كيف يحدث هذا كل مرة ؟

المؤمن القوي خير وأحب إلي الله من المؤمن الضعيف .. ما بالنا بغير المؤمن اصلا أو غير المسلم

كنا خير امة عندما كنا نامر بالمعروف وننهي عن المنكر

قبل ان تتهمني بالمزايدة

أنا ازايد بالفعل ... أزيد علي نفسي وعلي كرامتي .. وازايد علي الآخرين .. فالمرة التي زايدت فيها علي نفسي شاركت

في ثورة عظيمة انتظر الأيام بفارغ الصبر كي احكي لابنتي عما فعلته انا وزملائي .. فهو الشيئ الوحيد فى حياتي الذي صنعته

بنفسي كاملا متكاملا .. فخري بحق استطيع سرده بسعادة وزهو لا يوصفان.

لم ادخال فى معارك من ذلك النوع ابدا ولكن كنت دائما اعيش فيه واحلم به واصارح نفسي فى خوف ماذا ستفعل عند المواجهة؟

جائت الإجابة قاسية فى معارك الكر والفر الليلية يوم 26 و 27 يناير

جاءت من ضابط فى مثل سني بالقرب من نقابة الصحفيين عندما كنت اتلمس السبيل إلي هناك جاءت قاسية .. جاءت كالسياط

غادرة .. ارتني كيف نفسي وكيف حالي وما هو حجمي الطبيعي.. عندما ركضت مع الراكضون تجري ورائي سبابه كالذئاب

تنهش فى عرضي .. شعب جبنات وخولات وولاد وسخة ... كم اكره هذا الرجل

ماكنت احلم به عشته بالفعل

في ذلك اليوم لم استطع النظر فى وجه ابنتي .. وشعرت انها تستحق ابا افضل مني واني لا استحق زوجتي .. لا لا .. لا

استحق اي امرأة علي الإطلاق .

لم اكن الوحيد الذي ركض .. لكن هذا لم يكن فيه من العزاء الكافي لمواساتي

كنت اعلم ان علاجي الوحيد هو الانتقام .. ولكن ولسوء الحال لم اكن اعلم كيف سانتقم .. والافظع من ذلك كنت اعرف اني لا

املك قوة وقدرة الانتقام فلا املك مثلا الذهاب إلي اقرب قسم شرطة ومواجهة اي ضابط والانتقام منه

فكنا نفعل فى المدارس ان حدثت خناقة بيننا وبين طالب من مدرسة اخري نذهب لتلك المدرسة ونضرب اي فرد منها فنكون بذلك اخذنا

بثأرنا .. ولكن ذلك ايام المدرسة حيث كان سلاحنا الوحيد توكة الحزام .. أما والآن فالموضوع أكبر بكثير

انتهي ذلك المشهد من راسي عندما رايت بام عيني ضباط الأمن المركزي والعساكر وهما يركضون للوراء مفزوعين ..رفعت راسي

للاعلي كأي امتع ناظريا .. وانا القيهم بالحجارة فى مشهد اقرب لمشاهد الانتفاضة الفلسطينية لكي اصاب ببعض شظايا الخرطوش

لاشعر بالم بسيط فاسقط علي الارض مثل الشهداء ولكن لا اري دما ولا ألما كافيان حتي يهرع إلي الشباب بالقرب مني لاسعافي لاني

زي القرد ومافييش حاجة!!

لأقف ثانية واتمتع بذلك المشهد من جديد وهم ينسحبون وتختفي تلك الصورة خلف غطاء كثيف من الغاز المسيل للدموع.

لتعاودني مرة اخري الآن .. لأني لا اظن ان ابنتي سترغب فى الاستماع إلي بعد عشر سنوات من الآن اذا استمر حال الثوة كما

هي الآن

وبالرجوع لموضوع المزايدة

اتذكر حوار مع صديقة قبل الثورة حول وقفات خالد سعيد والأثر منها فتلجمني بحجتها القوية وتحكي لي عن بهاء صابر بفخر شديد

كيف واجه احد ضباط الداخلية واوقع قبعته و و و لاقاطعها قائلا انتي مش عارفة بهاء ده ايه .. فتسارع بالقول ارجل من ناس كتير علي فكرة .. اكم من رجال ملحتون متدينون يستطيعون تكرار ما فعل ... لانقطع عن محاوراتها لاجل

لنتقابل وتعرفني باحد الشباب واقول له لن يحدث شيئ حتي يقود البرادعي أي مظاهرة ونكون نحن الوقود لها ليقول لي بمنطق عجيب

انا مش مستعد اكون وقود لحد ومش هانتسني حد علشان يعملنا حاجة .. لم افهم كلامه إلا بعد صلاة الجمعة يوم 28 يناير فى امبابة

فوق الكبري وانا أري خلفي الحشود الهائلة .. ولا أري اي احد من النخب او حتي نشطاء سلالم النقابات

اقول لنفسي هذا قبل ان تحدثني "نفسي" عن علاء ومنال و بداية معرفتي بعالم التدوين وقصصهم وقصص آخرين

لن اخطا مرة اخري فهو فعل ما لم نسمع به يوما ما

أري الآن بمنظور مختلف كليا

اري ناشط "مطول شعره" "علماني" "مطرقع" فعل ما لم يتسطع فعله الكثير من المؤمنين والمتدينين

كيف يحدث هذا كل مرة؟

افيونتي اليومية .. جبهة التهييس الشعبية

علي فكرة أنا فيا شئ لله كده، كنت حاسس انهم هايلغوا حاجة فى البلد ... وكنت حاسس انهم هايلغوا الشعب .. بس الحمد لله عدت علي خير ... المرة الجاية يبقوا يلغوه علي رواقة ... هما بحمد الله وباحمد عز مفجر ثورة التوريث الى أبوه لسه ميت من يومين، لغوا الانتخابات قصدي لغوا الترشيح علي الانتخابات ،، ييييييي هما لغوا حاجة كده مش مفهومة بس متعلقة بالنخاع الشوكي بتاع الانتخابات

وأهو الراجل جابها من الآخر علي كبر أهو .. وقال ايه احنا الى كنا خايفين يتقلب ويسيبنا لجمال ... كده نطمن انه هايدفنا كلنا ابن اللذينه ده، وبأه مجلس الشعب كله حزب وطني ونسوان لا معارضة فيها ولا اخوان والله حلوة والله وايه ... ومن غير تزوير أصل البلطجة والعنف وتسويد الورق والحاجات دي كلها الى حصلت لا تؤثر علي العملية الانتخابية تؤثر فقط علي القب والجاهز الهضمي والتنفسي ... امال ايه الى ممكن يؤثر نفسي اعرف ... والكلامنجية يقولولك ده الحجم الطبيعي للاخوان والمعارضة والحاجة الساقعة فى نفس الوقت لا ونسبة المشاركة حاجة وتلاتين فى المية من 40 مليون قفا هههههههه

واكبر قفا هو السيد البدوي صعبان عليا قوي .. وشباب الاخوان الى تعبوا وعدوا علينا فى البيوت صعبانين عليا برده ... ومحمد مفيد صعبان عليا وهو رايح ينتخب ويبطل صوته مراقب اللجنة يهبشه ويقوله مش فيه ناس أولي بالصوت بتاعك ده .. مال اهلك انت هو انت صحيح هاتفهم احسن منه .. فعلا تلامة وغتاتة المصريين مش علي حد أبدا بس هو السؤال التاني ليه الناس ماتقفش الفلوس من المرشحين وينتخبوا حد تاني ولا بيحصل كده فعلا والحزب الوطني هو برده الى بيفوز .. لا دي أنا أقع فيها والله مش ممكن يعني توصل لكده سحر يعني ولا ايه

واحمد عز يقولك اهم حاجة فى الانتخابات هي خطة مواجهة الاخوان .. هو انتم محتاجين خطة ولا نيلة ... ولا كان ليها لازمة الزفة الزفرة بتاعة الدي جي ووجع القلب والازعاج والخايلة الكدابة فى العيد الكبير واليفط والمصاريف ... ده من غير يافطة واحدة .. من غير يافطة واحدة ممكن تعملوا الى انتم عاوزينه .. يالا تتعوض فى الانتخابات الجاية انشاء الله يديكم انتم طولت العمر احنا ممكن نتشل فى استفتاء الرئاسة السنة الى جاية ، طب ما نعملكم توكيل عادي يعني مافيهاش حاجة ولا بالاش خالي البلد تاخد اجازة يوم من نفسهامن وجع قلب وزحم المدارس واهو رزق برده .. امال البلطجية الغلابة ياكلوا منين والحرامية المساكين يشتروا مطاوي منين نفسي افهم .. حد يفهمني الى حصل ده حصل ازاي .. بس عادي عادي اربع فرخات ودجاجة وماحدش فاهم حاجة مقطع من " اغنية سعد حاحة اغبياء عين شمس"

سؤال صغير كده الجيش بتاعنا فين والله واحشنا قوي .... البهوات الى مفيمين الفيرنا والتيمبرا والكرولا 95 بيهببوا ايه ... نسوانهم قاعدين فى نادي الجلاء .. حلو نادي الجلاء مافيهوش حاجة .. بس مافيش منشور يوحد ربنا يهدد ولا يوعد بكسر الياء الحكومة يقولهم احنا هنا ..
طب ماحد يزور منشور كده ويمضيه حتي باسم الظباط الفُشار عادي يعني .. ايه يعني ماعندهمش مشاكل
مستشفي غمرة وحدايق القبة ونوادي المدرعات والاشارة والمشاة مكفية معاهم خلاص .. اكلوا وحلوا ولاد الهرمة وسيابنا للمر .. بكرة يشربوا ويشيلوا ابح

ناس مش لاقية مستشفيات وبياخدوا من الغلابة ضرايب علشان يبنوا ليهم نوادي ومستشفيات

ده الى بيعيا بيتعالج فيهم حسب رتبته مع انهم فى النهاية كلهم المفروض يعني جنود

وطبعا ماحدش يقولي الحزب الوطني فيه إصلاحيين مابقاش خلاص لا الشعب ولا الحزب ولا حاجة ياريت نفكنا من الحوار ده ...لان لو فيه عضو شريف وصاحب مبدا فى الحزب الوطني المفروض كان قدم استقالته .. والى قال ان الامن المركزي الجناح العسكري للحزب الوطني كداب وعوض لان وزارة الداخلية كلها مليشيا تبع الحزب الوطني وحرس مسلح لقصر الرياسة

سايبنا لشوية حرامية وقوادين وبرشمجية وتجار مخدرات ... ده فيه لواءات بتعمل عصابات مسلحة لسرقة العربيات ــ ولاد هرمة ــ والي يبكي انه بيبقي خارج من خدمة مكافحة سرقة السيارات .. ده الى بيعوز حشيش نضيف بيوصي ظابط شرطة معروفة يخلصله المصلحة دي

الجدع الشهادة لله عامل شغل فى آخر أيامه يتحسد عليه والله ... بسك السيد البدوي علي الدستور والمصري اليوم والشروق مش محتاجين بسبسبة ... و سافر قطر ظبطها والجزيرة بقت بسم الله ما شاء الله بقت حاجة مشرقة ... والمذيعيين الى كانوا بيظيطوا ويسخنوا لما حد بيشتم بقوا يقفلوا عليهم التليفونات ويألفلموا بعديها .. والعربية والحرة تتفرج عليها كانك بتفرج علي قناة النيل للأخبار معتز رفعوله السلك الى ماشي عليه أكتر واكتر ... وطبعا لبني وشريف هي عسل وهو عامر .. البنية بتلبسلي فراشة بمبمي
اما الشيئ العجيب فهي مني الشاذلي بقيت مش فاهمها .. بقت متحفظة شوية يمكن حاسسها متوترة حبتين جايز ... بس الناهية ان مش دي مني الى انا بعرفها .. حاسس ان عليها ضغوط جامدة حبتين مش ده ادائها والغريب انه مأثر علي طلتها .. ماحدش كتير ممكن يحس بكده
أنا بس الى بحس بكده وكلام نوارة عنها زعلني منها شوية .. لان مدونة نوارة بقت بصراحة افيونتي اليومية
بس خلاص

لقد الفنا القرف

يعني حلو يعني لما يولوعوا فى البلد ولا تحصلهم حاجة لا سمح الله .. هايبنسطوا يعني ولا احنا هاننبسط .. طب ما

يرمونا فى الصحرا احسن ... ويقعدوا هما هنا مع نفسهم ونرجع مرة تانية لمرحة الجمع والالتقاط !!!

ولا يبقي فيه لا جوامع ولا كنايس ولا تراخيص ولا نيلة، نرجع نبني بالطين وناكل من الفخار ــ ولا مانكلش احسن زي ما هما عايزين يعني ــ نتعلم فى الكتاتيب واتعشت علي كده

ويقعدوا هما فى التجمع والشيخ زايد والعروبة والقطامية والقرية الذكية .. بس هو فيه حد يسيب مصر ويقعد فى الأرياف بشوقهم يا عم خالص خليهم براحتهم

ولو عاوزين ضرايب بقي ياخدوها معيز وغنم ودره وشعير ويحكموا نفسهم باه ولا يجيبوا شعب من بره يحكموه ...ويا ناكر خيري بكره تعرف زمني من زمن غيري

طب مايفتحوا بابا الهجرة طالما حنا جاحدين خيرهم كده .. عاوزين يربونا يودونا الجزائر ولا السودان ولا نروح عوم لايطاليا احسن

عادي يعني

بس فكرت فى فكرة دلوقتي حالا

احنا نخلينا زي ما احنا

بس نهد الجوامع والكنايس وكل واحد يصلي مع نفسه ... ونقطع البطايق .. ونرمي بوتجازات وسخانات المصانع الحربية ويبقي كده ضربنا عصفورين بحجر واحد يصدروا الغاز براحتهم لإسرائيل علشان مش هانستعمل لا غاز طبيعي ولا انابيب .. لا ده كده ييبقي اكتر من عصفور لان مش هايبقي فيه خناقات ولا قتلي بسبب طوابير الانابيب ونعتمد علي البواجير بتاعة زمان فى الطبخ ووتسخين المية ... ولو قفشوا علي البواجير نقضيها ظلطتين واقلب ... احنا بطلنا نزعل حد مننا خلاص

بالنسبة للتلاجات والتكييفيات ولمض النور فمبقاش ليه عازة خلاص لاننا خلاص هانقعد في خيم فى الهواء الطلق و أي كلب معدي هايتاكل ، ولو حمار هايتسلخ ولو قطة هاتتدفن مطرحها ... من النهاردة مافيش شعب هما بس الي شعب .. . تصفيق
ونرجع نشرب المية من الطرمبات وماسمعش بطل يقولي مجاري ولا بتاع خلاص منها وإليها نعود و علشان كمان ما يجييش حتت اثيوبي يشخط فيهم ويعايرهم ويقولهم هاخد منكم ماية النيل ومش هاتعرفوا تعمل منتجعات ولا قصور ... ياخدو هما ماية النيل يملوا بيها حمامات السباحة وبحيرات الجولف فى مارينا الساحل والسخنة واحنا مع نفسنا ولا يشغلوا بالهم بينا خالص

وطبعا هانحتاج لا تليفزيونات ولا فضائيات ولا كمبيوترات ولا جرايد ولا نت ولا أي حاجة من دي خالص .. كله هاينام من المغرب ويصحي الفجر .. ومش عاوز شغل بنات حد فيهم ينطق و يقولي أنا ماقدرش افطر غير عيش وجبنة رومي مسخنين فى المايكروويف ولا الكيتشين ماشين بتاعي بيوجعني ولا الهاجص ده .. هاتتعور فيها ... زمن الللل خلاص انتهي ماحدش باه فاهم حاجة

و أتخنها بنت هايبقي جهازها باجورين وطقم فخار من مصر القديم خمس قطع احجام مختلفة وحلتين نحاس وطشط ألمونيا وانبسطوا الراجل هايجوز اربعة فمش هايبقي فيه مشكلة عنوسة خالص .. والنسوان هاتتهد وتتلقح فى البيوت لا شغل ولا يحزنون ولازحمة ميترو ع الفاضي

ايه تاني ايه تاني

نشتغل باه علشان الايد البطالة نجسة الرجالة تقتل الحيوانات الضالة وترعي الغنم والمعيز والجواميس وكده والحريم تطبخ وتضرب العيال
ماحدش يقولي طب مانشتغل عند الكبارات
الكبارات هايجيبوا عمال من بنجلاديش ونيبال هاياخدوا 400 جنيه لوكشة واحدة ولا حاوجة لأشكالنا الوسخة
ولما ييجوا سياح يبقوا يتفرجوا عللينا فى حديقة الحيوانات المفتوحة الى بقينا عايشين فيها
واظن بعد كده يبقي عدنا العيب وازح

حد ليه شوق في حاجة تاني

أو فيه حاجة تاني ممكن تتعمل اصلا

بطريقتهم واسلوبهم ده عاوزين يرجعونا لورا لورا كتييييير قوي

،

خلاص يشدوا كوبس الكهرباء

ييعرفوا يوقفوا عجلة الزمن والتقدم الانساني والحضاري

قدروا يعملوا كده كام سنة وهايقدروا يعملوا كده لكام سنة قدام 30 أو 70 أو 100 سنة يبقوا كام دول فى عمر الانسانية كلها

لو عرفوا الى قبليهم يضللوا الدنيا ويضلموها يبقوا هايعرفوا يضللونا ويجهلونا

بالأساليب الزبالة البيئة الدي جي الى عربية نص نقل الى بيلف فى الشوارع علشان ناجح محمد جلال وبشعبان عبد الرحيم وباحمد عز وجمال مبارك بتقطيع يفط الاخوان فى الشوارع والحواري وبوسترات جملة اسماعيل فى جاردن سيتي والمنيرة

بالدم الملوث وبقطر الصعيد وبخالد سعيد وعماد الكبير

بالخوف والرعب والقهر والظلم وبالمشي جنب الحيط

بالعبارة وطرق الموت والدائري والميكروباصات والتكاتك والميترو الى يقرف

بالمرتب الى بيبكتونا عليه وبالعيال وبلقمة العيش بالكدب فى التليفزيونات واسامة سرايا والدقاق ووعبد الله كلام وبيستك نو

بمعارضة مخصية متنقية ع الفرازة وقنوات حمضانة اصحابها مصلحجية

بتعليم فاشل جاهل وبشباب جامعي محصلته من دراسته سالب واحد وبفكر مشوه وثقافة سطحية تليفزييونية حورتجيه

بتامر حسني ولا حماقي ولا عمرو دياب بهيفاء وغادة عبد الرازق وخالد يوسف وعبير صبري

بالزحمة والخنقة والغلا والقرف والمرض

بالرشوة والسمسمرة والمصلحة والعمولات والهدايا التطنيش بالتصريح والتلميح والتهديد والتخويف

بالدين ولا بقلة الدين

بالحجاب ولا بالبادي وبحجاب علي بادي

بجلبية ولا ببنطلوان سقط

بايه بالظبط

هايعملوا ايه تاني ؟ طب ممكن يعملوا ايه اكتر من كده؟

انشكحوا .. وانكشحوا

لقد الفنا القرف

أمناء الجنة وحراس النار

من منا يملك من نفسه شيئا، الحياه كلها حكم واقدار ، انت مخير ولكن كتب عليك فى الأصل اختيارك، كل الأشياء والأحداث والتفاصيل مقدرة بقدرة الله وموزونة بمقياس عدله العدل، حتي الجنة لن ندخلها بعملنا لكن برحمة من الله عز وجل، ـ انشاء الله يعني ـ ، فالله وحده هو الذي يعلم كيف ستكون خاتمتنا

وحكمة الله ليس لها حدود مثل رحمته، فدائما اقف عاجزا أمام حكمة الله فى مصيبة اتخيلها انها فاجعة الفجائع، وفجاة تشع من وسط الفاجعة رحمة من رحمات الله ويرزق قلوبنا من الصبر والسلوان ما يجعلنا مذهولين من أنفسنا ، ونتسائل كيف لا نجزع؟ كيف لا نموت؟ كيف لا يحدث لنا شيئا؟

ومن هنا أتسائل عن الفرق بين البلاء والابتلاء، فهل لو قدر الله لنا المرور بأزمة معينة فهل معني ذلك ان هذا بلاء وغضب من الله ، ألم يقل رسول الله صلي الله عليه وسلم ان ما من شوكة يشاك بها الإنسان إلا وتحط به خطية من خطاياه يوم القيامة بمعني الحديث الشريف

فكيف نجترأ علي الله ويقول بعض الناس بغير علم ان الفيروس الغريب الذي اصاب الدكتور نصر أبو زيد هو عقاب من الله تعالي ولا يعنيني كتابات الرجل فهو فى ذمة الله تعالي وما ادرانا لعل الله جاوز بهذا المرض عن سيئات هذا الرجل وكلنا عيوب وخطايا

الطاغية صدام حسين فعل ما فعل ونطق الشهادتين فهنا حسابه عند ربه هل نقول بغير علم انه فى النار او فى الجنة

الغرقي فى البحر الذين لعنهم شيخ الأزهر السابق ورفض اعتبارهم شهداء هل علم من الله ما لا نعلم؟ كيف أصدر حكمه؟ هل نماشيه؟ هل نخوض فيما خاض العالم الكبير

فأنا أخطئت فى حق خالد سعيد تماما كما أخطئ الشخص الذي حلل لي لماذا لا يريد التضامن معه ولا يجد شفقة فى ميتته ويجد عذرا لقتله، ولكن عذري لنفسي ان عدم تضامني الانساني معه فى الاول كان لسبب آخر غير سببه، فسبب هذا الشخص ان أي حد يموت ميته كهذه فلابد وانه يستحق تلك الميته، وهذا التعذيب، ويري أن هذا هو القصاص العادل من الله فى حق هذا الشاب ، وانه ولا بد وان عاش هذا الشاب عيشة فاجرة يستحق عليها الموت، ولن يرزقه الله هذه الميته إلا بسبب أعماله الفاجرة، ناسيا وغافلا ان الله عز وجل ـ وباستخدام نفس منطقه أيضا ـ لن يرزق فاجر مثل هذا الكم من التضامن والدعاء بظهر الغيب.


كما فى حادثة انتحار الشاب من أعلي كوبري قصر النيل انهالت اللعنات من كل حدب وصوب ولا نعلم كيف تكون خاتمتنا ولا نعلم كيف كانت خاتمته ، ولنا فى الصحابة الذين ظنوا ان رجلا فى غزوة من غزوات رسول الله قد نال الشهادة فإذا بمعلم الأمة الحبيب المصطفي يقول لصحابته الكرام انه فى النار وهو كما يترائي للجميع شهيد نال الشهادة فى سبيل الله فإذا به لم يستطع تحمل آلام جراحه فأجهز علي نفسه

والمرأة التى عصت ربها و التى قال عنها رسول الله ( صلي الله عليه وسلم ) انها تابة توبة تكفي أهل السماء والأرض

ثم ناتي نحن ونُدخل من نريد النار ونُدخل من نريد الجنة

مضحكات .. مبكيات

جلس خالد الحندي بجلبابه الأبيض الناصع وعبائته الفخيمة وسبحته الملعلطة بجوار محمود سعد الأنيق والأسد مرتضي منصور وشبله احمد منصور بجوار الضبع أحمد شوبير علي أنها جلسة صلح بين فصيلين أبدع فيها مرتضي منصور بالورقة والقلم ومناديل الكيلانيكس علي الهواء، ولم يستطع ان يجاريه شوبير فطلاقة مرتضي منصور ليس لها حدود فافترسه مرتضي باستمتاع وتلذذ، وأجهز عليه بدم بارد إلي الأبد فأقترح ان يضم السيد عمرو موسي الشيخ خالد الجندي والإعلامي محمود سعد لجامعة الدول العربية لعلهم يستطيعوا أن يُجلسوا فتح بجوار حماس علي طاولة المفاوضات، لكن بشرط أن تكون علي الهواء

ذهب الغضنفر ابن الغضنفر أحمد زكي بدر غازيا مدرسة حكومية فى حلوان فقتل المدير والوكيل والناظر وجرح عشرة مدرسين وأسر مجموعة من التلاميذ وسبي المدرسات، وظهر مع معتز ومع مني ( يابخته ) وبدا مزهوا لأقصي درجة وشعرنا معه بقوة حجته وصرامة شكيمته وكمال شياكته واناقته، وبعد يومين ظهر فى معية السيد مشعل الوزير والنائب عن حلوان التي بها المدرسة والمدرسين متوسطا فى مؤتمر صحفي للعفو عن الناظر والمدرسين والطلاب ليرضخ أخاه فى الله وزميله فى الوزارة أخيرا لطلبات مشعل معقبا معلش هاتنزل المرادي لكن اعمل حسابك المرة الجاي مش ممكن تنزل الأرض أأأأأأأبداً ، فأقترح أن ينضم السيد مشعل إلي نفس صاحبيه مرتضي منصور وشوبير فى لجنة الجامعة العربية علي ان يتحقق نفس الشرط البائت

ذهبت مرغما إلي استاد المقاولون العرب مشاهدا لماتش باهت وممل جمع الأهلي بالمقاولن وكانت اول مرة أهذب فيها إلي الإستاد بعد المرة الخالدة الذكر التي جمعت بين منتخبي توجو وانجولا حيث ذهبت طامعا لبيع التذاكر المجانية ولم أجد أصلا أي متفرج عن شاري لتلك التذاكر، فنظرت متاملا لاحوال مشاهدي المباراه الذين تكبدوا عناء الذهاب إلي هذا الاستاد الشاق والهاتف وحرقة الدم ودفع تذكرة الدرجة الثالثة ـ خماشر جنيه لوكشة واحدة ـ فذهب بخيالي متفلسفا ومتحذلقا ومسفسطا لماذا لم تشارك تلك الجماهير فى إضراب السادس من إبريل او أي اعتصام او مظاهرة أخري، لماذا لم تهتف مدافعة عن حق أو رافضة لباطل والسؤال الأهم لماذا ذهبت انا الآخر لمشاهدة تلك المباراة

أن يبيت موظفون وعائلاتهم فى الشارع ونراهم بأعيننا كل يوم ويعلم بهم المسئومين ولا يفعلوا شيئا

أن يفترشوا الأرض يوم شم النسيم والرئيس فى فترة نقاهته فى شرم الشيخ

أن يضرب الشباب ويتحرش بالنساء وتتحول وسط البلد إلي ساحة معركة ونزال

أن يستقدموا حماقي للغناء فى جامعة عين شمس فى نفس يوم الإضراب وأن لا يخجل ولا يخشي من الافصاح عن تلك المؤامرة الهزلية

أن يعلم الشعب كل هذا وأكثر

ان أظل أنانيا مكتفيا بالحديث فى مدونتي مرددا صدي صوتي وصوت غيري ولا أفعل شيئا مثلي مثل غيري

فهو الشئ الحقيقي الذي يستحق البكاء من اجله

وللنتظر ما هو أسوء ولننظر فصل جديد من مسرحيات يقوم ببطولتها

شوبير ومرتضي

لكح والبردعي

طلعت السادات واحمد عز

أو حتي الأسواني وحسن نافعة

فلن أصدم فى أي شخص يظهر فى أي إعلام

طبعا ماعدا مني :)

أحداث حزينة - 1

قُبل الطعن فى قضية اختطاف ربة منزل من منزلها وتناوب عشرة كلاب الاعتداء عليها، وصرح محامي الكلاب بان السيدة هي التى دفعتهم لارتكاب الجريمة لما كانت ترتديه من ملابس، وهو قول ان سمعته من صاحبه لقتلته، وان كنت قاضي وسمعته من محامي وانا من علي المنصة لكان كفيل لي لرفض الطعن.
المصري اليوم بتاريخ 17/3


طالب يطعن زميلة بمطواه ، ويأتي أهل القتيل ويقتحموا المدرسة وينفذوا قصاصهم بأيديهم داخل المدرسة وامام التلاميذ والمدرسين فهي الغابة بعينها

يعقد حزب الوفد صفقة مع الحزب الوطني بموجبها يحصل علي23 مقعد من مقاعد برلماننا الموقر ، وينكر رفعت السعيد علي البرادعي عدم تحمسه للأحزاب، فهو التبجح بعينه والوقاحة بوجهها

أن نرمم الآثار والمعابد اليهودية ونسمح " للإسرائيليين" الاحتفال علي أرضنا وتحت حمايتنا، وهم يدمرون المسجد الأقصي ويهودون القدس ويطردون أهله ويضمون الآثار الإسلامية إلي تراثهم المزعوم فهو العهر والعري بذاته

أن يعلن الديكتاتور وابن الديكتاتور وأمين عام حزب الديكتاتور أن لا نية لتعديل الدستور فهي منتهي الصراحة والبجاحة وإعلان منهم عن الاستعلاء والاستغناء عن الشعب المقهور

ان يعلم " الشعب المصري" أنه ظل يأكل طيلة عشرون عاما من ري مياه الصرف الصحي وغير الصحي ومياه المجاري ولا يحرك ساكنا ولا يسكت متحركا فهو بمثابة إعلان وفاة هذا الشعب

أن نري بأعيننا كل صحاب العمال وهم يفترشون شارع القصر العيني ويبيتون فى العراء ونمر بسيارتنا وأقدامنا علي أحلامهم وآمالهم وحقوقهم ولا نفعل شيئا فهو منتهي الجبن والأنانية والتبلد والتوحش

حزين اني من هذا الجيل

لأ بأه .. احنا هانتسلم من أولها

ولأن «الجمعية الوطنية من أجل التغيير» ليست كيانا قانونيا مصرحا به، وبالتالى ليس له عنوان بريدى يمكنه استقبال البيانات الموقعة من جانب المواطنين، فمن المتوقع أن تظهر صعوبات جمة تحول دون توليد آليات ضغط جماهيرية كافية لحمل النظام على الاستجابة إلى مطالب التغيير. غير أنه يمكن التغلب، فى تقديرى، على هذه الصعوبات بإحدى وسيلتين، الأولى: أن يبادر الشباب، بشكل طوعى ودونما انتظار توجيهات من أحد، بتشكيل لجان شعبية فى القرى والأحياء والنجوع تتولى طبع المطالب وتوزيعها ثم إعادة جمعها بعد توقيعها وفقا للآليات التى يرونها مناسبة كى يسهل بعد ذلك حصرها.

ده جزء من مقال للدكتور حسن نافعة فى المصري اليوم بتاريخ 7 / 3/ 2010

أنا بحب وبحترم الراجل ده جدا، ومقدر قيمته الاكاديمية والعلمية والأدبية والسياسية وكل حاجة فيه

بس مش فاهم يعني الشباب مفروض عليهم يعملوا ايه تاني

المدونين عملوا الى عليهم ودفعوا التمن .. الى اطرد من شغله والى أخدله علقة والى اتحجز فى القسم والى اضرب والى هددوه في بيته

وبرده الشباب هما الى عملوا كفاية والغد والجبهة

و هما الى عملوا 6 إبريل 4 مايو وخلي عندك صوت وخلي عندك دم وغيرها

و هما الى عملوا للاخوان كيان وقيمة ونشاط

وهما برده الى مش لاقيين شغل والى بيتقبض عليهم والى بيبادروا والى بيتحركوا والى بيحركوا النخبة كمان .. وبعض النخبة كانت بتبلغ عنهم وكبار الصحفيين بتمص دمهم وشغلهم وشقاهم وتعبهم ومعروفين بالأسم وموجودين فى الويظطة دي صحاب الوشوش المحروقة المزيفة

والنخبة هي الى بتكتب فى الجرايد وتطلع فى التليفزيون وتبلغ عليهم الأمن وبتنظر عليهم

أنا بقولها بكل صراحة وكل وضوح

لو سمحتم انزلوا معانا

انزلوا احمونا

نفسنا نشوفكم من غير ميكروفون ولا كاميرا

ببتتحركوا معانا ووسطينا

جميل انكم تكتبوا البيان التأسيسي والأهداف والرؤى والخطط .. لكن حتي كمان الآليات بخلتم بيها علينا .. لا عيب .. عيب وحرام والله

لو عاوزين تعملوا لجان .. علشان انا عارف انكم بتحبوا اللجان زي عنيكم .. اعملوا وترأسوا اللجان دي كمان يالا ..
اللجان حلوة فى حد ذاتها بس لما تُفعل آليات عملها .. وتبقوا انتم كمان ضمن تروسها .. مش تبقوا الايد الى بدوس علي زر التشغيل ونبقي احنا وقودها

وأهم لجنتين .. أو الى اللجنتين الى هايشتغلوا

اللجنة حقوقية وتبقي مليانة محامين ويبقوا شغالين بجد

ولجنة إعلامية وطبعا تبقي مليانة إعلاميين مش محتاجة زكاوة... يغطوا تحركات الشباب والمحامين مش يغطوا

تحركات النخبة

علشان الشباب لما يتكلم مع الناس ويقنعهم وينزل بيهم للشهر العقاري ويطلع موظف غلبان ومديره الجبان ومايرضوش يوثقوا عريضة المطالب ، المحامين يشتغلوا ويعملوا اثبات حالة ويلبطوا ويظيطوا والإعلاميين تصور

واحنا نظيط والإعلاميين تصور واحنا نظيط

لأن الحكومة مابتخافش غير من الجرصة والفضيحة

والموظفين مابيخافوش غير من الى بيفهم فى القانون

وبكده الناس تتشجع اكتر واكتر واكتر وتحس بالامان ونقلل المخاطر ويبقي شغل بجد وفى النور وقدام الناس

ولأن لازم بأه النخبة الى بيقولوا عليها دي تنزل باه معانا الشارع وتبقها زيها زينا
لانها بتعرف تكلم واحنا بنعرف نكلم هي بتعرف تكتب واحنا بنعرف نكتب هي بتعرف نفكر واحنا بنعرف نفكر

وكمان الناس لما تشوف النخبة الى بتطلع فى التليفزيون وتقعد ترغي وتكلم فى الدستور وغيره ومش عاجبها النظام تبقي قدامهم وجنبهم ووراهم

كده الناس تثق فيهم وتمشوا وراهم

لان الى مخلي الناس مش ببتتحرك هي عدم ثقتهم فى النخبة دي

وبعد كده تيجي باه نقطة "تشكيل لجان شعبية فى القرى والأحياء والنجوع تتولى طبع المطالب وتوزيعها ثم إعادة جمعها "بعد توقيعها
وبلاش حركات قفل الموبايل والحركات دي

وارموا بياضكم وورونا أمارة

فضفضة

بحب محمد جمعة قوي

ممكن يكون بحبه اكتر من بنتي

هو ده الى كان نفسي يبقي أخويا

واد طيب وجدع ورجولة كده

غير انه مش خبيث خالص

الواد ده صعب قوي يتلوث بأي حاجة حتي بشرب الشيشة ، وحتي والمبسم فى ايده برده وشه بريئ جدا

فاعمل مهما تعمل يا جمعة برده مش هاتكون وحش

بتبسط قوي لما مفيد يكلمني فى البيت ويقولهم ممكن اكلم منذر

بحب الاسم ده قوي بيفكرني بحاجات جميلة عملتها

و بحاجات أكتر ممكن أعملها ورا الاسم ده

كان نفسي أنزل الهجانة

وأنزل اعتصام عمال طنطا للكتان

وأسافر العريش أصور السيول واتكلم مع الناس هناك

كان نفسي أبقي فى استقبال البرادعي و نفسي أكون فى الحملة بتاعته

نفسي أعمل حملة لتنظيف الشوارع والارتقاء بأخلاقيات الشارع وزيادة الوعي المروري فى القاهرة .. أي خدعة

نفسي أعمل حاجة لأطفال وبنات الشوارع .. ده حلم عمري بجد

نفسي أعمل خلية إرهابية لإرهاب ظباط الشرطة، كل منطقة وليها قسم ، نعمل تحريات ونعرف أسماء ظباط الشرطة مين فيهم الكويس ومين الوحش
والوحش نلبه نخطفه ونديله علقة سخنة ممكن يرتجع عن أفعاله ولا حاجة أو حتي لو مارتجعش يبقي أخدنا بطارنا

نفسي كل ما أشوف حاجة غلط أتكلم، لاني كل ما بسكت كل ما بحس بالضعف والشراسة والغل فى نفس الوقت

نفسي أجيب ولد وأسميه منذر وولد تاني وأسميه فاروق

نفسي أشتري حته أرض وأزرعها فاكهة وخضار ويبقي عندي بهايم و أقضيها زراعة واعمل شجرة ياسمين واقعد

تحتيها وجنبيا امي وعيالي ناكل فطير بسكر مع كوباية الشاي المتين وانشاالله الدنيا تولع بعد كده مش مهم

مش عارف معنديش طموح لأي حاجة .. ومانفسيش فى أي حاجة .. ومش معقول أكون حققت كل حاجة

قبل ماتجوز كنت بقول لنفسي: لما أتجوز مش هاسيب فرض

امي بتقولي اني محسود ههههههههههه

ومراتي بحس ان نفسها تقولي: انت مش أول واحد أبوه يموت

صحيح امال لو كان مات وأنا صغير شوية كنت عملت ايه

قبل ما يموت بحوالي خمس سنين

كنت بصحي كل يوم الصبح وأقول ياتري أبويا عايش ولا هادخل عليه الأودة ألاقيه مات

عاش طول عمره يقولي انه مش هايعيش كتير وانه هايموت قريب
عاااااااااااااااااااااااااااااااا

هههههههههه بقيت جبلة .. مش عارف ممكن يحصلي ايه تاني حلو أو وحش

والله ربنا كارمني آخر كرم وأنا في خير ونعمل ماحدش فيها

وبرده متالم لفراق أبويا ومحتاج لربنا بس مش عارف ليه مش راضي أروحله

مش عارف مالي .. ايه معقولة تكون دي خاتمتي

ادعولي بأه

هو فيه ايه يا عم الحاج؟

مين الضحية مصر ولا الجزائر؟

مين هايرشح نفسه فى انتخابات الرئاسة حسني ولا ابنه ولا ابنه التاني ولا البرادعي ولا عمرو موسي ولا أيمن نور؟


مممكن ماتش كورة يعمل كده؟

ينفع تشتغل الأغنية دي فى ماتش كورة ..أصله ماعداش علي مصر .. أصله ماعداش علي مصر .

هل ينفع بلد يقتحم حدود بلد تاني؟

طب هل ينفع البلد التاني تبني جدار فولازي تحت الأرض ؟

طب هل ينفع البلد الأولاني يحفر أنفاق للبلد التاني؟

طب هل ينفع البلد التاني تشارك فى حاصر البلد الأولاني؟

بتحب مصر؟

بتحب العرب؟

بتحب السعودية؟

بتحب أمريكا؟

بتحب إسرائيل؟

بتحب الجزائر؟

لو بتكره هاتكره الجزائر أكتر من إسرائيل ولا إسرائيل أكتر من الجزائر؟

ينفع حد يكره إسرائيل ويكره الجزائر ويكره أمريكا؟

عباس ولا حماس؟

هل حماس غلطانة؟

المفروض حماس تعمل ايه؟


لو ظابط لسعك علي قفاك تقدر تعمله ايه؟

لو هاتنزل مظاهرة تنزل ضد الجزائر ولا ضد إسرائيل؟

لو اضربت واتف عليك وحد زعقلك بالفرنساوي وخفت وواحد هوشك بسكينه من بعييييييد وقلعت فانلة بدلك وعلمك خوفا منه؛ ممكن تحكي ده من غير ما تتكسف وانت راجل البعيد طويل عريض وشحط قد الحيطة ..؟

طب ممكن تنزل مظاهرة علشان ماتش كورة؟

تعرف ايه عن علاء مبارك؟

ليه التبس علينا الخيط الأبيض من الخيط الأسود للدرجة دى؟

ليه احنا مشوهين للدرجة الدي؟

ليه مش عارفين مصير بلدنا رايح لفين؟

بتحب جمال مبارك ؟ وليه؟

بتكره جمال مبارك ؟ وليه؟

لو اترشح جمال مبارك وكسب جمال مبارك ممكن تعمل ايه؟

ليه بيتكلم شوبير ومصطفي عبده ومدحت شلبي والغندور ورجب حميدة؟

ليه عارفين يضحكوا علينا بالطريقة دي؟

علي فكرة شكلنا هانفضل كده مدة طويلة

ايه الى ممكن يحصل يفوقنا؟

والى معتمد إن إسرائيل وأمريكا من تحاربنا يبقي غلطان لأن إسرائيل وأمريكا مش هاتحربنا... لأنهم محققين مكاسب أكبر بكتير من حربهم لينا وعلشان هما عارفين لو حاربونا هايفوقونا.

صحيح إسرائيل ايه وأمريكا ايه .. قصدي حماس والجزائر ؟

تييييييييييييييييييييييييييييييت

بأه كل ده علشان الأوبرا .. الله يرحمه

أنا ضعيف جدا أمام الرغبات الانسانية، وللأسف عندي قدرة هائلة لإعطاء أي مبرر لأي حد، يعني ممكن ادي مبرر لشارون أو بوش، علشان انا لا أؤمن بالشر المطلق، وأؤمن ان الإنسان لا يولد شريراً، وأؤمن او مش راضي أصدق ان فيه واحد ممكن ينزل من بيته علشان يعذب فى خلق الله زي كلاب الشرطة مثلا

الكلام ده يصح فى حالات اسثنائية ضيقة .. يعني ممكن نتفهم مبررات الناصريين عن الفترة الناصرية الى امتلئت بيها السجون والمعتقلات بالمعذبين

بس فى النهاية ده بيبقي فى نطاق الأشخاص الى بيبقي عليهم مسئولية ضخمة، وفى فترة زمنية محددة محاطة بالمخاطر والتهديدات

زي الشباب الى بيهاجر وبيموت غرقان علي سواحل الموت، بنفهم ليه بيعمل كده، فيه شيئ أقوي واكبر وأهم من الموت بيحركه، هو كبير عنده ممكن يكون مش كبير عندنا أو مش مهم عندنا بس ده مايفرقش معاه

لكن مع البشر العاديين ، لازم نبقي حموليين شوية علي رأي امي، صبوريين شويتين، مش أنانيين، مش طماعين، زي ما بنشوف حقوقنا لازم نشوف حقوق الآخرين، زي ما بنشوف رغباتنا لازم نشوف رغبات الآخرين وهكذا

هاحكي عن تجربتي لما سافرت العمرة، ودي كانت اول مرة ليا خارج القطر المصري كله، وأول مرة أروح السعودية، وبصراحة من الى كنت بسمعه عنها كرهت السعودية وخوفت من أهلها قبل ما أروحلها، ومن الى بشوفه من اهلها لما بقابلهم فى شغلي خلوني اكرهم أكتر، إلا من رحم ربي

المهم أول ما نزلت مطار جدة حسيت بالاهانة لما سحبوا مننا جوازات السفر فى انتظار تسليماها للكفيل

بجد اهانة ... حسيت اني تحت رحمة من لا يرحم، اني مش بني آدم، ان ماليش أي حقوق، واني فى انتظار ما سيفعله بي الكفيل او ما ستعطيه لنا الحكومة السعودية، فى انتظار المجهول .. نفس احساس الطفل التائه بالظبط .. ودي كانت أول غُصة

نزلت علي المدينة وطول الوقت حاسس بغربة، إلا فى مكانين المسجد الحرام والمسجد النبوي، دول المكانين الى استريحت فيهم ، حتي تصرفات السعوديين داخل الحرم مقززة، السعودي بيدفعك دفع، قرفان منك .. زهقان منك .. حاسس انك واخد مكانه .. انه المفروض يصلي فى المكان الى انت بتصلي فيه بالذات، مافيش لا ذوق ولا مجاملات ولا ابتسامات، معندهمش من فضلك ولا لو سمحت ولا حضرتك ولا بعد اذنك ولا ممكن ولا شكرا ولا جزاكم الله خيرا ولا أي حاجة

عمري ما روحت أي مسجد فى مصر وفردت رجلي، هناك بيفردوا رجهليم فى وش بعض عادي جدا

واحد كان معاه سبح بيوزعها فى المسجد الحرام، بيوزع بطريقة غير آدمية بالمرة، بيرمي ويحدف ويشوط بيوزع بمنتهي الكبر

كنت راكب مع سواق تاكسي واحد قدامه راح داخل يمين من غير اشارة راح قال بمنتهي القرف والكبر ما هو مش سعودي ، قلتله يعني وانت عرفت منين، يعني لو سعودي ماكانش عمل كده وايه الفرق يعني ودخلت شمال، قالي يا حاجي قصدي بدوي، مابقتش عارف أرد عليه أقوله ايه بصيتله من فوق لتحت وقلتله بس بس ماتغلطش أكتر من كده

ماكنتش بلاقي راحتي غير فى الحرمين بس، غير كده كنت حاسس بغربة لا محدودة، وخايف من الناس، لأني مش معايا أي حاجة تثبت اني أي حاجة

فى آخر صلاة فجر ليا فى المسجد الحرام، قابلت مصري وانا بملا جيركن زمزم قالي انت من حلمية الزيتون .. قلتله آه .. قالي أصلي لما كنت بروح لعمي كنت بشوفك هناك .. جه معاد الإقامة، قلتله بتشتغل هنا قالي آه قلتله منين قالي من حلوان قلتله بقالك كتير هنا قال ستين يوم وعنينا دمعت مع بعض .. قلتله يا عم ما تفكك م البلد دي وترجع .. قالي لما احجج امي الأول واستأذن علشان شغله وسلمنا علي بعض ومشي
ماعندهمش غير الحرمين يكفيهم ويكفينا للكن من غير الحرمين ماعندهمش حاجة

حتي البيوت مافيهاش بلكونات .. ازاي عايشين من غير بلكونات .. بلدهم وهما حريين فيها .. بس مافيش قهاوي ولا نوادي ولا وسط البلد ولا طلعت حرب ولا جاد ولا فلفلة ولا تريموف وسفير والمهندسين والهرم والحلمية وعين شمس والقصر العيني ولا مترو ولا اوتوبيسات ولا ميكروباصات ولا ألف مسكن وعباس العقاد ومكرم عبيد ولا العتبة والموسكي والحسين والنيل والمنيل ولا شمسنا ولا أرضنا ولا جونا

علشان كده هبة نجيب صعبانة عليا .. بس أبوها صعبان عليا أكتر

آه يا بلد مالكيش حبيب

كنت قررت اني ماكتبش خواطر تاني، علشان بصراحة أنا اتعقدت من مهني والبوهي بيكتبوا شعر جاامد جدااااااااااااا، فعلشان نتفق من الأول أهو .. دي خواطر ولا يمكن أن تخضع لأي قواعد أدبية أو علمية او نحوية أو حبشتكانية حتي

ببساطة كان نفسي أبقي شاعر، وأعرف أعبر عن الى جوايا بجمل منسقة منظمة موسيقية، أصل أنا بحب الشعر جدا وخصوصا الزجل الى مليان موسيقي والى بيتغني لوحده زي بتاع الفاجومي

وبكره الشعر العامي الحر الى مافيهوش أي نوع من انواع الموسيقي

يعني الناهية دي أمزجة، بس أنا حمص .. ده مش شعر ده دقن J)، واعتراف أنا لا أملك أي موهبة فى هذا المجال، وزي ما عمري ماهكون رسام زي ما كنت بحلم عمري ما هاكون شاعر، بحب الرسم جدا لكن أنا أصلا مش بعرف أمسك القلم وخطي سيئ جداااا، الحمد لله ان فيه كيبورد لاما كنا اترفدنا من زمان


وعلي فكرة بتخنق جدا كل ما بقرا الخواطر القديمة الى كتبتها ، أنا بعتذر عن الهذيان الي أنا كتبته زمان ده بصراحة

وكنت كمان هابطل أكتب فى المدونة خالص علشان اتعقدت من ناس جامدة جدا بتكتب زي شقير والقاضي وعبد الغفار ومحمد شلبي ومفيد طبعا وأحمد سمير وشمس الدين ومحمود وعمرعزت ورامز وأسامة وميض هما مايعرفونيش ومش بعلق عندهم تقريبا لكن بتابع مدوناتهم باستمرار عقدوني وكنت هابطل والله، بس قلت أكتب بالعامية كده، لقيت ناس جامدة آخر حاجة ـ حلوة آخر حاجة دي ـ علي رأسهم نوارة وبنت خيخة الأخيرة دي بتهلكني من الضحك وسكوت هانصوت، لقيت نفسي مش باضيف حاجة غير لنفسي

فقلت أعمل زي جمعة وانا ماشي علي خطي جمعة الى نفسي أقوله هاقوله فى مدونتي حد ليه شوق فى حاجة .. والى ليه شوق فى حاجة يقابلني فى التعليقات


دايما ببدأ كلامي بسؤال

والكل بيفتي بالإجابة

ناس شايلة م الهموم جبال

وده بيسأل عن الجنابة

ما الكل فينا بأه عنده حال

وماحدش سائل عن الغلابة

بس أنا سالت عن البلد

بعد ما مت من ألف عام

بس زعلت من الى كان

أصل اتشوه المكان

والبشر والذكريات

والحاجات والمحتاجات

والقهر والخرس والسكات

فيه ايه يا ناس .. في ايه حصل

اغتصبوا بنت من البنات

قدام كل أصنام البشر

اغتصبوا وطن

وسط أنين الطين

والخضرة والشجر

ملعون أبوا ده بشر

ملعون أبو ده بلد

قلت ده يبقي أنهى بلد

قالوا دى البلد الى مالهاش حبيب

وحد قال ده بلد ملعون

ابن كلب كئيب

قلت يا ناس ده حتي يبقي عيب

انسي

احنا فى الزمن العجيب

زمن عبارة قطر الصعيد

والدم الملوث والحب المسرطن

والحديد

والحاكم ابن الحاكم

الى فى القصر قعيد

فقد ما فقد ولسه عمره مديد

واعتبر وما اعتبر

ولا اعتبر

ان فيه شعب أو وطن

من خيره مستفيد

آه يا بلد مالكيش حبيب

البلد دي ماحدش بيحبها

صحيت من نومي وركبت المترو وأنا بفكر فى بني آدم واحد بس، اسمه حسين سالم، قريت عنه شوية وسمعت عنه كتير، جبت المصري اليوم و قريت مقال بلال فضل، وعليها والحقد الطبقي نقح عليا اكتر علشان كان بيتكلم عن أحمد عز، روحت علي صفحة مساحة رأي فى المصري اليوم لقيت مقال د. حسن نافعة عن قضية سياج والمليارات الضخمة الى الدولة ممكن تدفعها من فلوسنا يا مواكيس وذكر حسين سالم تاني، بس و الدم راح غلي فى نافوخي أكتر لما قريت انهم باعوا 650 ألف متر فى طابا بجنيه ونص أو دولار ونص ، وافتكرت حلقة الطبعة الأولي بتاعة امبارح لما اتكلم عن الوليد ابن طلال لما أخد 100 ألف فدان فى توشكي بسعر بخس جدا وبدون وضع أي جدول زمني للزراعة، وبشروط مجحفة علي الجانب الحكومي.

حسيت ان حد ضاحك عليا، حسيت ان حد ضاربني علي قفايا، حسيت ان حد هزقني قوي فى نص الشارع، وبيقولي لو راجل وابن راجل تعمل حاجة، لو كنت دكر تعمل حاجة، حسيت ان مراتي وبنتي بيتفرجوا عليا وانا بتهزق وبتشتم وباخد بالجزمة القديمة علي دماغي ، حسيت انه مش خايف مني أو مش خايف من رد فعلي ، وبيقولي اشرب من البحر اخبط راسك فى الحيط، لو تعرف تعمل حاجة وريني نفسك ، لاقيت نفسي فى تحدي حقيقي، فى امتحان للرجولة والشجاعة.

ازاي مش خايفين مننا وهما بيبيعوا طابا، ازاي مش مكسوفين وهما بيدوا للوليد ابن طلال 100 ألف فدان، وماضيين علي عقد بيلزمهم انهم يمدوله كل المرافق والخدمات، وبيعفيه من استخدام العمالة المصرية

مين ابن الكلاب الى قبل علينا كده ووافق علي كده

أصلي روحت مدينة الشروق أشوف أرض مع واحد صاحبي، حسيت بعدها ان الواحد قليل قوي، بتاخد حتت أرض 200 متر حد أقصي وبتبتني علي 75% منها وتسورها قبل تاريخ معين وترمي الأساس قبل تاريخ معين وتطلع بالدور الأول قبل تاريخ معين، وعيش حياتك مع الماية والصرف والكهرباء والغاز، وأمن حديدك وأسمنتك بمعرفتك، كل أرض فيها غفير ومعاه سلاح

ولاد ميتين الكلب

واحنا ساكتين

بعدين تخيلت نفسي بقتل حسين سالم ورفاقه

بعديها علطول تخيلت امي ومراتي وبنتي ممكن يحصلهم ايه

تخيلت حاجة أقل من كده بكتير، اني ضعيف لدرجة اني ماستحملش قرصة ودن ممكن تقصيني عن شغلي

او بياته فى حجز او حتي ترحيلة فى بوكس

أنا ضمن القطيع. يا مقطوع منك له

يا بلد مالكيش حبيب

خواطر من ضربة شمس

ما بين طرفة عين وانتفاضتها يغير الله من حال إلي حال

شوفوا

صدام حسين

هشام طلعت مصطفي

من منا يأمن مكر الله

ويا وراث مين يورثك

اوعي تقول خلاص ضحكت لانك أول ما هاتقولها هاتشوف هايحصلك ايه

هو احنا عايشين ليه

هايحصل ايه لما نموت

يا تري الراجل المتشرد المجنون الى شفته النهاردة قصة حياته ايه

مش ممكن يكون كان راجل محترم ومر بموقف صعب ولا حاجة

طب يا تري الناس الى فى دور المسنين وهما فى عمري كده كانوا يتخيلوا انهم يحصلهم كده

هو أنا ممكن يحصلي كده

يا تري مستخبي ايه

طب هو ليه قالوا لو علمتم الغيب لاخترتم الواقع

طب هو ليه ربنا حرم الانتحار .. اكيد نفسك تعرف الاجابة يا جمعة

هو احنا هانورد علي جنة بمناظرنا دي

طب هو ليه ربنا بيرزقنا بالرغم من اننا بنعصاه ... يبقي بيحبنا .. طب بنعمل معاه كده ليه

هو احنا هانعيش فى القبر ازاي .. أو يعني الوقت هايمر علينا ازاي

طب هي ايه سكرات الموت

خايف احب بنتي

أصل أبويا كان بيحبني قوي .. وأنا ماكنتش مقدر حبه وخوفه عليا كده

وانا بقيت أخاف علي نفسي، أصلي بقيت بحب بنتي زيادة عن اللزوم وبقيت أخاف عليها لاتنخبط ولا تقع مني وانا بلاعبها

ماكنتش بخاف كده علي عيال اخواتي

مش متخيل اليوم الى ممكن بنتي فيه تعدي الشارع أو تروح المدرسة لوحديها. . أو المُدرسة تضربها ولا تزعل مع زميلتها

لغاية لما اتجوزت كان أبويا بيقلق عليا . وأنا ماكنتش متخيل ان فيه أب ممكن يقلق علي راجل بيشتغل من بدري ومتجوز وقرب يخلف، وكان بيتخانق معايه علشان قافل الموبايل ومش عارف يطمن عليا

كنت بستغربه قوي

قد ايه وحش الحساس ده احساس انك مش مقدر حب الآخرين ليك ولا مقدر قلقهم.. أصل معناه كده انك مش بتحبهم قد ما هما بيحبوك

طلعت أنا الغبي

دلوقتي والله لو نمت ع البورش ماحدش هايسأل عني ولا يعبرني بالجزمة القديمة



شفت ناس كتير كانوا أغنيا جدا وأقويا جدا وف لحظة وثانية وقعوا ومافيش فى جيوبهم حق المواصلات

والى بيموت وهو فى عز شبابه

وعاوز بعد كده حد يفكر فى حسني مبارك

كل واحد فيه الى مكفيه

ماحدش هايعمل حاجة غير اتنين مش هاقول عليهم خليهم فى البوست الى جاي

قال يعني

أديني ماطولتش يا مفيد :))

الإخلاص

الإخلاص

هي كلمة السر، ومفتاح الحل لجميع مشاكلنا، فإذا اختفي الإخلاص من العمل يختفي منه السداد والتوفيق، ويشوه كامل العمل .

يعمم ذلك علي الأعمال كلها، حقيرها وعزيزها، أهونها وأخطرها ، وكم من الأعمال هين وهو عند الله عظيم .

فالموظف إذا أخلص عمله لله وحده بعد ما ارتضاه لنفسه عملا، فعليه أن يؤديه كما يُرضي الله تعالي دون النظر إلي المقابل المادي أو المعنوي الذي يتلقاه من رب عمله ، أو ممن يقدم لهم خدماته، اما وانك وقد شعرت بان عملك هذا لا يلبي لك طموحاتك، وأصبحت تؤدي عملك فقط تحت رقابة من رؤسائك فإذا ذهبت الرقابة ذهب العمل، أو قلت " علي قد فلوسهم " أو أديت عملك مقابل رشوة أو هدية أو مقابل مصلحة أو مجاملة لعزيز أو خوف من قوي ذو نفوذ، ولم تؤد عملك لفقير أو غلبان او مسكين، فهنا وهنا فقط نري حال مثل حالنا، ونري حياة مثل تلك التي نحياها فى بلدنا الكئيب.

يستوي هذا كما قلت علي كافة الأعمال

ما بالنا بالدعاة والمصلحين والناشطين والسياسيين والمثقفين والإعلاميين والصحفيين والمهتمين بالاعمال الخيرية ورجال النخبة والحكم " والمناضلين"

ولنا مع المناضلون وقفة، فالنضال الآن أصبح مجانا، بمدونة وجروب علي الفيس بوك وبكام صورة مأخوذة من مظاهرة علي سلم نقابة الصحفيين، أقصاها لفة فى البوكس ورمية فى طريق القطامية أو القاهرة الجديدة، وتنهال اللقاءات الصحفية مع المراسلين الأجانب ومراسلين برامج التوك شو المختلفة، تواكبها حملة دعائية علي الإنترنت، نصبح بعدها أصحاب كلمة ودعاه لإضرابات واعتصامات، ووقود للوكالات الأجنبية المشبوهة التى تقدم العروض للسفر والتدريب فى الخارج.

لا أدري فى أي مرحلة من هذه وجد الإخلاص وأي مرحلة اختفي منها، ولن أسمح لنفسي أن أفتش فى نوايا العباد، او أن أنصب نفسي قاضيا أو حاكما علي غيري.

ولكن وإن كنت معارضا لحسني مبارك وعائلته وحاشيته، فلن أجعل من ذلك مبررا لأساق من أناس يتسابقون إلي الفتنة سبقا، أو يتمنون لأنفسهم شهرة أو مالا أو جاها من نضالهم، أو ينظرون بحسد للمفتونين ويتمنون أن يكونوا مثلهم، وينتهزون الفرص ليكونوا مكانهم.

لن أسمح لنفسي أن أكون تحت عباءة مناضل لا عمل له سوي النضال، أو حتي اكتسب عمله من النضال.

أما من ينتظرون ويتمنون التمويل، ويتمنون مراسلة وكالات الصحافة المشبوهة للتدريب أو أي كان مسماها، فهؤلاء ليسوا مناضلين مثلهم مثل مبارك وآله وصحبه، اخشي منهم علي مصر أكثر من خشيتي علي مصر من مبارك وآله وصحبه.


إذا أردتم مساعدة الناس فساعدوا أنفسكم أولا، ابحثوا لأنفسكم عن عمل شريف يكفيكم سؤال الوكالات الأجنبية ، وتكفونا شر النزول فى إضرابات قد تقصينا من أشغالنا، حتي تظهروا فى نهاية اليوم باسم المنسق العام لحركة كذا وأمين عام جماعة كذا وأدمين فى جروب كذا، تلقون البيانات وتجرون اللقاءات، ونحن الذين نتعرض للخطر الحقيقي، ونتعرض للزيف المؤكد، ونخدع بالشعارات البراقة الكاذبة.

أيها "المناضلون" الصغار، أريحونا وانضموا للحزب الوطني حتي لا نحارب علي جبهتين.

أما أنا فسأفعل كما نصح رسول الله ( صلي الله عليه وسلم) و قال فى حديثه الشريف عندما سأل عن كيفية التصرف فى زمن الفتن، فقال الزم دارك وأغلق عليك بابك، فسالزم داري ولن أذهب إلي البورصة إلا إذا اشتقت للذكريات الجميلة التى جمعتني بصحبة الخير والبركة صحبة أبناء مصر والمدونين المحترمين الذين أحسبهم علي خير.

فتكفيني مدونتي ، انتظارا إلي النزول مع الجماهير الحقيقية حينما تري هي حتمية النزول، فاتمني أن اكون من السابقون الأولون

* لقد آثرت استخدام كلمة مفتونين، فلم أستطع كتابة الكلمة المناسبة فى هكذا حالات

فما قرأته فى أبناء مصر يشعرني بخوف حقيقي

يا رب

سبحان الله

الإنسان ده عجيب قوي .. وعايش حياة عجيبة قوي

أنا خايف قوي

ومش عارف أعبر عن الى أنا فيه

عارف ان المؤمن مش بيخاف من لقاء ربنا لان عمله صالح وان المؤمن مش بيخاف من الموت علشان متشوق للجنة

حاسس اني هاخش النار

وأنا بعمل ايه يدخلني الجنة .. وهل أنا استحق رحمة ربنا أصلا

الصلاة فرضا لو كنت مواظب عليها فمش فى المسجد .. فمش فى وقتها ومش بديها كمان وقتها وبسرح وبفكر فى حاجات هبلة

الذكر ممكن أذكر ربنا وتعدي واحدة وأبص عليها وانا بذكر ربنا تخيلوا

غير الفرجة علي التليفزيون غير الغيبة غير النميمة غير انى أكيد مش بار بامي

ده صحابي شال امه المريضة وعمل بيها عمرة ودار حولين الكعبة والصفا والمروة ولما سأل هل بكده أكون اديت امي حقها قالوله لأ ... أنا فين من ده

أنا فين من الصدقة وأعمال الخير والبر والمشي فى حوائج الناس .. خلي الشغل ينفعني بأه يوم ما أقابل ربنا .. خلي مراتي وبنتي وامي ينفعوني لما ربنا يقولي ليه ما أنفقت فى سبيل الله

حتي الشغل بيتحكم فيه الأهواء والانطباعات الشخصية

الطالب ده بيتنك ياخد علي دماغه الطالب ده بيتذلل يبقي نتشفي فيه .. لازم يقدم فروض الطاعة والولاء

كنت فاكر انه لما يموت القيامة هاتقوم .. عقارب الساعة هاتقف هايحصل حاجة عظيمة

علي أقله مش هاكل مش هاشرب مش هاجوع أصلا مش هاشتهي حاجة

أول يوم ما أكلتش تاني يوم أكلت من غير مخلل ولا فراخ تالت يوم ماردتش أخد حاجة مسكرة

دلوقتي باكل وبشرب وبشتري الأكل الى بحبه وباكل حاجات مسكرة

كنت فاكر اني هافضل أبكي طول العمر بس خلاص بقيت أمسك نفسي .. لا وكمان ابتسمت وضحكت

كنت فاكر انى هانزل معاه القبر ولا علي الأقل هابات هناك .. شوية والشمس أكلت دماغنا وأصدقائنا تعبوا بعدين أهلنا تعبوا بعدين أحبائنا تعبوا بعدين احنا كمان تعبنا

كنت فاكر انه مش هايموت

أستغفر الله العظيم عمري ما شفته فى موقف ضعف .. كنت حاسه أقوي من أي حاجة

يوم ما مرض كان يوم موته

كان بيطلع من المنظار علي المطبعة

70 سنة شغل متواصل

70 سنة عطاء

ادا كل الناس وماحدش اداله حاجة

كل الناس اعتمدت عليه وعمره ما اعتمد علي حد يعمله حاجة

صبرت نفسي انى عمري ما هاعمل حاجة غلط

أنا فعلا بقيت بتقي ربنا أكتر من الأول وبقيت بخاف من ربنا أكتر من الأول بس برده بغلط

بغتاب بنم بزعق بتعصب ببخل مش بقدر دايما علي غض البصر

بعمل الغلط وأنا عارف اني هاتحاسب عليه وان ربنا شاهد عليه وان ربنا شايفني

هاقف قدام ربنا ازاي

معقولة عايشين الحياة القاسية دي قوي

اختبار ربنا صعب قوي

ادانا العقل وعرض علينا الأمانة وقبلنا بيها وقبلناها بظلم وجهل وغرور وكبر .. عرض علينا الفتن النساء والأموال والأبناء والأحباء .. حرم علينا قتل أنفسنا .. حرم علينا اننا نقطع ورقة الامتحان .. لو قطعت ورقة الامتحان يبقي هاتطرد من المدرسة يبقي مش هاتتعلم يبقي هاتطرد من رحمة ربنا و للأبد
آخر سورة الكهف فيها آية مرعبة ما معناها .. ان فيه ناس سعيها هايضل فى الحياة الدنيا وهم يحسبون أنهم يحسنون صنعا وهما دول الأخسرين أعمالا

يا نهار أبيض ايه الرعب ده

وخلقنا الإنسان فى كبد

يوم يفر المرء من أخيه وامه وأبيه وصاحبته وبنيه .. ممكن يحصل ده

هاتمر بينا سكرات الموت .. وسؤال القبر وينكشف عننا الحجاب .. وضمة القبر والسؤال

العيلة كلها كانت حوالين أبويا والدكاترة والممرضين وماحدش قدر يخفف عنه حاجة

دلوقتي أنا حاسس بأبويا

حاسس انه كان نفسه يقولي انه شايف مكانه من الجنة انشاء الله

حاسس انه كان نفسي يوصيني ويقولي انه بيمر دلوقتي بسكرات الموت وانى لازم أعمل صالحا علشان يخفف عليا

والله حاسس انه كان نفسه يقولي كده

كان نفسي أعيش معاه أكتر من كده

أصله خلفني وهو عنده 45 سنة

خلفني وهو كبير


كان بيحبني قوي

كان بيخاف عليا قوي

كان بيسأل عليا علطول

كان بيديني فلوس علشان أتفسح

والله كان بيقولي أنا عاوزك تخرج وتتفسح مع صحابك وتصرف

كان يقولي نفسي أشوفك تلبس وتقلع وتحلق دقنك وتحط برفان .. نفسي لما تنزل من البيت يقولي محمد خرج

لمع الجزمة

كان بيلمعلي الجزمة

كان بيبعد هدومي للمكوجي


يوم سبوع جمال ابن داليا قبل ما يموت العيلة كلها كانت موجودة وكلهم كانوا بياكلوا وداليا واقفة علي الحوض

زعقلهم كلهم واتخانق مع ماما وقالهم بأه عمالين بتاكلو وسايبين البنت الوالدة هي الى واقفة وانتم عمالين بتاكلوا

أنا أبويا مات مرتين

لا اكتر من كده بكتير

طول عمره وهو يقولي انه هايموت

من وانا صغير وهو يقولي انها خلفني علي كبر وانه لما هايتم خمسة وخمسين سنة هايموت زي أبوه

أصل ابوه مات صغير وامه ماتت صغيرة فكان حاسس انه هايموت صغير برده


عرفت انه هايموت قبل خمس شهور من الوفاة

كنت أنا الى سبت رقم تليفوني فى المستشفي

اتحمل كتير قوي

من مات مبطونا فهو شهيد .. يارب يكون شهيد

الدنيا مالهاش طعم

كنت بجري جري علشان أحكيله ايه الى حصل فى الشغل ومين سلم عليه ومين قابلني وكان يعرفه

مش قادر أنساه

أصلي لابس جلبيته
نايم علي سريره
لابس دبلته
راكب عربيته
فى نفس مكان شغله

بقابل صحابه وزمايله يوميا

بصلي فى نفس المسجد الى كان بيصلي فيه
بمشي فى نفس الطريق الى كان بيمشي فيه

بس بمشي فيه لوحدي
لما كنت بتاخر فى الشغل كان بيتصل بيا وماكنتش برد يقوم يتصل بيا يرد عم سيد يقولي حرام عليك رد علي أبوك

مرة بعد الوفاة عملها عم سيد وقالي تليفون علشان يا أستاذ محمد قلتلها بابا قعدنا انا وهو نعيط

نفسي أروحله بأه

ده احنا هانشوف أيام سودا

ليه فشل الإضراب بتاع السنة دي

طب بتاع السنة الى فاتت هل نجح؟
لا مانجحش .. هو نجح فى المحلة لكن فى القاهرة وبقيت مصر كلها ماكانش فيه إضراب أصلا

طب ازاي نجح فى المحلة الى هما عمال وماعندهمش نخب سياسية وقيادات حزبية و لاعندهم نقابة الصحفيين ولا نقابة المحامين ولا مجلس الدولة .. نجح ليه هناك وفشل فى القاهرة؟ الى هي فيها كل الحاجات الى فاتت دي

يبقي الى بيخلي أي إضراب ينجح هما الناس الحقيقيين الى تعبانيين ..مش النخبة ولا رموز المعارضة ولا قيادات الاحزاب
الناشطين أخوهم هايحركوا كوادر تعرف تهتف.. تعرف تصور ... تعرف تكلم ... ممكن يكونوا دروع بشرية .. يقفوا فى الصفوف الأولي علشان يكون شكلهم حلو .. ولما يتسجن الناس الغلابة يبقي فى وسطهم كوادر فاهمة تقدر ترد علي زبالين الشرطة .. لكن الحشو الأساسي هما الناس .. وقود الإضراب هم الناس الى بجد.
طب ليه الناس مش بتتحرك؟
ممكن يكون ماعندهمش مشاكل تخليهم يتحركوا .. ماتخلنيش أقولك كلمة وحشة L

جايز ولو كده يبقي لامؤاخذة كل واحد يحط صرمة قديمة ومايفتحش خاشمه بكلمة

لكن الى يغيظ ان كل الناس مطحونين وقرفانين وزهقانين ومخنوقين وتعبانين وشقيانين وجوعانين ومتبهدلين وقرفانين تاني بس مش بيعملوا حاجة
الغريبة ان اليوم ده أطلقوا عليه يوم الغضب .. علي فكرة الغضب كلمة جميلة ليها وقع ع الودن كده لوز .. غ ض ب كلها حروف سخيفة كده وانت بتقولها تغتضب ولو يوم فرحك
بس الناس مغضبتش ولا حتي عيطت
طب هل الناس مش غضبانة مممكن أقولك نفس الكلمة الوحشة الى فوق علي فكرة ... الناس اكيد غضبانين لكن المشكلة انهم مش بيعبروا عن الغضب ده

يعني مثلا لو مراتك بتصبحك بعلقة وتمسيك بعلقة .. اكيد هاتزعل .. كلنا بنزعل الحقيقة J لكن فى النهاية لازم تاخد موقف .. مش تضرب عن الأكل .. يعني تبقي انت الى شقيان وطلعان تربنتينك وجايب خيرات ربنا .. ومراتك تصبحك وتمسيك .. والموقف الى تاخده انك ماتكلش من الاكل الى انت جايبه .. دي ما هتصدق يا عم الحاج .. نسوان هم انت هاتقولي .. ده انت تبقي راجل لامؤاخذة ... الصح انك تضرب مش مراتك طبعا .. ممكن تقرا المدونة فى أي وقت .. هو فيه حد أصلا يقدر يضرب مراته .. دي تنقطع ميت حته وتاكلها القطة السودة لو حصل كده .. لا أنا قصدي يعني انك تضرب عن مجايب الأكل أصلا

طاخ طيخ طوخ

الناهية علشان مفيد بيقولي اني مش بعرف أكتب وانى بطول فالفكرة بتوه مني
انا كنت موافق ان أصحاب المعاشات يحتلوا ميدان التحرير ومش مهم لو ماروحتش الشغل او اتاخرت ساعة او ساعتين أو حتي أربعة .. وان الصيادلة يقفلوا صيدلياتهم .. حتي لو مالقتش دوا لهيام .. ولو الاطباء قفلوا عيادتهم ماعنديش مشكلة ان أستحمل أي ألم او اغور فى داهية
علشان احنا لازم نطبل أنانيية وضعف وجبن شوية .. يبقي الى مش اناني والى مش ضعيف ولا جبان من حقه انه يطالب بحقه وانا مازعلش لما يعمل كده .. مش المفروض نستني ان الخيرات تتنزل علينا من السما .. ولا نقوم ونصبح نلاقي مبارك عمل انتخابات نزيهة وطلع الناس من السجون .. والى بيسرق يبطل سرقة .. والوزرا والمسئولين المأنتيخن يبطلوا انتخة ويشتغلوا زي بقيت مخاليق ربنا .. ونلاقي الشرطة بطلت تضرب الناس علي قفاها .. وألاقي اختراع جديد بدل البامبرز ويكون مش غالي

لازم آخد موقف علشان آخد حقي

ولازم لما أحس ان فيه فئة من الشعب مظلومة انى أقف جنبها وأساندها بكل ما اوتيت من قوة

مش أسيب الى غرق غرق ولا الى اتحرق اتحرق ولا الي بيتهان يتهان ولا الى اغتصب اغتصب

والله الدور جاي علينا كلنا

والله لا يخدونا من بيوتنا عاطل بباطل

والله لنشوف أيام سودا

يا عالم يا سو

فانا مش هشارك فى أي إضراب غير لما يشارك فيه سواقين هيئة النقل العام ومش مهم الكمسرية علشان بيبقوا رخمين شوية .. وسواقين مترو الانفاق لازم يشاركوا وشباب هندسة وتجار ونظم معلومات الى شغالين فى البنزينات .. والناس الى مخنوقة من ظباط الشرطة لازم يشاركوا .. وطلبة الجامعة لازم يفكهم باه من تامر وحماقي ويركزوا فى هياف وإلياس قصدي يركزوا فى منير واسكندريلا .. ياعم يركزوا فى خدمة البلد ... والعنمل والفلاحين والفقرانين والبوابين والى عندهم عربيات والى بيركبوا مواصلات .. وسكان العشوائيات وهانبقي نضحي بسواقين الميكروباظ ونسيبهم يتخانقوا مع سواقين التاكسي

بس أهم ناس سواقين النقل العام ومترو الأنفاق .... ماهينجحش اضراب من غيرهم

ويالا باه بالسلامة كفاية عليكم كده

انهم يستحقون أكثر من إعدام - 2

كم كان مؤلما ومفجعا ذلك الخبر .. وكام كانت تفاصيله اكثر إيلاما .. هكذا هي دائما حوادث الاغتصاب .. تُصيب النساء بالخوف .. وتملئ قلوب الرجال بالرعب .. نعم بالرعب .. فمن يأمن علي نسائه الآن؟ .. فلقد أصبح محظورٌ عليك التواجد فى الميادين الكبري فترة الأعياد .. وحذاري كل الحذر ان تذهب بصحبة زوجتك إلي السينما وقت الذُروة .. وإن كانت تعمل فلا تجعلها تقود السيارة بمفردها لأنها سوف تُحَمل بكمية من السباب لا يقدر علي حملها أبلد الرجال .. ونبه عليها كل التنبيه ألا تركب سوي عربة السيدات فى مترو الانفاق... وإلا قد تأتي لك فى نهاية اليوم وقد شقت رأسها نصفين .. واجعلها تغير مسار طريقها إن كانت تسير بجوار مدرسة ثانوية او إعدادية بنين وفي وقت خروج هؤلاء الطلبة .. فالرجال ينالون حظهم مثل النساء تماما من هؤلاء الطلبة وإن كان بشكل مختلف؛ قد يصابون من أثر المشاجرات الطاحنة التى تحدث علي أبواب تلك المدارس ولا تسلم النساء والسيدات الكبيرات عذرا عن الفتيات الصغيرات من تحرشاتهم وألفاظهم المجزعة

.
كل هذا واكثر يمكن تجنبه باكثر من وسيلة ، أو علي الأقل يمكن احتماله والأجر والثواب عند الله تعالي عز وجل، ولكن ماذا ان قام أحد الرجال وأبي علي زوجته ان تتعرض لتلك المهازل اليومية، وقرر أن تظل حبيسة المنزل، ويذهب هو إلي

عمله وفى بطنه شادر من البطيخ الصيفي المسرطن اللذيذ، فهل سيأمن علي زوجته عند إذن؟

لا!!!! لا!!! لا!!!

لماذا هل لان البطيخ أصبح مسرطن؟

لا برده

أيها الرجال إليكم الخبر

قد تغتصب زوجاتكم فى منازلكم وعلي فراشكم أو علي أي مكان آخر وأنتم فى اعمالكم.

قد تغتصب وانت تظن أنها تعد لك الطعام، أو تنشر لك الغسيل.

قد تغتصب فى نفس اللحظة التى تفكر فيها أنك ستسكن إليها اليوم ويفيض بعضكم إلي بعضا

.
قد تغتصب وأنت تتذكر كيف كانت ليلتكم الأولي

.
أيها الرجال قد تخطف زوجاتكم من بيوتكم، وعلي مرأي ومسمع ومشهد من الجيران والبواب وأصحاب المحلات

والسائرين فى الشارع ، ولا ينتفض أحد للدفاع عنها، ولا لنجدتها.

أيها الرجل قد تغتصب زوجتك من عشرة أشخاص وعلي الطين وفي عز البرد

.
أيها الرجل صدق أو لا تصدق ق قد يقوم عشرة أشخاص بجرجرة زوجتك من بيتك مرورا بالشارع وانتهائاً بفراش الاغتصاب، ويراها كل العوام فى عز الضهر ولا يفعلون لها شيئاً.

أيها الرجل صدق أو لاتصدق ، تلك المراة التى نتحدث عنها وضعتها وليدها الثالث من أسبوع فقط قبل حدوث تلك الجريمة، أي أنها ليست صغيرة السن وانها بالتاكيد مترلهة الجسد.

أيها الرجال قد يحدث ذلك لزوجاتكم اللاتي لا يعملن. ولا يراهن غريب.

أيها الرجل صدق او لا تصدق حدثت تلك الواقعة فى محافظة فى الأرياف فى الفلاحين يعني!!!

أيها الرجل تخيل ماذا يمكن أن يحدث من عشرة رجال مع امراة فى حقل زراعي.

ماذا هوالمشهد الذي تراه الآن؟

أيها الرجل أوقن أنه لن يشفي غليلك حتي وإن علمت بان هؤلاء العشرة قد حكم عليهم بالإعدام شنقا.

أيها الرجال لا تتعجبوا مما حدث .. فهناك من رجال الشرطة من فعل أمر من ذلك وفي مركز توقيف للشرطة أتي بزوجة أحدهم وأخته وامرهم بخلع ملابسهم وهدد الرجل باغتصابهم واغتصابه حتي يعترف بسرقة ماشية.

أيها الرجال سحقا لكم فانتم من تُظلمون، وأنتم من تظلمون وانتم من تسكتون عن الظلم

.
يا رجال الشرطة أنتم السبب فلتذهبوا جميعكم أنتم ووزيركم إلي الحجيم.

انهم يستحقون أكثر من إعدام

طبع قبلة علي جبينها ، وأطل برأسه ينظر إلي وجهها كأنه يراه لأول مرة أو كانه سيراه لآخر مرة، حتي تنحنحت وبدلال وبحياء الأنثي

اطلقت آهة من التوجع وأرادت أن تعدل من جلستها النائمة، حتي تنهي الموقف سريعا بدلا من ان تاخذ المشاعر زوجها أكثر من ذلك، ثم قامت امها لتقول لزوج ابنتها ما سالتش عن بنتك يعني، يرد سريعا لا شوفتها كويسة وبخير المهم امها، تقوله يعني ما سالتش هي فين ... يقولها يعني هاتكون راحت فين راحت المدرسة مثلا، تقوله مش تطمن علي بنتك يا راجل .. خالتها اخدتها تخرم ودنها علشان نلبسها الحلق الى جابولها جدهاف، جدها جاب الحلق ادفع انت مصاريف الخرم باه .. وتمتلئ الغرفة بالضحكات

هي مازلت تتألم من أثر الولادة القيصرية فلديها اثنان آخران وزوج شقيان طيلة النهار .. غير الطفلة الرضيعة .. وامها عجوز .. لا تقوي علي خدمتها طيلة العمر .. فماذا قد يفعل والدها من دون والدتها غير اخوتها التي لا تنتهي طلباتهم .. لابد ان أتحامل علي نفسي .. ماحدش بيشيل حد .. وتحمل سبت الغسيل تدخله فى نهاية الغرفة ،، تخرج ترتدي إسدالها .. وعليه الروب الجديد الذي اهداه لها اخت زوجها الملئي بالألوان المبهجة فهو أبيض وبه ورود بمبي كم تعشق هذا اللون .. تقوم بمسح أحبال الغسيل أولا .. ثم تسرح بعيدا .. فيما سوف تعده اليوم من طعام لزوجها .. فتقوم بعمل جرد سريع لأصناف الطعام فتتذكر ما هو موجود وما ينقصها

تفيق علي يد تتحسس وجهها ، تشعر باليد أكثر فاكثر كأنها تريد ان توقظها .. تفتح عينيها فتري السماء كانها اطبقت عليها .. تشعر ببرودة شديدة تسري فى اطرافها فى انحاء جسدها .. تتحسس زراعها .. تجده عاري من الملابس .. يتملكها الخوف من كل جوانبها .. تحاول النهوض .. تتكئ بمعصمها علي الأرض تجده منزلق من أثر الطين .. تشمئز بشدة .. فتشعر بالطين من أسفلها .. ترفس بأرجلها .. تفرك بقدميها فى الطين .. فالطين لزج ممزوج بالماء ورائحة القيئ والبول يبعث بشعور مقزز وهو يلامس ظهرها .. تستشعر وكان الطين قد ابتلعته .. تشعر به فى جوفها .. تضع يد علي فخذها واليد الاخرى علي اعلي صدرها فتجدهما عاريان .. تحاول الصراخ فلا يخرج صوت .. تحاول إخراجه بالقوة .. تحاول التنفس تفتح فمها بقوة كأنها تريد ان تبتلع الهواء .. أو كأنها تريد أن تفتح طريق لتخرج روحها منه .. وعندما تفشل يشغي عليها

انهم يستحقون أكثر من إعدام

اللهم أرنا الحق حقا وارزقنا اتباعه وأرنا الباطل باطلا وارزقنا اجتنابه

كل ما يحصل مصيبة وأشوف ردة فعلنا عليها أستغرب قوي
أيام العدوان علي غزة
كلنا كنا بنحمل مشاعر متناقضة متضاربة
زعلانين من الضرب الى شغال فى غزة
وف نفس الوقت محملين حماس المسئولية علشان الصواريخ الى بتضرب بيها إسرائيل
وبرده زعلانين من الضعف بتاعنا وتخاذلنا الرسمي والشعبي
زعلنا من ردة فعل حسني مبارك علي مجزرة غزة، وف نفس الوقت زعلنا برده من العرب الى طلعوا فى مظاهرات ضد مصر
تابعنا الجزيرة بشغف غير عادي وكنا مبهورين وسعداء بيها جدا، بس كان ضغطنا بيترفع لما كانت بتعيد وتزيد فى مواقفنا وتصريحاتنا المخذلة وبتكررها بمناسبة وبدون مناسبة
كرهنا أبو الغيظ وتصريحات أبو الغيظ وقناة النيل الدولية قناة مصر الحمصية وأداؤهم وشكلهم وريحتهم ونَفسهم ، والاغرب اننا كان نفسنا فى حد يضحك علينا

كنا بنتمني وزير خارجية مطأطأ كده يضحك علينا ويأكلنا الحلاوة، ويعمل شوية حركات ويدي كام تصريح ناري ترابي مائي ويحسننا اننا بنحارب إسرائيل من أسبوعين تلاته كده



ويا سلام لو قناة أو حتي ترعة تليفزيونية تردد الأباطيل بتاعة وزير الخارجية المطأطأ ده

والله كان نفسنا فى حد يضحك علينا ويكذب علينا .. عمركوا شفت شعب نفسه يضحك عليه

ماكنش نفسنا فى حد يقولنا لقد أعذر من أنذر، ويتباهي ويتفشخر بان مصر أفشلت قمة الدوخة

ماكانش نفسنا نشوف القفا الى لزق علي مبارك لما ليفني جت زارت مصر قبل يومين من عدوانها علي غزة، لا وكمان ايه اعلنت من علي منبر وزير الخاجرية ومن قصر الرياسة المصري انها هاتسحق حماس
ماعندوش كرامة الجدع ده
طب احنا وطظ فينا ولا نفرق معاه بترمسة لكن كرامته هو قدام الناس دي كلها

ويا سلام علي القفا التاني الى لزق علي قفاه الكريم لما أعلن انه علي شفا التوصل لإتفاق تهدئة، يقوم ييجي أولمرت ولامؤاخذة مديه الكريمة ويعلن إنه لا فتح للمعابر إلا بالإفراج عن الجندي الأسير



طب كبروا الراجل قدام ناسه يا جدعان ... لو عندكم هفق لكن وسط عيلته وناسه هو ريسهم .. هو اللي مأكلهم هو .. هو الى مشربهم هو .. حسني يا حسني

طب بلاش قدامنا .. تعملوا كده قدام سوزي.. تقول عليه ايه دلوكيت .. الراجل كبر وهفق وبأه ملطشة .. ارحموا عزيز قوم ذل

علشان كده انا اتخنقت مننا .. ازاي نجمع بين الشيئ ونقيضه .. ازاي نجمع ما بين الأفكار المتناقضة دي كلها .. مش بكلم علي النخب .. لكن بكلم علي الناس العادية الى لما تكلمها وتقولها يرضيك سكوتنا عن الى بيحصل يرد يقول لا طبعا حرام وكفر و و و و .. بس حماس والفلسطينيين هم السبب مش قد الحرب بيضربوا صواريخ ليه .. طب مش شايف سبب لضربهم للصواريخ دي .. يقولي غباء وعلشان يبانوا هما الى بيقاموا والباقي خاين .. أقوله بيضربوا الصواريخ علشان يتفك الحصار علشان مش لاقيين ياكلوا وتتفح المعابر .. يقولي هي غزة يعني مالهاش حدود غير مع مصر أقوله البحر ومتحاصر ولو علي حدودهم مع إسرائيل إذا كانت مصر قافلة عليهم ومش مخلياهم يبيعوا ويشتروا يبقي اليهود هما الى هايبعيوا ويشتروا معاهم يقولي واحنا الحيطة المايلة بتاعتهم ماتشطروش علي الحمار يتشطروا علي البردعة.. تفضل تهاتي ويتوجع قلبك.

فيه دعاء بحبه قوي ونفسي يستجاب ألا وهو الله أرنا الحق حقاً وأرزقنا اتباعه وأرنا الباطل باطلاً وأرزقنا اجتنابه
احنا لا شايفين الحق حق ولا شايفين الباطل باطل

صعبان عليا حالي

صعبان عليا حالي، أغنية شعبية تلاقي جمعة بيحبها

هو مش حالي الى صعبان عليا .. لكن الفكرة الذهبية بتاعة أبناء مصرهي الي صعبانة عليا

كنت بتفرج فى يوم علي مني .. حد يسالني ويقولي مين مني .. طبعا مني الشاذلي .. هو فيه ميت مني يعني .. ومني الشاذلي دي بالنسبة لي هي الست .. لانها ست بما تحمله الكلمة من معاني وعبر وعظات لأي ( إمرأة) أخري يدور بخاطرها أنها ست

المهم مش هاطول علشان لو مراتي فى يوم من الأيام عرفت طريق المدونة ماتخنقنيش .. أصلها قربت تكره مني وقناة دريم كلها والساعة عشرة كمان
فلما بتيجي الساعة عشرة من هنا ألاقي البيت اتقلب من هنا، وفجاة أحس انى بقيت فى كافتيريا ينزل شوب بيبسي بالتلج مشبر .. أقول قشطة هاتبقي سهرة زي الفل مع مني .. تكتم غيظها وتجيبلي باكو شمعدان الشبح ... يا عيني يا عيني .. تاكلهولي يا سلام يا سلام .. بعدين فجاة تقولي انت كلمت عمو النهاردة .. أقولها آه طبعا .. طب سألت علي ماما .. أقولها ليه هي عيانة.. هي بتعيا أبدا .. تجز علي سنانها وتقولي مش مامتي انا مامتك انت .. أحرج كده وأقولها وماله نكلم الاتنين .. جبرا للخواطر ودفعا للشرائر.. عبال ما أكلمهم ألاقي معلقة أيس كريم فى بوقي و وفجاة ألاقيها بتقولي الله الفيلم ده حلو قوي ده الى مش عارف بيحصل فيه ايه وايه فى لحظة وثانية ألاقي القناة اتقلبت علي أي قناة أفلام أجنبي وكان الله بالسر عليم



نرجع لمني وف يوم خطة المدام بائت بالفشل الذريع نظراً للنفاذ السريع للحاجات الحلوة، لقيت مني مستضيفة دكتور فى الجامعة وكام شاب لووز بيتكلموا عن حركة جديدة اسمها مش عارف حركة 14 فبراير .. مصر أولا .. و المؤسسين ليها زعلانين من الناس الى طلعت فى مظاهرات ضد مصر أيام حرب غزة، وكلامهم موجه ضد الإخوان بالأساس ، ورافعين شعار مصر أولا، وهو شعار حق يراد به باطل من وجهة نظري ، المهم لما اتكلموا كمان مع مني حسيت انهم بيتكلموا فى امانة الشباب فى الحزب الوطني مثلا .. نفس البوئين ونفس الشعارات ونفس الخطاب بتاع الحزب الوطني المعادي للمعارضة ومصدر الاخوان فى الوش

المهم وانا بتفرج حسيت بحسرة، ان فكرة فكسانة زي دي تطلع مع مني، وفكرة تانية زي أبناء مصر تتاقل بالدهب يتردم عليها بالتراب من أصحابها، لو اتعرضت الفكرة دي فى منبر زي ده كانت لمت مريدين بالمئات علي الأقل، لكن احنا أصلا ماكانش هدفنا نطلع فى برامج .. كان بس هدفنا اننا نشتغل من سكات مش جنب الحيط لا ده جوه الحيط وماحدش يسمعلنا حس علشان نستمر، وفعلا عملنا شغل حلوقوي، الفكرة كانت تستاهل والناس يستاهلوا ان الواحد يشتغل معاهم ويعرض نفسه للخطر علشان خاطر الفكرة الذهبية الى آمن بيها والى فى الآخر أشوف فكرة زي دي بتتعرض مع مني ويتقالي من عضو مؤسس وعزيز فى أبناء مصر لما قلتله هل عملت كل الى نفسك فيه فى أبناء مصر رد وقالي بعدم اكتراث لا طبعا .. بس فى النهاية أبناء مصر دي مظلة زي أي مظلة وهلاقي مظلة تانية أشتغل فيها

رحت قلبت مني وقلت لمراتي تجيبلنا طبقين جيلي بالموز واتفرجنا علي فيلم غباء فى غباء لجيم كاري ع الفوكس موفي

لن أنسي لكم هذا الموقف .. الي هايقولي قول كلمة هابطحه

طبعا قرفان من الى حصل امبارح، امبارح كان ايه يعني، امبارح حفل توقيع كتاب هما انثي، انا أصلا قلت ماقابلش حد وانا فى حالتي دي، سايب شغلي والإضافي ومراتي تعبانة وعند الدكتور، وأبويا فيه الى فيه وورايا شغل هاستلمه من المطبعة وأروح حفل توقيع.. لا وايه كمان أقول كلمة ... انا أقول كلمة ينعل ديك امر الديك علي فكرة

وطبعا اول ما ايناس لطفي قدمتني وقالت بس منذر، ماتتخيلوش التصفيق الحاد، وقعدوا يبرئو يبرئو يبرئو لدرجة ان كنت خايف علي جوهرة عنيهم لتقع من مكانها وإلا التصفيق ايديهم اتبرت وإلا الانصات مش ممكن كأن علي رؤوسهم الطير، تجمدوا وتخشبوا كده، قوم ايه انا فى وسط ده كله أنسي الكلام الى كنت هاقوله

احيه يا أبو سوسو أحيه ،، اختك هاترقص وانت هتمز يا أبو سوسو
غطوني وصوتوا غطوني وصوتوا
ايه ده .. انا ايه الى وداني مكان زي ده

متنيل مابقتش اتابع مدونات زي الاول، انزل ليه هاتعرف علي مين، طبعا اعتمدت علي الاخ مفيد وماعبرنيش، كل شوية يجيلوا واحد يقوله انا مندهش ويخلع التاني يعرف نفسه يقوله انا مجنون ويخلع ويسيبني طيشة لغاية ماجم حبايبي واخواتي وصحابي من أبناء مصر ... هم الى سيحوا الجليد شوية

لازم الى ينزل تجمع للمدونين يبقي متابع للمدونات يبقي بيقرا مدونات علشان يبقي عنده شغف انه يتعرف علي ده ودي وعلشان يقدر يستمتع بالناس الموجودة

أي نعم حسيت ان فيه مدونين رجالة صيع ، صيع صيع يعني، مش عارف مش راضية تركب معايا مدون بيشرب سجاير وبيكلم لغة شوارع ويدون

أينعم انا عارف ان التدوين مش محتاج مؤهلات بس برده مش عارف أستسيغ حاجة زي كده

كان تامر جمال بيشرب سجاير بس كنت بحسه ابن ناس ومؤدب وعند فكر

مش عارف هاتفهموني ولا لأ ولا بخبط ولا لأ بس علي فكرة مش مشكلة

كمان فيه حاجة، كان فيه راجل قليييييييييييييط جدا ومخنق جدا وراسم نفسه بطريقة غريبة وام سماعة البلوتوث – بتنرفز منها قوي – ويمشي يا أرض انهدي ما عليكي قدي ، وطلع فى الآخر صاحب دار نشر، امال لما يبقي زي الحاج مدبولي الله يرحمه هايبقي عامل ازاي ، وواحدة تانية برده صاحبة دار نشر مخنقة كده، هي العالم حصل فيها ايه

بس أرجع وأقول انا الغلطان

وكمان مفيد بعد ما خلصت الناس الى تتكلم ومشيت مها واحمد عبد الفتاح والساعاتي، مابقاش حد اعرفه غير مفيد

قبل ما هاشرد لمفيد بعد شوية أحب أقول اني شوفت سلمي انور الى كان نفسي أشوفها وعندها حضور طاغي كما توقعت وكلمتها كانت قوية جدا هي وشمس الدين وطبعا انا بس نسيت اسمي والله الى هايقولي اعمل حاجة زي كده تاني هابطحه ... ينعل .... يحرق .. ايه الي فكرني تاني

نرجع لمفيد سابني ملطوع زي قرد قطع ماعرفش حد وهو عارف ان واقف لوحدي زي قرد قطع ماعرفش حد وقعد يتعرف علي ناس اول مرة يعرفهم أنا مندهش وانا مجنون .. بس أرجع وأقول ان انا كان لازم ماروحش معاه فى حته غير لما يكون جمعة معايا هو الى فاهمني، بس معلش غلطة وتتعوض

وشوفوا الغلاسة بعد ماستنيته قد ايه رجع قالي انا هاركب من هنا لامبابة .. بيهزر البيه .. ماشي يا مفيد .. بس قطعت نفسه قعدنا نزق سواق تاكسي عطلان من مطلع كوبر الجلاء لغاية كوبري قصر النيل .. أحسن يا مفيد ... وطلعنا علي عبد المنعم رياض لقي الميكروباصات زحمة .. ده ذنبي يا مفيد علي فكرة

لا وبكلمه فى موضوع مهم هو الى فتحه يسيبني ويعمل نفسه مشغول فى قراية ماعرفش ايه .. ولما أهبش فيه يقولي انا كنت قاصدها علشان اعرف انت بقيت عصبي ولا لأ .. طب ما أي حد هايتعمل فيه كده هايتعصب .. حاجة عجيبة والله

بس خلاص .. حاجة تقرف

الصنم

الصور من تصميم يساري مصري الجامد جداً

ما أنت إله ولن تكون أبدا كذلك

إنما أنت صنم ولست علينا بمالك

عجبوا واستنكروا عندما تحدثنا عن مرضك

فماذا قد يفعلوا إن قلنا ممماتك

ماذا إن قلنا أنك تأكل وتشرب وتشعر

ويخرج الريح من فضلات غذائك

أيعلقون لنا حينها المشانق

إن لاح على خاطرنا مشهد فنائك

أسيبنون لك قبرا يطوفون حوله

ونرى بأعيننا من يسبح بأسمائك

أحينها يتمجدون بإنجازاتك

ويقولون هذا هو ملك الممالك

أم سيبولون عليك

ويصنعون صنما جديدا

يبنوه من نفس أحجارك

أيتخيلون يوم يلتف ساقك

إلى ربك يومئذ مساققك

حين يضمك قبرك

ويزول عنك طغيان سلطانك

وينهال على وجهك التراب

وأنت بثوب أبيض غير مخيط

أملاكٌ سيلقنك أم سيذهب

كما ذهب عنك شيطانك

أيجول فى خاطرهم هذا اليوم

أم يظنون أن الشمس لا تشرق بغيابك

وأن السماء التى تقلنا سمائك

ما أنت إله ولن تكون أبدا كذلك

إنما أنت صنم ولست علينا بمالك

الصور من تصميم يساري مصري الجامد جداً

مجنون عاااااااااا

مش عارف ليه حاسس بغربة، كان دايما جمعة يتكلم ويقول حاسس بغربة .. ماكنتش بفهمه .. او ممكن أكون كنت بفهمه غلط ... لكن انا حاسس بغربة .. حاسس انى كائن غريب .. مش هامثل وهاقول اني ملاك وسط شياطين .. لكن علي الأقل مش عارف أكون بنى آدم .. حاس انى لسه ابن امبارح .. حاسس انى لسه مولود طفل رضيع .. لسه بيشوف الناس بيتعامل معاهم .. طول عمري كنت خايف من يوم زي ده .. علشان كده عملت حسابي وخرجت للدينا واشتغلت من أولي جامعة مع انى مش محتاج للشغل .. واتبهدلت وانا فى غني عن البهدلة .. بس تقريبا ماجابش نتيجة
حاسس انى أول مرة أركب ميكروباص أو أركب ميترو أو أول مرة أسوق لوحدي واول مرة أشتري حاجة .. أول مرة اتكلم مع الناس .. اول مرة أمشي وسط الناس.. حاسس انى أول مرة اعدي الشارع .. مش عارف ممكن يكون زاد الموضوع ده لما عرفت ان أبويا عيان .. يمكن يكون علشان بقالي كتير بعيد عن ربنا أكيد .. القرب من ربنا بيخلي الواحد قوي .. بيحسس الواحد انه مش لوحده

الناهية ان جمعة بيبهت عليا .. كل ما أدخل أقراله حاجة يبهت عليا

علشان كده نفسي أفضفض

أنا مريت بفترات ممكن أسميها جوهرية أو انتقالية أثرت فى حياتي .. اولهم لما سقطت فى اختبارات الكلية الحربية .. عارفين العيل الصغير الى لما حد يساله نفسك تطلع ايه؟ يقولك ظابط .. انا كنت كده .. حتي فى الثانوية العامة لما كنت بختار بين أدبي وعلمي .. ماكانش عندي نبوغ فى مادة بعينها أخويا قالي ماتحيرش نفسك شوف انت عاوز تدخل كلية ايه وساعتها هاتعرف تدخل علمي ولا ادبي، ساعتها زادت حيرتي ومابقتش عارف انا عاوز ايه .. ولقيت نفسي بقول عاوز ادخل الكلية الحربية ، ده حتي وانا فى اعدادي قدمت فى الثانوية الجوية .. وأبوياعمل البدع علشان ماقدمش وفعلا خلاني مقدمش .. ودخلت أدبي وخلصت الثانوية وقدمت فى الحربية وسقطت .. ساعتها الدنيا اسودت فى عنيا .. حسيت بقمة الضياع وانا داخل كلية التجارة حسيت انى فعلا مستقبلي ضاع واني هاشحت وانى مش هلاقي شغل واني قليل قوي وده كان أول تحول فى حياتي

التحول التاني لما دخلت الكلية ؛ ماكنتش بحضر ولا بذاكر غير هي ليلة الامتحان بس كنت بشتغل فى مكتبة ابن عمتي جنب الجامعة .. كنت بروح أدفع المصاريف واطلع الكارنيه واذاكر ليلة الامتحان واخش امتحن وانجح .. وفى سنة تانية جبت تقدير ومشيت كده لغاية سنة رابعة .. وماتوقعتش أبدا انى ممكن أسقط فى رابعة بالرغم من انى كنت بتوقع كل سنة قبل كده ان أسقط الا اني فى السنة دي ماتوقعتش انى اسقط أبدا .. وهنا كان التحول التاني قضيت السنة الى سقطت فيها فى جحيم .. بالرغم من ان البيت ماحملنيش المسئولية او ضغط عليا أو ... أو.. ده كان أبويا بيهون عليا .. بس انا عندي حته جلد الذات .. كنت بعاقب نفسي بنفسي كنت بشتغل ليل نهار وباكل فى الشغل علشان ماكلش من اكلهم .. كنت بحس ان مش مستحق للقمة بتاعتهم، ولما دخلت التدوين كنت بفضل طول اليوم علي النت وماكنتش بقعد معاهم ، وبعدت عن كل صحابي الى كنت اعرفهم قبل كده .. لا أرد عليهم ولا أقابلهم ،تعبت قوي فى الفترة دي وتعبت كل الناس الى حواليا

ودخلت التدوين فى نص السنة الى سقطت فيها .. والحمد لله استعدت كتير قوي من ثقتي فى نفسي .. بس حصل الى بوظ كل حاجة وهو بختصار انى مريت بقصة حب فاشلة جدااااااااااااااااا أفقدتني الثقة فى نفسي تقريبا لغاية دلوقتي

بالرغم من ان اشتغلت فى مكان مرموق نوعا ما .. واتجوزت انسانة مرموقة برده والحمد لله

إلا إني حاسس انى غير جدير بالقمم

والإحساس ده هايموتني
حد ممكن يقول ارضي بالى ربنا كتبه .. وانت أحسن من غيرك و و و


بس أنا حاسس ان الموضوع بعيد عن الرضا من عدمه

عقلي بيقول انى شغلي دلوقتي احسن من مليون ظابط وفيه مزايا كتير جدا ومافهوش عيوب الحياة العسكرية و و و
وعقلي بيقولي وبيدلني علي انى مانفعش للبنى آدمة الى اختارتها .. وان مراتي أحسن وانسب حد ليا

بس مش عارف أرضي

دايما حاسس انى الى اخترته لنفسي هو الأحسن .. مع انى عارف ان الى ربنا قدره ليا هو الأحسن والانسب والأفضل .. مش عارف أجمع بين عقلي ومشاعري

ازاي أنا عارف ومتأكد ان وضعي فى شغلي احسن من الظابط بكتير وحاسس انى قليل


ولا انا سطحي ومبهور الدبابير الدهبي ونفسي أتنك علي الناس واتعالي عليهم

ليه بتمحك فى بدلة ولا فى دبورة ولا فى كارنيه .. ليه مادخلش علي الدنيا بصدري ويقاتل يا مقتول .. ليه مستني انى أفرض احترامي علي غيري بخوفهم من مظاهر فارغة .. ليه حاسس ان الناس مش هاتحترمني غير لما يعرفوا انى ظابط .. ليه عندي العقدة دي .. ليه حاسس انى مش هاعرف آخد حقي من الناس غير لما يخافوا مني .. مش عارف ليه حاسس انى عندي عقدة نقص .. مش عاوز أتلكك بظروف البلد وأقول هي السبب لأن مش كل الناس كده
ممكن يكون الحب أعمي وماحدش بيختار الى بيحبه لكن ليه دايما بعوز الشيئ ونقيضه .. ليه عاوز الناس تلف حوالين نفسها علشان يرضوني

عاوز مراتي تبقي رغاية بس لما ترغي أقولها ايه الرغي ده علي شرط انها ماتزعلش .. وعاوزها فى نفس الوقت هادية ولما تسكت أقولها ايه الملل ده وبرده ماتزعلش

علشان كده الى يخلص البوست يبعتلي علي الميل عنوان ورقم تليفون أقرب دكتور نفساوي

لو لم اكن مصريا لوددت ان أكون ؟

كل الأشياء تدعوا للإحباط

ومافيش حاجة مضمونة

مافيش منطق .. ولا بديهيات ولا مسلمات

يعني.. واحد زائد واحد بيساوي اتنين .. مع ناس ممكن يساوي ملايين وناس تانية ممكن مايسوش حاجة، يساوي صفر

ماحدش حاسس بالامان ولا بالاطمئنان

الغابة مثلا معروف ايه هي احكامها وقوانينها ، ومعروفة كمان عناصرها ومعروفة ادوارهم ووظائفهم، مثلا فيه أسد ونمر وديب وتعلب وفيه غزال وجاموس وبقر وحمير .. معروف مين المفترس ومين الفريسة .. مثلا الغزالة طبعا واكيد مش عاوزة تتاكل فبتدافع عن نفسها قدام الأسد بالجري والهرب من وشه، ولما بقيت الحيوانات يشوفوا مشهد المطاردة ده ماحدش بيستغرب وكل واحد بيبقي منتظر دوره .. فى الغابة معروفة طبيعة الأشياء وقانونها فطري وبديهي ومسلم بيه ، ورغم من كده عمر ما الغزالة حاولت تبقي أسد .. وعمر ما الضبع حاول يبقي أسد ولا الغزالة حاولت تطور قدرتها ومهارتها انها تبقي أسد

أنا حاسس اننا فى غابة بس قوانينها مش قوانين غابة .. يعني يمكن كنت أستريح لو حسيت ان ربنا خلقني غزالة أو أسد ، علي الأقل كنت هاعرف دوري ووظيفتي كويس ومش هاقفز عليها .. بس ازاي نيعش لو الناس كلها كانت اسد .. والى مش أسد بيحاول بكل الطرق والكباري انه يبقي أسد

ببلطجة بفتونه بنفوذ بسلكان بهمبكة بقلة أدب .. المهم يعمل ضوافر وأنياب يدافع بيها عن نفسه وعن منطقة نفوذه
مش عارف هل أنا قادر أوصل الي أنا حاسس بيه ولا لأ

والأسد فى مصر لاما يبقي ظابط أو وكيل نيابة او مستشار أو دبلوماسي أو أي حاجة من الحاجات الى بتخض دى ،علشان يبقي أسد لازم يبقي كارنيه لامؤاخذة .. او يبقي غني جدا وبعلاقاته يخلي البشر يعملوله ألف حساب، ويقدر لو وقع فى مشكلة أو لو وُضع فى أي صراع انه يدافع عن نفسه ويأذي خصمه .. يقدر يجيب حقه وماحدش يدوسله علي طرف ويبقي ماشي مطمن ومامن نفسه .. والنوعين دول ماشيين مع بعض ماحدش بيشوفهم او بيتعامل معاهم كتير مش بيختلطوا بينا مش بيركبوا مواصلاتنا ولا بيمشوا فى شوارعنا .. راكبين عربيتاهم المتفيمة والى عليها النمر السودا .. متعلمين لابنجمة لا بلوحة سودة عليها قبة برلمانية او نسر او حتي دبور

كل الناس بتستخبي ورا شعار ورا لوجو يحميها

ولو علي دول يبقي مقدور عليهم بنوسع عادي وربنا يبعدنا عنهم وبيعدهم عننا

بس الاخطر ان بقيت البشر المطحون برده عاوز يبقي اسد ... بيحاول يدرب نفسه علشان يبقي أسد

تقريبا نسيوا انا احنا مش فى غابة وان احنا مش حيوانات

مش قادرين يعيشوا مع بعض بمنطق التكافل ، لازم منطق الافتراس

بتخيل لو اتحطيت فى موقف وكنت فيه خصم مع حد مسنود هايعمل فيا ايه

ده فى مرة مع سواق ميكبروباص خبط عربيتي عند قسم السلام وجبتله امين شرطة وكان يعرف الى مسرحه طلعه مش غلطان ... ولولا انى استقتلت فيها وأصريت انى اعمل محضر قدام الرائد ماكنش خلاه يصلحلي العربية علي حسابه
بس لو ماكنش مع سواف ميكروباص لو كان مع الباشا أبو عيون الى رخمنا علي بعض فى غياب أي عنصر أمني محايد .. ولو موجود ولقي خصم برنس بعربية ستة متر والى قدامه شاب مطحون بحته فيات هايعمل ايه

مين ممكن يخلق امان وعدل فى الشارع

الكافتيريا الى فتحت قدام بيت أبويا العيال الى شغالة فيها بيبيعوا حشيش وبانجو للشباب جوه العربيات وبيركنوا عربيتهم فى أي حته فى الشارع مكان عربياتنا احنا .. فتحول الشارع الى كان اهدي ما يمكن لوكر مخدرات ولعب بالعربيات وضاق الشارع الواسع وباه كل يوم فيه خناقة .. والشارع الي كان بينام من العشا بأه يصحي المغرب وينام الفجر

مين فى البلد ممكن يجيب حقه بما يرضي الله وبالقانون من غير ما يجور علي حق حد

مين حاسس ان ممكن يجيله حقه من غير واسطة ولا محسوبيه ولا نفوذ

مين بيحكم بين الناس بالعدل

أنا شايف ان فساد الاوضاع فى مصر خرج بره دايرة الكبار وباه مترسخ فينا احنا كمان ، باه فى كل ذرة فى كل نسمة هوا .. فيه فساد وظلم وقهر وخوف

سلوك الشرطة المصرية صايبني بذعر حقيقي

بجد انا حاسس انى عندي مرض نفسي زي فوبيا من الشرطة

حالة عدم منطقية الأحداث وعبثية الحوادث ولامعقولية الامور تصيبني بالخوف

بس انا عاوز اعرف مين خايف ومين حاسس بالأمان

الحادثة بتاعة نادي الصيد مأثرة عليا قوي ، أنا بعدي من هناك كتير الدكتور الى بيعالج أبويا عيادته هناك، لو الموقف ده حصل معايا، كان ممكن يحصل ايه ، انا مش خايف من الموت انا خايف من الاهانة والبهدلة والتنكيل، أنا عارف انه غلط انى أقول خايف بس أنا فعلا كده، ليه كل واحد بيحاولي نفسه بطريقته هو، ليه الناس شايلة فى عربياتهم مسدسات صوت وكرابيج وشوم وحديد، ليه واحد صاحبي شايل ترسانة أسلحة فى عربيته، استعداداً لأي خناقة فى الشارع مع تاكسجي ولا سواق ميكروباص او سواق ملاكي برده معاه نفس الترسانة

سألت مرة عبقرينو علشان كان فى الامارات قلتله لما بتحصل هناك حادثة ايه الى بيحصل ، هل بينزلوا يسمكوا فى بعض زينا؛ قالي لأ طبعا الاتنين بيقفوا يطمنوا علي بعض يتصلوا بالشرطة تيجي تحقق ويتصلوا بشركات التامين والى ليه حق بياخده ، والكل بيبقي مطمن ومتامن عليه

انا نفسي فى كده

حزنت تاني لما اتفرجت علي العاشرة مساء لما كانت مستضيفة علماء من الطاقة الذرية .. مهندسين واطباء بيطريين وبشريين وخريجين علوم معاهم ماجستير ودكتوراه ومتاكله حقوقهم ، وكان فيه مهندسة عاملة دكتوراه فى الطاقة الذرية والاشعاع والحاجات الغريبة دي بتقول ان مرتبها 1600 جنيه، حاجة عملتلي صدمة، وزعلانة علشان اكلوا منها درجة وظيفية كانت هاتوصل مرتبها لـ أربع تلاف جنيه ، ايه التهريج ده ، واحدة مهندسة خريجة هندسة 5 سنين عملة دبلومة وماجستير ودكتوراه وأبحاث فى الطاقة الذرية وتكنولوجيا الاشعاع بتقبض 1600 جنيه فى الشهر بعد عشرين سنة شغل ، حاجة يعني تخرج من الملة، دول بياعين كروت الشحن بيقبضوا اكتر منها، مندوبين المبيعات وخدمة العملاء الى بيردوا علي التليفونات بيقبضوا اكتر من كده، فيه موظفين عندنا فى الشغل بياخدوا المرتب ده بالدولار وخريجين تجارة مابيعملاش حاجة غير انهم قرايب الكبار .. الكبار قوي

ده مش اسمه قهر وكبت وظلم وفساد ، ليه اسم تاني .. انا مش عارف ألاقي توصيف حلجاة زي كده .. بجد مش لاقي

نفسي أخرج كل الى جوايا بس مش عارف اخرجه


بجد انا قرفان وساخط وزهقان ونفسي أغور من وش البلد المقرفة دى، جايالي حالة من عدم الانتماء الخطيرة ، فعلا بتمني أهج من البلد دي وأعيش فى أي بلد محترمة، أسمع عن سويسرا انها محترمة بس ازاي أسافر هناك ، وخصوصا بعد ما اتجوزت فى الأيام الضنك دى

يارب اصلح حالنا بأه، وهيأ لنا من أمرنا رشدا

ابن خلدون المدرسة والرمز

أنا طالع من مدارس حكومي ابتدائي وإعدادي وثانوي مأصل يعني .. كل مرحلة اختلفت عن التانية من حيث تعاملنا مع المدرسين وتعامل المدرسين معانا .. فى ابتدائي كانت أبلة سامية مسكانا من أولي ابتدائي لغاية خامسة ابتدائي .. كانت نعم المعلم كانت شديدة جدا وعندها ضمير جدا جدا .. كانت بتدينا كل المواد .. تقريبا كنا بنقعد معاها أكتر من قعادنا مع أمهاتنا .. كانت بتابعنا فى المذاكرة اكتر من أهالينا .. كانت بتهتم بنضافتنا الشخصية .. ضوافرنا ، الساندويتشات ، المناديل، أسباب الغياب، حالتنا الأسرية .. كان عقابها شديد جدا .. كانت تمسك خدودنا تفركها بصوابعها التخينية .. وبدراعها القوي المليان علي ضهرنا .. كانت تمسك البنات من شعرهم تمسح بيهم بلاط الفصل .. لو لقت منها حاجة غلط .. كان عقابها قاسي جدا .. امتحان الشهر مثلا لو الدرجة من أربعين لو واحد جاب من 30 لى37 تكمل الباقي ضرب بالعصاية علي بطن ايديه ... لو جاب من 20 إلي 30 يبقي علي ضهر ايديه لو أقل من عشرين كان بتمد علي رجليه .. ماكانش عندها واسطة .. كنا متفوقين وشاطرين وبنجاوب وبنذاكر وبنخاف منها وبتحبنا .. ولما بتضربنا كانت بتحبس دموعها .. كانت بتضربنا الصراحة زي أي أم بتضرب عيالها علشان يذاكروا أو علشان مايبقوش مهملين .. أنا اختي الكبيرة كانت بتعمل فيا اكتر من كده، والأهالي كانوا بيشجعوا المدرسة علي الضرب

وكانت بتهزر معانا وتمسك واحد واحد تعرف منه هياكل ايه النهاردة .. ومرة جبتلها حمامتين كانت عمتي عملتهم وقعدت تتريق علينا علشان عمتي عاملة الحمام بخلطة المحشي .. كانت تعرف والدتي، وتعرف أمهات باقي الطلبة .. الى كان بيخاف منها البليد الى مش عامل الواجب والى حل وحش فى الامتحان وجاب درجات وحشة
كنا بنخاف من أبلة الحكيمة .. كانت ست مليانة وقصيرة وسمرة وملامحها حادة جدا وكشرية جدا وفظة جدا .. وكمان كانت بتدينا حقن .. كذا مرة بنت تعمل علي نفسها من كتر خفها من الحكيمة دى .. هي فعلا كانت مرعبة .. احنا كنا بنخاف من أبلة سامية لكن عمر ما حد عمل علي نفسه علشان خايف منها قوي كده .. كان خوف مختلف

فى إعدادي المدرسة كبرت أكتر دخل فيها مستويات كتير.. وكنا احنا كمان كبرنا .. وقل عدد المدرسات .. علشان احنا مدرسة ولاد وإعدادي وحكومي وفي عين شمس كمان .. فكان عدد المدرسات قليل جدا ونادر للغاية
شفت بعيني بعد ما كنت بسمع عن المدرسين الى بيستقصدوا الطلبة علشان ياخدوا دروس خصوصية .. ماكناش بنتجاوز مع المدرس .. إلا ما ندر .. كنا بنتجاوز مع طلبة كلية التربية الى كانوا بيدربوا عندنا .. كنا ممكن نتجاوز مع مدرس النشاط، كان عقليا وذهنيا فيه حاجة غلط .. كمان بعض المدرسين كانوا بيضربونا بعنف واضح وشديد .. وشفت كذا طالب اتعور واتبطح أو اتكسرت أو اتجزعت ايديه بقصد أو بدون قصد، بسبب عصاية جت غلط علي ايديه بدل بتيجي علي وشه .. طالب ياخدله شلوت لوز يجلي وييجي فى أطراف صوابعه تتجزع او بطنه او ضهره
حالة واحدة كان فيه عيل صايع وكان أكبر مننا سنا وحجما، فالمدرس جاي يضربه اخد منه العصاية ومسكوا فى بعض .. كنا بٍنِضرب كتير فى إعدادي .. كتير قوي .. أي مدرس بيعدي يلاقي دوشة يدخل مذنب الفصل كله ومدي كل واحد كام عصاية .. احنا كنا معتادين علي الضرب بسبب أو بدون سبب.. عمر ما واحد امتنع عن الضرب أو استنكر او رفض عن حق او بدون وجه حق .. وعمري ما شكيت المدرس لاهلي لانه ضربني بدون سبب، وعمر ما حد اشتكي لاهله وهما ناصروه

عرفت فى مدرسة الحرية الإعدادية من أول يوم ليا فيها معني الشعار المقيت "السيئة تعم والحسنة تخص"، شفت كمان التحرش الجنسي ، فى آخر سنة عملوا فترة تانية فى المدرسة بيحضر فيها بنات مهني فكانوا بيدخلوا فى مواعيد خروجنا وتخيلوا طلبة فى إعدادي متلاحمين مع آنثات ، شفت مهازل والطلبة عملوا مهازل لا يمكن ذكرها فعلا لا يمكن ذكرها، وكمان كان جنبينا مدرسة النعام التجارية، كان بيحصل مش تحرش كان بيحصل هتك عرض والله .. علي قارعة الطريق قدام كل الناس


اما فى ثانوي كترنا أكتر واكتر واكتر.. شفت طلبة بتشتم مدرسين، وبتضرب مدرسين، وبتكسر ازاز عربيات مدرسين، وبتمسك فى خناق مدرسين، وبتف علي مدرسين، وبتبجح فى مدرسين .. وشفت مدرسين بيخافوا من الطلبة
ماكناش بنقول للمدرس يا أستاذ كنا بنقولهم يا بيه ويا باشا ، وشفت مدرسين يضربوا طلبة ويخافوا يقولوا لطلبة تانين بطلوا كلام .. شفت مدرسين بتسهزئ بالطلبة الضعفا أو الطيبين أو الطلبة العاديين علي حساب الطلبة البلطجية .. كتينا فى ثانوي وهربنا من المدرسة وقعدنا علي قهاوي وماحضرناش وجتلنا جوابات رفد وفصل من المدرسة ومكناش بنحضر الحصص .. كان لازم نعيش كده فى المدرسة دى علشان كانت غابة .. الطلبة كانت بتتخانق بالسنج والمطاوي جوة حوش المدرسة، والمدرسين كانوا بيفترجوا علينا .. كنا بنتخانق مع المدارس التانية .. فاكرين فيلم المصارع، أول مايتفتح باب المدرسة كنا نلاقي طلبة المدرسة التانية مستنينا قدام البوابة بالشوم والعصيان والجنازير وتضرب فى أي حد وتعور أي حد
كان كل فصل فى المدرسة عبارة عن دولة مستقلة ليه جيش دفاع وهجوم وبيعمل غارات .. فى وقت الفسحة كان فصلنا يعمل غارة علي الفصل الى جنبينا ونضرب الى قاعد فى الفصل ونبوظ الشنط ونرمي الى فيها .. والغنيمة كانت عبارة عن خشب او دكك نضيفة وهكذا .. والفصل التاني يرد علي الغارة .. ويتكون جيش أكبر عبارة عن جيش مبني يعمل غارة علي المبني التاني وهكذا .. ونفس الغنايم ونفس الخناقات .. كنا بنملي أكياس بلاستيك ماية ونحدفها علي بعض فى الحوش بيبقي عبارة عن حمام سباحة ونطلع من فوق المباني ونحدف اكياس علي كل الناس .. الحمام كان عبارة عن غُرزة .. 3 سنين مادخلتش فيهم الحمام ولا مرة كان بيحصل فى الحمام شرب سجاير وبانجو .. كانت الطلبة بتشرب السجاير فى الفصل .. المدرسين كانوا عارفين كل ده واكتر .. الضرب ساعتها كان قليل قوي .. كان المدرس بيفرض احترامه فقط بشخصيته لا اكثر .

وصل الامر اننا أكتر من مرة نولع فى المدرسة .. طبعا كان ورا المباني زبالة لا يحصي لها،وطبعا 75% من الطلبة بتسجر فمرة حصلت انهم رموا أعقاب السجاير مولعة نزلت ع الزبالة ولعت فى فصول مبني الزراعة

ولما كنت فى مبني العزبة المهيب فى تالتة ثانوي كنا فى الدور الثاني والدور كان عبارة عن فصلين حصلت كام غارة متبالدة ما بين 3/16 و 3/17 تسببت فى حريق الفصلين وماتبقي فيها من خشب وكسر البابين والتوليع فيهم ورمي الخشب الوالع فى الشارع

كنا بنروح المدرسة بعد الحصة الأولي وماكناش بنشيل حاجة معانا لا شنطة ولا كتابة ولا كراسة وحتي قلم .. وماكانش فيه زي مدرسي وطبعا ولا طابور صباح .. وفى الفسحة كنا نجري علي البوابة الحديد نفضل نزق فيها لغاية ما الجنزير والقفل يتكسر ونطلع نجري

كنا الصبح نتجمع ومنخليش حد يدخل الفصول علشان ماتجيش ورقة غياب أصلا
حاولوا مرة ماينزلوناش فسحة . فجه شارون وقفل بوابة المبني من تحت بالجنزير، راح تجمع الفصلين معبرين عن أروع صور تكاتف قوي الشعب العامل وأروع صور الوحدة الأدبية بين جناحي الأمة طلبة ادبي تخصص علم نفس مع طلبة أدبي تخصص فلسفة، مرددين هتافات افتح يا ابن الو تيييييييت افتح يا ابن الو تيييييت وفتحوا بوابة المبني عنوة، وجاء باكيا شارون يعدد مآثار والدته العظيمة التى انجب هذا الغزال الشارد .. شارون ده نيك نيم لمدرس العربي بتاعالفصل الى قدامنا وزماليه المدرسين كانوا بيقولوا عليه كده .. ييجي مدرس يسأل علي المدرس الى بعده أو الى قبله فيقولنا مين الى ببعدي شارون ولا مستر طارق فالطلبة ترد شارون بمنتهي البساطة والليونة

مدرس الإحصاء لما شافني مرة فى الفصل ماعرفنيش .. وكان هايطلبلي الأمن فاكرني طالب من مدرسة تانية سنة كاملة عمره ماشافني .. بس انا أرحم من غيري يه ناس تانية ماسمعش بيها خالص .. والى خلاه يشفوني اني جالي جواب فصل علشان غبت 43 يوم مع اني غبت اكتر من كده

المحترم الى زيي ماكانش بيحضر الى ما نذر
شفت كل ده واكتر.. كان كل يوم كان فيه جديد وعجيب فى الوقت نفسه.. فى مدرسة ابن خلدون
لكن ماشفتش مدرس موت طالب .. ولا أبويا شاف الى أنا شفته .. ولا أنا عاوز ابني ولا بنتي يشوفوا الى أنا شفته أو إلي إسلام شافه