حد يقولى يا ناسهو المصرى تمنه كام
أصلى سألت النخاس
راح قالى قرشين بالتمام
قمت أنا استغليته
قالى خُد اتنين ... فأنا جريته
ده واحد بالمداس يداس
والتانى تاخده كمداس
ويرضى بكونه كناس
شفته معايا ياناس
وسمعتوا كلام النخاس
عن ان المصرى أرخص الأجناس
طب تبدله يا عم بنسناس
طب عاوز كام
هو النسناس أغلى من الناس
قصدك على أنهى ناس
آآه ... ده فيه على كده ناس وناس
أصل أنا مصرى ماعنديش احساس
كنت فاكر نفسى
انى بقيت زيى زي بقيت الناس
* * *
هو فيه زي المصرى الصابر
أنا بجد ماشفتش حد
ده عبد سيده ومثابر
وتلاقى جرجس وجابر
والست منه بميت راجل
حمال قسية وشايل
وم الظلم دايق ولاقايل
يشيل كتر مين قده
ويجرى يتعب على كده
يغرقوه ما يهموش
يحرقوه ولا يختشوش
وتشوف بعينك كتير وشوش
عاملة يا اخويا زي القروش
وهما فى الآخر ولا يساوش
مش ده بجد أحسن عبد
والله ده عبد مش مغشوش
* * *
يقولك يا بنى بكره هاتفرج
ياما عدت علينا أيام
والنخاس بياع الأصنام
فاكر المصرى زيه جبان
وهو راقد زي التعبان
باصص بعين الحرمان
نسى الى لا يغفل ولا ينام
حارس المصرى الغلبان
من النخاس بياع الأصنام
طب بعد كل ده الكلام
حد عرف المصرى بكام
حد عرف المصرى بكام
32 comments:
ايه ده يا عم ده يخرب بيت عقلك كلامك رااااااااااااااااااااااااااااااائع
نغسى اكتب ربعك
بس فى الاخر المصرى برده احسن الاجناس
بس هو اللى عامل فى نفسه كده
من الخوف اللى شافه و الظلم اللى دائه من ايام ناصر و السادات و مراكز القوى بس هيجى يوم و ينفجر مش بيقولوا اتق شر الحليم اذا غضب
اهو المصرى هو الحليم ده
بس هو يتكلم و يقول لاء لاء لاء
لو ده حصل هيكون احسن الاجناس
لانهم قالوا زمان لفرعون مصر يا فرعون ايه فرعنك قال مش لاقيت حد يلمنى
لو المصرى لم الظلم و رماه البحر هيكون افضل الاجناس
العيب مش فيهم العيب فى خوفنا و جبننا
و لو عملنا زى ما رسولنا الكريم صلى الله عليه وسلم قال كلمه حق فى وجه حاكم ظالم جهاد فى سبيل الله
هنكون فعلا افضل الاجناس
المصري تمنة معدوم
والسبب الحرامي جلاب الهموم
زرع جوانا الخوف و الأسي و الرعب والسجون
خلي حيتنا بتمشي لورا و زرعنا بالسرطان و السموم
أرحل بقي منك لله كفاية مهانة وديون
أرحل بقي و غور خلتنا رخاص و مفيش زبون
أرحل و منك لله يا كافر يا حرامي يا ملعون
صديقى/منذر
المصرى غالى قوى بس حكامه رخصوه وخلوه ملوش قيمه
حاول تدخل اى فندق سياحى حتتفتش تفتيش ذاتى اما الاجنبى يدخل حتى لو كان معاه قنابل
ولما تحصل مصيبه كل اصابع الاتهام تتجه للمصريين اما الاجانب فكلهم ناس طيبين وملهومش فى الشر
وقس على هذا فى كل شئ
وابقاعده تقول ان حلم كل اجنبى ان يتعامل معاملة المواطن الا فى مصر فحلم كل مصرى هو ان يتعامل معاملة الاجنبى
شكرا على موضوعك الرائع
وبعدين بقي
انت غاوي توجعني يا عم والا ايه
هو في مصري من الاساس
ربنا يسامحك
اخى الكريم منذر
اصعب شيئ على النفس هو اذلالها وعشان كده تلاقى القران بيقول عن فرعون "فاستخف قومه فاطاعوه"
المصرى او اى انسان لا يعطى ولا يعمل بشده الا عندما تشعره بقيمته وانه انسنا وحتى ابرهن على كلامى تلاقى اعظم واكبر شركات العالم تعتم بصورة اساسية بالعنصر البشررى لانه اساس اى نهضة.
البداية من نفسنا احنا!!! لو تعاملنا مع بعضنا على اننا واحد لا فرق بين فوق وتحت سوى بالتقوى والاخلاق وان الافضل هوه اللى يقود!!!
لو اتقينا ربنا؟؟ لو كل واحد فينا عمل اللى عليه تجاه نفسه اولا وقيمها واعادها الى الطريق السليم....
البداية من نفسنا اولا يا منذر
محدش رخصنا
احنا الى رخصنا نفسنا
لاننا سلمنا بالامر الواقع
و قلنا يا عم يعملوا الى هما عايزنه اهم حاجة المم
الاكل يعنى
اكلنى و اعمل فيا الى انت عايزة
متنركرش ان معظم الشعب بقى كدة
رخصوا نفسهم و معتش لهم سعر فى اى مكان
معقوله المصرى بقى قرشين بس
انا سئله عغليه من يومين
اقلولى انه دلوقت بيتوزع مع التموين
ربك يرحمنا بقى
تحياتى و كلامك اكثر من رائع
من هانت عليه نفسه .. هان على الناس
ومن ارتضى الهوان ذاق الذل
شكرا على الكلمات الجميلة والمعبرة
طب ليه بتقلب علينا المواجع بس
هي العملية ناقصة
يعني تغيب تغيب وترجع لنا بالنخاس والمصري بكام والحاجات اللي بتنكد ع الواحد دي
مش هقدر اقولك بوست جميل لانك عارف انه تحفة
تحياتي ليك
سلام عليكم
ايوة كدة ياعم فينك من زمان
انا بقى شايفة النخاس حد عادى جداا
اللى مش عادى بقى هما العبيد اللى بيتباعوا
ذاكر كويس يا بطل
هانت
سلام
روجته جامدة ده يا مارو وفعلا ده الحل
والله فعلا اتقووا شر الحليم إذا غضب
تحياتى ليك وبشركك على كلامك الجميل
انت معلم والله يا أبو حميد
كلام جميل جدا جدا جدا، والله الواحد بيتعلم منك
وأقولك
ان شاء الله الشمس هاتشرق من جديد
ومش هايبقى فيه غيوم
والمصرى هايصحى كمان من النوم
وهايبقى جامد ولو غرقوه هايعرف يعوم
ولو جوعوه بيقول زيه زي شهر الصوم
وع العموم المصرى عنيه مليانهة ومش محروم
فعلا والله البد ده بلدنا احنا مش بلد الاجانب
دايما بينظروا للمصرى نظرة شك لكن الأجنبى يتعامل بترحاب وتتفتحله كل الأبواب
تحياتى ليك يا صديقى العزيز النورس
انت فين يا أستاذنا محمد مفيد
واحشنى والله من آخر لقاء
وبقالك كتير برده ماكتبتش حاجة
ولا اتقابلنا
يالا ظبطنا فى خروجة جديدة
تحياتى ليك
وسلامى لعبد الله
كلامك مظبوط مية بالمية يا أستاذ أيمن
وفعلا ده المقايس لافرق بين عربى واعجمى إلا بالتقوى
لكن احنا عملنا فروقكتير
ومنها حاجات تافهة
زيموبايلك وعربيتك وساكن فيه وعند دش كام كامة
وطبعا فيه فروق أكبر
أبوك سارق كام مليون
ومهرب كام
أبوك قتل كام واحد
برده ده حاجات تفرق كتير بين شخص وشخص
تحياتى ليك
أستاذة رانيا
ههههههههههههه
فعلا شاح شوية من السوق
بيسقعوه علشان يغلى شوية
وكمان فيه خبر كويس انت قلتى عليه نزل مع التموين
لا تمام
كه يبقى خير
تحياتى ليكى
أستاذ عماد أن الى بشكر حضرتك لزيارتك وكلامك الجميل
جزاكم الله خيرا
والله حبيتك يا أبو حميد
شكلك والله زي العسل ودمك خفيف جدا
عاوزين نبقى نتقابل كده على الماسنجر
ماشى هابعتلك الميل بتاعى
وشكرا على مجاملتك الرقيقة
سارة
عبيد هي بقت كده
خلاص انا حاسس ان بتوع الضرايب جايين علينا
ويقولولنا عمالين تبيعو وتشتروا واحنا خلاص مابقاش لينا لازمة
وع المزاكرة ادعيلى بأه ربنا يعميهم عن الأخطاء
فى حزب جديد تحت الانشاء اسمو حزب احه يامصر سوف يضم كل قوى الشعب المصرى العمل حد عايز ينضم الكارنيه ببلاش من مزرعه ليمان طره
أستاذ منذر
حمدالله
على عودتك سالما
بصراحة قصيدة رائعة
لو ممكن تشرفني وتضعها
في البوست عندي
الخاص
بالدرس الثاني
فهي
مناسبة جدا للوضع
وأنا في انتظار أفكارك التي تريد أن أتكلم عنها في الدرس الثالث
يا أخي الغالي
أما زلت تسأل عث ثمن المصري أو قيمته ؟؟؟
ما قيمة ما يداس بالاقدام
ما ثمن ما يلقى في سلة القمامة
ولا شــــئ
لكنه ما زال هناك أمل واحد
ان نحاول نحن ان نُعلي من قيمة ذلك الانسان المصري
وأن نزيد من ثمنه
عن طريق تعلية سقف إداكه
ومحاولة افهامه
وتكرار توعيته
وليس لنا الا سلاح واحد نمتكله
وهو لعمري سلاح قوي وشديد
انه سلاح الكلمة
تحياتي اخي الحبيب
المصرى فى بلادة غريب
بس هيرجع
صراااااااحة كتير حلو الابداع بالكلام
ولكن بالنسبة للمحتوى المصري ما بيتبدل بكل الناس
تحياتي
أم المييس
http://omelmees.blogspot.com/
أخى منذر
ايه يعم الحلاوة دى , ماشاء الله عليك , بس عندى سؤال , هو لما رخص المصرى أحنا اللى رخصنا ولا النظام اللى رخصه على العموم , كلنا مسئوليين عن هذا المصرى , وربنا مع المصرين لغاية ما تمنهم يزيد تانى
وأخيرا
انا انضم لحزب أحه , والكارنية هايكون أكيد عملى , يعنى قلم , أو شلوت , او اى حاجة تانى من فنان من فنانى "أمن الدولة"
حمادة زيدان
لا يا عم احنا مالناش تمن
احنا زى البحر ميه البحر حد بيشتريها ؟؟
ثم احنا كتار جدا يعنى لو مات 10 مليون اهه لسه فيه 70 مليون
يعنى وجودنا زى عدمه
اللى لهم تمن هم اللى معاهم
والغريب يا أخى احنا مبسوطين اوى ان مالناش تمن ؟؟
لكن كلماتك رائعه جدا احييك عليها وعلى المدونة ككل
ان شاء الله ربنا ميجيب لا لمان ولا سجن
تحياتى ليك يا عمر
ربنا يخليكى يا أستاذتنا العظيمة انتصار
ويشرفنى انى أضعه فى مدونة مقروؤة مثل مدونة معلمون احرار
جزاكى الله خيرا على كلامك الجميل
فعلا لابد أن نعلى من سقف إدراك المصرى
بالكلمة ان شاء الله بحضرتك وبالمخلصين يحدث ذلك
جزاك الله خيرا
الاأستاذ بن يسرى
تحياتى ليك وفعلا المصرى باه غريب فى بلاده
شكرا على مرورك وتمنياتى بدوام التواصل
ـــــــــــــــــــــ
الأستاذة ام الميس
شاكر جدا على إطرائك ومجاملتك
تقلى تحياتى
جزاكم الله كل خيرا يا أستاذ حمادة
وتمنياتى بدوام التواصل
السؤال ممكن يكون
ال 12000
بنت مصرية
اللي هيتصدروا للسعودية
تمنهم كام؟
لو بناتنا احن
يبقى عليه العوض ومنه العوض
بس ايه حكاية ال 12000 دول الاول
ده أخبار طازة
انت تعرف انى ماعرفش حاجة عن الموضوع ده
اوعى تكون اشتغلت مع النخاس
ربنا يقويك وابقى شوف الجديد
Post a Comment