Sunday, August 19, 2007

عادى مش لاقى عنوان ده الطبيعى بتاعى

احترت فيكى يا مصر
واحتار عقلى معاكى
لهدعى عليكى فى صلاة العصر
لهموت أنا فى غناكى
شفت الى عاش فى فيلا وقصر
وبياكل فى فراخ كنتاكى
والى اتولد ع ضفاف النهر
ويتمنى يموت ... فداكى

تبقى أنت راكب فى الاوتوبيس
وعينك على واحد راكب جيب
وأبوك يبقى اسمه عتريس
وتلاقى ولية بمايكرو جيب

عايش فى اودة فوق السطوح
والتانى فى فندق ماكسيم
هو يصيف فى مطروح
ومافيش ماية فى بلطيم

تروح تتعالج فى التامين
وهو علاجه فى باريه
وتجرى يا عينى بالسنين
من هنا لهنا ماتعرفش ليه

ولادك عدو السبعين
علشان كده الى يموت يموت
وهو عدا التمانين
ومشينا بالريموت
وسكوت يا ولاه اكتم الصوت
ضرب النار هايشتغل
والأسد هايتحول كتكوت

حتى الحلم بطلناه
والأمل وراه ضهرنا رمناه
والخير كمان سيبناه
والحب فقد معناه

هو الحلم من امتى بنملكه
بنمسكه
بننكته
ده احنا دايما بنتركه
بنعدمه
بنردموا
لكن
أبدا مش هانبطل
نحلموا

40 comments:

احمد الجيزاوى said...

اول تعليق تمام
ايه الجمال دة يا شاعر المدوين فعلا انت شاعر المدوين يا باشا
احمد الجيزاوى

عصفور المدينة said...

ممكن نحط عنوان للكلام الجميل ده

جقد طبقي

وبعدين أنا ماحبش حد ييجي يمة طبقي
طمنا عنك

بحبك يا مصر said...

أبدا مش هنبطل نحلمه علشان لو بطلنا نحلم نموت

shams said...

مش قلتلك رائعة من قبل ما اشفها
و كلماتها جميلة جدا
بس و الله يا منذر كان نفسي تدعي عليهم في الاخر

مـحـمـد مـفـيـد said...

بجد يا منذر جامده جدا
أمتياز يا فنان

مـحـمـد مـفـيـد said...

بجد يا منذر جامده جدا
أمتياز يا فنان

sokoothansawat said...

مش معقول الحقد الطبقي ده

مالك و مال الولية الي بميكروجيب..وحاقد ليه على بتاع الجيب

يا ساتر..أما تعليم حكومي صحيح

هههههههههه

أظن انت عارف رأيي

الى الأمام يا رومل

لجنة سجناء الرأي وحقوق الإنسان said...

يلا نفضحهم هى دعوة صادقة من اناس اختلفت افكارهم ... اختلفت اتجاهاتهم .... تباينت انتمائتهم.... ا

ولكن توحدت عقولهم وقلوبهم واقلامهم على "يلا نفضحهم "

انتصار عبد المنعم said...

منذر كلامك بيوجع أوي
لك مني كل تحية وامنياتي
بالتوفيق

مصطفى محمود said...

شفت الى عاش فى فيلا وقصر
وبياكل فى فراخ كنتاكى

تبقى أنت راكب فى الاوتوبيس
وعينك على واحد راكب جيب

عايش فى اودة فوق السطوح
والتانى فى فندق ماكسيم
هو يصيف فى مطروح
ومافيش ماية فى بلطيم

تروح تتعالج فى التامين
وهو علاجه فى باريه




جرى اية يا منذر انت بقيت شيوعى ولا اية !!

قصيدة جميلة والله واحسن ما فيها انك بتتكلم عن الفقرا والمحرومين فى مصر .

هو انا بس مستغرب من قصيدة الحقد الطبقى دة لانى عارف انك اسلامى .

بس فى الاخر قصيدة رائعة .

تحياتى .

عصفور اسكندرية ( المواطن المطحون ) said...

منذر
السلام عليكم
كلامك وايد كتير مؤلم
بس دا الواقع
وايه اللي صبرك علي المر ؟
اكيد اللي امر منه

bedo said...

مش عارف بس هوه كلام حلو

ينم عن إحساس حقيقي

وإوعى تبطل تحلم

دي هيه دي الحاجة اللي باقية لنا
خلينا نحلم

فأحلام اليوم حقائق الغد

وربنا يكرمك

وجزاكم الله خيرا

أحمد المصري said...

الله الله الله ايه الجمال ده..مكنتش استنى أقل من كده فعلا..راااائع خاصة الحتة الأخيرة:
حتى الحلم بطلناه
والأمل وراه ضهرنا رمناه
والخير كمان سيبناه
والحب فقد معناه0

جميل جميل جدا00

عازف الناى said...

اعلق عندك ولا امشى
العربيه واقفه على باب المدونه
فى البوست الماضى رديت على كل الناس
الا انا
هو انا مزعلك ولا حاجه ؟

عمر الشرقاوى said...

حبيبى منذر وحشتنى ياراجل موووت شعر احمدك يارب انته دائما تعلمنا الجديد ياباشا شعر ده فى الجون يعم منذر ربنا يبارك فيك

ابو مفراح said...

السلام عليكم
جميله اخى بصراحه

هاني جابر said...

شارك معنا وانضم الينا في لجنة الدفاع عن سجناء الرأي وحقوق الإنسان
شارك معنا بارسال حدث وتفاصيله لكي نفضح الظالمين ونفضح مهازلهم
انضم إلينا في يالا نفضحهم
www.dahayaa.com

ibnyosry said...

الله ينور يا واد يا لوزجىىىىىىىى
طول عمرك مبدع موهوب

ولــــــــــو said...

نحلم وماله
كل ف خياله
نصحى نلاقي
راجل يقول
كل واحد
يخليه ف حاله

A.SAMIR said...

بص.....هو طبعا ربنا خلق الناس جميعا طبقات
بس في مصر المحروسة الطبقات بتتأكل وبتتحول لسادة وعبيد
والغريب والعجيب ان السادة بيخلفوا سادة والعبيد مابيخلفوش الا عبيد
واللي عايز يتحول من عبد الى سيد الشرط الاساسي انه يكون حرامي
بوست اكتر من روعة
تحياتي

صاحب البوابــة said...

حتى الحلم بطلناه
والأمل وراه ضهرنا رمناه
والخير كمان سيبناه
والحب فقد معناه

----------

آلمتني تلك الجملة يا صديقي

آلمتني وأوجعت قلبي

تحياتي لشعرك الذي ينبض بالمآساة

Monzer said...

متأسف جدا يا أصدقائى على عدم الرد على التعليقات أو المتابعة
ادعوا لى بظهر الغيب

اخى العزيز احمد الجيزاوى، والله العظيم انت بكاش يا معلم ربنايعزك

***********

أستاذنا وعصفورنا عصفور المدينة والأستاذة سكوت هانم هانصوت
حقد طبقى
هي بقت كده يعنى
حقد طبقى ... كراهية عمياء ... غل أسود
معقد انا سيادتكم :))
هو مش القصد بس أنا بكلم عن التافوت الرهيب الى بقى بين المصريين الى متمثل فى الملابس والعطور والمدارس ها يا سكوت والمسكن والماكل والمتنزهات وأماكن الخدمة، ده حتى فيه محافظات اكملة مايقدرش تسعين فى المية من المصريين انهم يدخلوها زي شرم والغردقة سينا كلها مش لكل المصريين وطبعا الساحل
والعيب كمانان الناس الى فى مارينا والساحل بتصيف وبتبلط فى الماية وقرى الدلتا الى على النيل مش لاقة ماية، يعنى الماية تعدى عليهم ومايشربوش منها تروح للمصايف

ده غير ان فيه فعلا تفاوت كبير جدا بين الطبقات أصبح موجود، ومافيش توزيع للثروة أصلا
مثلا محاسب فى بنك نفس المؤهل ونفس المهارات بس ده شغل فى بنك مصرى والتانى شغال فى بنك اجنبىده بيلهبف كام والتانى بيلهف كام، ده لو جنبنا الى مش لاقى شغل أصلا

بس ده كل الى فى الموضوع وآدى كمان بوست فى تعليق ههههههههه

Monzer said...

الععزيزة شيماء ان شاء الله مش هانبطل ابدا
ربنا يبارك فيكى

********

صديقى العزيز شمس
ربنا يكرمك ع المجاملة ده، بس انت مادعتش عليهمليه انت، بدبسنى يا عم الحاج هههههههههه
ربنا يبارك فيك يا معلم


***********


أستاذنا محمد مفيد، والله سعيد انه عجبتك
بس ايه الأسئلة الى على الطريق ده، أسئلة تدعوا إلى التأمل والتفكر فعلا بس برده لازمن ولابد انك تجاوب انت كمان

***********

سكوت هانم هانصوت انا باه بتغاظ جدا من المتصابيات بيعملولى هسس أزلى ههههههه
وهو الى معلمنا هو اي خدعة

**********

لجنة سجناء الراي مدونة اكثر من رائعة وهادفة جدا
وربنا ينفع بيها

*************
أستاذتنا ربنا يبارك فيك ويعزك دايما يا رب

Monzer said...

صديقى العزيز مصطفى محمود

حلوة بقيت شيوعى ده، هو كلامى ده يتصنف على انه شيوعية يا خبر أبيض بس انت عارف انهم بطلوا يقفشوا فى الشيوعيين ابسط يا عم هههههههه

بجد فعلاالمحرومين والفقرا زي ما قلت ليهم مكان تانى غير المكان لى احنا عايشين فيه
نفس كلمة صلاح عبد الله فى دم الغزال ده بلد تانية غير بلدكم
احنا لينا بلد وهما ليه بلد تانية خلاص، بنتقابل فى ظروف الأمروتنفيذ الأمردهوالخدمة والضيف مش أكتر من كده

ووالإسلام على فكرة نصير ودهر لكل الفئات المهمشة فى أي مجتمع كان
لانه وازن بين العمل وتنمية لاموال والسعي وراءها وبين التكافل الاجتماعى فى الصقات والزكاة والأرحام والجيران وغيرها

والحمد لله انها عجبتك يا معلم وعلى امل اللقاء

*************

والله يا عصوفراسكندرية صبرنا لغاية ما الصبر زهق
وفيه ناس تانية لما صبرها نفد هاتولع مداين يا عبد الجبارتحياتى ليك يا معلم

********
مالك يا بيدو
حاسس فى فيه كلام واقف فى زورك قوله يا معلم
ماتخليش حاجة فى نفسك هههههههه
والحلم هو الى فاضلنا
عيب باه لو خدوه مننا او سمحنا ان حد يسلبوا

*********

ازيك يا أبو حميد
والله انت الى رائع والحمد لله انهاعجبتك

*************


أستاذنا عازف الناي
انا شرحت لحضرتك فى مدونتك الجميلة، وانافضيتلك مكان ظلة ومستنيك يا أستاذنا
ربنا يبارك فى سعادتك

*********
حبيبى الشرقواى
انت الى واحشنى فعلا يا رجل
هانتقابل قريب ان شاء الله
وقولنا شوية شعر كده ع الماشى

Monzer said...

أعزيز أبو مفراح
ربنا يبارك فيك

********

صديقى هانى جبر
مدونة جميلة فعلا
وربنا يكرم ونشارك بأي حاجة

**********

اللوزجى ابن يسرى هههههههههه
حبيب قلبى والله
خاطرة لوز ولا عادة
أي لووز قصدى يا خدعة هههههههههه
ربنا يبارك فيك ونعرف نشوفك يا معلم

**********
ولو والله كلماتك انت الى أجمل والأروع
مسحت كل كلامى الحمضان ده
فعلا حقيقة فعلا احلم براحتك بس خليك فى حالك برده
رائعة جدا والله
*************

أحمد باشا سمير
اول تعليق بعد الغيبة
أقلقتنى يا رجل
الحد لله رجوعك بالسلامة وده المهم
وسبحان الله مش عارف مين الى بياكلهادود عاوز الحرق والله
*******

أخى العزيز صاحب البوابة

فينك وفين تعليقاتك كان الموضوع الى فات كان عاوزك بصراحة
والحمد للله انك بخير

وبصراحة مابقاش فيه حاجة فى الزمن ده بتفرح مش تبألم كل بيوجع
وكله ع الله

inksarat said...

هى دى اول زيارة لى لكن عشان اكون صادق معاك ..الاحساس عالى جدا ويحمل معه معالم الصدق العفوى الرائع ونقاء المضمون
ولكن للامانة فان القصيدة غير موزونة فى مقاطع كثيرة منها
فقط تعتمد على ان يكون للجمل نهايات مقفاه .. ولكن القافية بدون الوزن تجعل القصيدة تفتقد الكثير
....
تحياتى لك يا شاعر

مواطن زهقان said...

بجد يامنذر
بجد زى ماقال احمد الجيزاوى
انت شاعر المدونين
بجد تمام
وابقى تعالىنورنى فى مدونتى بقا

مـحـمـد مـفـيـد said...

يا منذر
كلمني ضروري علشان الموبيل اتسرق والارقام كلها عليه ويلريت تبعتلي ارقام الناس في ميل علشان مش معايا ولا رقم والميل عندك مش شغال

Monzer said...

أخى العزيز inksarat

سعدت جدا بزيارتك ورايك متفق معاه تماما وكليا
فى النهاية أنا بجب أقرا الشعر وفى معانى بتيجى ببقى نفسى اعبر عنها بحجة غير المقال زجل او شعر تحت أي مسمى وكلها محاولات صراحة لغاية ما املك بعض الأدوات ، لانى بمارس ذلك دون دراسة
لكن متفق معاك تماما فى رايك ووجهة نظرك فى الصميم
سعدت جدا بهذه الزيارة وأرجوا دوام التواصل ودوام النصيحة والنقد اهادف البناء
فرحم الله امرء اهدانى إلى عيوبى
وجزاكم الله كل خير

**********

اخى الكريم مواطن زهقان
ياباش ربنا يكرمك
الجيزاوى ده بيجاملنى بس علشان أخويا
وطبعا انا زرتك مدونتك قبل كده وهازورها اكيد
ده يشرفنى جدا

تحياتى لك اخى العزيز

********

أستاذى وأخويا محمد مفيد
اتلله يعوضك عنه كل خير
وانا بعتلك ميل
معلش
مقصر معاك قوى
علشان الشغل
أرجو تقبل اعتذارى
وفداك يا سيدى

طال الليل said...

كلامك أخى منذر من النوع المسمى السهل الممتنع وأزيد أنا الممتع الموجع

لست طبعا ضد التفاوت بين الناس فى الأرزاق ولكن فهمى لقصيدتك يؤكد إنك ضدمظاهر الفساد وأفعال محدثى النعمة وأغنياء الحرب والأكل الفاسد
هذه الطفيليات البشرية التى تحمل الشر لبلدنا الصامد

واصل حلمك أخى ربما أتى اليوم على بلادنا لتنهض بمجهودات منذر ومن مثله من المبدعين فى المجالات كافة



أحلم معك من فضلك تمسك بحقك فى أن تحلم

حزيــــــــــــــــــن said...

حبيت بس اثبت حاله انى متواجد
وعديت عليك
بص يا باشا القصيده محاوله جميله بس الوزن بس لأن الوزن اهم من القافيه بكتير
اقرا لأحمد فؤاد نجم وهتعرف ازاى هو كان بيخترع اوزان
بس اوعى تبطل تكتب شعر
لأن عندك معانى عميقه

inksarat said...

اكرمك الله واعزك

لك ان تتخيل مدى سعادتى وانا اقرا ردك الجميل جدا على تعليقى
حقيقى انا كنت محرج جدا لما علقت تعليقى ده ..لدرجة انى كنت عايز ارجع وامسحة لكن انت كنت نبيل جدا وصادق مع نفسك لدرجة ازالت معها احراجى

تحياتى لروحك النقية وصدقك ..ادامه الله عليك
.........

احببتك فى الله

امام الجيل said...

انت فين يا وليدى

شاعر إخوان said...

طبعاً كالعاده ....جاي متأخر


حبيبي منذر
تحياتي على شعورك الجميل .... وبصراحه أنا "حقود زي حالاتك



...و...
ود

هيثم أبوخليل said...

جميله بجد ....تحياتي

أحمد سعيد said...

صديقى العزيز..منذر

جميله كلماتك

تنطق بالألم

اخى الحبيب..سعدت كثيراً بكلماتك

واتمنى من الله ان أقرأ لك المزيد

أخوك دائماً..أحمد سعيد

Monzer said...

اخى العزيز طال الليل
فعلا هذا ما أقصده تماما
ان المشكلة مش تفاوت الأرزقا
لطكن مافيش عدالة فى توزيع ثروة مصر
لكن خير مصر
مش لعيال مصر
ده القصد منها
الأرض موجودة ، ومافيش سكن ومانقدرش نشتريها
المياه مش بتوصل لكل الناس ده بتعدى على قرى علشان توصل لمدن، والقرى الى بتعدى عليها مش بتنول نصيبها من المياه
فى شغل، لكن من يستفيد بالشغل ده
مين بيستفيد بالقروض، ناس تاخد مليارات بدون ضمان، وناس تانية تدوخ علشان حته قرض بخمسة تلاف جنيه

مش فاضل غير الاحلام، الى ممكن نتمسك بيها نوعا ما، بس برده فى الوضع الحالى ده، للأحلام برده سقف

بسعد جدا بزيارتك اخى الحبيب

*************


الشاعر الحزين احمد مهنا
عامل ايه واحشنى جدا والله
ومستنيينك فعلا، ومستنى الى اتفقنا عليه
وكلامك مظبوط مية مية
الوزن اهم بكتير
بس انت هاتقارنى بمين بعمنا،
يا باشا ده محاوالات تبوؤ جميعا بالفشل الذريع المريع ههههههههههه
ربنا يبارك فيك
وابقى طمنى عليك

*********

أخى الكريم انكسارات
تعليقك جميل جدا وصادق وهادئ ومحترم وفيه نقد بناء، ومايزعلش المفروض أي حد، ولو حد زعل منه تبقى عنده مشكلة،
وده وظيفة التعليقات، نقاش وحوار ودى محترم ، يذهب بنا بعد ذلك نصيحة
وده كان متوافر فى تعليقك المحترم، وكمان حقيقية، ان الأوزان فعلا مش متظبطة
وفعلا كل ما هانزل حاجة هاتسنى ردك عليها ونقدك الهادف البناء
واحبك الله الذى احببتنى فيك

Monzer said...

إمامنا غمام الجيلن واحشنى جدا والله
انا زعلان انى بقالى كتير مش متابع مدونتك ولا باسأل
عارف انى شكلى وحش ، معلش ظرو عمل وخير ان شاء الله
ربنا يجمعنا عن قريب ان شاء الله

***************

المعلم الكبير شاعر اخوان
ده شرف ووسام على صدرى انك تعلق يا معلم
بس كنا عاوزين نقد يا باشا عاوزين نتعم بجد ههههههههه
ربنا يبارك فيك يا مفخخ
*********

أخى العزيز هيثم أبو خليل
ربنا يبارك فى حضرتكن وشكرا على إطرائك ومجاملتك التى سعدت بها جدا

*****

القاص والأديب
احمد سعيد

ربنا يبارك فيك وشكرا على مجاملتك


وكنت عاوزك فى موضوع مهم جدا
انت وحمادة
ربنا يعزك يا رب

maro said...

اخيرا ابدعت و طلعت اللى انا اسف انا مش دخلت عندك من زمان لانى فكرك مش بتكتب بسبب الشغل
بس ده ابداع

مصطفى محمود said...

الف الف مبروك للانجازات الهايلة دى يا منذر ننتظر المزيد من ابناء مصر .


تحياتى