Sunday, May 6, 2007

هاتوحشونى







هاتوحشونى


بس نداء العلم، والتعليم والتحصيل والمعرفة، ولازم تذاكر يابنى علشان مضحكش حد عليك، وماتبقاش أقل من حدا


واحنا كبرنا وبقينا عواجيز، ولو عشنالك النهاردة مش هانعشلك لبكر


ولا انت عاوز تفضل محلك سر


شوف .. شوف الى بياكل على ضرسه بينفع نفسه


ويابخت من بكانى ولا ضحك الناس عليا، ولا ضحكنى وبكى الناس عليا


خلاص يا أما هاعيط ... هاعيط والنبى خلاص


أصل انت مش نافع، كلية ايه الى عمرك مارحتها ده


انت ياض مش فى تجارة


آه والله


امال يا موكوس بقالك خمس سنين ليييييييييييييييييييييه


ولا تكونش وكستنا وعرتنا ودخلت هندسة من غير ما نعرف


ما انت طول ما النت وراك مش نافع ولا هاتشوف خير أبدا


تقدر تقولى انت بتعمل ايه ع النت لغاية دلوقتى، انت ريحت من الشغل علشان تذاكر وقاعدلى زنهار على النت ليل نهار
... اوعى تكون داخل على حاجة مش ولابد


لا يا ماما بدون


يالاهوىىىىى .... الحقنى تعالى يا راجل شوف ابنك


قال ايه بيدون


أبويا بأه : بيدون ايه مذكراته يعنى .... بلا خيبة


ست الحبايب: انت ماتنصرنيش أبدا يا راجل انت، بدل ما تقوله كلمتين فى جنابه


يا ماما ده مش حاجة وحشة، تعالى شوف ابنك كاتب ايه


أبويا بأه: يعنى هاتكون كاتب ايه يا منيل على عينك انت .... فاكرلى نفسك أحمد رجب


هي بقت كده.... طب مش هوريك


آبا الحاج: يبقى بتعمل حاجة غلط .... والله لأ


طب ورينى .... بص


يخرب بييييييييييتك، مين الى كاتب الكلام ده


ابنك، بس مش عارف ليه الكاف الى فى آخر كلمة ابنك رنت شوية، بس ده كان من وقع ... بلاش أحسن أتحسد


انت كمان حرامى نت


لا... انت هاترد عليا، طب أفهمك ... مافتهمنيش ... طب أقولم ... لا متقوليش


ناقل حاجات وكاتب عليها اسمك، عاوزهم يحبسوك


لا كمان مانقلتش غير الحاجات الى تودى فى داهية ده


طب انقلك أشعار رومانسية ولا عاطفية، ولا حتى انقل كلمات أغانى نانسى وهيفاء


مش لما تسرق تسرق ألغام ومفرقعات


حد يعمل كده، طبعا كده ده رنت لتانى مرة


آثرت السلامة ومشتها سرقة ونقل، أحسن ودانى مابقوش نافعين


وأمام هذه الطغوط


وخوفا من أن تتحول دراستى لتجارة لطب، بعد أن تحولت إلى هندسة


قلت لازما ولابد انى أوقف التدوين الى أكل دماغى


لكن مش ممكن أوقف قراية المدونات الى بحبها جدا والى بقت ادمان بالنسبة لى


ولذلك، هايكون البوست ده تطويل شوية علشان كان فيه حاجات عاوز أكلم عنها


رصاصة فى قلب الديمقراطية


الأخوة العلمانيين الى صدعوا دماغنا بأحلام الديمقراطية العمياء الى ممكن توصل إرهابيين لكرسى الحكم إذا جاءوا بطريقة ديمقراطية


تعرت الحقيقة عنهم للمرة العشرين وأمام الجميع


فالمرة الأولى بدعمهم أنظمة ديكتاتورية مستبدة فى سبيل تطويق الاتحاد السوفييتى، ده غير دعم طالبان وبن لادن


التحالف ودعم عراق صدام فى مواجهة الثورة الايرانية، ثم القضاء على صدام


محاصرة ومصادرة إرادة الشعب الفلسطينى فى اختيار حكومته


ديمقراطية المارينز والقوات المتعددة الجنسيات الى أثمرت عن أبو غريبب وفرق الموت والسيارات المفخخة فى الأسواق والأضرحة والمساجد والقتل على الهية وغيره


السجون السرية فى دول العالم الحر وطائرات السى آي ايه


دعم محاولات الانقلابات فى فنزويلا الديمقراطية


افراز حكام أمثال نورى المالكى، والجلبى، والجعفرى


أما الطامة الكبرى، فحكم المحكمة الدستورية التركية بعدم ترشوح جول لانتخابات الرئساة، الذى له مرجعية إسلامية لأن زوجته محجبة


قلة أدب بصراحة


مظارهات وحكم محكمة، ومصادرة حق الترشح، وانذار من المؤسسة العسكرية، بالتدخل فى حال سيطرة الاسلاميين على مؤسسة الرئاسة، بعد سيطرتهم على البرلمان والحكومة


فيصدر حكم المحكمة الدستورية كما أطلق عليها رئيس الحكومة المحترم أردوغان رصاصة فى قلب الديمقراطية


وحسبى الله ونعم الوكيل


الموضوع التالت حكاية عبد الرحيم، بائع الروبابيكا الغلبان الى كانوا هايفقعوا عينيه، لمتابعة الموضوع فى مدونات الأخت العزيزة سارة والاخت الأستاذة منال، والأخ الأستاذ أيمن مصطفى

فهم القائمين بالموضوع، ولهم طبعا كل الدعم، ده غير انهم المتابعين اليوميين له

الموضوع الأخير علشان أنا طولت جد، هما ايه الى وداهم هناك؟

بس استحملوا ... آه ما هو آخر بوست هاتشوفوه لغاية مانخلص،
لاما نستكفى بهندسة ولاما نكمل طب

كنت فى زيارة للمقابر انا والحاج، والحاج سكرتير جمعية خيرية للمقابر

فيها أهل بلدنا علشان لما حد يتوفى يدفن هناك

ففوجئت بعد ماقرأت ماتيسر من القرآن الكريم

ودخلت عليهم لقيتهم ماسكين فى خناق بعض

الى يقول عاوزين نوسع الترب والى يقول مش عارف العضم مين بيسرقه، حاجات ترعب

انا خفت وقلت مش طالبة حوارات جثث

خرجت قلت اتمشى فى المنطقة

وبصراحة ماتأخرتش كتير لانى قلقت

فيه ناس بتسرق جثث

امال لو لقوا واحد ماشى على رجليه هايعملوا في ايه

رجعت تانى وقلت أستناه فى العربية فى الضليلة

وانا راجع لقيت تلات عساكر

قل ياه مايهمكش... لف من الناحية التانية

لفيت الجهات الأربعة لقيتهم مترشقين

قلت هو انت سارق سريقة ولا ايه، خش بقلب جامد كده انت قاتل قتيل ولا ايه

طبعا أنا مابامشيش ببطاقة

هو كارنيه النادي والأبونيه وصورة كارنيه الكلية

رحت ماشى بكل شجاعة واقدام وعديت من وصتهم، زي السبع

لقيت الباشا الأمين، بينده رايح فين يا أستاذ

لحقنى عم عطا وقاله لا سيبه ده تبع الميتين الى جوه

قاله آه لا طالما كده اتفضل

انشحكت أوى وقعدت فى العربية وشغلت شريط قرآن

بس كان فيه تلات عساكر بيحرسوا المنطقة الشمالية الى أنا راكن فيها العربية

واتخذوها متكئا يتكئون عليها

قلت دول الحكومة

ياض هايبوظو الكبوت

قلت دول عساكر لو كانو ظباط

الشرير الى جوايا قالى نعم كنت هاتعمل ايه يعنى

طبعا كنت هادخلهم واخرج أنا طبعا

المهم لضمت مع عسكرى منهم

عاوز أفهم ايه الحكاية فيه جثة مهمة جوا المقابر ولا ايه

وزير هايدفن ولا حاجة، يكون بلديات مثلا، واهلوا قالو يوفروا

لا .. يكونش بيطلعوا حشيش ومخدرات،
عما عطا انا مش مستريحله
تلاقيه زارع الحوش حشيش وبانجو وراح مبلغ عنا

انا كنت عاوز أطمن على أبويا

بس قلقت قلت طالما ماحدش طلع، يبقى خير

أحصله انا من بره بره

وقلت آدى آخر الحاجات الى تودى فى داهية، قال ايه ماكنش عاجبه التدوين

قلت عيب ياااااه، وشلت الوساوس ده من دماغى

وسألت العسكرى انتوا ايه الى جايبكم هنا

بصلى ببتناحة كده وقالى ماعرفش

طب وانت يا مدحت جاي هنا ليه

قالى والله يا بيه ماطرح مابيوجفونا بنجف

قلت هو انتم كلكم كده، وافتكرت الفيلم بتاع يعقوبيان

وقلت هو الحوار بدأ كده برده وفى الآخر قلب بغم

والتالت الكوماندا المهم، ، بقوله وانت يا أبو حميد جايين هنا ليه شكلك أقدم واحد فيهم

قال آه ، قالى أصل العسكرى الدرجة الاولى الى لابس اسود هناك ده
شايفه ، قلتله آه شايفه

قالى أصله بيكدرنى، فقلت أكدرهم معايا برده

راح مدحت رازعه على قفاه.. ومسكوا فى بعض
فحلقتلهم وقلت دول مش عارفين حاجة، وقلت أستنى لما أبويا ييجى

فلما أبويا رجع

قلتله سليمة كفارة

الله يسلمك، بعد كده لما ركز فى الكلام بصلى شزرا وقالى

أنا هاعتبر نفسى ماسمعتش حاجة

وسالته مين الى جاب دول هناك

قالى أصل ده اجتماع جمعية عمومية، ولازم ناخد تصريح من القسم علشان نجتمع طالما احنا أكتر من خمسة

قلتله حتى لو اجتماع مقابر

قالى حتى لو اجتماع عقيقة
عقيقة

قلتله، هاعتبر نفسى اسمعتش حاجة
وآخيرا أودعكم بكلمات بسيطة
إهداء خاص وحار لبابا وما وعمو وطنط فى السويس وإلى خالته فى الشرقية والعائلة فى المنوفية وإلى الاحباب والأقارب والأصدقاء
حبيبى وأخويا محمد مارو
الريسة ايمى والى مش عارف مدونتها حصل فيها ايه، يايت لو حد يقولى هو حصل معاها ايه
الأستاذ المحترم والخدوم جدا الأستاذ محمد مفيد وإلى ابنه عبد الله أصغر مدون
واستاذتى الأستاذة انتصار
واختى العزيزة سارة
والى الأستاذ المحترم ابن بهية
وإلى الأستاذ المدافع عن الحق الأستاذ عمر الشرقاوى
الأستاذةالعزيزة نيفين عمر
وإلى مدونين لم يسعدنى الحظ مطالعة اعمالهم باستمرار، ولكنى بهرت بمجهودهم، وبرعة مدوانتهم
الأستاذ أحمد سمير
والأستاذ ابن ناصر
والأستاذ أيمن مصطفى
الأستاذة منال
والحالمة وبقايا انسانة
وكثيرين لم تسعفنى الذاكرة لذكرهم، لذا أرجو المعذرة
فكم أثرت كلماتكم فى، كم أثر تشجيعكم لى
كم أثرتنى مناقشاتكم، كم أثرتنى مدوناتكم، كم أثرتنى شخصياتكم
كم أثرتنى تلك اللحظات التى أطالع فيها مدوناتكم
وبالله عليكم لدعولى بالنجاح والهداية والصلاح
ولابويا وامى بالشفاء
وطبعا خير البلاد والعباد
ودمتم بألف خير
دهب الإنسان تراب
حلم الإنسان سراب
وهم الإنسان حقيقة
والصادق بأه كداب
مابقاش فيه احلام بريئة
حتى الخايبة بقت جريئة
والجنة جواها عذاب
مستنى من مين جواب
هو الكروان شبه الغراب
ولا دماغك بقت مريضة
ومش كل من كتب قصيدة
بأه شاعر وعمله عريضة
ولا لكل شيخ طريقة
بس نعرف الخطأ م الصواب
بس والله عندك حق
طالما البيه بأه بواب
والأعداء بأوا أصحاب
وخلونا فى بلدنا أغراب
يبقوا كده نفذوا المكيدة
واحنا بغبائنا بقينا صيدة
ولا أقلوك احنا مش شايفين من الضباب
ولا تكونش الشمس مش باينة من السحاب
ده حتى ضحكوا علينا وبدل ما نشم هوا
شممونا بداله هباب
ايه هما نسيوا ان احنا كلنا ولاد تسعة
واننا كلنا مصيرنا التراب
وسابوا الى قتل و الى سرق
واتهموا الشعب كله بالإرهاب
وطبعا سابلونا الفول والطعمية
وقعدوا يلغوا هما الكفتة والكباب
أصل انا جعان وحران
وبقيت زهقان وطهقان
وكمان قرفان ومش عشمان
انى البلد ده تتغير
أصل أنا حاسس من زمان
انى ممكن أتشنير
والبلد ده ما هتتغير
بس قلبى بيقولى
الشمس هاتظهر تانى وهاتبان
ســـــــــــــــــــــــــــــــــــــــــــــــلام

28 comments:

AHMED SAMIR said...

ايه ياعم انت محسسني انك بعد ماهتخلص البوست دة هتكسر الكومبيتر وخلاص كدى
دي كلها شهر وشوية بتاعة الامتحانات
شد حيلك انت بس وترجع للانترنت في الاجازة بالف سلامة ان شاء الله بعد ماتكون جبت التقدير المتين
تحياتي ليك وتمنياتي بالتوفيق

Anonymous said...

ازيك يامنذر
بص ياباشا هندسة كويسة اوى
سيبك من الطب ده خالص
وركز بجد كويس وربنا يوفقك ان شاء الله

بالنسبة للعلمانية
تركيا ليست علمانية
حاولت فقط ان تبدو علمانية تفصل الدين عن السياسة
وذلك للحاق بذيل الاتحاد الاوروبى
وفى حين يفصل الغرب الدين عن السياسة كوسيلة لحماية الدين من الشبهات الفردية والحزبية وليكون الدين مرجع اساسى للسلوك الشخصى يعود على السلوك الجماعى
قامت تركيا بفصل الدين عن السياسة بمعنى اخر هو معاداة الساسة للدين والتبرأ من كل مظهر دينى
للاسف تركيا ليست دولة دينية ولكنها ليست علمانية ايضا
لانهم اخذوا ظاهر الامر وتركوا جوهره .

شد حيلك فى المذاكرة
وادعيلى اخد قرار جرئ زيك واعمل فترة توقف
ربنا يوفقك سلااااام

Rania Lelah said...

يا سلام
نفس الى بيحصلى يا عم
اة و الله
تصويرك رائع للمحادثة اليوميه
بين الاب و الام و الابن او الابنه
بس بالنسبة ليا انا
كان ديما بيتنهى الامر
الى تشابك بالايدى و الارجل
تحياتى

Anonymous said...

منذر
ممكن نعطيك أجازة من التدوين
بس لبعد الإمتحانات
وبعدها لن نسمح لك بالتوقف
أولا والمهم النجاح ثم النجاح
وبعد كده كل شيء يتم
بس خليك فاكر لن نسمح لك
بالهرب
حتى لو رحت الجيش
تبقى زوغ يوم وروح أي سيبر وأكتب بوست
مع خالص أمنياتي بالتوفيق والنجاح
انتصار عبد المنعم

Anonymous said...

ربنا يوفقك وينجحك وتكون سنة سعيدة يارب وختامها مسك
اتمنى لك امتحانات تكون فى اللى ذاكرته بس
عارف الواحد بيستغرب هو لسه فيه ناس بتمتحن ؟؟
انت عارف انا بقالى 13 سنه عايشه من غير مذاكرة وامتحانات
ربنا معاك

Monzer said...

تقدير انت لسه ماعرفتش أخوك يا سمسم
ده كان زمان حلم كان وانقضى
صحيت من على كابوس وفرغ وفضى
ماتقلبش علينا المواجع ده الجرح لسه واجع ههههههههه
ربنا يخليك وعزك قادر يا كريم

Monzer said...

فعلا هما عملوا زي الغراب لما حب يبقى طاووس ماعرفش يبقى طاووس ولا عرف يبقى غراب
ونحن قوم أعزنا الله بالإسلام فمن ابتغ الغزة وراء ذلك ازله الله

ويارب يديمها علينا هندسة والنبى يا سارة، ومانشنفش طب أبدا
وأنا أبطل مش مهم مش هاتفرق كير
لكن انت تطبلى هايبقى فيه فراغ كبييييير قوى

Monzer said...

على فكرة يا رانيا أنا أصل دخلت على المدونة بتاعتك أنا قريت فيها موضوع وكنت تعليق ونسيت أحطك فى المفضلة، علشان كنت مستعجل وعجبنى الموضوع فعلقت على أمل انى هاحفظ الاسم وأعمل بحث وألقيها لكن للأسف مكتوبة بالعنجليزى وأنا ثقافتى هيروغلوفيه فمعرفتش أسبل الكلمة كويس
شكرا على كلامك الجميل والحمد لله ان عرفت العنون
بجد أسعدتنى زيارتك

Monzer said...

أستاذتى ومعلمتى استاذة انتصار تحياتى ليكى وشكرا على كلاغمك الرقيق ده ومش عارف بجد أقول ايه على الكلام الجميل ده
أنا مككن أوقف كتابة بس الى مش ممكن أن ماطالعش مدوناتكم، بجد ماقدرش ، أنا مش مهم المهم بجد انتم وكلامك وآرائكم وقلمكم ده أهم منى وأهم من أي جريدة كبيرة فيها صحفيية وغيره
تحياتى ليكى وأرق امنياتى بدام التوفيق

Monzer said...

الأستاذة نيفين
اللهم ماتقبل
وفعلا انت بقالك مدة طويلة كده مافيش الحاجت ده،
أنا بحس بكده مع ولاد اخويا فى الاعدادى مش متخيل ان لسه فى طابور وفسحة وحاجات من ده
يالاه هانعمل ايه
ربنا يعديه على خير الأيام ده
ويكملها بالستر
ألف شكر لسيادتك

كلبوزة لكن سمباتيك said...

انت رايح تمتحن و لا تعتقل و لا اية بالظبط
كاتب بوست 3 في واحد زي هيد اند شولدر
بس تعرف انا بقول نفس الكلام اللي مامتك بتقوله ده لاولادي
بس مش بيجيب نتيجه

يا رب تنجح يا تتح

تحياتي

Anonymous said...

استاذ منذر بجد هاتوحشنى بس انت برضو لازم تتابع معانا وفقك الله زعلت قوى على حكايه ايمان دى
حلو اوى الحوار ده يامنذر بجد فكرتنى بوالدى
اعنك الله وسدد خطاك

محمد مارو said...

حبيب قلبى و اخويه منذر
انا بجد اسف انى اتاخرت عليك فى الرد
بس زى ما انت عارف يا حبى انا كمان بقوة الطوارى ممنوع من النت الفترة دى ع شان عندى مذكره انا كمان
بس بجد حوارك رائع
و دائما للامام
و اشوفك ان شاء الله بعد فترة الامتحانات دى

صاحب البوابــة said...

اضحكتني يا رجل

كل هذا لأنك سوف تجبر على المذاكرة

تحياتي يا صديقي

ibn nasser - ابن ناصر said...

ايه يا عم احنا مستنينك علي احر من الجمر
تحياتي

Anonymous said...

اولا اسمحلي اعتذر عن عدم زياره المدونه دي جميله بحق والله
ثانيا هو البوست طويل شويه بس فيه معاني كتير جميله ربنا يعينك
ثالثا بقه انا كنت عند ابن ناصر وشوفت تعليق ليك كده مش عارف عن ايه ايمان وكده يعني ياعم متقلقش انتا فيه ايه كل شي بقه عادي

Monzer said...

Sampateek
والله أكتر من الاعتقال، هانعمل ايه بس أنا خلاص اتخنقت جاتلى حالة قرفة من الكلية، ربنا يعدينا منها على خير
على حكاية أولادك واحدة واحدة عليهم والنبى، ماتخليهمش يطلعوا زيى كده، فيه حاجة اسمها نقاش وحوار ، مش نقاش يفدى إلى خناق وزعيق وطلطشة وحدف بقذائف الشباشب وركل بالأيدى والأرجل ونكش للشعور ولطم للخدود تنتهى بدعاء يسود الدنيا فى وشنا
بجد أسعدتنى زيارتك جدا جدا جدا وسعدت بزيارة مدونتك الجميلة على ومستنى الحلقة التانية بفارغ الصبر

Monzer said...

أخى العزيز عمرو
شكرا جزيلا على كلامك الرقيق وأنا ماقدرش ماتبعش مدوناتكم أنا ممكن أبطل تدوين لكن مش ممكن أبطل قراءة مدوانتكم العظيمة الى استفدت منها جدا
تحياتى ليك

Monzer said...

أخويا وصديقى العزيز مارو تحياتى ليك
وتمنياتى ليك وليا ولكل الطلبة بداوم التوفيق والنجاح
وشد حيلك

Monzer said...

أخى العزيز صاحب البوابة
سهدت جدا بزيارتك
فعلا كل ده علشان هازاكر وكل ده علشان فيه امتحانات وكله ده علشان ممكن وبندعى وعاملين ندر عيش ولحمة لو حصلت وخدت البكالوريوس فى سنتى الى مش فايتة ده
ادعولى بالله عليكم
اظاهر ان حضرتك بقالك كتير بعيد عن الدراسة
والى ايديه فى المية مش زي الايديه فى النار
تحياتى ليك وسعدت جدا بزيارتك الجميلة هذه

Monzer said...

ابن ناصر
شكرا جزيلا على كلامك الحلو ده

واحنا الى مستنينك ومش قادرين نصبر على توقفك ده
وان شاء الله راجلعنا تانى بمواضيع وصور أقوى

Monzer said...

fares
بجد كلامك أسعدنى جدا جدا جدا وشجعنى جدا جدا جدا وسعدت جدا بزيارتك وشكر على كلامك الحلو ده
أما عن ايمان
فأنا كنت قلقان جدا لأن ماكنتش عارف أوصلها، ومش عارف ايه أخبارها ولا هي كويسة ولا لا، وكنت حاسس ان الموضوع مش ترتيب المدونة او ظهورها بمظهر جديد
واحنا فى الآخر معشر المدونين مالناش غير بعض، فلازم نسال على بعض
بالذات ان أغلبنا مش تبع تنظيمات ولا حركات ولا منظمات فكلنا دهرنا للحيط
وطالما هي كويسة وبخير يبقى مافيش حاجة
احنا كنا سانيين السكاكين والسواطير بس
تحياتى ليك وسعدت بزيارتك جدا

Anonymous said...

الاستاذ منذر وفقك الله وجعل الامتحانات سهله وميسوره اللهم امين المهم انا اقتبست شعر حضرتك ووضعتو عندى فى المدونه ارجو ان تكون موافق على نشرها عندى شكرا لك

Monzer said...

أخى العزيز عمر أسأل الله تعالى أن يتقبل منك دعائك وشكرا جزيلا لك
ولى كل الشرف ان حضرتك تنقل عنى كلمات البسيطة وتحطها فى مدونتك الرائعة
والمدونة كلها تحت أمرك تأخذ منها ما تشاء دون الرجوع لى
ولكى منى كل التحية

Anonymous said...

اخى/منذر
اجازه ممكن لكن استقاله لاااااااااااا
فى انتظارك وبالتوفيق

Unknown said...

شوف يا منذر

اهم حاجة الاولويات عشان تنجح فى حياتك....انت شايف التعليم مهم؟ يبقى لازم تكمل حتى تحصل على شهادة؟ ولكن التعليم غير التعلم...التعلم يحتاج الى قراءة فى كل شيئ من كل بستان زهرة لا يجب ان تقرأ فى مجال واحد
تبنى نفسك الاول والرزق بتاع ربنا وعلى قدر سعيك رزقك.....
ياتى بعدها بناء الاسرة والمجتمع...
بدون فرد سليم لا اسرة سليمة ولا مجتمع سليم
فكر فى كلامى
تحياتى

صاحب البوابــة said...

الاخوة الكرام لأن دورنا هو إظهار الحقيقة وتوعية الناس بها , ولأن ما علمته عن ذلك المجاهد يمثل قيمة عظمى المفترض أن نفتخر بها ونكرمها , لا أن نعتقلها ونسجنها , فإني أطلب منكم رجاءاً أن تساعدونا في بدء حملة الافراج عن شيخ المجاهدين السيد / أبو الفتوح شوشة , وتتمثل الحملة في نشر هذا البوست الجاهز يوم الجمعة الموافق 19/5/2007 , ونشر صور شيخ المجاهدين في جميع المدونات المشاركة – الصور موجودة في مدونتي- , مع توسيع نطاق الحملة لتشمل كافة المدونات التي نستطيع الوصول اليها .. وجزاكم الله خيراً ...

البوست بعنوان

أن تكون أبو الفـتوح شوشة

حملة الإفراج عن شيخ المجـاهدين :

في ظل تلك الهجمة الشرسة التي يتعرض لها كل وطني حر شريف , تتعدى تلك الهجمة هذه المرة خطوطها الحمراء , وتتمادى في غيها المنهجي , لتصطدم برمز من رموز العزة والكرامة في مصرنا الحبيبة , إنه شيخ المجاهدين الذي يربو عمره عن الثمانين , الأستاذ أبو الفتوح شوشة , ورغم ان الكثيرون من قد لا يعرفونه , ربما لأنه ليس بلاعب كرة قدم قديم أو مطرب شهير قد إعتزل ... بل إنه من القلائل الذين ما زالوا أحياء ممن سبق لهم الخروج مجاهدين وقت تقسيم فلسطين عام 48 م , ورغم أن الكل قد تناساه , في غمرة إعتقال نائبي مجلس الشعب من الإخوان المسلمين , وقد تم إعتقاله معهم وقتها بكل القسوة رغم شيخوخته وكبر سنه , إلا أنهم لم يرحموه , ولم تمنعهم كهولته , بل لفقوا له التهمة الشهيرة وهي محاولة قلب نظام الحكم !!! وكأن كهولته وكِبر سنه تسمح له بمجرد التفكير في قلب منضدة و ليس قلب نظام الحكم !!! لكننا اليوم نعلنها إننا لم ننساه , وكيف ننساه ؟؟ وقد حمل لواء الرجولة والعزة آنفاً وخرج ببدنه وماله قاصداً فلسطين ليجاهد عام 1948م اليهود الصهاينة وهو يبغي النصر أو الشهادة , , إنه اليوم له كل الحق علينا في ان ندعمه تماماً , حتى ولو لم يطلب , وحتى ولو لم يعلم , فإننا من منطلق من نمثله من صحافة شعبية , تمارس دورها في تنوير شعوب المنطقة , نعلن اليوم ما الذي يعنيه أن تكون شخصاً كشخص أبو الفتوح شوشة في مصرنا الحبيبة ...

أن تكون أبو الفتوح شوشة فهذا معناه أن تكرم وتصير رمزاً لكرامة الرجال لو كنت في بلد غير مصر ... أما لأنك في مصر ... فهذا معناه أن تصير نزيل أحد السجون وحبيس أحد المعتقلات ...

أن تكون أبو الفتوح شوشة فهذا معناه أن تخرج للجهاد في فلسطين وعمرك لم يتجاوز التاسعة عشر ...فتبلي البلاء الحسن ... ثم تعود لتنال جزائك على جهادك وبدلا من تكريمك يزج بك في السجون 15 عاماً مع الشغل والنفاذ ..

أن تكون أبو الفتوح شوشة فهذا معناه أن تعود من فلسطين راضياً عن نفسك ... راضياً عن جهادك ... راضياً عما فعلته لرفع لواء الذود عن فلسطين ... فلا يرضى عنك النظام ... لتذوق الويل والتعذيب في السجون المصرية ...

أن تكون أبو الفتوح شوشة فهذا معناه أن تخرج من السجن بعد 15 عاماً كاملةً لتمارس رسالتك في البناء والاصلاح من جديد ... بدون أن تتغير قناعاتك أو تتزعزع ثقتك في نفسك ...

أن تكون أبو الفتوح شوشة فهذا معناه أن تترشح في انتخابات مجلس الشعب لعام 1987م ... فيهب جميع أبناء دائرتك لإنتخابك ... بما فيهم أقباط دائرتك بالكامل .... فتنجح نجاحاً باهراً ... ثم يتم حل المجلس لأجل إسكاتك ...

أن تكون أبو الفتوح شوشة فهذا معناه أن تتحصن بحب الله و تحظى بحب الناس لك ...... لكنك في الوقت نفسه تجد أن النظام يُكن الكره لك ... ويعتقلك المرة تلو الأخرى ...

أن تكون أبو الفتوح شوشة فهذا معناه ألا يرحموا شبيتك وأنت قد قاربت الثمانين ... فيزجوا بك في المعتقلات غير آبهين ... ويحولوك لمحاكمة هزلية غير مستنكرين ...

أن تكون أبو الفتوح شوشة فهذا معناه أن تُحارب في رزقك وسكنك وراحتك وانت شيخ كبير ... ويضيقوا عليك كل شئ حتى يسجنوك ... في الوقت الذي تتمنى أن تنعم فيه براحتك ...

أن تكون أبو الفتوح شوشة فهذا معناه جهاد في صغرك ... تعذيب في شبابك ... بهدلة في كهولتك ...

أن تكون أبو الفتوح شوشة فهذا معناه ... اننا معك حتى النهاية ... نهاية ظلمهم أو نهايتهم ...

الروابط :
مدونة انسى تذيع نبأ اعتقال شيخ المجاهدين
http://ensaa.blogspot.com/2007/04/blog-post_9947.html

مجلّة "فلسطين المسلمة" تذيع فقرات من جهاد شيخ المجاهدين
http://www.fm-m.com/2003/aug2003/story24.htm

تقرير صحيفة المصريون عن اعتقال قدامى رجال الاخوان المسلمين
http://www.almesryoon.com/ShowDetails.asp?NewID=34088&Page=1

ملف pdf عن جهاد شيخ المجاهدين المصريين في فلسطين
http://www.fm-m.com/2003/aug2003/pdf/51.pdf

جاري تدعيم الحملة بتقرير جريدة الدستور عن شيخ المجاهدين بتاريخ 13/5/2007
جاري تدعيم الحملة بتقرير جريدة الوفد عن شيخ المجاهدين بتاريخ14/5/2007

مشروع انسان said...

يا سيدى معلش هما خايفين عليك وعايزين مصلحتك بس نعمل ايه فى الاعلام اللى نشر سياسة الخوف والذعر عند الناس وربنا يوفقك وحاول تقنعهم باهمية اللى بتعمله