Wednesday, April 23, 2008

تاج مفيد

مفيد ربنا يكرمه عشقلى تاج لوز لوزجى مانجالاوز

طبعا مفيد ماينفعش حد مايمشيش كلمته

التاج سهل جدا وفـ نفس الوقت بسيط وعميق وغميق .. تاج تعشيق بجد

التاج عبارة عن 10 أسئلة صعبة أو بتدور فى الذهن

1 - نفسى أدخل فى نفسيات كل البشر وخصوصا ظباط الشرطة، أو الطلبة الى بيقدموا فى كلية الشرطة، وأعرف السبب الحقيقى ورا تقديم كل واحد فيهم فى الكلية دى، يا ترى فعلا عاوزين يحمونا .. يعنى مثلا مثلا هيثم جارى الى فى الشارع الى أبوه جابله نيو اكسنت فاضى لما دخل المخروبة والى بيضرب شعره جيل .. والى كنت بقفشه عند باب حقوق عين شمس بيقف يزغلل الحريم بالدبورة الدهبى .. مسعتد انه يحمينا .. بلاش يحمينا .. يحمى نفسه أصلا .. لا بجد بلاش هيثم .. امشى يا هيثم .. أي حد تانى بيقدم فى كلية الشرطة ليه؟ .. يعنى بيبقى فاهم انه هايدخل الكلية دى علشان يخدمنى ويخدمنا .. وان كل وجوده فى الحياة وكل وظيفته فى الدنيا دى انه يحمينى وانه يخلى باله منى ..وانه مايعرضنيش لأي خطر .. مش وظيفة رجل الأمن برده وظيفة خدمية بالدرجة الأولى ؟

2 – ليه عامل النظافة الى عندنا فى الشغل أو الى فى أي شغل بيشتغل 12 ساعة وبيبذل مجهود عضلى وبدنى كبيييييير جدا بيقفش ـ يعنى بيقبض ـ أقل من أي موظف عندنا برده أو فى أي حته تانية بيشتغل 6ساعات أكتر من نصهم نميمة وفطار وتليفونات وشاي وتفخيد ؟ اوزاي بيتحدد قيمة الأجر؟ على أي أساس يعنى؟

3 – ليه دايما كوبرى اكتوبر والقصر العينى مردومين عربيات ؟

4 – ليه الريس قاعد فى الحكم لغاية دلوقتى؟ صحيح هو مرتب الريس كام؟

5 – هو الريس فاكر نفسه كويس .. يعنى فاهم انه ريس جدع .. عادل، ومحترم ومنغنغ شعبه وكده ، هل عارف انه هايتحاسب عن كل واحد فينا ، مممممممم ، طب بلاش دى ، هل فاكر اننا بنحبه .. اوعوا يكون عارف اننا بنكرهه ومش طايقينه ويبقى ولا همه ... ده احنا نبقى هفأ قووووووووووى ....... اخييييييه :(

6 – ليه فى قاعدة الحمام دايما بيفضل شوية مية .. ومش عاوز حد يضحك ولا يتريق بجد مش عارف ولما كنت صغير كنت بفضل أسأل السؤال ده .. وكنت بسال أسأل تانية كتييييييييير
:))
7 – لو كنت اتولدت مسيحى .. هل كنت هافضل مسيحى؟ يعنى كنت هابقى مقتنع بديانتى وبدافع عنها زي ما أنا دلوقتى .. أعتقد إن الإجابة آه .. بس كده يبقى أكيد فياحاجة غلط .. طب بلاش دى .. حاجة رنت فى دماغى حالا خلتنى اصدع .. لو كنت اتولدت فى إسرائيل يهودى .. هل كنت هاكره العرب والمسلمين زيهم كده .. ولو دخلت الجيش هناك كنت هاقتل الأطفال الفلسطينيين ... مممممممم الموضوع باين عليه كبير؟

8 – ليه حماس دخلت الانتخابات وهي عارفة انها هاتكسب .. وهي برده عارفه ان كل الدنيا مش بتطقيها وهاتجيب عليها واطيها لما هاتكسب .. نفسى أعرف الفايدة من دخولها الانتخابات وسايبانها المقاومة .. يا ترى حسبتها ازاي .. يعنى ايه هيا المكاسب حصلت للشعب الفلسطينى أو للقضية بعد دخولهم للانتخابات .. طب كانوا متوقعين الخسائر الى حصلت دى كلها .. طب كانوا متوقعين ان هايحصل ضرب بينهم وبين فتح .. طب الى حصل على الحدود بينا وبينهم فى رفح ده يصح.. طب لو عندهم متفجرات وبلدوزارات وحاجات كده .. توجهه لفين، لرفح المصرية ولا للجدار العازل .. انا عارف انهم لو هوبوا نحية السور ده هيتروقوا .. هما بيبقوا قاعدين فى بيوتهم وبيتروقوا .. بس فيه ناس بُعدا اصطادت فى الماية العكره .. وأصلا أصلا وده كان كله ليه ؟ وأصلا ليه تبقى كل الخصومة مع مصر .. آه مصر شاركت فى الحصار علشان كلنا عارفين مين الى فى قصر العروبة .. بس لازم نحسب حساب للشعب الى بياخد على قفاه من هنا ومن هناك .. علشان مايفقدوش الدعم الشعبى

9 – ازاي الواحد يبقى زي عز .. وأصلا ازاي عز باه عز ؟

10 – ليه كل ما ييجى حد يحب الاخوان .. يعملوا حاجة فيكره الاخوان .. ليه الجماعة دى بتخسر محبيها؟

ممممممم انا عاوز أسأل حاجات كتير

- لو حسنى مبارك قال انا ماشى ، وعملنا انتخابات حرة ونزيهة .. مين هايكسب .. تعالوا مانقولش أشخاص علشان مافيش حد على السطح ينفع .. هو أكيد فيه ناس كتير تنفع .. بس الى ينفع قاعد فى بيتهم .. زي لما ييجى حد ينوى يخطب مثلا ويفضل يبص على البنات وبيبقوا موزز بصراحة .. ولما عنيه تزغلل على بادى ولا حاجاة كده .. يقوم ييجى حد بيفهم كده يقوله يا بنى بنات الناس قاعدين فى البيت مش الى انت ريلت عليها فى الشوارع دى .. برده الى ينفع يبقى ريس قافل على نفسه بابه ولم يلوث بوساخة السياسة ..

ممممممم نرجع تانى لو الريس ساب الحكم ومثلا كسب الاخوان .. المعارضة هاتبقى عاملة ازاي ... طب الاخوان هايبقوا عندهم استعداد انهم يتخلوا عن الحكم حالة وصولهم إليه لو الشعب بعد كدا رفضهم .. طب كوادر الاخوان .. مش هايبقوا زي مطبلاطية الحزب الوطنى .. وزي أي حد ييجى مثلا وينتقد حماس أو ينتقدهم .. طب مش المعارضة هاتبقى فى قمة شراستها .. بصراحة كده .. مش فيه ناس بتكره الاخوان عمااااااااااااااااااااااااااااااااا .. وشايفة ان كل البلاوى بسبب الصحوة الدينية السبعينية لما خرجوا من السجون ولما الناس رجعت من الخليج الوهابى على رأي الأسوانى .. طب لو اليسار كسب أو الليبراليين كسبوا مش الاخوان هايبقوا فى قمة شراستهم وهايتهموهم بالكفر والزندقة؟

- ليه الاخوان بتعمل مظاهرات كبيرة جداااااااااااا علشان العراق وفلسطين وغزة ومش بتعمل للزيت والسكر والعيش .. ووالله والله دى مش مزايدة؟

– ليه المتدين بيبقى دايما متناقض .. والناس بتكشف تناقضه ده بسرعة وبتحسبه عليه قوى .. مش طبيعى ساعات ان الواحد يبقى فيه الخير والشر .. مرة يصلى ومرة تانية يكسل .. مرة يبقى شيخ .. ومرة تانية مايسبش بنطلون يعدى من غير ما يبص عليه؟

- ليه فيه شقة فى عين شمس 120 متر بس، بـ 200 ألف جنيه محارة وحلقان .. طب وطالما الأسعار غالية كده .. والغنى قبل الفقير بيشتكى ليه الناس قادرين يشتروا شقق وعربيات وحاجات كده؟


– ليه لما بكلم مع أي حد عن احوال البلد بيبقى ساخط جدا وبيعيط ويفضل يقولى كل الأسعار الى غليت.. ويبقى شوية شوية وهايقولى مماعكش 200 جنيه لاول الشهر .. ولما أجيبله سيرة إضراب ولا احتجاج ولا عبر عن رأيك .. يحور ويقولى يا عم انا فاضى.. العيال والدروس والاقساط والولية وأبويا الى مات وامى الى فى الجيش وحوارات فاشلة كده .. يبقى اشرب كمان وكمان وتستهال كل الى يجرالك

- فاضل ايه علشان كل المصريين يتحركوا ... يعنى مثلا هايتحركوا لو قفشنا الريس بيحط سم فى النيل مثلا .. وقال كده.. "بأه فيه حوارات كتيرة من الشعب ده .. وأنا زهقت منه وخلاص وقررت انى هاسمه" .. فجه حد وصوره بموبايل وكان مدون برده، وهو بيرمى سم فى النيل ومعرى شعر شوزان ومخليها عمالة تدعى علينا علشان نموت ولا نروح فى دوكة .. هل ساعتها ممكن نتحرك .. ولا هاتتحبس إسراء .. واختى تتصل بيا ملهوفة وتقولى انها اتفرجت على معتز الدمرداش وعرفت ان فيه حد اسمه إسراء وتقولى اوعى تكون تعرفها .. أقوم أقولها للأسف للأسف ماحصليش الشرف أنا اطول

- يعنى ايه مازوشية .. محمد هانئ زميلنا فى أبناء مصر كان كاتبها فى ميل وبعتهولى .. فاتكسفت أسأله .. فقلت أسألكم انتم؟

– ليه مش كل الناس زي محمد جمعة وميدو مجدى ومفيد

آخر حاجة علشان زهقت .. - يعنى ايه شكرا؟

وده عنوان البوست القادم انشاء الله

قال يعنى وتابعونا وحاجات كده .. صحيح هو ليه مابقاش حد بيعلق .. حسبى الله ونعم الوكيل فيك يا جمعة


صحيح مبروك لمهنى والبوهى على فكرتهم الرائعة مدونات مصرية للجيب

التاج باه أبعته لكل الناس بجد .. ياريت فعلا أي حد يلاقيه ويعجبه ياخده وش بس يبقى يقولى علشان أتابعه


19 comments:

مـحـمـد مـفـيـد said...

سعيد بكوني أول تعليق
كلالاسئله اللي في التاج تخليك تفكر مليون مره
وده اللي خلاني ابعته لك واعمله
فكرته عميقه تخليك تبحر في اعماق الاشخاص الاخري وتعرف ما يدور بخاطرهم
وشكراً يا عم علي المجامله الرقيقه منك
وهعديها
وفي تاج صغير بعدها فين يا لوز ؟

AHMED SAMIR said...

بفكر جديا اني اضرب التاج دة
اسئلته استفزت نفسيتي الصراحة يعني
تحياتي

صاحب المضيفة said...

ايه ياعم كل ده


وانا عمال اقول الواد مختفي ليه


ربنا يستر عليك

انت اتهريت من التفكير بالمنظر ده بجد



سلامات يا كبير

رفقة عمر said...

انا باعلق اهو
بس ايه دة كل دة جواك
انت مش سبت لينا حاجه نقولها
بس اسئلتك قوه جدا وبجد محتاجه اجابه بس ارت تلاقى حد عنده اجابه

No Fear said...

السلام عليكم
أيوة كده يا لوز هي دي البوستات و لا بلاش
نفسي أعلق علي كل نقطة بجد عندك وقت
ظباط الشرطة لأنها الوسيلة الوحدية لنحقيق جميع أحلام أي شاب بنات و مركز و فلوس
الحاجات التانية زي الحماية و الحاجات دي بتكون في أحلام الأطفال و هما صغيرين لما بيقروا أدهم صبري رجل المستحيل
.
بالسنبة لعمال النظافةعلشان في حاجة شهادة و فوق و تحت و ده قانون إلهي بس إحنا للأسف بنستخدمه أسوأ إستغلال كعادتنا في كل شئ
.
تخيل صحيح لو الريس فاكر إن إحنا بنحبه و الله تبقي كوميديا بس معتقدش علشان علي ما أعتقد أكيد الريس من فترة حكمه دخل كم جمعية و أشتري دش صح
.
بالنسبة بقاعدة الحمام يا مقرف هتلاقي الجزء اللي ورا عالي علشان كده في شوية مياه مش بتنزل و ده علي ما أعتقد علشان الصحة العامة يا مقرف
.
أحمد ربنا إنك مسلم الحمد و متفكرش في أي حاجة تانية
.
حمسا و الإخوان و السياسة زيهم زي اللي بيدخل كلية الشرطة فوق عاوز مصلحته فقط ممكن منظلمهمش عاوز مصحلته بنسبة تسعة و تسعين بالمية و الواحد التاني للمصحلة العامة جت جت مجتش خلاص هيقطعوا نفسهم يعني
.
معلش طولت عليك
.
بالنسبة لينا كمواطنين الجهل و الخوف و قبلهم البعد عن ربنا هو اللي خلانا
بالضعف و المهانة دي
.
مش لازم بقة أجاوب علي كل حاجة أنا طولت قوي نكمل و إحنا مع بعض بكرة
بس بالسنبة للناس ليه متبقاش زي ميدو مجدي و مفيد بس بلاش جمعة علشان هو مش أمله يعني بجد و الله تحت السواهي دواهي
تصبح علي خير أشوفك بكرة
:)))))))))))))))))))))

Rania Lelah said...

انا صدعت
معقوله كل دة جواك
بس عارف
كل اسالتك منطقية فعلا و كلها اجابتها تقريبا مبهمه او احنا الى فاكرنها مبهمه

تحياتى

القاهرة - said...

تاج رائع

كلماتك تتسم بالانضباط
نعم كل هذا واقع مرير
فهل الاستسلام هو الحل المبين ؟

ما علمته ان الاستسلام خنوع وذل
بجانب ذلك تتربع جوانب القهر ظاهريا
هلا السبب التخلف ام الخوف ام الركون
لكل حقير مستقذر ام اننا شخوص لا تبالي

ام الاخوان اخى منذر اذا دققت جيدا ستعلم الحق الواضح جلي لا غبش فيه ولا ضبابية هم قاطعوا الاضراب
لاسباب رخيصة دبرت بليل تجاههم هو لم يخدعوا الشارع ولم يوقعوه فى مأزق بقدر الكثير الذى دبر مكيدة رخيصة مستحقرة لاصطيادهم بشباك أمنية حاقدة على الوطن
أخى منذر الاخوان كانوا يتمنون المشاركة لكنه علم من مصادر وثيقة ان الامن كان يعد فخا للاخوان لتحميل الامر برمته على كاهلهم هو كان يريد تعليق المشانق للاخوان على طول الخطوط

وانت تعلم جيدا ما يعانيه النظام من الاخوان فهو يواصل ليله نهاره سعيا فى كسر ارادة الاخوان والاخوان اخى منذر حركة تربوية اصلاحية وستصلح لكن الاولى الان تربية الشارع الشارع فى حالة من التدنى الخلقي السلبي المريع

لو اردت النزول للشارع سيتعاظم على النزول لرد حقه رغم ما يصاب به من معاناة فى كافة النواحي لكن الجبن يركنه
للصمت والذل

نريد تربية الشارع اولا حبيبي منذر
وبارك الله فيك وفى والديك واصدقائك

أخوك المناضل / أسامه جابر

د/اجدع بنوته said...

هيثم طبعا للاسف مثال سىء جدا عن كل طلبة الكليات العسكريه دلوقت

قاعدة الحمام فيها ميه بالخاصيه الاسموزيه

لووووووول

مازوشيه يعنى بيتلذذ بتعذيب الاخرين ليه

الريس طبعا كويس وزى الفل

برده لووووووول

شكرا

شــــمـس الديـن said...

سلام عليكم

انا قرأت التاج و خلصته و معرفتش هي فين الاسئلة ؟؟؟ اللي انا شايفاه دي خواطر ولا انا دماغي اللي لفت ؟؟؟

NilE_QueeN said...

دي مش اول زياره مني لمدونتك لكن دا اول تعليق

واجاباتك على التاج عجبتني

اتمنالك دوام التوفيق

مصطفى محمود said...

اية يا عم منذر الروقان اللى انت فية دة ..اخبارك اية يبنى واحشنى كتير

سكوت هنصوت said...

ايه يا بني الي انت كاتبة ده

فكرتني بعادل امام في مسرحية شاهد ما شافش حاجة لما وكيل النيابة طلب منه يكتب اوتوجراف فقعد يكتب السلام عليكم من بلد الكفاح المسلح والسادة اعضاء مجلس الشعب والسادة اعضاء المجالس النقابية يحييون السيد الوزير بعودته سالما وسلم علييييييييي زفرووت

الراجل بعتلك تاج تكتبلنا عريضة كلها اسئلة تفجر نافوخ هتلر ذات نفسه!!!!

طب هو فين التاج....؟؟؟

مشكلتك يا منذر يا جن انك بتفكر كتيير وللأسف الشديد افكارك كلها من النوع الي يودي في داهية لإنه افكار بتصحي الحتة الحية الوحيدة في دماغ المصريين

بتصدم زي جردل المية بتاع الغسيل الي بيترمي من بلكونة عمارة على مواطن رايح الشغل الصبح

نفس الإحساس بالبلل والإستغراب ثم الحنق والغضب الشديد ثم العجز والكساح عشان عارف انه مش هينوبه حاجة من الزعيق مع واحدة ست في بلكونة غير تقطيع هدومه بعد بهدلتها

إمتى الشعب هيفوق لما يتعلم ( طول ماهو جاهل و غرقان لشوشته في جهله عمره ما هيعرف يجيب حقة) و يتعلم مش معناها يعرف يقرا و يكتب وبس

لأ معناها يعرف الحد الأدني من المعرفة الي تؤهله انه يفهم ان الي بيحصل ده غلط وما يصحش وعيب وان الحكومة عمرها ما هتكون صحبته ولا حبيبته ولا الي خايفة على مصلحته

يعني ايه مازوشي ( تنطق ايضا مازوخي) وهي مرض نفسي يجعل صاحبه يهوى تعذيب نفسه عكس السادي الذي يهوى تعذيب الأخرين

المازوخي يستمتع بإحساس العذاب , يهوى ان يشعر بلذع السياط على ظهره.

المرض جسد كثيرا في السينما المصرية لو تفتكر فيلم شفيقة ومتولي جميل راتب كان مازوخي لإنه لم يكن يستمتع بالحب ما لم تنهال عليه حبيبته بضرب السياط

المواطنين جايبين فلوسهم منين , سؤال غريب قوي من الفساد طبعا

كلنا فاسدون على رأي احمد زكي في ضد الحكومة

اكبر نجاح عملته الحكومة دي انها خلت الشعب كله فاسد. ومفيش فاسد بيثور

الي بيثور هو المضطهد وليس الفاسد. الي قبلنا عملوا 17 و18 يناير لما السادات غلى 20 سلعة فقط عشان كانوا بقايا شرفاء

ما كانوش عارفين حقيقي هيجيبوا منيني الزيادة لكن احنا بقى الله ينور

زودنا شوية سلع 40% وبالتبعية زادت كل السلع 50% وزيادة حبتين والشعب اقصى حاجة عملها انه نفخ وقال اوف هو احنا ناقصين

ببساطة لإنه عارف كويس ان هو كمان هيزود تسعيرة فساده 50% عشان يعوض هو يعني اقل من الحكومة لو شحات هيزود التسعيرة بتاعة ويشحت في المهندسين ولو شغالة هتزود مهيتها ولو حرامي هيسرق اكتر ولو موظف هيغلي سعر فتحة الدرج ولو دكتور هزود سعر الفيزيتا او يتفق مع صيدلية اغلى يروجلها الدوا وكله من ده يا ريس

كل سيسرق من مكانه بحيث ان المحصلة ان الشعب كله حاطط ايده في جيب الي جنبه

تحولنا الى حفنة من الحقراء فاقدي الذمة والكرامة لإننا ببساطة حقدة كل واحد باصص في جيب الي جنبه

لما الشعب كله مرتبة متوسطة 500 جنيه مين الي بيجيب العربيات الي في الشوارع دي ومين الي بيدفع تمن الدروس الخصوصية دي كلها ومين الي بيجيب كمية وصلات الدش دي

يا عزيزي كلنا لصوص ( حكمة قديمة قالها محمود عبد العزيز في فيلم بنفس العنوان تصلح للإستخدام حاليا)

الله يسامحك شوفت رغيت قد ايه مش بقولك بوست منيل :-))))))))))

Anonymous said...

ياااااااااااااااااه
كنت شايل دا كله جواك وساكت

الحمدلله انه خرج

بمناسبة الشقه الي 200 الف وهي في منطقه تعتبر بعده شويه

انت زعلان انها ب 200 الف جنيه تمليك

طب تقول ايه لما تروح تسأل على شقه في المهندسين تلاقي ايجارها بس في الشهر 30 الف جنيه ايجار يا مؤمن مش تمليك

هييييييييييييييييييييييه

دونياااااااااا

تحياتي
و
محبتي

محمد عبدالحي بتاع بيطري said...

وربنا .. شوف وربنا كمان مرة
أنا كنت أول مرة أسمع عنك لما قريت تدوينتك اللي في الكتاب

واتقهرت جدا أني ما شفتكش يوم الحفلة
لأن كلامك كان شبه كلام واحد حبيبي جدا .. مدون برضه .. بس هوة دلوقت مسافر

و لأن الواحد بيشوف الناس من كتابتهم
أنا متأكد أن معزتك هتكزن من معزته بالظبط

و على فكرة

أنت لو جردت دماغك من أنك مسلم و مصري و مواطن مطحون هتلاقي الأجابات واضحة جدا بدون فلسفة

سلام يا معلم

ولــــــــــو said...

تصدق افتكرت من شوية
قلت الراجل ده دخل الجيش مع اخويا واويا خلص بقاله يومين اروح اشوف ايه اللي حصله

نورت بلوجر تاني
وهاروح اقرا اللي فاتني بقى

smraa alnil said...

عذرا اسفة
بعيدا عن الموضوع


ارجو المشاركة في ما اعلنت عنه في مدونتي

تحياتي

Dr. Eyad Harfoush said...

عزيزي أ / منذر

نويت التعليق، ثم قرات تعليق الصديقة سكوت هنصوت قوجدت به تقريبا كل ما أردت قوله لكن لا بأس، اسمحلي افتي برده مجيبا على الأسئلة و لو كانت سكوت قد قطعت قول كل خطيب:

لو حسنى مبارك قال انا ماشى ، وعملنا انتخابات حرة ونزيهة، هايكسب تامر حسني غالبا، ليه؟ لأننا في زمن المسخ

نرجع تانى لو الريس ساب الحكم ومثلا كسب الاخوان .. المعارضة هاتبقى عاملة ازاي؟ لن يكون هناك معارضة، لان معارضة من يدعي أنه يحكم بكتاب الله، هي معارضة لكتاب الله ضمنا، عندها ستصبح المعارضة كفرا، و الوطنية عصبية جاهلية، و القومية نعرة، و العلم علمنة، و الفكر هرطقة

ليه المتدين بيبقى دايما متناقض .. والناس بتكشف تناقضه ده بسرعة وبتحسبه عليه قوى؟ لو متدين في حاله، و به كل متناقضات الدنيا لما لامه أحد، و لكن يلومون من يعدل على كل من يمر عليه، و يتخذ لنفسه شكلا كمسوح الرهبان، عندها يتصيد له الناس سقطاته

باقي الاسئلة قالت فيها سكوت ما كنت ساقول

تحياتي و تقديري لارقك الكريم و تفكيرك في وطن قل من يفكرون فيه

الله...الوطن...أما نشوف said...

حبيت أحط ردي على تعليقك اللي منور مدونتي هنا على مدونتك...وبعدين لاقيتك قايل كلام واعر جوي...بوست طويل عريض عايز كوباية نسكافيه وفضوة:)
وبعدين ايه مجمع المدونات اللي انت فيه دة يا ريس؟ يعني انا لما احب أخاطب "شعب مصر" أكلم مين يعني من بين كل المدونات دي؟

طب أنا حاحطلك التعليق اللي سيبتهولك عندي هنا كمان عشان أبقى جيتلك لحد عندك:)

بتنورني لما تعلق عندي

"انت أدمنت على المدونة؟؟؟تصدق ان دة أحسن خبر سمعته في العشر سنين الأخيرة!!:)) بأقوللك ايه...في اول فرصة تفضى لو سمحت تكتب البوست بتاعك اللي بترد فيه على البوست بتاعي...هي دي المشاركة التفاعلية اللي بيجولو عليها!مستنية البوست بتاعك...وعلى فكرة تدوينتين في الصفيحة- أقصد في اليوم- كتير علي أوي يا صديقي المدمن...فيه رسالة ما جيستير المفروض بتتكتب هنا! المفروض يعني!والمدونة بالفعل واخدة جزء كبير من تركيزي...دعواتك/صلواتك (أخدت بالك من الحتة بتاعت عنصري الأمة دي؟ عشان يعني دعواتك لو مسلم صلواتك لو مسيحي! مش مخلية في نفسك حاجة يعني أظن!...شرفني دايما:))"

الله...الوطن...أما نشوف said...

يا قلبي!! كل دة في قلبك وكاتم؟؟خطر عليك يا بابا:))
أسئلة مشروعة جدا...وبتدور في ذهن كتير مننا...ومش كل سؤال له جواب ابتداء من موضوع السيفون وانتهاء بموضوع لو كنت مسيحي ولا يهودي مرورا بموضوع حماس...والصورة دايما معقدة ...مش معنى كدة اننا ما ندورش على اجابة...بس على الاقل تعالى نستعد لحقيقة ان الاجابات على الاسئلة الصعبة لا هي سهلة ولا هي بتيجي بالساهل...ونخلي عندنا شجاعة البحث ثم الاعتارف بالنتائج اللي نوصلها...