Monday, July 27, 2009

خواطر من ضربة شمس

ما بين طرفة عين وانتفاضتها يغير الله من حال إلي حال

شوفوا

صدام حسين

هشام طلعت مصطفي

من منا يأمن مكر الله

ويا وراث مين يورثك

اوعي تقول خلاص ضحكت لانك أول ما هاتقولها هاتشوف هايحصلك ايه

هو احنا عايشين ليه

هايحصل ايه لما نموت

يا تري الراجل المتشرد المجنون الى شفته النهاردة قصة حياته ايه

مش ممكن يكون كان راجل محترم ومر بموقف صعب ولا حاجة

طب يا تري الناس الى فى دور المسنين وهما فى عمري كده كانوا يتخيلوا انهم يحصلهم كده

هو أنا ممكن يحصلي كده

يا تري مستخبي ايه

طب هو ليه قالوا لو علمتم الغيب لاخترتم الواقع

طب هو ليه ربنا حرم الانتحار .. اكيد نفسك تعرف الاجابة يا جمعة

هو احنا هانورد علي جنة بمناظرنا دي

طب هو ليه ربنا بيرزقنا بالرغم من اننا بنعصاه ... يبقي بيحبنا .. طب بنعمل معاه كده ليه

هو احنا هانعيش فى القبر ازاي .. أو يعني الوقت هايمر علينا ازاي

طب هي ايه سكرات الموت

خايف احب بنتي

أصل أبويا كان بيحبني قوي .. وأنا ماكنتش مقدر حبه وخوفه عليا كده

وانا بقيت أخاف علي نفسي، أصلي بقيت بحب بنتي زيادة عن اللزوم وبقيت أخاف عليها لاتنخبط ولا تقع مني وانا بلاعبها

ماكنتش بخاف كده علي عيال اخواتي

مش متخيل اليوم الى ممكن بنتي فيه تعدي الشارع أو تروح المدرسة لوحديها. . أو المُدرسة تضربها ولا تزعل مع زميلتها

لغاية لما اتجوزت كان أبويا بيقلق عليا . وأنا ماكنتش متخيل ان فيه أب ممكن يقلق علي راجل بيشتغل من بدري ومتجوز وقرب يخلف، وكان بيتخانق معايه علشان قافل الموبايل ومش عارف يطمن عليا

كنت بستغربه قوي

قد ايه وحش الحساس ده احساس انك مش مقدر حب الآخرين ليك ولا مقدر قلقهم.. أصل معناه كده انك مش بتحبهم قد ما هما بيحبوك

طلعت أنا الغبي

دلوقتي والله لو نمت ع البورش ماحدش هايسأل عني ولا يعبرني بالجزمة القديمة



شفت ناس كتير كانوا أغنيا جدا وأقويا جدا وف لحظة وثانية وقعوا ومافيش فى جيوبهم حق المواصلات

والى بيموت وهو فى عز شبابه

وعاوز بعد كده حد يفكر فى حسني مبارك

كل واحد فيه الى مكفيه

ماحدش هايعمل حاجة غير اتنين مش هاقول عليهم خليهم فى البوست الى جاي

قال يعني
أديني ماطولتش يا مفيد :))

4 comments:

حزيــــــــــــــــــن said...

لا اخال نفسى وليا واعلم انى لست براهب ولا متنسك لكنى كنت اعرف انك ستصل الى هنا
كنت تختلف معى منذ عرفتك فى هدوئى وتسألنى لماذا
الله يرزقنا ونحن نعصيه لأن الله ليس لديه الامراض النفسيه التى لدى البشر
الله منزه وله صفات يجب ان يراها على عباده
لذلك لابد وان تعصى والا لما ظهرت صفة المغفرة

لو ظللت فى التأمل قد تصل الى الجنون
ونعما به من جنون

على فكره انت واحشنى جدا
ربنا يخليلك البت

smraa alnil said...

اولا ربنا يخليلك بنتك يارب
ويخليلي انا كمان بنتي
في احساسك ببنتك هو نفس احساسي انا وجوزي ببنتي برضه
انا كمان مش كنت مقدرة حب امي ليا
وعرفته بعد ما جبت بنتي

التساؤلات اللي انت قلتها جايز مش تلاقيلها اجابة
ولو حاولت انك تفكر فيها يبقي هتفضل طول عمرك بتفكر ومش هتعرف تعيش

وبالنسبة لجمعه مهما قلتله علي اجابات مش هيقتنع
دة جمعه وانا عارفاه
وربنا غفور رحيم

مـحـمـد مـفـيـد said...

الله يسامحك

No Fear said...

السلام عليكم
ربنا يهديك و يهدينا يا منذر
ربنا يبارك لك فيها إن شاء الله و يحافظ عليها
.
الله يسامحك زي ما مفيد ما قال
و الله يسامحك أنت كمان يا إنجي