Sunday, April 29, 2007

ريس مصر مسجون فى قصر


تحديـــــــــــــــــــــــــــــــــــــــــــث

أوعاك تحلم انك تكون ريس
وخصوصا ريس لمصر
لازم عقلك يميز
ان ريس مصر محبوس فى قصر
والسجان هو الحرس
والحاشية ماسكاله جرس
لو لف يمين ولا شمال
يجيله عسكرى راكب فرس
وهو مخنوق بالأغلال
وتشوفه تقول شيال
من القميص الواقى

فاكر مشنقة العراقى
وهو ده الباقى
انه يعيش جوه قفص
* * *
عمرك شفته على قهوة
طب امتى شفته فى جامع
لكن أكيد لمحته فى سهوة
وهو رايح أو راجع
مقفلين له السكة
كأنه راح يفتح عكا
وهو اطرش ومش سامع
مش لاقى راحته ولا حتى فمكة
وشرم بقت فيها مواجع
* * *
طب ياعم ماتروح سيما
ولا اضربلك أكله فى مسمط
ولا ده كمان مش قيمة
وآل ايه كل متخطط
طب ماتنزل شبرا الخيمة
وقولى على طعمية ام نعيمة
ودوس فى طبق كشرى متظبط
وحلى وراه ببسيمة
* * *
آخر مرة اتمشى ع الكورنيش
أكيد كان من زمان
طب امتى راح الحسين
من غير لا غفر ولا تقفيل ميدان
لو راحها ... الدنيا هاتتقلب
والى هايقعد هايضرب
خليه يروح لبنان
ويشوف الوزرا ويا الغلمان
من غير لا حرس ولا تقفيل ميدان

* * *
لكن لو فيه محبة
ونزلت بيها الحسين
هاتلاقى الناس ع الصفين
فارشة الأرض ليك مربى
والى يقولك خد حجرين
والى يعزم بكوبايتين
ومش هاتفرق بين جرجس وحسين
وكل الناس ليك حرس شخصيين
ومش هتلاقى امان غير وسط المصريين



أنا جالى المعنى بتاع العصيدة ده أو الخاطرة ه، فى يوم كان عسل قوى قضيته صح،

كنت أنا واصحابى، ع الصبح فيه ناس ضربت طعمية من عند ام سماح ، وفيه ناس ضربة كبدة وسجق من عند تلوث القذر

وفيه ناس ضربت ساندويشتات ديناميت من عند جاد (بيض وفول وطعمية وبطاطس ومسقعة)

وبعد ما قعدنا شوية فى الكلية، جه معاد الغداء وقعدنا نفكر نروح فين ونيجى منين، طبعا ماكانش فيه أحلى من بيبيتو الى فى باب الشعرية، ضربنا طاواجن لحة بالبصل وبطاطس فرن وروز وسلطة ، وبعديها كان لازم نحلى ، فرحنا على القبيصى الى فى غمرة ضربنا مانجه لوز لوزجى مالاوز

وبعدين رحنا على شقة واحد صاحبنا فاضية مهجورة نمنا وارتحنا شوية، ونزلنا على بليل، وطبعا مافيش أحلى م الكورنيش

وطبعا الكورنيش اشتكى م البرم واللف، وركبنا الأتوبيس النهرى بس المميز آه مش أي حاجة أبو خمسة جنيه

وطبعا طالما كنا فى وسط البلد يبقى لازم زيارة لأبو طارق، والدقة شعشعة معانة أوى

طب نحلى فين كان لازم زيارة للعائلات الى فى سفير طبق فواكه حمصانى بالأيس كريم، وناس ضربة بوريو، وفيه ناس أخدت من عند أبو حمامة حاجة خفيفة كده، مولوتوف رز بلبن عليه بسبوسة وكنافة ـ والله جعت ـ وعليه قشطة ومكسرات

جاتلى الخنقة لما واحد رزل وقال أنا عاوز آكل أيس كريم من عند قويدر وطبعا كنا لازم نعدى على القصر، وبعد نظرة طويلة وعميقة للقصر

بجد حسيت أنا مميز جدا وسعيد جدا وفرحان جدا جدا جدا انى مش ريس ولا أبويا ريس

أخيرا بطلب منه انه ينزل للناس الحقيقيين للجامعات ، للمستشفيات، للمصالح الحكومية لأقسام الشرطة،

ينزل الميادين والشوارع والقهاوى والقرى والنجوع ويتمشى بعربية 28 علشان مايلفتش النظر ليه ويوشف أحوال البنءادمين الى بيحكمهم

علشان هو مابيشوفش غير سواقه الغلبان ولا الطباخ، وده طبعا بالنسبة لينا صاحب نفوذ واسع جدا، سواق الريس يا جدعان

الخلاصة عاوزه يبص على الناس بعينين مواطن مش بعينين التقارير



الطلب ده مش ليا انا ده ليه هو

31 comments:

intissar abdulmonaem said...

أستاذ منذر
والله كلام جميل
وطبعا الحمد لله أني لست برئيس حتى أعرف أروح الحسين وأمشي ع الكورنيش
تحياتي
معلمون أحرار

راعى الياسمين said...

اخى العزيز منذر
سعدت جدا بزيارتك لمدونتى
واسعدنى اكتر زيارتى لمدونتك
كلمات حقيقية
من الواقع دمت لنا
ودام قلمك
تحياتى وتمنياتى بدوام التواصل
راعى الياسمين

hapasa said...

ربنا يخليكى يا أستاذة انتصار، وبجد حضرتك مش عارفة كلامك بيفرق معايا ازاي بيشجعنى بجد
وربنا يديمها علينا نعمة المواطنة بس تكمل

hapasa said...

أخويا راعى الياسمين
ألف شكر على تعليقك الجميل والمشجع
ولكى منى كل التحية وتمنياتى بدوام التواصل

maro said...

اخويه و حبيب قلبى منذر
بعد اللى انا قراته ده انا معنديش غير انى اقول لك ربنا يحرسك ع الكلام الحلو ده بجد حلو جدا و خاصة من ناحيه الوزن و القافيه
ثانيا حبيبى قلبى منذر شهوة السلطه هى اللى بتغلب على الحكام على شان كده مش بيسيبوا الحكم
الحكم له شهوه طاغيه يهون ادامها اى طبق كشرى
ثالثا عندى سؤال
الفسحه اللى انت عملتها انت وصحابك دى كلفتك كام ؟
ع شان انا مش رئيس و مش بتمتع بشهوه السلطه
بس عاوز اتمتع بكشرى ام نعيمه
و شكرا اخى العزيز

مـحـمـد مـفـيـد said...

مش مهم القصر
اصعب من سجن القصر سجن النفس وعذاب الضمير
في انتظار ايميلاك

hapasa said...

حبيب قلبى مارو، شكرك على كلامك الرقيق ده
فعلا ييجى ايه طبق الكشرى قدام شهوة الحكم، بس الى أنا متأكد منه انه مابيعرفش يستعم أي شيئ كان
وع التكلفة، كلها حاجات بسيطة فول وطعمية وكشرى، وفخفخينا، تعالى معايا انت بس واحنا هانعمل احلى أشغل

hapasa said...

فعلا عندك حق مسيت وتر حساس جدا
بس لو هو دخل سجن النفس أو عذاب الضمير، وده الى نفسه يدخله وده بجد الى بكتب علشانه ، ونفسى يدخل السجن ده
لان لو دخله هايرجع لينا قبل انه ريس مواطن له شعور ووجدان
المعنى بتاع سيادتك رائع جدا
وأنا آسف مافهمتش آخر جملة
وتمنياتى بدوام التواصل ولك منى كل تحية

ibn nasser - ابن ناصر said...

ههههههههه
انت عارف خديجه وجمال اما بيعوزوا يتعشوا بيروحوا بالهيلكوبتر علي الفندق !!؟
تحياتي علي المقال والشعر الرائع

hapasa said...

هههههههههههههه
جامدة قوى حكاية الهليكوبتر ده، تصدق بايه أنا كنت باحسب انه بيروحوا بمدرعة، وبتمهيد نيرانى الأول، وغطاء من الاف ستاشر
بجد تحياتى ليك وتسلم على الزيارة الجميلة ده وياريت ماتنقطعش

مـحـمـد مـفـيـد said...

ايميلي علي البلوج عندي لو عايزمني اي حاجه انا تحت امرك

hapasa said...

ياااااااااه ربنا يخليك يا أستاذ محمد، ومش عهارف أقول لحضرتك ايه على زوقك والله، ومعلش مصطلحات الانترنت أنا لسه جديد فيها
تحياتى لييك وأتمنى ليك قضاء يوم طيب
ejymejy@yahoo.com

Anonymous said...

عزيزى منذر طالما الريس بتاعنا مسجون هو حد سجنو ما سيبو ياعم من السجن اللى هو فيه كفايه صعبان علينا من 26 سنه ساجن الشعب كله قرفنا الحمار فى الزريبه طلع وتف

عمر الشرقاوى said...

عزيزى منذر البلد كلها تحت ايديه سجن ايه الى انت جاى تقول عليه عزبه ابوه واللى مش عاجبو يغور مصر هى المحبوسه حبسها بالقوانيين سيئه السمعه وخيره شباب البلد فى المعتقلات دور على العملاق خالد عوده دور على العقليه التجاريه الجباره خيرت الشاطر دور على العالم الكبير محمود غزلان خلف القضبان الا لعنه الله على الظالميين

عمر الشرقاوى said...

عزيزى منذر البلد كلها تحت ايديه سجن ايه الى انت جاى تقول عليه عزبه ابوه واللى مش عاجبو يغور مصر هى المحبوسه حبسها بالقوانيين سيئه السمعه وخيره شباب البلد فى المعتقلات دور على العملاق خالد عوده دور على العقليه التجاريه الجباره خيرت الشاطر دور على العالم الكبير محمود غزلان خلف القضبان الا لعنه الله على الظالميين

hapasa said...

تحية ليا يا اخويا يا لهو يا خفى، وطبعا عندك حق
بس ايه المثل الجامد ده مثل محترم من نوعية مايقف ع الموارد غير شر البقر
ياريت ماتقطعش الزيارة، ومستنيك مرة تانية

hapasa said...

ااخى العزيز عمر،
أؤكدلك لو آتاه الله مفاتيح ملك قارون، وهو على حاله هذه لن يتيغر حاله فهو مسجون ومحبوس
اما ع الأسماء الى سيادتك قلت عليها، فهم أحرار وليس بمسجونين، بل هو المسجون
المسجون بخوف الناس منه وبخوفه منهم، مسجون بنفاق الحاشية الظالمة، مسجون بالنفاق والرياء، مسجون بتبعيته لأرميكا واسرائيل،
اما هم أحرار بيك يا عزيز الشرقاوى احرار لكل من يحبهم ويحترمهم ويدافع عنهم، ويحمل هم قضيتهم
هو ساجن مصر فى سجن كبير لكن هو مسجون جو نفسه، مهما وسع بيه المكان فسيظل مسجون، اما أنا وانت، فأحرار علشان لم نظلم احدا
ولكن هو الظلم سجنه جو نفسه
شكر جدا على زيارتك، وأتمنى عليك انها ماتنقطعش، وموضوعان القديم ياريت تكون فهمت فيه وجهة نظرى، أو على الأقل فهمتها على حقيقتها حتى لو بدون اقتناع
تحياتى ليك وأصدق امنياتى وتمنياتى بدوام التواصل

david santos said...

Thanks for you work and have a good week

عمر الشرقاوى said...

اخى منذر بالطبع قرات رسايللك اللى انت بعتها بس قراتها متاخرا لانها على الاميل التانى ما بخشش عليه كتير وفى حقيقه الامر انا ضد تللك البذاءات ولكن انا وانت وهو فى مركب واحده
نتعاون فيما اتفقنا عليه ويعذر بعضنا بعضا فيما اختلافنا فيه
والقاعده الذهبيه التى وضعها الامام حسن البنا يقول سنحارب الناس بالحب

A.SAMIR said...

يعني القصيدة دي طلعت بعد فطار من ام سماح وغدا في باب الشعرية وعشا عند ابو طارق وكمان ايس كريم في قويدر
دة انت علشان تعمل دماغ بتحتاج تعميرة جامدة جدا
تحياتي ليك
مدونة روعة وبوست جميل

SARA said...

الاخوة الكرام
ندعوكم للتضامن مع محمد عبد الرحيم
اختنا منال صاحبة مدونة هموم مواطن عرضت مقال تحيى فيه محمد عبد الرحيم بائع الروبابيكيا الذى قال لا لامناء الشرطة الذين ارادوا ابتزازه ودفع اتاوة ولما رفض قاموا بضربه وتعذيبه بكلاب الشرطة وضابط القسم

وقد تقدم ببلاغ الى حقوق الانسان وهدده الضابط باضطهاد اسرته وكادوا يفقأوا عينيه

يوم الاحد القادم وقفة تضامنية بموضوع واحد تحية لمحمد عبد الرحيم
وتقبلوا فائق الشكر والتقدير

http://on.maktoobblog.com/
لينك مدونة الاستاذة منال

intissar abdulmonaem said...

أستاذ منذر
فينك؟
لا نسمع ولا نقرأ لك شيء
لعل المانع يكون بخير
معلمون أحرار

hapasa said...

أستاذ سانتوس شكركا جزيلا على زيارتك لى

hapasa said...

أخى العزيز عمر، أشكرك على تفهمك، فلتكون هذه كلمة سواء
ولكن كل ما أخشاه الخداع والنفاق،
فمن كان كل سلطته هو عمل بلوك لشخص ماء لرأيه، فماذا قد يفعل هذا الشخص لو أصبح رأيس تحير أو أصبح فى منصب مسؤول ماذا سيفعل بمعارضيه، لان الحكومة الآن عالملة بلوك علينا كلنا، فأنا لا أستبعد من فعل بلوك هو فى موقع صغير أن يفعل ما هو أكبر فى موقع أكبر
العموم حصل خير ويسعدنى جدا ان نصبح أصدقاء،

hapasa said...

أخى عمر أحب أن أشكرك شكر واسع لاختيارك هذه المدونة لتكون من من تطالعهم وشكرا على كلماتك الرقية جدا، فكلمات لا تستطيع أن توافيك شكرك

hapasa said...

أختى العزيزة سارة كلنا محمد عبد الرحيم، وكلنا عماد الكبير فى وجه مصطفى شحاته واسلام نبيه وغيرهم
شكرا جزيلا لكى

hapasa said...

الأستاذ أحمد سمير بجد شرفتنى بزيارتك وسعدت بها جدا
خلى بالك ان جيت كلمت فى البيت كمان ههههههه
أرق تحياتى

hapasa said...

شكرا جزيلا على سؤالك يا أستاذة انتصار ولكن ظروف الدراسة، وبعض هموم العمل الأخرى، وكنت مريض نوعا ما
ألف ألف ألف شكر على سؤالك،

amoooos said...

عزيزى منذر

المشكلة مشتركة بيينا وبين الريس...هو لا ينظر الى الشعب الا من خلال تقاريره ونحن لا نريد ان نتحرك لنلفت نظره.؟...
اى انسان يجى مكانه حتى ولو كان رجل صديق وشيخ وبدون ان نحاسبه...الشيطان وبطانة السوء بيتنفخ فيه عشان تحوله الى اله حت تستفيد من وراه

يبقى كلنا لنا حقوقو وعلينا واجبات لاوم نتعاون نعملها

تحياتى

hapasa said...

عندك كل الحق يا أستاذ أيمن
تحياتى ليك ولفكرك المستنير وشخصيتك الواضح منها أنها شجاعة ومقدامه

Anonymous said...

A片,A片,成人網站,成人影片,色情,情色網,情色,AV,AV女優,成人影城,成人,色情A片,日本AV,免費成人影片,成人影片,SEX,免費A片,A片下載,免費A片下載,做愛,情色A片,色情影片,H漫,A漫,18成人

a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍

情趣用品,情趣用品,情趣,情趣

情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品
情趣用品,情趣用品,情趣用品,情趣用品.情趣,情趣,情趣,情趣
視訊聊天室

情色,AV女優,UT聊天室,聊天室,A片,視訊聊天室


UT聊天室,視訊聊天室,辣妹視訊,視訊辣妹,情色視訊,視訊,080視訊聊天室,視訊交友90739,美女視訊,視訊美女,免費視訊聊天室,免費視訊聊天,免費視訊,視訊聊天室,視訊聊天,視訊交友網,視訊交友,情人視訊網,成人視訊,哈啦聊天室,UT聊天室,豆豆聊天室,
聊天室,聊天,色情聊天室,色情,尋夢園聊天室,聊天室尋夢園,080聊天室,080苗栗人聊天室,柔情聊天網,小高聊天室,上班族聊天室,080中部人聊天室,中部人聊天室,成人聊天室,成人