خوفنا واحنا بنسمع مواعيد الإرجا .. ولا خوفنا لما نقابل شخصية مهمة فى الشغل .. ولما نفس الخوف لما تقف فى لجنة ومش معاك رخصة .. ولا نفس الخوف واحنا فى انترفيو شغل .. ولا نفس الخوف أيام الامتحانات

ونخاف ليه أصلا .. نخاف ليييييييييييييييييييييييييييييييييه ؟؟؟

ساعتها جالى صدمة عصبية وحضارية

لله العوض ومنه العوض

مافيش إحساس صح ؟

2008-01-21T07:57:00.000-08:00

ياااااااااااه وحشنى التدوين جدا
بجد وحشتنى المدونة أوى .. ووحشتنى حياتى القديمة

بس خايف
آه خايف

خايف وانا بكتب البوست ده

خايف من فترة التخبط دى

خايف من أي قرار ممكن آخده وانا فى الظروف دى .. وخايف ماخدش قرار يحسم الظروف دى .. وخايف من الحسم .. لان المرحلة الى انا فيها دى أي قرار باخده بيترتب عليه حاجات كتيرة قوى، وممكن آخد ناس فى الرجلين مالهمش ذنب .. وخايف لحسن يكون الى متخيله حسم ده يكون مسكن ... يسكن الوجع الى أنا فيه ... بس آثاره الجانبية تبقى محتاجة لجراحة .. وأقضى حياتى كلها فى امراض ... أمرض نفسى واعالجها بمرض اخطر

علشان كده اتمنيت انى أفضل افتراضى .. آه افتراضى .. انى أفضل منذر .. منذر مين ... مانعرفش .. لا نعرف .. حباصة منذر اليوسف .. طب مين يعنى .. يا عم عادى بأه..

وفكرت انى أعمل مدونة جديدة .. بشخصية جديدة

أصلى مش هاقدر أنسى أبدا شغفى لمعرفة كل الناس الى بتدون .. بجد شعور جارف انك تبقى عاوز تتعرف وتشوف الناس الى انت بتتواصل معاهم .. وتبتدى ترسم صورة لكل واحد .. ده طويل وده قصير .. ده شاب وده راجل كبير .. ده عصبى .. ده هادى .. دى شكلها عندها عيال وكبيرة .. ودى شكلها صغيرة .. ده شكله بدقن ياعم .. وده شكله شاب روش ... دى دمعها عسل .. ودي أكيد خنيقة جاد جدا اوعى وشك .. ياااااااااه بجد كنت فرحان قوى لما كنت بشوف الناس ولاول مرة .. نفسى أرجع الاحساس ده تانى .. بس تقريبا صعب

برده كان نفسى أفضل بعيد عن الاحداث .. الفترة الى فاتت دى قربت كتير من احداث مؤلمة .. لمست معاناة حقيقية .. لمست معاناة سمعت عنها كتير وقريت عنها .. بس لما قربت منها فهمت حقيقتها .. فهمت ان مش كل الجوع .. جوع الصيام .. كلمة البرد .. من 3 حروف لكن حقيقتها أكبر من ان توصف فى 3 صفح .. وان البرد مش كله انتعاش .. ومش شوية ماية برشهم علشان مش بحب الحر وودانى بتحمر .. ولا قعادى جنب الشباك فى الأوتوبيس .. ولا فتحانى لشباك العربية ودلدلة ايدى .. ولا تمشية ع الكورنيش وانى أبقى قاصد انى ألبس خفيف .. علشان عاوز الهوا البارد يتخلل جسمى كله .. ولا هي تكتة برد الصبحية بعد ما المنبه يرن علشان أروح الشغل وبعديها آخد الدش السخن المتين ..

بقيت أفهم الكلام شوية .. أو ألمس حقيقة الكلمة .. وفهمت ان الكلمة الى المكتوبة فى خبر .. لما يتحكيلك عن عنها غير لما تشوفها بعينك غير لما تقراها غير لما تتعرض ليها شخصيا

عرفت معنى جملة تقولها مذيعة فى نشرة وهي متمكيجة ومبتسمة ابتسامة بلهاء تنقلنا خبر ان فيه ناس بيوتها اتهدت وقاعدين فى الشارع

مثلا

لو قرات عنوان خبر فى جريدة بيقول، من أجل إقامة محطة مياه الحكومة المصرية تقوم بطرد عدد 50 أسرة من أرضهم غير تجريف هذه الأرض وإتلاف ما بها من محصول، وهدم ما بها من بيوت، فلجأ الأهالى إلى العراء فى ظل هذا البرد القارس حيث إتخذوه ماوى لهم

نقطة وخبر جديد ع اليمين والشمال وصفحة الرياضة والفن والسياسة والأحزاب ودنيا تانية خالص

سؤال ؟

هاتتوقف قدام الخبر ده قد ايه .. يعنى هايشغل كام ثانية من وقتك ... هاتفكر فى الناس دى؟ .. هاتتخيل لحظة هدم البيوت وتجريف الأرض .. طب ايه المشهد الى ممكن ييجى فى بالك ... ده فى حالة انك لو تخيلت أصلا .. طب كلمة اتخذوا العراء مأوى لهم .. فكرت فى معناها .. ايه الصورة الى جت فى ذهنك .. صور عشش ولا خيم ولا ناس غلابة ولا أكلهم ولا شربهم ولا مكان استحمامهم وقضاء حاجاتهم .. طب هاتتخيل قلقهم ..

طب هل مثلا حصلك موقف انك كنت مسافر وفى أرض غريبة.. ومش معاك فلوس وماتعرفش حد هناك.. وكان معاك مراتك وعيالك والليل ليل عليك ومابقتش عارف تنام فين .. طب مراتك عرضك وشرفك الى بتغير عليها م الهوا الطاير .. والى لو بان منها حاجة تبقى عاوز تاكلها ولا تاكل الى بيبص عليها .. هاتعمل ايه وانت فى الشارع والليل هايليل عليك وخلاص الشارع بيفضى وبيضلم وخايف لحسن ييجى بلطجى ولا شمام ولا حتى بوليس .. طب عيالك هايناموا فين وازاي .. طب لو واحد فيهم عاوز يشرب ولا عاز يعمل حمام .. صحيح لو مراتك عاوزة تعمل حمام هاتتصرف ازاي .. انت هاتعمل ايه وهي هاتعمل ايه فى موقف زي ده .. طب لو عرفت ان ده هايبقى وضعك الدائم إلا أن يشاء الله هاتعمل ايه ... ؟

إحساس مين أصدق

إحساس واحد قرأ بس .. ولا إحساس واحد تابع وحاول يساعد .. ولا إحساس الى فى المشكلة

ولا مافيش إحساس
؟

دائما وأبدا

2007-12-27T11:03:00.000-08:00

دائما وأبدا أبنى حياتى ومستقبلى على بديل واحد

فعينى لا ترى غيره

وقلبى يؤمن به إيمان تام ... ويراه الكمال الذى أنشده

وعقلى يوقن بأنه وسيلة وغاية فى نفس الوقت .. تحقق لى السعادة فى الدنيا والفوز بالجنة فى الآخرة

ودائما وأبدا أيضا يكون هذا البديل مستحيل تحقيقه

ودائما وأبدا لا يتحقق هذا البديل لظروف لا يد لى بها

ودائما وأبدا آخذ بالأسباب العملية والعلمية، ويكون معى زمام المبادرة ، وأسير فى الطريق غير آبه للنتائج، محددا الصعاب .. واعٍ لها ، متوكلا على الله أنى أستطيع اجتياز كل صعب ، ولكن فى لحظة ما يتوقف كل شيء أمام عينى ، وتتكتف يدى، ويسكن معها سيل قطرات الدم فى العروق ... بل أكاد أشعر أنى أحيا دون أن أتنفس ..

وأعجب حقا كيف أحيا وقد ماتت معى أشياء كثير

كيف أحيا .. وقد اخترعت من خيالى لنفسى عنصرا جديدا غير الأكسوجين أحيا به ، وبعد أن صنعته فى خيالى، وهيأت نفسى للاختراع الجديد، وبدأت أعتاد على زيف هذا الاختراع الخيالى، الذى سيحقق لى كل شيء أتمناه، وبعد أن أقول لنفسى أنى أستطيع التغلب على كل الصعاب لتحقيق هذا الهدف، وأسير بالفعل فى طريق تحقيقه بكل الطرق والوسائل ... دون أن أغفل للعقبات والمشاكل .. لا أستطيع تحقيقه ... فتلك العقبات لم أصنعها .. ويسهل التغلب عليها ... يسهل جدا

ولكنى لا ادرى فهذا قدرى،

والأكثر إيلاما أنى لا أستطيع العودة إلى الأكسوجين القديم
.
.
.

لقد افتقدت التدوين

وعذرا على غلق باب التعليقات ... فيكفينى صدى صوتى

ورايا جيش

2007-10-25T20:33:00.000-07:00

سلام ورايا جيــــش

مش عاوز انسى

أي مدون دخلت مدونته، سواء علقت أو ماعلقتش

مدون تواصلت معاه على الماسنجر، أو قابلته

مدون اتخانقت معاه

مدون اتفقت معاه ... مدون اختلفت معاه

مدونات كرهتها ... مدونات عشقتها

مدونات كنت المفروض ادخلها، وحظى العثر مادخلتهاش

أول ناس عرفتهم المدونين العرب ، اتعلمت منهم، وشجعنا بعض

مش عاوز أقول أسماء علشان مانساش حد، بس هما عارفين نفسهم

كان ليهم الفضل انها تفضل مفتوحة ، وانى لا أخجل من كتاباتى

بعد كده مدونين من اجل التغيير

ومجموعة القلوب البريدية، يارب تستمر على نفس النشاطات

بعد كده المدونين الى اتقبض عليهم، او الى اتعرضوا لمضايقات

وكنت اعرفهم أثروا فيا جدا، ودول الى خلونى أنزل للشارع

مرورا بمدونى الاخوان ، المحترمين دمثى الخلق

والمدون خانة

ولغاية ما بقيت فى فريق عمل أبناء مصر

الفريق ده، يخليك تشتغل، لازم تشتغل، الى فيه حماسيين جدا ومهمومين بالقضية ومنفتحين وملتزمين ومنظمين جدا

ومخلصين جداهايوصلوا ان شاء الله وهايغيروا باذنه

بيخافوا على بعض قوى، كانهم جيران أو قرايب

لو حد حابب يشتغل يروحلهم يا جماعة

وأراكم على خير ان شاء الله

محمد فاروق

الى كان ضاحك عليكم باسم منذر

كيف من البداية أنتبه؟

2007-10-22T20:48:00.000-07:00

من أين تسرب هذا الشعور؟

أتسرب من بين أصابعى؟

أين هم حراس الثغور؟

حينما ضاعت ودائعى

أأصاب عقلى الضمور؟

حتى ينفد حبها من بين أضلعى

أكان عليّ تحطيم الجسور؟

حتى لا أجرح فى مسامعى

أكان علي وئد هذا الشعور؟

أو أن أأمر بسجن أدمعى

ولكن

تركت لقلبى العنان ... فأحبها

تركت لعقلى اللجام ... فهام ولعا بها

تركت روحى تحلم أنى فى يوم

...
سأبيت بين أحضانها

* * *

كل هذا وأنا أعلم أنها ليست لى

كل هذا وأنا اعلم أنها لا تفكر فى

وبينما وأنا أسطر هذه السطور

ويترقرق الدمع من عينى

ويجتاحنى مثل هذا الشعور

أعلم أن حبى لها بلا أمل

أعلم أن حبى لها سيندثر

أعلم أن قلبى من الشوق سينفطر

أعلم أن دموعى من الحزن ستنهمر

أعلم أن جرحى أبداً أبداً لن يندمل

وأنها ليست لى

* * *

أذهب لركن بعيد وأنتظر

واخفى عينى عن عيون البشر

وأظل أتأمل فى ملامحها دون ملل

وان ضحكت يضيع عنى أي كلل

وان غضبت أكون كالجمر المشتعل

وان ذهبت أخشى على نفسى من الشلل

* * *

أفتشعر هي بما أشعر به؟

أتظننى صديق؟

أتظن أن هذا الاهتمام

يأتى من أخ أو رفيق؟

ألا تنظر لى أبدا

كحبيب أو زوج أو عشيق؟

أعندما تحدثنى

أتشم هي نفس الرحيق؟

أعندما تنظر لى

أتكون تلك نظرة شقيق؟

أعندما تأتى لى

أتتمنى أن تسلك نفس الطريق؟

أعندما أغيب عنها

أتشعر هي بنفس الضيق؟

* * *

فكيف أصبحت هكذا مهموم؟

وكيف من البداية انتبه؟

وكيف أحبها بهذا الجنون؟

وأنا اعلم أنها لى ... لن لن تكون

شعب عاوز يعيش

2007-10-19T05:06:00.000-07:00

من المتعارف عليه أننا نطلق هذه الجملة غالبا على الشعوب التى تعيش تحت نير الإحتلال مثل الشعب العراقى أو الشعب الفلسطينى او الشعب الأفغانى، فشعوب هذه الدول لا تأمن على سلامة مواطنيها من القتل، فالرجل العراقى وهو ذاهب إلى عمله صباحا، يتمنى ألا يكون فى إنتظاره عبوة ناسفة على حافة الطريق ، أو لا تضرب وزارته او هيئته الحكومية التى يعمل بها قذيفة هاون او صاروخ مطلق من طائرة اف 16 امريكية، والمرأة العراقية كل املها وهي ذاهبة إلى التسوق، ألا تقابل مفخخ بشرى مثلا يستهدف السوق الذى ترتاده، حتى الأطفال العراقيين فى مدارسهم لا يامنون على حياتهم ، فالمدرسة معرضة هي الأخرى للقذف من الأمريكان او المليشيات، حتى الرجل العجوز وهو فى مسجده، ممكن ان يتهدم فوق رأسه او تقتحمه قوة أمريكية تقتله وهو ساجد فى محرابه، او تهاجمه مليشيا مسلحة تقتله وتحرقه مكانه وهو ساجد، وهذا الموظف العراقى البسيط بعد ما أنهى عمله بسلام لا يامن رجوعه، فمن الممكن ان تنتظره مغاوير الداخلية العراقية، تختطفه وتقتله بعد أن تذيقه مر العذاب .

وهذا نفس الحال مع المواطن الافغانى والفلسطينى، مع اختلاف نوعى إلى حد ما، فهذه الشعوب كل املها أنا تحيا ، فالحياه عندهم فى حد ذاتها رفاهية وطلب غالى جدا لا يتمتعون به، فرائحة الموت ومشاهد القبور فى كل مكان هناك، ولذلك لا يفكرون كثيرا بالحرية والديمقراطية وحقوق الإنسان، ورفع مستوى الدخول ومستوى المعيشة وغيرها من المطالب التى يطالب بها شعوب العالم الثالث، فهم يحلمون أن يصبحوا تحت حكم حكام ديكتاتوريين مثل حكامنا ، على أن يحكموا على أيدى حكام خونة جاءت على ظهور دبابات الأعداء، بالرغم من أن حكامنا صورة كربونية من حكامهم، فكامنا عبيد ولكن متخفيين، وحكامهم عبيد سافرين !!!

تخيلو معى اننا كشعب مصر لا يعيش فى ظل محتل أجنبي بغيض ظالم ومتجبر يكرهنا ويتمنى فنائنا، ولا نتعرض للغارات أو الحروب أو القصف من دول معادية، ومع ذلك فهذا الشعب يتعرض لسفك دمه .. نعم نحن نتعرض للموت !!! ... نتعرض للقتل !!! ، لا أتكلم عن الظلم، أو القهر أو الاستبداد أو المحسوبية أو الرشوة وغيرها من الأمراض، ولكننا نتعرض لسفك دماء حقيقية ، أليست حوادث القطارات سفك دماء؟ أليست حوادث الطرق البرية سفك دماء؟ أليست حادثة العبارة سفك دماء؟ أليس الإهمال فى المستشفيات العامة سفك دماء؟ على أي مسمى يندرج فعل الشرطة المصرية فى قتل المواطن نصر ورميه من شرفة منزله؟ وتحت أي مسمى ممكن ان نسمى حادثة سحل مواطن حتى الموت فى المنصورة؟ وما الوصف الذى يمكن ان نصف به تعذيب أفضى إلى قتل الطفل محمد بعد أن ذاق العذاب أهوال؟

لا يوجد فرق بين أن يتم سفك دمى بواسطة بندقية أو مدفع أو قذيفة أو صاروخ أطلقهم جهات معادية، لا فرق بين هذه الوسائل ووسيلة الغرق أو الحرق أو التصادم أو التعذيب على أيدى جهاز يمسى جاهز أمنى ، ففى النهاية قد مت وفارقت الحياة، الفرق الوحيد بين الوسيلتين أن فى الوسيلة الأولى اعلم جيدا من الفاعل ، والفاعل هناك مغتصب غاشم ظالم اعلم انه يكرهنى ويتمنى موتى، ويسعى إلى ذلك بكل الوسائل والطرق، ولكن فى حالة شعب مصر فالمتسبب من المفترض هو من يقوم بحمايتى، وهو آخر من يفكر به عقلى.

نوع آخر من الموت، وهو الموت البطيئ المتمثل فى الطعام المسرطن، والمياه التى تسبب الفشل الكلوى، وارتفاع نسبة التلوث وأمراض الصدر، والربو، والموت م الجوع كل هذا أيضا يمسى موت ... ولكنه موت بطيييييييئ
وفى النهاية نحن شعب يهدر دمه فى غير موضعه، فأولا بهذه الدماء أن تراق وهي تعمل على آلة ... وهى تضرب على الأرض بقوة الفأس، وهي تجاهد فى سبيل صد الظلم والعدوان

فأصبح شعار شعب مصر "شعب عاوز يعيش

أبنـــــــاء مصـــــــر

عبد الرحمن فارس ... فضح زبانية أمن الدولة

2007-10-14T19:12:00.000-07:00

بانر من مدونة عبد الرحمن فارس صاحب مدونة لسانى هو القلم

المعتقل بعد صلاة العيد مباشرة

فى صبيحة يوم الجائزة، حيث يخرج المصلون من المساجد، يقابلون بعضهم البعض بابتسامة صافية مرحبة بشوشة، قابل عبد الرحمن فارس صاحب مدونة لسانى هو القلم مجموعة رجال من كوكب آخر ... غالبا، اقتادوه بجريمة واهية، كما ذكرت مصادر مدونته إلى أمن الدولة، ألا وهي توزيع منشورات تهدف لإثارة الشعب وقلب نظام الحكم، واخشى ما أخشاه، أن يكون ما وزعه عبد الرحمن هي أكياس الحلوى على أطفال المسلمين، أو تكون الفاجعة إن قام بتوزيع على ألعاب بلاستيكية على هيئة مسدس او سيارة او عربية على الأطفال، فيتهم بحيازة أسلحة وتوزيعها، وتهديد السلم والأمن الاجتماعى، غير التخطيط والتدبير لقلب نظام الحكم

ولكن يبدوا أن الأمر لم يكن توزيع أكياس حلوى أو لعب أطفال او حتى منشورات، ولكن الأمر تعدى ذلك بكثير، هو أن يقوم فردا مدنيا ويحاول أن يكون ندا لكلاب أمن الدولة، فقام بحملة طموحة جريئة وخطرة على مدونته وتعد الاولى من نوعها، وللأسف لم نسمع عنها إلا بعد اعتقاله، وعنوان هذه الحملة " تعالوا نراقبهم زى مابيراقبونا"، وتهدف هذه الحملة إلى فضح كلاب أمن الدولة، بذكر معلومات عن ظباط هذا الجهاز القذر، وفضح أسمائهم، ونشر معلومات شخصية عنهم، مثل ماركات سياراتهم إلى غير ذلك، والأهم نشر الملفات التى يتولون مسئوليتها، ومن هنا نعلم الحقيقة، ونعلم لماذا تم القبض على عبد الرحمن فارس

الأمر الآخر الذى ذكرته أكثر من مدونة تحدثت فى نفس الموشوع، وهي مدونات حنتكلم، وسكوت هانصوت، ومراقب مصرى وصدى صوت، حالة اللامبالاة التى تعيشها مدونات الإخوان، وهنا لى كلمة، يا مدونى الإخوان، وبعد مدونة أنا إخوان، والإعلان الصريح والملفت للنظر لأى مدونة إخوانية، ويظهر ذلك من سمتها و موضوعاتها و باناراتها، فكل هذه المظاهر، يتوجب معها تحمل قدرا من المسئولية، فى النشاط التدوينى، ومتابعة مدونيهم هم وموافاتنا بالأخبار والتطورات، فطالما رغبتم بالإعلان عن أنفسكم فى كل مكان وهذا حقكم، فيتوجب عليكم القيام بأمرا مهما، حتى لا يتم المزايدة عليكم، أو تحميل مواقفكم أكبر من حجمها، او الصيد فى الماء العكر، فيجب عليكم تحمل مسئولياتكم تجاه كوادركم، بالدعم الإعلامى، وبالدعم الميدانى

فكما عبرنا عن سخطنا من كفاية، وتخاذلها عن المظاهرات التى تدعوا لها، ونسيانها ، وعدم اكتراثها بمن تم إعتقاله أو ضربه أو سحله من المتظاهرين، بنفس النية، نطالبكم بالدفاع والوقوف بجوار مدونيكم على الأقل

لا أحب ان أسمع عنكم، أو يتاكد لدى شعور قاتل، هو تصنيفكم لكوادركم، فيقال هذا كدر مهم وهذا لا، هذا مدون كبير ... قديم، وهذا لم نسمع عنه فهو جديد، هذا اخوان، وهذا غير اخوان

وفى النهاية ، هناك من سيقل، هذه أيام عيد، لم نسمع او لم نعرف او لم تأتى لنا اخبار
وهذا أيضا خطاكم أنتم، لانه إذا تم القبض على أي قيادة من القيادات، الخبر يعم الأرجاء،ولكن لا يتكرر ذلك الامر مع الكوادر، فهؤلاء منكم وأنتم منهم، فتحركوا متى علمتم، إن أردتم العمل بجوار باقى التيارات، والمدونات،

ولا تسمحوا بالمزايدة ،،، او الصيد فى الماء العكر
فأنتم أكبر من أي مزايدة

متضامن مع عبد الرحمن ... متضامن مع الشعب الغلبان... ضد السجا
حتى إن لم يفعل اليسار أوالإخوان

صرخات .. فيلم وثائقى عن التعذيب

2007-10-10T12:37:00.000-07:00

لا تسال من أنا .. انا أصلا حرامى

2007-10-02T05:54:00.000-07:00

حالة تعذيب المواطن عصام رشاد عبد العزيز عوض

على أبنــــــــــــاء مصــــــــر

فى مركز النديم (للعلاج والتأهيل النفسي لضحايا العنف) كان موعدنا لمشاهدة فصل جديد من فصول المسرحية الهزلية التى يقوم ببطولتها مجموعة همج من رجال الشرطة ، و لمعرفة ما توصل إليه هؤلاء المجرمون من أساليب جديدة للظلم والقهر والاذلال وقمع المواطنون البسطاء كنوع جديد من الحرب النفسية التى يشنها النظام على شعبه توازيا مع حروبها المتعددة كعبارات الموت وقطارات النار والأطعمة المسرطنة وغيرها الكثير ، فكان هذا اللقاء مع السيد/ عصام رشاد عبد العزيز عوض، الذى وصل من الإسكندرية، وأخذ يروى ما حدث له فى حضور اثنين من المحامين التابعين للمركز وصحفى فى جريدة الأهلى وهو ممثل أيضا لمصريين ضد التعذيب، ونحن فريق عمل أبناء مصر

بدأ عصام رشاد حديثه قائلا" كنت جالس فى مكتبى فى الشركة التى أملتكها شركة الرشاد للاستيراد والتصدير وفى العاشرة مساءاً، فوجئت بخمس أشخاص يدخلون مكتبى، وأنا بمفردى أُنهى بعض الأعمال بعدانتهاء يوم العمل الرسمى ، وسألونى عن اسم شخص لا أعلم من هو، وعندما سألتهم من أنتم قالوا احنا مباحث، وطلبوا منى إبراز تحقيق الشخصية، ولكنى شككت بهم لأن اثنين منهم كانوا يرتدون جلاليب، فطلبت منهم ما يثبت أنهم ينتمون إلى المباحث، فردوا احنا الى بنسأل وانت الى تجاوب، فرفضت إعطائهم أي معلومات أو التكلم معهم، قبل أن يثبتوا انهم من المباحث فضربنى احدهم على رأسى بقوة، سقطت على أثرها على الأرض .. وقام آخر بقطع سلك التليفون وحاول ربطى به. ثم ضربونى بقسوة بأيديهم وأرجلهم، و لأنى مريض بتليف فى الكبد، فخشيت من أية ضربة تصيب الجانب الأيمن من جسدى فحاولت حمايته ما أستطعت، ثم فقدت الوعى من كثرة الضرب، واستيقظت لاجد اثنين منهم يهمون بتفتيش المكتب والبحث فى ادراجه وبعثرة أوراقه لأفاجأ بعد ذلك بسرقة 11.600جنيه، و سرقة بعض المستندات المهمة ، فقلت لهم، ان هذا يستلزم إذنا من النيابة ، فقاموا بضربى مجددا وقالوا " احنا مانعرفش الى بتقول عليه ده"، ثم دخلت على زوجتى وبناتى والجيران ووجدونى فى هذه الحالة، ومع تجمع الجيران واستيائهم من مشاهدتى والدماء تسيل منى وصراخ زوجتى وبناتى، وسؤالهم لهؤلاء الأفراد عن جرمى ، قام أحد المخبرين و اسمه عبد لله عبد الهادى باشهار مسدسه وتهديد الجيران ليفسحوا له الطريق، ثم سحلونى من مكتبى إلى الميكروباص التى توجهت إلى قسم الدخيلة، كل ذلك دون أن أعلم الجرم الذى ارتكبته، واستمر الضرب اثناء توجهنا إلى قسم الشرطة، ثم دخلنا على الظابط

، لأفاجئ به يقول احنا آسفين لست أنت المقصود ،

وخرجت من القسم وتوجهت إلى مستشفى العجمى العام، ورفضت المستشفى كتابة تقرير طبى عن حالتى، بعد ان علمت أن المتسبب فى الإصابات هم رجال الشرطة، فتوجهت المستشفى الميرى حيث قاموا بحجزى وبعد الفحص وجدوا أربع أضلع مكسورة من الناحية اليسرى، وكدمات فى أنحاء الجسد، وتجمع دموى تحت العين اليسرى، ، وان حالة العلاج تستدعى أكثر من 21 يوم ، وكان اخشى ما أخشاه فقع عينى اثناء ضربى وقامت إدارة المستشفى بإبلاغ قسم الشرطة، وحضر أمين الشرطة ويدعى وليد الطحان وقام بتحرير محضر أحوال رقم 9 بتاريخ 6/4/2007 ولم أوجه فى المحضر أي اتهام لأي فرد من الشرطة، لكى احصل على تقرير طبى ولا يتكرر ما حدث فى المستشفى الأخرى

ولكنى فوجئت بعد عودتى لشركتى بفقدان 11.600 جنيه مصرى كان موجود بمقر شركتى فى كيس بلاستيك بين المكتب والفاكس يوم الحادث، واختفاء مستندات مهمة ، وأخبرنى مخبر من القاطنين فى المنطقة عن أسماء أفراد الشرطة الذين داهموا مقر شركتى وفعلوا ما فعلوا بى وهم:
كرار جاد كرار وشهرته عبد الناصر، وشقيقه احمد جاد كرار وشخص آخر يدعى أشرف، واثنين من المخبرين بقسم الدخيلة هم عبد الله عبد الهادى والآخر سعيد سماحة. وهؤلاء الاثنين هم من كانوا يرتدون الجلباب ومن رأيتهم يفتشون مكتبى

ولذلك قررت القيام بتحرير محضر آخر برقم (4793 / 2007) بتاريخ 21/4/2007 يثبت واقعة الضرب وسرقة مبلغ 11.600 جنيه ومستندات أخرى، و ذلك بعد حصولى على تقرير المستشفى الميرى بالاصابات .
ولكن لا يمكن أن ننتظر الحُكم من الخصم، ولا ننتظر منه الانصاف، فقد قررت النيابة تحويلى للطب الشرعى بعد الحادثة بحوالى ثلاثة أشهر ، وصدر تقريرالطب الشرعى بتاريخ 13/7/2007، وجاء التقرير برقم (60 الدخيلة / 2007) متوافق مع تقرير المستشفى الميرى، ومصدق عليه، رغم بعد المدة واختفاء آثار الضرب والاعتداء ،وقد حصلت على وعود من رجال المباحث وخاصة العميد ناصر البعد، حيث وعد بالقصاص ومعاقبة الجناة ورد أموالى ، بشرط عدم نشر ما حدث ، ولكن ذهبت الوعود ادارج الرياح فهذه الأيام الرياح تحمل معها كل معانى العدل والمساواة والأخلاق والرحمة ولا تبقى منها شيئا، وتبقى فقط ع الظلم والقهر والقمع والجور أيضا.

حوار الجيزاوى ... تصوير وكتابة التقرير منذر .. راجع التقرير سارة

محتلة والله محتلة

2007-09-28T08:13:00.000-07:00

انتظروا تغيطة احداث مظاهرة طلعت حرب صور وفيديو وتقرير كتابى على أبناء مصر

قامت قوات شرطة الاحتلال المصرية مدعومة بجحافل الأمن المركزى وفرق ومليشيات الكاراتيه باحتلال ميدان طلعت حرب، وحصر المتظاهرين فى شرفات حزب الغد، وهذا وقد أعلن مسئول أمنى تخين المستوى فى وزارة البلطجية، عن نية الوزارة إلقاء المتظاهرين من شرفات هذا الحزب، لسرعة وصولهم إلى منازلهم، وأعرب أيضا عن تخصيص سيارات مجهزة لنقل المتظاهرين إلى مكان آمن قد جهز خصيصا لراحتهم فى التجمع الخامس

ولكن يبدوا أن المتظاهرين آثروا الشقاء والتعب على أنفسهم، فذهبوا إلى سلالم نقابة الصحفيين، وأخذوا يرددون هتافات وشعارات التضامن مع عمال المحلة، والتضامن مع الصحفيين، وكل ذلك بتواجد كثيف من البلطجية، حيث تم حصارهم والتضييق عليهم، هذا وقد أخذ البلطجية بمبدأ دخول الحمام مش زي خروجه، فمن شاء فليدخل بس يبقى يدور على حد يخرجه، حيث سمح لأي فرد بالدخول ولكن إذا أراد هذا الفرد ان يخرج فعليه أن يغادر بعد منتصف الليل، وبرر ذلك نفس المسئول قائلا ان الوزارة كانت قد عزمت على إقامة سحور جماعى فى سابقة الأولى من نوعها يجمع بين البلطجية والمتظاهرين حيث سيأكل المتظاهرين أطعم وأشهى المأكولات التى عملت خصيصا من أيدى وأرجل البلطجية، ثم أردف قائلا، انه إذا ما سمح للمتظاهرين بمغادرة المكان باكرا سينامون عن صلاة الفجر، ولن يؤدوا هذه الفريضة، ونحن حريصون كل الحرص على إقامة الفرائض وعلى عدم تفويتها على المتظاهرين

من أمام نقابة المسحولين
محدثكم حباصة المنذر
قناة الهس بس هس
العاهرة

حالة تعذيب سيد ضحية الشرطة

2007-09-27T03:24:00.000-07:00

فى تغطية خاصة لأبناء مصر

تم الكشف عن ضحية تعذيب “سيد” من قبل “مصريون ضد التعذيب

حوار : أحمد الجيزاوى بقلم : أحمد سعد دومة تصوير : ومحمود الشيشتاوى ومنذر

تحرير وإخراج التقرير: تامر أبناء مصر

بحث ميدانى معتز عادل وإسلام العدل ومحمود الشيشتاوى

نظام أصبح العنف له شرعة ومنهاجاً، ومواطنون آثروا السلامة من بطش هذا النظام بالصمت عن حقوقهم …. آلام وجراح ما فتأ جرح أن يلتئم إلا وباغتنا غيره سريعاً ، تعذيب ،إهانة، ذل …..بل وصل الأمر إلى حد القتل .صورة قاتمة ،معالمها التعذيب ، ألوانها الذل بسواده ، رتوشها مهانة طالت جبين الوطن بأكمله ،أما راسمها فهو نظام أبى إلا أن يسجل له التاريخ بأحرف من دماء هذه المعاملات البشعة ،والتصرفات العبثية الوحشية في التعامل مع المواطنين .
(”صورة سيد ضحية الشرطة”)مشهد مخيف فوجئ به “سيد” في يوم 24/2/2007 في حوالي الساعة الثانية عشر ظهراً أمناء شرطة …مخبرين…. وغفراء حاصروا المنزل وانتشروا في أرجائه ،جاءوا للقبض على “سيد” ،و السبب –كما قالوا- أنه مطلوب على ذمة قضية تبديد أموال ،مع العلم أن هذه القضية قد انتهت بالمصالحة في تاريخ 12/12/2006م .لكن الأمر عند الشرطة لم ينتهى ،وهذا ليس بسبب تطبيق القانون-حاشاهم ذلك- ،إنما لأن زوجة “سيد” السابقة أرادت أن تنتقم من زوجها السابق فأوصت عليه كي يفعل به ما سنعلمه معاً

.
قابلنا “سيد” وأخوه الأكبر”محمد” سألناهم عما حدث …. حاورناهم ….. فبدأ لنا سيد بسرد القصة كما حدث تماماً.(صورة “سي”د و أخوه الأكبر “محمد” اثناء حواره مع المراسلين)سيد:- انا فوجئت يوم الاتنين 24/2/2007م بـ “السيد عبد الله، السيد عبد النبي، محمد فرج ” وهم أمناء شرطة ،ومعاهم “سعد سعد عبد الباري وده غفير في المركز ، وكان معاهم الضابط محمود أبو المكارم مستنييهم جنب البيت بأنهم بيقولوا لي إحنا عاوزينك في القسم ، لما سألتهم عن السبب قالوا إن عليه قضية تبديد ، مراتي السابقة كانت رافعاها علي …. رديت : يا جماعه القضية دي انتهت بالتصالح من زمان والموضوع خلص ، قالول لي: لأ الموضوع ما خلصش وانت لازم تيجي معانا علشان تشوف الموضوع ده .انا قلت لهم طيب ممكن اطلع أغير هدومي ،قالوا لي ماشي . طلعت غيرت هدومي ونزلت ومعايا شهادة رسمية بالتصالح ووريتها لهم ، أخدها مني “السيد عبد الله –أمين شرطة” وقال لي ما تلزمناش يا ……. وقطع الشهاده ورماها على الأرض ………………………..”“……… أول ما دخلنا القسم لقيت أمناء شرطة بيقولوا لي :انت جيت يا ابن الـــ …………… . وبعدين نزلوا علي ضرب بالأقلام والرجل واللي بيضربوا كان السيد عبد النبي ومحمد فرج ، وبعدين دخلت على أوضة”محمود أبو المكارم” – ملازم أول - ،وقال لي وصلت يا ابن الـــ …… ، وبعدين قال لهم فتشوه . أخدوا المحفظه والحاجة وأخدوا الفلوس اللي كانت معايا وبعدين ربطوني خلفي إيد ورجل …أنا بقيت مستغرب ومش عارف أعمل إيه ،حاولت أفهم منهم أي حاجه لكن كل سؤال مني كان بيقابله ضرب وإهانة منهم .ضربوني بعصاية سمكها تقريباً 4 سم وطولها متر ،ومحمود أبو المكارم حط وشي على الأرض وداس فوق دماغي بالجزمة، وبعدين محمود أبو المكارم قال لهم دخلوه أوضة المباحث وما تعملوش له ورق ولا محضر ،ورموني بين مكتبين في الأوضه علشان ما حدش يشوفني …….”“……. فضلت مربوط من الساعه 1.5 لغاية تاني يوم الظهر ، وتاني يوم خالي جه ولقي التراب على وشي ووشي وارم من الضرب ،سأل محمود ابو المكارم رد عليه وقال له روّح انت مالكش دعوه ومتجيش تاني …….”“…….. طلعت من القسم يوم 26/4/2007 وده كان يوم خطوبتي

وأخويا شاف جسمي ،أخدني ورحنا تاني يوم على مكتب النيابه العامه …….”“….. أما عن الإصابات فكانت في الكتفين والظهر والفخذين ، حولوني علي مفتش الصحه علشان أعمل تقرير بالإصابات وأخدت التقرير ورحت بيه للنيابه ……….”هكذا انتهى “سيد” من كلماته بعد أن ذرف دمعاته ،وكأنه يبكي حداداً على كرامة مصر.
توجهنا بالحديث لـ”محمد ” أخو “سيد ” الأكبر والذي ذكر ما حدث في البداية مروراً بـ شتاته بين النيابات والمحاكم والمحامين ، والكم الهائل من الفاكسات والتليفونات التي أرسلها للمسؤلين –جميعهم – دون هدوء أو توان .وذكر لنا أيضاً أنه أثناء محاولاته الاتصال بالمحامي وجد تليفونه مغلقاً … ولم يرد عليه في منزله مم جعله يعتقد أن الأمر أكبر مما يتخيل ،وأن هناك أيد خفيه تلعب دوراً محورياً في القضية .محمد الذي يذكر كذلك أنه فوجئ بالسيد عوض القهوجي عضو مجلس الشورى ومعه عضو آخر في مجلس الشورى ، ووالد الضابط محمود أبو المكارم جاءوا إليه يعرضون تعويضاً مادياً يبدأ بـ 100ألف جنيه ويصل إلى ما يريدون حفاظاً على مستقبل الضابط من الضياع …”وذكر قبل ذك الضغوط التي تعرض لها من تهديدات بالقتل أو الاعتقال أو الملاحقة . وذكر كذلك أنه وجد “صبي الورشة” الذي يعمل معه في ورشته يسأله عما إذا كان “سيد ” تعرض بالفعل للتعذيب داخل قسم الشرطه ، ولما سأله عن مصدر الحديث وجد أن محمد فرج والسيد عبد النبي أعطوا “عائلة طليقة سيد ” تسجيل الفيديو الموضح فيه حادثة تعذيب “سيد” ،وبهذا اتضحت معالم القضية .وقد أرسل “محمد ” في النهاية رسالة إلى كل مواطن يتعرض لمثل هذا الموقف بألا يضعف أو يستكين ، بل يواجه هؤلاء الطغاة الفاسدين بكل ما أوتي من قوة ، وقال في النهاية”لازم كلنا نقف بقوة علشان نعرف نعيش في البلد دي ……….”
هكذا انتهى حديث محمد وسيد ….. ولكن الأيدي الطاغية في بلدنا لم تكف عن التعذيب واالفساد ، ولن تكف كذلك طالما نحن صامتون عن حقوقنا ، نخشى سجونهم وجلاديهم .الصوره كما رأيتموها لا تحتاج إلى تفصيل أو تعليق ….. أما مصر ….فلها الله

بقلم أحمد سعد دومة

انتظروا فيلما وثائقيا عن حالات التعذيب الثلاثة على أبناء مصر

مظلة لكل مواطن .. علشان لم تيجى تترمى

2007-09-24T13:31:00.000-07:00

فى تغطية مباشرة خاصة لأبناء مصر
تم الكشف عن ضحية التعذيب محمد عبد العزيز اسماعيل من قبل “مصريون ضد التعذيب
وأحب أن أتوجه بالشكر لكل من معتز عادل وإسلام العدل لتقيدمهم يد العون لنا ولتعاونهم لاخراج هذا العمل
وأتوجه بالشكر يضا إلى كل من الاخ العزيز احمد الجيزاوى ومحمود الشيشتاوى وأخى العزيز أحمد سعد دومة”

محمد عبد العزيز إسماعيل، شاب مصرى لا يتجاوز من العمر الثلاثين عاما، يمتلك قدراً كبيراً من الوسامة لم تستطع هذه الحادثة أن تخفيها أو تغير منها، استقبلنا وهو طريح الفراش ... مكسور .. منهك القوى والعزائم ... ترى فى عينه نظرة منكسرة على شبابه الذى يخشى أن يضيع، وخوفا على عائلته من المستقبل الغامض، ورعبا من المجهول الذى ينتظره، أما أمه فهي سيدة بسيطة ترتدى ثوبا أسودا كأغلب سيدات مصر، ووجهها يحمل ملامح مصرية خالصة، ويحمل معه أيضا معانى كثيرة لا تخطئها العين، فترى في ملامحها هذه جهد وتعب وشقاء وانكسارات وعناء وأفراح، وآهات، ومعاناة طويلة .. ولكن لم يكن هدف تلك المعاناة بناء شاليهات أو قصور، لا لا ... لم تكن معاناتها فى سبيل ذلك، ولكن كل معاناتها تمثلت فى أن ترى وليدها البكرى قد صار رجلا يحمل معها أو عنها بعض متاعب الحياة، ويمسح عنها آثار الماضى بكل ما فيه من مشاق ويزيل عنها هذا الأثر الذى ارتسم على وجهها للأبد، ولكنها ولفجأة استيقظت من هذا الحلم لجميل، على واقع مرير، لتجد رجلها وقد كسرت عظامه وتحطمت أمامه كل معانى الرجولة والعدل والرحمة، وتكسر وتهشم معه هذا الصنم وهذا الإله الذى قد جعلوه كذلك مؤخرا

ومن هنا يروى لنا عن قصته مع دبابير وأفاعى النظام ، فيروى قائلا أنا متزوج ولدى طفل وأعول أمى واخوتى ـ تقريبا يعول ستة أفراد ـ ترك تعليمه الجامعى فى كلية التجارة واشتغل فى مهنة والده حدادا ليجاهد شرور الحياة ويقوم على رعاية أسرته، ولكن هذه الشرور لاحقته وكانت على شكل بلاغات كيدية ومحاضر بيئة قام بها بعض أفراد من أقاربه، وفى كل مرة يذهب إلى عش الدبابير (قسم الشرطة سابقا) ويسدد قيمة هذه الغرامات، ولكن ما حدث هذه المرة كان اكثر من مفاجأة، ففى يوم 4/9/2007 كان الشر فى انتظارهم وأخذ يطرق باباهم بقوة وفى ساعة متأخرة من الليل حوالى الساعة الثالثة والنصف فجرا، تقتحم قوى الشر هذا البيت المسالم، ويفزع من فى البيت، ويأمر الظابط ويُدعى "إسلام باشا" زبانيته بان يجدوا له "محمد" وتنتشر الأفاعى فى كل مكان تبث سمومها وشرورها فى وجه من تلقاه فهذا أخوه الصغير نائم على فراشه فى الصف الثالث الإعدادى يظنون أنه "محمد" فيوقظه أحد المخبرين ضربا وركلا ولكما على وجه وفى كل أنحاء جسده الضعيف الهزيل، وتستغيث الأم وتقول للظابط الذى يدعى "إسلام باشا" يا بيه ابنى ده صغير ده فى تالتة إعدادى ده مش هو أخوه "محمد" الى انتم بدوروا عليه ... هو بس الى طويل شوية... وريهم يابنى كرنيهك .. ده مطلعش بطاقة حته، ولكنه يسبها ويشتمها باقزع الشتائم وأفظع السباب،ويسالها عن مكان مبيت "محمد"، وتخبره على مضدد على انه فى الدور الثانى ولا يرق قلبه لتوسلاتها وآهاتها ودموعها، وهنا يتركونها مع طفلها الصغير ويذهبون هم إلى مرادهم.

ويتوجهون إلي الدور الثانى، ويطرقون الأبواب بشدة وبعنف، ويوشكون على تحطيم الباب، فيفتح لهم محمد، فيستقبلونه باللكمات والركلات، ويقول له "إسلام باشا" انت عليك 1300 جنيه غرامة، ينظر إليه متعجبا .. خائفا، ويقول يا باشا جايلى الساعة ثلاثة ونصف الفجر وتطلب منى 1300 جنيه، ده ما فيش فى البيت غير 300 جنيه خدهم يا باشا، ويأخذهم الباشا، وينهال عليه المخبرين "أحمد جميل السباك" و"عمر المرشدى" وآخرين ضربا بالأيدى والأرجل ويظلون يكيلون إليه كل هذه الضربات و يحاول أن يتلمس ملجأ من هذه الآلام ومن هذه الضربات حتى يُحجز فى ركن صغير، ويصبح ظهره إلى السور ووجه إلى ركلاتهم وضرباتهم فلا يصمد هذا السور طويلا، ولا أعنى بصمود السور الصمود أمام الدفع والشد والجذب، فمن الممكن أن يصمد أمام هذا، ولكنى اعتقد أن سبب انهياره، هو عدم قدرته على تحمل كل هذا القدر من الكره والحقد والغل والشر، فالسور أبى على نفسه أن يحجز محمد ويترك متسعا للمجرمين فى أن يكملوا حلقة التعذيب، فابى وسقط به من الدور الثانى .

وتدخل الأم، بعد سماعها صوت الارتطام ، لتسمع الباشا وهو يقول لمخبريه ومساعديه .. هو حي ولا ميت، فتخشى الأم، ولكنها ولسخرية القدر تخشى على واحد منهم، وتقول لهم يا نهارى انتم رميتوا واحد منك من عندنا، انتم جايين تودونا فى داهية، وتنظر من بعيد فترى شخصا ملقى على بطنه وسط الأكوام والكراكيب، وعقلها لا يريد أن يصدق عينيها، وقلبها يحدثها بأنها تعيش حلما أو كابوسا على الأكثر، ولكنها تصرخ .. وتصرخ ... وتصرخ، وذلك بعد أن تيقنت أن هذا الملقى على وجه فى الشارع هو ابنها .. وليدها، وبعد أن يفروا هربا، ويتجمع جيرانها وتستغيث ويغيثها جارها ويشهد على الواقعة، ويقلهم بسيارته إلى بمستشفى بلقاس حيث تم عمل جبيرة له، ثم تم نقله إلى مستشفى المنصورة الدولى، لإكمال رحلة العلاج

وفى مستشفى المنصورة الدولى وفى قسم العظام بالدور الرابع؛ غرفة 4203 تحديدا كانت زيارتنا لنه، وبعد أن أنهى حديثه هو وأمه، ، وحدثنا عن إصاباته من جراء هذا الحادث، فترك هذا الحادث كدمات تقريبا فى جميع أنحاء جسده، وتتركز خاصة فى الزراعين والكتفين وكسور فى اليد اليسرى ، وقد أجرى له عملية جراحية وتم تركيب شريحة فى منطقة الفخذ، ويجب أن يظل على طريح الفراش دون حراك لمدة شهرا كاملا

وبرغم كل هذه الآلام، فتضاف على آلامه آلاما من نوع آخر، ولكن أثرها على النفس لا يقل ألما من الذى حدث
ـ فالمستشفى والطبيب المعالج لم يكتب تقريره الطبى حتى الآن، وقد مر على وجوده فى المستشفى 18 يوما، ولم يزره الطب الشرعى، ولا يعرف شيء عن حالته التى تستدعى العلاج أكثر من شهر
ـ دخل عليه بعض الأفاعى والدبابير الكبيرة، وهو فى حالة إغماء وتخدير من أثر المخدر وذلك بعد وصوله إلى مستشفى المنصورة الدولى بساعات قليلة، وبعد إجراء العملية الجراحية له قاموا بتبصيمه على ثلاثة أوراق وذهبوا !!!
ـ التهديدات ظلت مستمرة له، فذهب إليه بعض الأفاعى ذوى الدبابير الكبيرة، يهددونه تارة ويرشونه تارة أخرى، ويبتزونه تارة بالورقات التى عليها بصمته.
ـ يخشى من ركود الإجراءات وعدم اكتمالها ، بسبب أن المدعى عليهم وهم رجال وأفراد الشرطة ذوى النفوذ والسلطان الواسع فى هذا البلد

وينهى محمد حديثه معنا، وآخر سؤال أسأله له، عاوز ايه؟ يقولى عاوز أروح البيت وأمشى على رجلى تانى

وهنا يجب أن توجه رسالة ويسمعها كل كهنة هذا النظام وصنمه الأعلى ، كلمة "محمد" ... أن كل أمله فى أن يرجع ويسير على قدميه مرة أخرى لا أكثر.

فلتسمع يا صنم إن كنت تسمع؟ ولتشعر يا صنم إن كنت تشعر؟ ولتعقل يا صنم إن كنت تعقل؟
أن عبيديك بنى عبيدك بنى امائك، قد كرهوا ظلمك وطغيانك

فانتظر ما هو آت
ولتفهم يا صنم ان كنت تفهم

بحث ميدانى
احمد الجيزاوى ، ومعتز عادل، وإسلام العدل، ومحمود الشيشتاوى، وأحمد سعد دومة
تصوير وإعداد التقرير منذر

أيام رمضان

2007-09-12T18:14:00.000-07:00

ملاحـــــــــــيظ
الصورة مسروقة من مدونة أخويا علاء الغزالى لكن الكلام بتاعى
كل سنة وانتم طيبين باه ربنا يجعله عامر يا علاء يا اخويا

مش عارف أدون فى رمضان ولا لا
كله حسب التساهيل
بس تقريبا كل الناس واخدة اجازة وعملوا بـنصائح أستاذنا وشيخنا عصفور المدينة، اشمعنى أنا يعنى،

بس لو فيه حاجة تابعوها على أبناء مصر

وده حاجة بسيطة إهداء لكل الاخوة والاخوات المدونين، أذكر نفسى وإياكم بها

وآدى الفانوس، انا مش هازعل حد، وبعد كام يوم هايبقى فيه بلح .. انشاالله ما حد حوش
لا تقولى مسلسل ولا أغنية
ولا فيلم لأجمد فنان
ولا قعدة فى خيبة رمضانية
ولا سهرة فى فندق هلنان
ده هالل علينا هلال رمضان
بين صوم وصلاة وقراءة قرآن

********
أوعى تفوت الفرصة ده
وتقعد تبص على دى ودى
أنا عارف الوضع صعب
بس خلاص رمضان جه
********
يا رمضان هلى هلالك
ده والله الخير جالك
ولا تشغل بالك الفلوس
المهم نصفى النفوس
ونضفها م الغبار
ده الشيطان تلاقيه محبوس
ومتغاظ ومفروس
مش مشكلة يولع بنار
********
فى المسجد تروح تصلى
وتظبط شغلك تمام
وبعد الفطار تروح تحلى
بالذكر بصلاة القيام
ما أحلى ده الأيام
أيام جميلة
أيام رمضان
كل سنة وانتم طيبيييييييييييييييييييييييييين جدا جدا
ومع السلامو عليكم :)))

كتبها منذر

التيه فى محاكمة إسلام نبيه

2007-09-06T06:04:00.000-07:00

عذرا على رداءة الصور، فأنا صورت بالموبايل 2 ميجا بكسل وتخيلوا، لما أعمل زوم الصور هايطلع شكلها ايه
فيه تغطية صحفيةعلى أبناء مصر

تقرير أبناء مصر عن هذه المحاكمة

لحظة دخول إسلام نبيه ع الفيديو ده

طبعا العنوان مش مفهوم، بس هو تيه فعلا، ولانك ولأول وهلة، وانت بتسمع كلام الدفاع بتاع إسلام، تشعرأن إسلام نبيه ، هو من تم تعذيبه على أيدى عماد الكبير، وليس العكس، وهو من تم إهانته وهتك عرضه، وسبه وشتمه وضربه وفضحه وليس العكس
تشعر أيضا انك ممكن تلبسلك تهمة وانت قاعد فى بيتكم فى أمان الله وتتعاقب عليها وتنفذ الحكم كمان، بس كل ده مش مش مهم ، الاخطر انك هاتقتنع فعلا انك الى عملت الجريمة ده
اعتقد ده شعور جه لكل الاخوة الى حضروا لمحاكمة بتاعة يوم الأربعاء
كانت أول مرة أحضر المحاكمة ده، وأول مرة أشوف عماد، وأشوف إسلام نبيه، وأشوف جو القضية بنفسى
بس زي ما قلت خفت ع القضية جدا، من تلبيس إبليس
وإبليس ده المحامى بتاع إسلام نبيه

أقام دفوعه الخطيرة الى مش خطيرة فى كذا نقطة
أول حاجة سبت النيابة وشكر فيها شكرانية من هنا لاسبوع جاي، بس بين التارة والتارة ، من تحت لتحت كده بخباسة ينقدها من غير ما يغلط فيها
مثلا ان النيابة قالت ، يجب الضرب بيد من حديد، وقال ووجه كلامه للقاضى، ان ساحة عدل حضرتكم مافهاش يد حديدة تضرب بيها، وساحة رحمة حضرتكم، لا تملك مثل هذه الأيدى، وهكذا لغاية ما كنا هانعيط والله
الدفوع باه كالآتى

ان الخبير لما جه يحلل الشريط المصور، استعان بحواسه سمعه وبصره فقط، ولم يستعن بأي جهاز تقنى، ولما ساله هل بتكشف دوريا على حواسك ده، قاله آه، راح سأله اجميل آخر مرة كشفت فيها امتى، راح قايله مش فاكر
تناقض فى أقوال الخبير اثناء تحقيق النيابة، لما سأله وكيل النيابة وقاله هل استعنت بأي حد لما جيت تحلل الشريط المصور، قاله آه استعنت بزميل، ولما جه قدام القاضى وساله المحامى حد ساعدك فى تحليل الشريط ، راح الخبير قاله لا مافيش حد ساعدنى
وأ صلا المحامى بيقدم الخبير على انه مش خبير، هو بيقدمه على انه دبلوم صنايع كهروبائى مايفهمش فى الشغلانة ده أصلا، وانه خارج نطاق التقييم من أصله، ومقدم مرجع فيه انه لا يعتد خبيرا من استعان بحواسه فقط دون انا يتسعين بأجهزة تقنية
وهنا تنتهى نقط الخبير وندخل فى نقطة تانية
انه قال ان عماد الكبير، عنده تناقد فى كلامه بخصوص انه مرة قال على اسم أمين الشرطة رضا ومرة قال فيه كام واحد ماعرفهومش، وانه فى أول القضية خالص اتنازل عن البلاغ، ورجع غير أقواله قدام المحكمة
ده حتى الشريط المصور، شكك فيه وقال ان الأودة الى حصلت فيها الحادثة ده، ماتستوعبش العدد ده كله
وكان مركز قوى، فى واقعة ين خلع هدوم عماد الكبير، يعنى مين أصدر الامر ده، ويرجع تانى لنقطة التناقد فى كلام عماد، ان عماد قال انه شافهم وهما بيكلموا وبعد كده جم خلعوه ملابسه، فأكيد إسلام هو الى قالهم يقلعوه، ومرة تانية قال ان إسلام نبيه دخل عليه لقاه قالع
ولما ساله سمعت بودنك مين الى قال قلعوه، عماد قاله ماعرفش
كله كلام فارغ ولعب على الألفاظ، واستخدام ثغرات تافهة وهايفة
الأمر لم يخلى من كوميديا

منها ان النيابة استخدمت بيت شعر كده، راح جمال قايل أنا مش هاتناول الشعر وكلام الشعراء، أنا هتلواكلام ربنا
وراح قايل آية ان الشعراء يتبعهم الغاوون ومكمل الآيات، واستخدم إشارات خطيرة، نوارة قالت عليها وخدت بالها منها، انه لما جه عند آية الا الذين امنوا وعملوا الصالحات وانتصروا من بعد ما ظلموا شاور على إسلام، وبعدين شاور على محامى عماد وهو بيكمل الآية وسيعلم اللذين ظلموا اي منقلب ينقلبون
موجودة ومصورة على الفيديو ده، والحمد لله انى لحقتها

كانت حته خطيرة قوى، انه فسر الآيات وفصلها على مقاس مقاس جنابه
وبعيدين، فى النهاية وعلشان يختم قال مقولة لشيخ المحامين عبد العزيز فهمى وهي منقولة من مراسل أبناء مصر تامر
عندما يطل شبح الاعلام علي القضاء تفزع منه ملائكة
وقال ان فيه فرق بين الوقاحة والصحافة
وراح معقب وبعلو حسه قال سامعه يا نوارة
كلنا بصراحة اتفاجانا ، للأسباب الآتية
لاننا وقبل ماتبدأ المحاكمة، لقيناه جاي كده ورايح لنوارة وسلم عليها وقالهاازيك وازي بابا، وكلام جانتيه كده
فمتخيلناش انه يعمل كده معاها هي بالذات،بعد ما جه وسلم
وكمان تواجد فى قاعة المحاكمة جميع وكالات الانباء والصحف والفضائيات، سابهم كلهم وادير على نوارة
وبعد كده راح دافع عن جهاز الشرطة المصرية ككل وقال انهم ولادنا ولاد مصر صناعية مصرية مش ميد ان تيوان ولا كوريا، وان ولادنا ولو فيهم عيب ،... لو ... فاكرين لو يبقى عيب المجتمع ككل، وايه يعنى حادثة ولا تنين من ملوين، ده نسبة نرفع لها القبعة انحنائا واحتراما، والله قال كده وعقب وقال لو صحت أصلا، وقال امبارح عن محاكمة ظابط شرطة سراي القبة الى خد براءة، واستشهد بحاجات من كده كتير

وقال ان جهاز الشرطة بيتعرض لحملة بشعة واستشهد ببورنامج تسعين دقيقة ع المحور، لما اتصل الراجل الكويتى قال لا تعايرنى ولا اعايرك، وقال ان الراجل ده رد على مصطفى بكرى، ان المصرى فى مصر بياخد بالجزمة ومابياخدش فلوس، لكن المصرى فى الكويت بياخد بالجزمة وبياخد فلوس
وان لما القطار عندنا بيولع بناسه بركابه، بيدو للضحية ألفين جنيه، يعنى مايسواش فى الكويت غسالة عادية مانويال يعنى

وان المصرين لو كانوا ساعدو فى تحرير الكويت، فكانوا جنود مرتزقة ، وبياخدو معونات من الكويت وفلوس مقابل ده
وطبعا قال ان كلام الكوايتة ده بسبب الصحافة الصفراء المشوهة لسمعة مصر، وتساعدهم فى ذلك جمعيات حقوق الحيوان أقصد الإنسان

وعقب وخدته الجلالة أوى، وقال ان الهجمة ده تطول جهاز الشرطة ورجا الشرطة أمثال وإسلام الى بيحمينى ويحميك، يروحوا يشطروا على جرائم عماد وعيلة عماد من سنة كذا، وتارهم الى مش هاينسى مع جهاز الشرطة علشان هم مجرمين و-حشين مش زي إسلام نبيه الى دخل كلية واكاديمية محترمة وهي اكاديمية الشرطة .... يوووووه آسف أقصد اكاديمية مبارك للامن وراح مكمل ان الهجمة ده طالت كمان المحامين وغيرهم، وكانت عوازة تطول القضاء
وهنا كان زعق ووشه احمر، واتقلب يوسف وهبى،وراح قايل لا وألف لا إلا ده ، مش ممكن يحصل أبدا مهما يكون .. مهما يكون
وقال كفاية ان رئيس الجمهورية بيتشتم، قال ان لو حد شتم أبوه هايديه بالجزمة ـ آسف ع التعبير ـ ولكن هكذا ورد فى هذا الفيديو
انا ماكملتش بعيدها وسمعت شوية من مرافعة محامى امين الشرطة رضا فتحى

محامى أمين الشرطة رضا فتحى
وبعدين فكيت، بس كان على عين عينى والله
بس قصة خروجى من قاعة المحكمة كانت مثيرة على الأقل بالنسبة ليا .. ازاي
آه أصل انتم مش عارفين ، فجاة كده واحنا واقفين قبل ما المحاكمة ما تبدأ لقيت نوارة جارية ووراها الشباب والبنات جري ، اخترقوا صفوف العساكر الى كانوا واقفين ساددين المنصة، هما اتخضوا من الاقتحام المفاجأ ده،
وانبطحوا ع الأرض، وقعدنا تحت منصة القاضى بالظبط، كأنه بينج الجامعة، القاضى دخل، وراجل زعق وقال محكمة، لقيت نوارة بتدى تعليمات تنظيمية اوعى حد يقف، أصل محسوبكم كان هايقف :)))))
وبقينا فى وش المحامين لزق، ببص قدامى لقيت المحامين ، قلت عادى وايه المشكلة، يمينى لقيت النيابة، اتخضيت شوية ، بس ايه ثابت برده ، شمالى لقيت الأخوة اطمئنيت، وقلت نبقى فى السليم،
ببص باه لفوق عرفت ان ورايا القاضى

قلت لو امحامى إسلام نبيه يبلغ عننا ولا حاجة، بس لقتهم كلهم قاعيدن وتصوير ايه وفيدوا ايه، وشاويش معاه زمزمية، تقولش طالعين رحلة :))
بس بعد انتهاء مرافعة جميل سعيد، كانت وقتى ازف، وكنت لازم أروح للحاج الوالد، بس ازاي هاقتحم ممر الخروج كده وصف العساكر زي ما هو، وأقوم وأقف وادى ظهرى للقضاة الى فوق دول
وبقيت فى حيرة من امرى خايف أقوم، يكون فيه مشكلة، وفى نفس الوقت لازم أقوم، وكل ما أتشجع وأقول أقوم ، شاويش يقولى اوعى تقوم وتقف وتمشى اوعى
بس لقيت واحدة خرجت وبعديها واحد، ... مش عراف انا الستات عليها جراة
قلت ما بيقوموا اهو، روحت قايم، وقايل يا فكيك، وجالى شعور، ان لو حد نده عليا مش هابصله حتى لو كان القاضى وهاطلع اجرى
ده الواحد جبان جبن يا جدعان
أصل لو انا مكان القاضى، كنت هاقول ده هو الجدع ده طلع منين ، كان قاعد فين ده علشان يطلعلى من تحت الأرض كده
الحمد لله ربنا سلم ، ويارب يكملها على خير

وطبع الحكم تأجيل علشان المحامى وراه قضايا فساد اخرى، رايح قضية العبارة فى الغردقة، أصله محامى ممدوح إسماعيل .. رشوة تلاقى قتل تلاقى تعذيب تلاقى هو بتاع الفساد
يعنى اقتل اسرق ازنى ووكل جميل سعيد وعذب واحرق وافنى ووكل جميل سعيد
وهنا تنتهى فصل آخر من فصول تلبيس إبليس فى محاكمة إسلا نبيذ

جديد نوفى

2007-09-01T06:23:00.000-07:00

قبل ما ادخل فى البوست عندى كلميتن سارقهم من اخويا علاء الغزالى
" أن من لا يتابع مدونات الآخرين فلا تستحق مدونته المتابعة و أيضا من لا يتابع الردود فلا يستحقها "
وده حكمة تدوينية غاية فى الروعة، وعجبتنى جدا، وموافق عليها بشدة
لكن عندى شوية أخبار جددة كده عاوز أعرضها عليكم، وسط مشاغل الشغل الخنيقة الى بمر بيها دلوقتى

وافقت كل من الناقدة والأديبة انتصارعبد المنعم، والأستاذة نيفين عمر، على نشر اعمالهم وقصصهم الأدبية على الركن الأدبى لموقع أبناء مصر

والمفاجاة الاخرى، وجاءت بعد مراسلات بين الركن الأدبى وبين الأستاذة نيفين عمر محررة مدونة الاديب علاء الأسوانى، حيث وافق الاديب على نشر قصصه القصيرة فى الركن الأدبى على سايت أبناء مصر، والاهم والأجمل، انه وافق على القيام بالنقد الادبى لأي قصة قصيرة او عمل أدبى سواء كان لمدون، او ناشط انترنت أو شخص عادى قرأ الكلام ده بسبيل الصدفة،، وأردا أن يعرض اعماله الأدبية على الاديب ، وهاينقدها فى ندوته الأسبوعية يوم الخميس الساعة التاسعة مساءا فى شارع أمين سامى من القصرالعينى، فى مقر حزب الكرامة

حتى يتنسى ذلك، فمن يرغب بنشر اعماله الأدبية سواء كانت شعراً او زجلاً أو قصص قصيرة يرسلها لى فى فايل وورد ومؤرخة على البريد الإلكترونى التالى
ejymejy@yahoo.com
وسوف ننشرها فى الركن الادبى الخاص بسايت ابناء مصر

ولمن يرغب بان يقوم الأديب بنقد اعماله الادبية، فليرسلها لى على نفس البريد الإلكترونى وترك وسيلة للاتصال به، لتحديد ميعاد مع الاديب

والركن الأدبى بينشر أشعار الأستاذ عبد الله المصرى، و شاعر اخوان أحمد سعد دومة، وشمس الزناتى، و الشاعر الحزين احمد مهنى، والشاعر على إبراهيم، وابن ناصر، وصاحب البوابة، والعبد لله، وأي حد حابب ينشر أعماله يبعتهالى على نفس البريد الإلكترونى السابق فى فايل وورد ومؤرخ

الأمر الآخر فيه تجربة عاوزين نعملها فى الركن الأدبى، فى أي سايت أو مدونة بتكون القصيدة مكتوبة فقط، مش ملقاه يعنى مش مسموعة

ميزة الانترنت فى المالتى ميديا الى بيتمتع بيها، يعنى كتابة وصوت وصورة وفيديو، يبقى لازم نستغل الامكانيات ده كلها، ففكرت ليه ماتبقاش القصيدة مكتوبة ومسموعة، يعنى مثلا انت كتبت القصيدة عاوزينك تلقيها بصوتك وتسجلها وتبعتهالى وتبقى القصيدة مسموعة ومقروءة بصوت الشاعر نفسه، وهاتبقى احلى كتير، وهايقدر الشاعر فيها انه يطلع احساسه ويبرز مواطن الموسيقى الى فى القصيدة كلها، وده هايخلى الناس تقبل على الشعر والزجل لأنهم سمعوه وحسوا بيه، لانهم ساعات مش بيقدرو يفهموه قوى، فتبقى ده وسيلة ترغيب وجذب جديدة، أنا لغاية دلوقتى ماجربتهاش، لكن أتمنى ان أي حد يقرا تعجبه الفكرة يجرب يعملها او يقول ينشرها بين أصدقائه الى بيعرف انهم بيكتبوا ، ويبعتهالى، ونتشرف اننا ننشره

فيه نقطة تانية، عاوزين نبرز مواهب تدوينية جدية غير نمطية يعنى تكون مختلفة عن كتابة المقال أو الشعر او الزجل، زي الكاريكاتير مثلا، مرسوم بخط الايد أو ببرنامج فلاش مثلا بأي طريقة كانت المهم انها تتنفذ، اعتقد انه فكرة جديدة ياريت لو حد عنده الموهبة ده يجرب يعملها ويبعتهالى ونشرها على أبناء مصر

ولو حد بيعرف يرسم بس لكن عاوز أفكار ، ممكن يعمل فريق عمل من اتنين واحد يفكر فى فكيرة والى بعيرف يرسم يرسم الفكرة ده ، والبلد مليانة مشاكل عاوزين نصورها بكاريكاتير، مثلا مشكلة المية اتعملت مقال و شعر و زجل و قصة، مانجرب نعبر عنها فى كاريكاتير ساخر

فى مواهب تانية زي العزف، لو حد بيعزف على أي آلة ليه مايسجلهاش، ولو حد بيكتب ، ممكن نوفق الى بيكتب مع الى بيعزف وينفذو حاجة مع بعض، أما عن الوسائل والله بسيطة مش مكلفة أبدا، ولو مش موجودة ممكن نوفرها

الأفكار ده علشان تتحقق فعلا، محتاجة إيمان انها مفيدة، أما عن الخطوات والوسائل لتنفيذ ذلك، هي عرض الأفكار ده، على أصدقائنا، وأصدقاء أصدقائنا، جايز جدا نكتشف مشروع صحفى .. شاعر .. عازف .. رسام كاريكاتير، منتظر فى التعليقات بالله عليكم ان حد يبلغنى يقولى هايبعتلك فى الميل خاطرة زجل او شعر مكتوب ومسموع أو مصور حته، قصة قصيرة، حد يقولى أناهاكلم صاحبى وهو بيعرف يرسم هانعمل كاريكاتير عن الموضوع الفلانى، مقطوعة موسيقية، اتفقنا

علشان رمضان جاي، وكده كده هانوزع بلح، لكن الى هايبعت هانوزع عليه بلح بلبن وان شاالله ماحد حوش :))
وكل عام وأنتم بخير
ونسالكم الدعاء

عادى مش لاقى عنوان ده الطبيعى بتاعى

2007-08-19T12:52:00.000-07:00

احترت فيكى يا مصر
واحتار عقلى معاكى
لهدعى عليكى فى صلاة العصر
لهموت أنا فى غناكى
شفت الى عاش فى فيلا وقصر
وبياكل فى فراخ كنتاكى
والى اتولد ع ضفاف النهر
ويتمنى يموت ... فداكى

تبقى أنت راكب فى الاوتوبيس
وعينك على واحد راكب جيب
وأبوك يبقى اسمه عتريس
وتلاقى ولية بمايكرو جيب

عايش فى اودة فوق السطوح
والتانى فى فندق ماكسيم
هو يصيف فى مطروح
ومافيش ماية فى بلطيم

تروح تتعالج فى التامين
وهو علاجه فى باريه
وتجرى يا عينى بالسنين
من هنا لهنا ماتعرفش ليه

ولادك عدو السبعين
علشان كده الى يموت يموت
وهو عدا التمانين
ومشينا بالريموت
وسكوت يا ولاه اكتم الصوت
ضرب النار هايشتغل
والأسد هايتحول كتكوت

حتى الحلم بطلناه
والأمل وراه ضهرنا رمناه
والخير كمان سيبناه
والحب فقد معناه

هو الحلم من امتى بنملكه
بنمسكه
بننكته
ده احنا دايما بنتركه
بنعدمه
بنردموا
لكن
أبدا مش هانبطل
نحلموا

أوقفوا عمليات الختان واللوز كمان !!!

2007-08-12T12:10:00.000-07:00

من الممكن أن اتفهم موقف النظام المصرى من احداث كاحداث غزة، فمثلا مواقفها إملائية كما قال عزيزى عازف الناي وأتفق معه بانها إملائية ولكنها على هوى النظام المصرى، وممكن تكون نابعة من معادتها للفكر الإسلامى حتى لو كان معتدل، وعدم رغبتها فى التعامل مع حكومة إسلامية منتخبة وحاصلة على القبول الشعبى وتكون على مقربة من حدودها ، وتحوز على حب وثقة الشارع المصرى، فأنا مستعد تمام لتفهم مثل هذه المواقف

ولكن الذى لا أستطع أن أتفهمه مدى سرعة وقوة وصرامة موقف النظام المصرى من مشكلة بدور، فرأيت أن جميع أجهزة الدولة من إعلام ونقابات ومؤسسات قانونية وتشريعية بل وأزهرية أيضا كلها عزفت على نغمة واحدة، فمثلا إعلاميا تناول الإعلام المصرى الرسمى متمثلا فى القنوات المحلية وبعض القنوات الفضائحية الموضوع من جانب واحد فقط وهو قتل الطفلة بدور، الأيدى الغاشمة تغتال الطفولة البريئة، وشاركها أيضا فى تلك التغطية الغير موضوعية والغير حيادية الإعلام المقروء كالصحف الحزب وطنية وبعض صحف المعارضة وبعض الصحف المستقلة ، وقامت المؤسسة الأزهرية بإصدار فتوى نالت قبول الجميع ـ ويالا للغرابة ـ وتم التصديق عليها سريعا، وقامت نقابة الاطباء بتجريم عملية الختان ومنع الأطباء من القيام بهكذه عمليات،

فى حين لم يبلغ ردة الفعل الرسمية المصرية المباركية مابلغه فى هذه الحادثة ـ محليا على الأقل ـ فقد حدث

قتل وسفك دماء جنودنا على الحدود المصرية الفلسطينية على أيدى الجنود الصهاينة
تصادم القطارات ذهب مقابله الآلاف
وحوادث الطرق تحصد الآلاف كل عام
وغرق عبارة الموت
مطالب اهلنا فى بدو سيناء المشروعة
أكياس الدم الملوثة
الطعام المسرطن
عدم وجود مياه فى محافظات الدلتا بلد النيل والقاهرة الجديدة والأمر يمتد للصعيد
اللبن المغشوش او السام
وغيره الكثير والكثير

فنحن شعب ممن المفترض انه لا يوجد بيننا وبين أحد من الدول الاخرى حروب ولكن يتم سفك دمائنا بصورة مستمرة ويا ليتها من عدونا الحقيقى ولكنها تاتى من من نطالبه بامننا وسلامتنا

فعجبت أن جميع الناس تعلم ان بدور قتلت بالمخدر واهلها يعرفون ذلك ولكن يتم جعل الحق بالطلا والباطل حق بالباطل ، لكي يلتبس على بعضنا الأمر، فجميع المصريين من آلاف السنين يقومون بهذه العملية ولم يحدث لا موت ولا قتل ولا حتى نزيف، اما بدور فقتلت بسبب مخدر ومخدر فقط ويجب أن يبقى الأمر على حقيقته ، وإن كان بسبب حتى نزيف فلن نخشى وسوف نواجه انفسنا بالحقيقة ولكنه ببساطة بسبب جرعة زائدة من المخدر هذه حقيقة تم غفلها عمدا

فمثلا نعقد مقارنة بين هذه الحادثة وحادثة سعاد نصر فكلاهما بسبب جرعة خاطئة أو زائدة من المخدر، نجد ان المؤسسات التى ذكرتها لم تجرم فى العموم عمليات التجميل ولم تحمل جراحة التجميل ذنب سعاد نصر، فلماذا نحمل عملية الختان ذنب ما حدث للطفلة بدور ؟؟؟

ثانيا وهذا الأهم إن كان النظام المصرى يبكى دما على دم الطفلة بدور فإنه لم يذرف حتى الدمع بسبب كل ما تم قتلهم بسب حوادث الإهمال والجشع والسلطة والطمع، فلماذا هذا الإنفصام ولماذا هذه الإزدواجية ؟

ثالثا حادثة مشابهة للطفلة بدور، هل تتذكرون الطلفة التى زهقت روحها بالبطيئ بسبب وقوفها فى الشمس تشريفة لمعالى وزير التعتيم، فلقد فارقت روحها امام أعين مدرسيها وناظر ومدير المدرسة وزملائها الطلبة، فى هذه الحادثة لم تسن القوانين ولم تسن أيضا الألسن ولم تصدر الفتاوى ولم ترفع القضايا ولم تتغير القوانين ولم تشرع قوانين جديدة، لم يهاجم الإسلام، لم يعلن الإنتصار على الإسلام، لم يعلن هزيمة الإسلام ، لم يعلن الإنتصار على اجهلة الظلاميين المتخلفين الرجعيين ، لم تقام المظاهرات، لم تقام البرامج الدعائية يقدمها فنانين كبار، لم يسب الشيخ ابن تيمية وابن حجر وابن الباز والعثيميين، ولم يسب الوزير والوزارة والرئيس لم يحدث أي شيئ بالعكس تم ردمه ودفنه، كأن شيئ لم يحدث

حادثة اخرى الطفل محمد عبد الحميد، توفى بسب جرعة زائدة أيضا من المخدر إثناء قيامه بعملية اللوز، وتم نشر هذا الخبر بجريدة الأهرام المصرية بتاريخ 19/7 ، لم أسمع من ينادى بعدم القيام بعملية اللوز، لم أرى نوال السعداوى او أقرا لها مقالا ناريا، لم تقام المظاهرت لتابين هذا الطفل أوالطفلة ضحية وزير التعتيم

لهذه الأسباب ولهذه الازدواجية لا أطمئن لهكذا موقف
فإذا بكيتم فلتبكوا على الكل
وإذا نسيتم فلتنسوا الكل
أما نحن فكتب علينا ألا ننسى أحد
فهذه بنتى وذاك اخى

تلاتة فى واحد

2007-08-05T14:34:00.000-07:00

تم بحمد الله افتتاح سايت أبناء مصر لجميع انواع الأخبار
ونتشرف ان نقدم لكم فى هذه المناسبة

أخبار مصر فى الصحف العالمية ... مقالات رأي ... تحقيقات وتغطيات مصورة وموثقة صوت وصورة ... أقوى الأشعار لأقوى المدونين .... أفلام وثائقية ... حملات شعبية

ولفترة غير محدودة نقدم خدمة توصيل الأخبار السريعة الطازجة قدام عين جنابك
نشر مقالاتك وأشعارك وإنتاجك الأدبى

ولمن يرغب للإنضمام فى مجموعة أبناء مصر
عليه إرسال بريد إلكتروني على هذا العنوان
webmaster@abna2masr.com

ويسعدنا بل ونتشرف بكم جميعا

وأيضا هناك لقاء عمل خاص بالتعرف بالأعضاء الجدد يوم السبت الموافق 11 أغسطس الساعة خمسة فى نقابة المهندسين فى الزمالك
نهتم كثيرا بحضوركم وتفاعلكم وإشتارككم

خبر عاجل* عندنا فى سايت أبناء مصر أقوى تغطية صوتية وأقوى الصور لأحداث المحاكمة الرابعة للشاطر وأعوانه .. وابقى سلملى على أي حد تشوفه وقوله اشترك معانا

الخبر التانى
تم إفتتاح مجلة أقلام مصرية ... صوت المدونين الهادف
فى مول جروب مدونين من اجل التغيير

احدث المقالات لأقوى المدونين
أشيك الخواطر والأزجال والأشعار والقصص القصيرة
أقوى التحقيقات ... نتوعدكم بكثير من المغامرة والإثارة ... قليل من الخنقة
مجلة أسبوعية تصدر كل يوم جمعة بعد او قبل الصلاة
من المدونين وإلى كل الناس

للإشتراك فى الجروب ادخل هنا

للإنضمام إلى طاقم التحرير ابقى ادخل هناك او هنا عادى يعنى

الخبر الثالث
انتهى المهندس علاء الغزالى من تصميم سايت المدون خانة على الورق فقط
والباقى رفعه على الشبكة العنكبوتية إن شاء الله

ومازال البحث جاريا عن أي اموال قد تسهم فى إنشاء هذا السايت اللعين
ويقوم المدون احمد الجيزاوى بالتسول على أبواب المدونات والمجموعات البريدية.... والمدونين الولاد الحلال لسداد المبلغ المتبقى للقيام بهذه المهمة

بصوا بأه يعنى م الآخر
عندكم ثلاثة انشطة اتمنى من كل اللى اعرفهم يكونوا فى الثلاثة ... لانهم ما شاء الله هايكونوا حاجة حلوة قوى قدام

لكن لو حابين تنقوا براحتكم
لكن هانتبتر ع النعمة
ونقول مجهود رائع وبارك الله فيكم وجزاكم الله كل خير .. من غير ما يتقالى انا هاكون فى كذا وكذا وكذا
هازعل والله
وعاوزين كمان نتناقش يعنى الى متخوف من حاجة او عنده ملحوظة او نقد يمهنى جدا أعرفها وناقشها مع بعض
وفى النهاية
الى مش عاجبه المدون خانة .. عنده أبناء مصر

والى مش عاجبه أبناء مصر ... عنده المدون خانة

والى مش عاجبه الاتنين عنده أقلام مصرية
والى مش عاجبه المدونة ده
يبقى راجل كده :))
بس كده كده هاتشترك فى التلاتة أو فى حاجة واحدة ع الأقل :))))

حوار حوار ... يعنى

2007-07-31T00:15:00.000-07:00

منذر : أولا أحب أن أرحب بصديقى العزيز الشاعر أحمد سعد دومة ، وأقوله حمد الله على السلامة، وربنا يجعله فى ميزان حسناتك

دومة : الله يسلمك، آمين وربنا يرزقنا الإخلاص فى القول والعمل

منذر : جاهز لأول حوار اعمله مع أي حد ؟
دومة : جاهز ان شاء الله

منذر: ما الذى حدث صباح يوم الخميس الموافق 26/7 ؟
دومة : اللي حصل ببساطه شديده هو إني أثناء توجهي للمنزل الذي أسكن به في محل عملي بمدينة شبرا الخيمة ..فوجئت باثنين يتابعونني بترقب ، كان هذا بالقرب من شريط القطار ....فحاولت التحرك لأتأكد من كونهم يراقبونني .... وفعلا ما توقعته كان صحيحا تحركوا ورائي بطريقة ملفتة للنظر تشبه إلى حد كبير طريقة الأفلام القديمة ، وبعد أن سرت إلى طريق جانبي متفرع من شارع 25 كانوا هم ورائي وأمسك كل منهم بأحد ذراعي ، وقالوا "تعالى معانا" ....وهم يتجاذبونني بعنف غريب ، حاولت المقاومة ....والاستفسار عن صفتهم فقال لى ثالث كان يقف بعيداً ثم اقترب منا لمشاركتهم في عملية القبض أو الاختطاف ، قال لي "إحنا أمن الدولة" ...فرددت :أي دولة تلك التي تقصد ....دولة مبارك ...أم دولة المصريين ؟ ،فرد علي بأسلوب همجي ...وسبني ....فما كان مني سوى أن قمت بضربه في وجهه ، مما أدى إلى سقوطه أرضاً بعد أن دفعته ، وأدى كذلك إلى تغمية عيني من قبلهم ...ثم اقتيادي إلى سيارة بوكس ...كانت قريبة منا ، ثم بعدها بثوان ..نقلوني لسيارة ميكروباص
منذر : هل الأشخاص الذين قاموا بالقبض عليك أو " باختطافك " كانوا يرتدون زي الشرطة ، ام انهم كانوا يرتدون زيا مدنيا عاديا ، وهل كانت السيارات التى نقولوك بها إلى محبسك هل كانت تحمل ألواح الشرطة المميزة؟
دومة: كانوا يرتدون زيا مدنيا، والسيارة البوكس كانت شرطة، اما الميكروباص فألواحه لم تكن شرطة ولا بها شعار الشرطة

منذر : إلى أين اخذوك بعدها يا دومة ؟
دومة: لا أعلم حتى الآن أين كنت، وظللت طوال تلك الفترة معصوب العينين، واخذوا منى كل شيئ، الموبايل والساعة وكل ما كان معى اخذوه

منذر : صف لى ما الذى حدث معك فى مقر احتجازك او "اختطافك" ؟
دومة : الغرفة كانت عبارة عن أربعة حيطان ليس فيهم سوى أنا وترابيزة وكرسيان، دخل محقق ....وأخذ في استجوابي بطريقة غريبة تشبه -ايضاً- الأفلام العربية القديمة .... ازاي؟ يعني كان يتحدث وهو ورائي وأنا جالس على الكرسي طبعاً ومقيد

منذر: ما هي الأسئلة التى سألها لك؟
دومة : أخذ يسألني عن طبيعة الحملة؟ وماذا نريد من ورائها ؟؟؟ وما هي الأهداف التي نريد تحقيقها ؟؟؟وما هي مصادر تمويلنا .؟؟؟وعلاقتي بالإخوان المسلمين..؟وعلاقة الإخوان بالحملة ؟؟ هكذا ...أسئلة غبية كلها ...تشعرك أنك أمام طفل في الروضة ، وطبعاً أثناء ردودي عليه ...التي استفزته جميعاً كان يتطاول علي بألفاظ دنيئة كأخلاقة ..وأحياناً يصل الموضوع لحد الضرب، هذا في المرة الأولى

منذر : كم من الوقت استغرق التحقيق معك ؟ وهل قام أحد بالاعتداء عليك بالضرب ؟ وهل قاموا خلال تلك الفترة بتقديم أية مأكولات او مشروبات ؟
دومة : استمر التحقيق ما يقرب من ساعة ونصف أو ساعتين ، و كنت مقيد أثناء التحقيق ... وكان يحقق معي واحد في كل مره وتم التحقيق معي ثلاث مرات ، مرتين منهم كانت نفس الشخصية التي حققت معي، أما الأخير فكان شخصا مختلفا، المحقق كان يعتدى عليا بالضرب إثناء التحقيق بيده عندما لا يعجبه رد من ردودى ... ولكن بعد كل محقق منهم بفترة كان يدخل اثنان ومعهم عصي ويحاولون استفزازى، أما من ناحية المأكولات أو المشروبات لم تقدم لي أي مأكولات ولكن قدموا لى ماء وبالطبع لم يكون باردا

منذر: ذكرت يا دومة انهم كانوا يحاولون استفزازك وانهم كان لديهم عصي، ما هي اشكال الإستفزاز تلك؟
دومة: انت مش بتتكلم عدل ليه ؟؟......هو انت محدش عاجبك ...؟؟؟؟؟ .... وكان نهاية هذه المشادة الضرب بالعصى ... حدث لي إغماء لا اعلم كم استمر، و المهم أنني افقت ووجدت نفسي في الغرفة وحدي، وظللت حوالى ثلاث أو أربع ساعات بعد الإفاقة حيدا على كسى ومعصب العينين

منذر: بعد حادثة الإعتداء عليك هل قدم احدهم طعام لك ؟ أو أي مساعدة طبية؟
دومة : واحد ممن قاموا بالاعتداء على قدموا لى ساندويتشا ولكنى رفضت تناوله، فكيف من قام بالاعتداء علي يقوم بعدها بتقديم طعام لى !!!!!

منذر : كيف مر عليك التحقيق الثانى؟ من حيث الأسئلة وإجاباتك عليها ؟
دومة : قام نفس المحقق الأول بالتحقيق معى وبنفس الأسلوب وبنفس الأسئلة، وسالنى عن كتاباتى التدوينية وسألنى عن رأيى فى النظام وفى مبارك، وإجاباتى كانت من النوع الوسطى بمعنى أنه كان يسال ويرد على نفسه !!

منذر : بعد إنقضاء تلك المدة حادثة الإعتداء عليك، هل طلبت منه أن تذهب إلى دورة المياه وأن تتوضأ وتصلى مثلا.. أبسط الحقوق على الأقل؟
دومة : طلبت منهم الوضوء والصلاة ولكنهم رفضوا ذهابى إلى دورة المياه او فك قيودى او فك العصابة عن عينى وصليت على نفس الكرسى الذى كنت جالس عليه ... ولكن احدهم قال لى وأنا أصلي ... والله لو قعدت تصلي وتدعي من هنا للسنه الجايه ...ولا هيعمل حاجه . حسبى الله ونعم الوكيل

منذر : فى الفترة بين التحقيق الثانى والاخير هل دخل عليك نفس الشخصين يوسعونك ضربا ؟ وكيف كان آخر تحقيق؟
دومة: فى التحقيق الأخير لم يحدث ذلك، ظأم عن أحدث التحقيق نفسه دخل المحقق وكان عقلانى أو يدعى العقلانية يتلكم بهدوء باحترام نوعا ما ... كيف؟ يمعنى أنه كان يسأل باحترام ...ويقول لي يا باشمهندس أحمد ....وايه يا شاعرنا ....وكلام من هذا القبيل حتى يجعلنى أطمئن إليه ... أما عن الأسئلة لم تختلف عن سابقيها ولكن اختلفت الصياغة ... انا قدامي ورق فيه كل حاجه عنك ...تحركاتك ...مقابلاتك ...اتصالاتك كل حاجه
يعني ما تنكرش أحسن لك .... فقلت له طالما انت عارف كل حاجه كده بتسأل ليه ... انفعل وثار .....وتحول من عقلاني إلى همجي متخلف ... وقام من على لكرسى ورزع وشى فى التربيزة .. وظل يصيح ويعلى فى صوته علشان أخاف وأترعب ... ودخل إثنان من المخبرين يهددوننى ويقولون لى رد ع الباشا كويس ... ويسبوننى وهكذا الحال والحمد لله بعدها بفترة تقرب الساعتين اخدوني وركبنا العربية ونزلوني في عبود

منذر : حمد الله على السلامة يا عم
دومة : الله يسلمك يا سيدى

وأضاف دومة ان لديه رسالتين ...واحده للنظام وبقول له ...انتم أعلنتم التحدى على الحملة ، ونحن قبلنا التحدى ...فليخرج كل منا ما عنده ....والله غالب على أمره ولكن أكثر الناس لا يعلمون
والرساله الثانية للمدونين والشرفاء من هذا الشعب أقول لهم ....اصبروا وصابروا ورابطوا ...واعلنوا غضبكمـ ورفضكم لهؤلاء السفلة ....ولا تتركوا حقكمـ وإن متمـ في سبيل ذلك أو عذبتم . والله ناصركمـ وهو على كل شيء قدير

هوامش

أولا : دومة لم أعالج كتابته فهو ما شاء الله شاعر فحتى أنا حاولت نى أكون على قده ومقاسه فأنا عالجت أسئلتى بس، وأجوبته زي ما هي من على الماسنجر كوبى بيست .. ما شاء الله عليه ، اللهم أدم عليه موهبته وأسأل الله تعالى انا ينفع بها

ثانيا : بعض من الأسئلة الساذجة التى جعلت دومة يموت م الضحك عليا
هل تكلمت مع أي من المحققين بخصوص واقعة الإعتداء عليك أو أنك ترفض أن يقوم بضربك او بسبك او بإهانتك، هل تكلمت بخصوص إحتجازك الغير قانونى، وعدم توجيه تهمة رسمية إليك، وعدم عرضك ع النيابة ، عصب عينيك وتقييدك، وعدم تقديم لك أي مأكولات او مشروبات، وعدم وجود محامى إثناء التحقيق معك، وعدم الإتصال بزويك طوال تلك الفترة
وسمعت إجابة واحدة منه، قالى تصدق إنك غلبان لما هاتدخل هاتعرف :) وثانيا انه تم إختطافى وهذا حتى ليس باعتقال وما بنى على باطل فهو باطل

فلم أملك إلا قول اللهم أهلك الظالمين بالظالمين واخرجنا من بينهم سالمين منصورين

شيلوا البانارات الى هنا

2007-07-28T13:37:00.000-07:00

دومة حر يا مدونين
يا حبايبى يا اخوانى يا أصدقائى المدونين

الحمد لله احمد سعد دومة تم الإفراج عنه

وطلع يوم السبت 28/7 ع العصر كده

وهذه رسالة احمد سعد دومة لكل المتضامنين معه تركها فى تعليق

إخواني ...أخواتي

سلام ربي عليكم ورحمة الله وبركاته

لن أشكركم على موقفكم ...فلن توفيكم كلماتي مهما عظمت وإن بلغت عنان السماء

.لا يسعني سوى أن أقول جزاكم ربي عني خير الجزاء

أحمد سعد دومة"شاعر إخوان"

وجارى اللقاء معه ... ومعرفة تفاصيل اكثر عن ظروف اعتقاله

وجزاكم الله كل خير على تضامنك وعلى سرعة استجاباتكم وعلى مشاعركم الجميلة هذه

وعقبال الباقى :)
اوعوا تنسوا شيلو البانارات الى هنا :))

اختاطف مدون إلى جهة غير معلومة

2007-07-26T10:03:00.000-07:00

تم أختطاف المدون والشاعر الإخوانى أحمد سعد دومة صاحب مدون شاعر اخوان

وذلك إثناء وصلوله إلى مكان سكنه فى شارع 25 متفرع من شارع خمسين بالقرب من المؤسسة فى شبرا الخيمة

حيث أفاد مقرب منه

أنه فوجئ بثلاثة رجال يهاجمون أحمد سعد ، وهو يقاومهم ولكنهم استخدموا عصابة فى تغمية عينه، واقتادوه إلى عربة شيفورليه بوكس نقل كحلى كانت تقف على ناصية الشارع الجانبى يعنى فى شارع 25 ، وكانت تقف بجوار هذه السيارة سيارة ميكروباص بيضاء ، أنزلوه من السيارة الشيفورليه إلى السيارة الميكروباص واقتادوه إلى جهة غير معلومة، وكانت الساعة حوالى العاشرة والنصف أوالساعة الحادية عشر من صباح الخميس 26/7

وأفاد صديق أحمد سعد ، أنهم قالوا له مش قلنالك ماكلش دعوة بالحملة ده

وكان أحمد سعد، يجهز لحملة المليون وجه ضد نظام مبارك

وحسبى الله ونعم الوكيل

أرجوا من الجميع التحرك، والتضامن مع أحمد سعد

بوضع البانارات، أوبالاتصال بمن يعرفون من الحقوقيين
وجزاكم الله كل خير