Monday, July 16, 2007

تعرية المحاكمات

طبعا دول المدونين الى حضروا من اليمين إلى الشمال ياسر سليم وأحمد دومة شاعر إخوان وعلاء ومؤمن وهانى جبر وزي الشمس والبلد بلدنا وطبعا الى قاعد ده ميت والى والى بيصور منذر والى واقف جنب شاويش ويالالالى هههههه
الاوتوبيسات الى راح فيها الاهالى والمحامين لقاعة المحكمة




بصراحة ظباط الجيش محترمين وكانوا بيعاملونا كويس ده شهادة
طبعا ده عربيات امن مركزى جوه الهايكستب ومش عارف ايه الى مدخلها جوه الثكنة العسكرية
دبابة مش بس هيكل طبعا
جانب من دعاء الاخوان بعد صلاة الظهر


سيارة الوزير السابق كلاركالسيد رامزى كلارك وزير العدل الأمريكى الأسبق

بسم الله ما شاء الله كان دافع عن صدام وصدام جاله إعدام وربنا يستر
السيد رامزى جاء متضامنا مع المحالين إلى المحاكمات العسكرية
السيدة ريدلى



الأستاذ عبد العال عبد المقصورد محامى الجماعة

الأستاذ منتصر الزيات
شاويش مع عضو مجلس شعب
أحد المحامين وسألت قالولى انه كان مرشح نفسه ضد آمال عثمان وطبعا حصل الى حصل وخدوا بالكم من كلمة قالولى ده

تصحيح من الأخوة جازاهم اله خيرا : زوجة الدكتور حسن مالك

جانب من الافتات التى كانت موجودة ومعبرة جدا
طبعا كالعادة ماعرفتش أرتب الصور، وكنت عاوز أستعين بابن ناصر وان شاء الله ظيبطنا ونتعبه فى الموضوع ده بعد شوية كده أنا قلت أنزله مؤقتا ونبقى نظبط على مهلنا
وده الفيديوهات
وياخوفى لاحد يتفرج ع الصور ومايقراش الى انا كاتبه :)))))

بصو باه انا بقالى حوالى أسبوع مانزلتش حاجة جديدة فالبوست ده جاي بعد غيبة هاتقراه يعنى هاتقراه :))

طيب معتز خرج امبارح يعنى بتاريخ 15/7 الموافق يوم الاحد
و
الجيزاوى خرج 16/7 الموافق يوم الاثنين
وماكنتش عاوز أكتب حاجة غير لما يخرجوا بالسلامة

واديهم خرجوا ، وماليش حجة، ظروف اعتقال المدونين الى أنا أعرفهم هاكلم عليها فى بوست منفصل ان شاء الله ، علشان أنا اتخنقت بصراحة

أول واحد اتصلت بيه أعرفه خبر اعتقال معتز هو الجيزاوى علشان عارف انه جاي ومش لوحده
احمد أصلا لوحده تهمة مابالكم لو مشى مع الاخوان :))، وقلتله لو معاك مجموعة من النشطاء أو المدونين أو الاخوان وجايين مع بعض أحسنلك اتحرك لوحدك ماتمشيش فى مجموعات وخصوصا لو كان بينهم اخوان
بعد كده طبعا اتصلت بعلاء وقلتله الخبر وحذرته، وكمان هو بدوره يحذر بقيت الناس ، لان فى الأول حسيت انها ممكن تكون ضربة لكل الناس الى قالت انهم جايين يوم المحاكمة

مافيش بعديها بنص ساعة الجيزاوى بعت رسالة نصية للكل وقال فيها انه اتقبض عليه وبيحذرنا بدوره، قلت أوباااااااااااااه، بس أنا كنت عند اخويا لان المسافة من عنده أقرب، بس كنت من غير كدب كنت خايف بصراحة، وقلقت اكتر على المجموعة بتاعة علاء لكن هو طمنى وقالى انه وصل والحمد لله
كنت انا نزلت سايبر فى السريع كده ونشرت الخبر على البلوج وكمان فى رسائل أوف لاين ميسيج وعلى كام مجموعة بريدية وتوكلت على الله، ورحت نازل على الهايكستب

بس طبعا الهايكستب ده كبير جدا والمكان الى فيه المحاكمة اسمها بوابة أيوب أبعد من المكان الى بيستقبل المواطنين يخلصوا فيه ورق سواء كان تجنيد اوا جواز سفر أو غيره

المهم الحمد لله اتقابلت مع الناس الى كانت حاضرة، وبعديها سكوت هانصوت جت، كانت هي عرفت اخبار معتز واحمد ، هي اتصلت بـ أ/ احمد سيف الإسلام بتاع مركز هشام مبارك وأنا اتصلت بـ أ/ أحمد حلمى المحامى فى لجنة الحريات فى نقابة المحامين نبلغه بالخبر
وكانت
سكوت عدة البوابة والظابط رفض انها ترجع بدهرها الحته ده، وقالها لازم تعمل تلف وترجع تانى وطبعا اول لفة بعد اكوابارك كده ، طبعا ده كانت غلاسة م الظابط لأنهالافة كبيرة وهي ماكنتش هاترجع بدهرها كتير ، وهو م الآخر مالوش دعوة، لاننا فى ثكنة عسكرية من المفروض هو مالوش علاقة بأي حاجة ، المهم

ندخل على اجواء المحاكمة نفسها

اولا : على بوابة الهايكستب كام دبابة كده طبعا هيكل تماثيل لكن على بوابة الدخول موجود ظباط شرطة وده حاجة غريبة ، فين الشرطة العسكرية المفروض اننا جوه ثكنة عسكرية ، والى بيتحاكموا دول بيتحكاموا محاكمة عسكرية فايه دخل الشرطة
تدخل جوه تانى تلاقى كام عربية مصفحة على كام عربية أمن مركزى راكنة كده على جنب، وموجود برده فى حته ضلة كده كام ظابط شرطة

تدخل الكافيتريا كان فيه حوالى ثلاثة ظباط شرطة اتنين امن مركزى وواحد لابس أبيض ، دول فضلوا قاعدين من اول ماجيت وولغاية ما مشيت كانوا موجودين

ثانيا: بعض المحامين الذين يمتلكون توكيلات من موكيلهم لم يدخلوا
ثالثا : بعض أهالى المعتقلين لم يدخلوا لزويهم

رابعا: الإعلام منع من التغطية متمثل فى صحافة وفضئيات ومدونين طبعا ، المدوينن الشباب بس البنات الاخوات دخلوا و
سكوت كانت معاهم وهي مش اخوان

خامسا: رامزى كلارك وزير العدل الامريكى الأسبق منع هو الآخر من الدخول ومنعت أيضا ريدلى ايفون، وممثل منظمة العفو الدولية من الدخول إلى قاعة المحكامة او من منحهم تصريحات دخول
سادسا: الأستاذ منتصر الزيات وبعض الشخيصات الأخرى منعوا من الدخول بالرغم من أنهم يمتلكون تصريحات دخول، ورفض المسئولون فى الهايكستب مساعدتهم أو الانصات ليهم

من داخل المحاكمة وده يرجع
لسكوت لأنها الوحيدة الى عرفت تدخل المحاكمة، هو الى حصل ايه لم العملية هديت شوية وحسنا اننا ممكن ندخل فى الخباسة كده جمعان بطايقنا وبطايق ناس كتير تانية، راح علاء حاطط بطاقة سكوت على الوش كده علشان ماتزعلش يا علاء :)،
فى الأول خالص دخلوا الحريم كلهم قاعة المحاكمة كل البنات سواء كانوا اهالى أوو محامين اما المدونين البنات استخبوا مع الاهالى علشان كلهم اخوات،
فهو لما شاف بطاقة مها راح مديها تصريح دخول وكان فيه كام سيدة تانية دخلوا مع بعض على كام محامى كده ملوا الاتوبيس يعنى وراحوا مرجعين البطايق
فهي الوحيدة الى عرفت تدخل داخل المحاكمة وهي الى شافت كل حاجة، وهي الوحدية الى مش اخوان وعرفت تدخل والله أعلم

الاخبار الى وصلت لنا من جوه المحاكمة
الأخبار كالاتى:
أولا حرز د. خالد عودة وجدوا به 108 طلقة وده جديدة نوفى
ثانيا
سكوت قايلة ان اغلب الأحراز أذكار وكتب دينية وحصن المسلم وحاجات كده، تهريج يعنى وادخل عنده اونت تعرف أكتر
طبعا التأجيل كان متوقع
كانو حوالى 39 متهم ولغاية ما مشينا كانوا فضوا احرزا تلات معتقلين فقط يعنى على العقد القادم ان شاء الله تنتهى القضية

بعض بطايق الناس ضاعت وواحد م الاهالى قالهم على ان بطاقة حفصة بنت خيرت الشاطر ضايعة وبطايق كتير تانية لقوا وجزء وجزء آخر كان مفقود

احنا بعد ما المحاكمة بدأت وخلاص كده الجو هدى فضلنا قاعدين اكلمنا شوية عن مفاجاة علاء المدون خانة وهاكلم عليها ان شاء الله قريب

بعد كده دخلنا فى مناقشات حامية عن الإخوان وتربيتهم وسلوكهم طبعا مجموعة الاخوان كانت متواجدة بقوة وكناو لكهم على احمد عبد الفتاح يالالالى وفيه بعض المستقلين الى كانو شوية يعارضوا ده وشوية يعارضوا ده زي شاويش وميت ومحسوبكم

حاجة اخيرة بخصوص المحاكمة ظباط الجيش كانوا محترمين جدا وهاديين جدا وبيحاولوا يمتصوا غضب الناس ومش متعجرفين على الإطلاق ومتواضعين جدا وكانوا بيلموا علينا، وحسيت كده انهم مخنوقن انهم اتحطوا طرف أو خصم امام الشعب ده شهادة لابد منها بصراحة
طبعا كل مدون كان موجود ، يستحق بوست بحاله
لكن انا هاكلم على مجموعة الاخوان اجمالا الى جت من سفر الى من الاسكندرية مؤمن وهانى جبر والى من ددمنهور علاء، والى من المنصورة زي الشمس والى من المنوفية ياسر سليم، وأقرب واحد للهايكستب ساكن فى الجيزة زي كش ملك وبن توفيق

ثانيا سكوت بنت جاية لوحديها فى ثكنة عسكرية وعارفة ان فيه ناس اتقبض عليها وكملت مشوراها، الطريق موحش والسواقة صعبة جدا على الطريق ده لأنه سريع وسفر ، وأول مرة تمشى على الطريق ده، وكمان المكانى الى فاكر ان المحاكمة هاتكون فيه طلع غلط، فبقيت أوصفلها غميضى، وواخدة أجازة م الشغل، ومش قايلة لحد فى البيت، وطبعا أي حاجة ممكن تحصل هناك، لو حد عمل مشكلة احنا جوه ثكنة عسكرية ، فم الآخر بنت بميت راجل، وده مش ذكورية ولا حاجة علشان فيه ناس بتروش المهم زي الفيلم أجدع الجدعان

ثالثا أحمد عبد التفاح يالالى وميت وشاويش ايه شعلة لنشاط ده تحس فعلا انك قدام صحفى ممكن ينزل تحت عربية يرمى نفسه جوه النار ينط من تانى دور علطول بيبعت الاخبار والصور ورسايل وشغل عالى بجد التلاتة دول كنت بجد مبهور بيهم جدا، لما رحت البيت لقيت أحمد عبد الفتاح كاتب كل حاجة لايف على اخوان اون لاين، أجدع من أي صحفى ولا مراسل قناة فضائية والله

ثالثا فيه جنود حقيقيين ماحضروش المحاكمة لكن وجودهم فى مكانهم كان اهم من الى حضر، وهم أعضاء أبناء مصر ... احنا ماكناش مرتبين ان الوضع يبقى زي الى حصل ان مثلا تامر يكلمنى أنقله الاخبار وتامر يبعتلها لابن ناصر وناصر ينزلها فى بوست، ان شاء الله نعمم حاجة زي كده بس تبقى محترفة اكتر من كده، الخلاصة كان تامر حنتكلم يكلمنى على الموبايل ـ صرف كتير جدا على الموبايل ـ يسأل على سكوت وعلى كل الناس ويطمن عليهم بعد كده أنقله الأخبار يروح ينقلها لابن ناصر وناصر ينشرها، بجد كانت حركة جميلة جدا، ودورهم مايقلش أهمية عن الى كان موجود ، وامام الجيل كمان كان بينقل عنهم وده كان شيئ جميل جدا يعنى كان فيه تكاتف جميل بين الى راح والى ماراحش الى الاتنين كملوا بعض بجد، طبعا مجهود ابن ناصر مافيش حد ينكره لأنه كده خلى الموضوع طازة بطازة، وكان بحرفية كبيرة جدا لا وكمان أمنة قليلة فى الزمن ده، فهو وتامر وامام الجيل جنود حقيقيين فى الويم ده بنقلهم أخبار الى اعتقلوه والى أفجروا عنه واحداث المحاكمة هو ده الشغل بجد ادعولهم باه

فارس كلمنى مكالمة حسيت فيها انه أخويا الى خايف عليا بيقولى يا منذر خلى بالك من نفسك وبياكد عليها وبيتكى عليهم بكل قوته، بجد مكالمته عمرى ما هنساها أبدا

اما مريم تخاريف من المعادى فدى تقرييا جالها انهيار عصبى من قلقها على سكوت وقلقها على معتز والجيزاوى ، وكانت قلقانة عليهم جدا ربنا ركمها ان شاء الله على روحها الطيبة ده

أما الشخص الى كان مفاجأة انه يتصل فعبقرينو لانه قاعد فى الكويت وبيتصل دولى علشان يطمئن على سكوت ويطمئن على الناس الى موجودة تخيلوا ماتصلش لا مرة ولا اتنين اتصل كتير قوى، طبعا شوفو التكلفة قد ايه، أصل انا موضوع الاتصالات ده بيأثر فيا أوى علشان انا بصراحة علطول رصيدى على الأبيض

أنا بصراحة حبيت الحركة ده جدا، وحبيت كل اعضاءها لأان كل أعضاءها بجد رجولة وجدعان واخوا
كده خلصنا التغطية آسف التعرية ده

طبعا ده تغطيات الناس الى كانت موجودة



وطبعا انسى

طبعا كان فيه ناس كتير عمالة بتصور وحاجت كده بس مش عارف لسه مانزلتش حاجة أول ماتنزل هانسرق منها اللينكات بلطجة ماشى

42 comments:

Anonymous said...

الله عليك يامنذر كان نفسى والله اكون موجود بس لاسف لقمه العيش صعبه كان وراى شغل كتير معرفتش ازوغ المهم يابطل انته ممتاز وتغطيه ممتازه وربنا ما يحرمنا منك يارب

ابن رشد said...

الله عليك يا منذر
فعلا نقلك للاحداث بالصور رائع

Anonymous said...

بص بقى يا أخ منذر أنا أتفرجت على الصور بس وقرأت شوية كلام أصله بجد طويل أوى والخط صغير جدا وأنا عنيه مقفلة ومش شايفة قدامى وعاوزة أنام، وكمان أنا كنت هناك أصلا وشفت كل اللى حصل ومشيت فى الآخر خالص ، بس وعد منى برده علشان ما تزعلش وخصوصا أنك برده تعبت فى البوست وبقالك فترة ما نزلتش حاجة فأنا حرجع أكمل قراءة بإذن الله

ياسر سليم said...

ايه يا عم منذر الحلاوه دى

الله ينور

بس والله اللى ييجى معاكم فى مكان لازم يحط فى دماغه انه ما ينفعش يخبى حاجه

نشرتلى صورة وكمان قلت من المنوفيه وكان ناقص تحط نمرة الموبايل :)

تحياتى يا باشا

محمد مارو said...

الصور حلوة جدا بس يا كوتش يا حبى مفيش خط اصغر شويه ؟
يا حبى انا واحد مش بشوف
بس ع العموم اكيد الكلام هيكون معبر و فى الصميم كالعاده

أحمد عبد الفتاح said...

ايه ده يا عم
اولا شكرا لكلامك الرقيق جدا والي حطني في قدر اكبر من قدري
بص كون ان الصحفي يرمي نفسه من التاني ولما سلك الاكسراتير يتقطع ينزل تحت العربية يصلحه والكلام ده فده واجبه وهي ده شغلته
انا كنت في الهيك استيب بقوم بدوري كصحفي ينتمي لموسسة صحفية كبيرة وفي نفس الوقت دوري كمدون اتعاهد مع نفسه انه يبقي وسيلة اعلام مستقلة تعبر عن الشارع بجد
بخصوص ابناء مصر
اولا انا كنت طلبت من مها الانضمام ومعرفش الجمعية العمومية عملت ايه
بس علي كل الاحوال انا بعرض مساعدتي في نقطة التغطية الحية بالذات واعتقد اني ممكن ادي فيها كويس
وربنا ييسر ونبقي افضل وافضل



صحيح الصورة صورة زوحة حسن مالك

Anonymous said...

بجد تغطيه اكتر من رائعه
و الحمدلله انا برضه عرفت احضر
و شكراااا

Anonymous said...

صحيح الصورة صورة زوحة حسن مالك


آه ما أنا برضو داخلة أقول نفس الحاجة
:)

بس بجد تغطية أكثـــر من رائعة

في ميزان حسناتكم

احمد الجيزاوى said...

يا جامد يا بتاع التغطيات الجمدةطول عمرك جامد يا باشا وتغطيه بصراحه فوف ممتازة دة الجزيرة والعربيه وغيرهم موصلوش لتغطيات الجمدة ديه
لا احنا مش قدك خلاص يا عم الشاعر الكبير
احمد الجيزاوى

مشروع انسان said...

ايه يا بنى الكلام الكبير ده والله نغطية جامدة جدا ربنا يكرمك
عايزين نتعرف اكتر مينفعش كده بقلك انا منزل ايميلى على البروفايل بتاعى تعالى خد وابعتلى مستنيك

mo'men mohamed said...

اخى منذر
ايه الحلاوة دى
جزاك الله كل خير اخى
وحسبى الله ونعم الوكيل فى كل من حاول الإتداء على الحق بأى صورة من الصور
السلام عليكم

عازف الناى said...

تغطيه صحفيه تدونيه هايله
وكمان شفنا الاخوه المدونين اللى بنحبهم
بس تصدق انا زاد خوفى عليكم
ربنا مع الحق

Monzer said...

يا حاج عمر كإنك جيت والله وزيادة
ربنا يخليك على كلامك الحلو ده

****************
جزاكم الله كل خير اخى الكريم شمس


******************

بحبك يا مصر
هو انت كنت هناك ماشفتوكيش والله
ربنا يبارك فيكى يا رب
انا كبرت الخط شوية
جزاكى الله كل خير

***************
ياسر باشا سليم

يااااااااه لو كنت اعرف رقم الموبايل
بس أسأل واحطها انت تامر يعنى :))))

تحياتى ليك يا جميل


***************

حبيب قلبى مارو الجميل
انا كبرت الخط شوية
مش عارف صحيح ليه البخل ده هو بفلوس
يمكن علشان أضحك عليكم وتستصغروا البوست شوية

تحياتى ليك المعلم

Monzer said...

احمد باشا عبد الفتاح
أصل أنا اول مرة أشوف شغل الصحافة الى بجد
الى يجرى ويروح ويطنطط ويكتب ويعبت رسايل ويستخدم التكنولوجيا الحديثة
كل الحاجت ده بهرتنى جدا
ولازم برده نشيد بيها
اكل عيش مش اكل عيش برده مجهود يستحق الإشادة


بخصوص أبناء مصر، فأنت بالتاكيد هاتكون إضافة كبيرة جدا فى الحركة طبعا
تحياتى ليك يا لوووووز

آه صحيح شكرا على التوضيح وانا غيرتها

**************

مريم
للأسف ماكانش فيه فرصة اننا نتعرف على المدونات الى كانت موجودة
انتوا حظكم دخلتوا
جزاكى اله كل خير


***********
أستاذة خديجة
جزاكى اله كل خير على التوضيح وانا صححتها
بس هو أنا ماكنتش اعرف ولا شخصية من الى كانت موجودة غير الأستاذ منتصر الزيات ولا واحد كنت أعرفه
طبعا ده جهل منى بكل تأكيد
علشان كده كنت باسأل كل واحد فتقريبا سمعت غلط او هو برده كان زي ماكانش عارف
جزاكى الله كل خير

Monzer said...

أحمد بيه الجيزاوى عندنا
يا مرحبا يا مرحبا
بجد انت لو كنت موجود
زمانك كنت حبستنى كلنا
كفاية انها جت عليك لوحدك :))))))))))

بجد شكرا على مجاملتك الرقية يا لوووووووووووز احنا بنتعلم منك يا معلم

تحياتى ليك يا حبسجى هههههههههه

***************
إمامنا إمام الجيل
بجد شكرا على الإطراء العسل ده
وقد تم يا معلم وهاشوفك يعنى هاشوفك


*************


اخى العزيز مؤمن
بجد انا بحبك فى الله جدا
وحاسس انك غير جدا على الدين
وعلى جماعتك
وانت فى غاية فى الحماس ماشاء الله عليك
سعيد جاد بمعرفتكم جميعا

**************

أستاذ عازف الناي
مش كفاية والله نعرف بعضم الصور
ياريت نتواصل ونتقابل مع بعض
عبر الميل والماسنجر
بجد هانكون سعداء بحضرتك جدا
جزاكم الله خيرا

Bou-ME said...

الحمد لله ان الكل بخير يا منذر
بس ايه حكابة مريم تخاريف من المعادي؟؟؟

والله أبويا اسمه عمران مش تخاريف...ما داهيا لا يكونوا غيروه!!؟؟؟!!!!

Bou-ME said...

يا منذر باشا المرة دي سماح

أصل أنا من نوع الناس الفوضاحية

بحب أفضح نفسي هههههههههه

فسواء مريم عمران أو مريم تخاريف مش مشكلة الاتنين :):):)

و عن المعجبين لا تقلق أنا عملهم يوم في الاسبوع استقبل مكالمتهم :):):)

صاحب البوابــة said...

كعادتك يا منذر

عرفتك رجلاً لا تهاب الظلم

ولا تخاف الطغيان

الى الامام يا عزيزي

مش هنسى said...

جزاكم الله خيرا على الحضور والاهتمام بأننا نعرف الاخبار من الواقع

ibn nasser - ابن ناصر said...

الله عليك
والله رجل جدا يا جماعة منذر ده
اه والله جدا
وطبعا بالنسبة للتغطية اكثر ممتازة مقدرش اقول عليها حاجه
ووالله والله كنت نوي يومها ونايم ناوي اجي معاكم بس معرفش انها الصبح كده


تحياتي

Anonymous said...

وبعدين معاك ياعم منذر ، انت تغيب تغيب وتطلع لنا بمصيبه؟
بس مصايبك بصراحه تغييييظ" طبعا مش منك"
واخرتها يا منذر؟؟؟؟

اسلام رفاعى said...

تغطية رائعة بسم الله ماشاء الله
..................
سعيد بزيارة المدونة الرائعة دى

هاني جابر said...

ايه ياعم نذر الحلاوة ديه
ده انت مسحتنا باستيكه ياراجل
وايه الفضايح ديه كلها
ده انت وفرت الموضوع علي امن الدولة خالص خالص
خلاص باه الواحد يحضر الشنطه
علي فكره انا اسمي هاني جابر مش جبر
جزاك الله خيرا
وتقبل الله منا ومنك

bedo said...

منذر

حبيبي

إيه يابني الشغل ده

لا بصراحة تغطية رائعة
ربنا يكرمك يارب

مسبتش حاجة
ولا حتى واحد
في اليوم ده

ربنا يجعله في ميزان حسناتك يارب

ويتقبل منك إن شاء الله


ودمتم بكل خير


وتحياتي

مشروع انسان said...

ايه يا بنى ده ابعتلكوا رسالة امبارح ولا ترد حتى برنة ايه البخل ده

ahmed mefrh said...

الله يبارك فيكم اخى
تغطيه جميله جدا و رائعه
ان شاء الله ربنا ييسر و نتقابل فى اغسطس

حزيــــــــــــــــــن said...

ايه يا عم انت بتحسسنى انك بتحكى عن شغل مخابرات مش شوية شباب

ربنا يجعل مجهودكم فى سبيله ويكون هذا العمل مقبولا

انا مش عارف بس انا حاسس ان عدم الانتماء لأى تيار سياسى افضل وان الدعوه السلفيه هى افضل طريق فعلى لأصلاح الامه
اما عن الاخوان المسلمون فانا اتعاطف معهم ليس اكثر

بس انا سعيد انى اتعرفت عليك وانى احبك فى الله

صاحب البوابــة said...

اعتذر عن التحليق خارج السرب

لكنني أريد رأيكم للأهمية في آخر موضوع لي

بعنوان

شكــر وإعتــذار

تحياتي

سكوت هنصوت said...

منذر

انا بيتهيألي لازم اشكر صاحب البوابة ليل و نهار انه عرفني بحد زيك...لو فضلت اشكرك طول عمري على وقفتك معايا اليوم ده..عمري مش هيكفي..بجد ربنا يكرمك و يجازيك خير..كل الي اقدر اعملة اني ادعيلك بالتوفيق ... انت نعم الأخ يا منذر...انت و احمد عبد الفتاح و علاء من الناس الي الواحد بيتشرف انه اتعرف عليهم..جزاك الله كل خير اخي الكريم..والى الأمام دائما

Monzer said...

الآنسة المبجلة مريم عمران
الحمد لله لقد توصلنا إلى تفاهم بخصوص هذا السام : ايه رايك فى الكلام الكبير ده
مليون مبروك ع النجاح
وحلوة الإشاعة بتاعة أولالدفعة ده :) ما هو السيط ولا الغنى

**************

أخى وصديق الغالى ومثلى الاعلى صاحب البوابة
أنا أتعلم منك هذه الصفات اخى الغالى
دمت لنا فارس كعادتك

**************

الاخ حسين رضا
جزاكم الله خيرا على مجاملتك
وده أقل ما يقدم
تحياتى لك يا عزيزى


***********

الزعيم ابن ناصر
انت يا زعيمنا وجودك هو الى مهم
هو انا فايدتى ايه هناك من غيرك بجد
كفاية متابعتك للاحداث أول باول ، ده غير امانة النقل التى أثرتنى التى لا توجد كثيرا فى مثل هذه الأيام
وكان لازم حد فينا مايروحش يا اخى العزيز

Monzer said...

صديقى واخى الغالى النورس
كم تسعدنى زياتك وتواصلك
وكم يسعدنى تواصل اخوتنا فى مكتوب
يارب ماتقطعهاش
والله فعلا مصايب وبنبتلى بيها
بس انا شفت بعينى اسود فى الهايكستب
أسود والله يا نورس
رجال ونساء ل تتخيل انهم يعيشون بيننا
منهم ومن امثالك هاييجى التغيير ان شاء الله
تحياتى لك أخى الغالى

**************

جزاكم الله خيرا على الإطراء أخى إسلام الرفاعى
وأن سعدت أكثر بزيارتك

***************

دوكتور هانى

بجد انا مستقصدكم انتم بالذات
انا عاوز اجاملك بصراحة
حاسس انكم عاوزين شوية ثواب كده ع الماشى
فنساعد بيه حبايبنا الحلوين
ربنا يعصمك من كل شر اخى الغالى


**************

ايه يا عم بيدو
ايه رايك فى التوصيلة اللوز ده
الحمد لله ان ربنا عداها على خير
شكرا لك يا جميل

***************


إمامنا إمام الجيل
انت فاهم باه لقد رفص رصيدكم
ولا ميسد ولا رنة ولا أي حاجة
ماتحلوى رصيد هههههههههه
:)
مستنين نرتب ميعاد تانى ان شاء الله فى أقرب فرصة

Monzer said...

أبو مفراح

ان شاء الله على نفس الموعد

وربنا ينتقم منهم قادر يا كريم
بدل ما كان أهل العتقلين يصيفو ولا يرفهوا عن أنفسهم شوية فى عز الولعة والنار ده
يودوهم ويبهدلوهم فى يوليو وأغسطس
حسبى الله ونعم الوكيل


*************
اخى الغالى حزين
نعم هو شغل مخابرات
نحن نعيش فى دولة مخابراتية بالفعل
نحن نعيش فى دولة بولوسية بالفعل
ماذا تفعل ا حين تأتيك رسالة السباعة صباحا تخبرك بأن صديق لك تم اعتقاله فى المنثورة وآخر فى الجيزة
وربن يستر ع الباقية الباقية
هم من خلقوا هذا وحسبى الله ونعم الوكيل

أم عن الإخوان فهذا شرف لا ادعيه على الإطلاق
ولست بسلفى فهذه منزلة لم يفتحها الله عل حتى الآن
ولكن ما يحدث موجه لكلك صاحب راي على أي اتجاه
ومابالنا لو كان اتجاه بالحق
فيجب ان ندافع عنه بكل ما اوتينا من قوة
وياريت لو تبقى تيجى معانا ان شاء الله
او نتعرف عليك من قرب
ejymejy@yaho.com
مستنى غضافتك صديقى العزيز

************

اخى صاحب البوابة
لقد قرأت البوست ورديت عليه
مش عارف اوصفك بايه
ياريت تكون حاسس ببمشاعرى تجاهك
ربنا يبارك فيك


***************

اختى الغالية سكوت

بجد انا مش عارف أرد على مجاملاتك الرقية ده كلها
فى مدونتك بجد اخجلتى تواضى بشدة
مش عارف ارد على زوقك بايه والله يامها
ربنا يرزقنا الإخلاص لوجه الله تعالى

ومستنين ميتنج قريب عن أبناء مصر
العملية هادية ليه مش هاينفع كده
عاوزين نشتغل باه

تحياتى لكى اختى الغالية

belal said...

ماشاء الله عليا منور الصور..ربنا بيارك
ههههههههههه
...
تغطية ممتازة أوي الله ينور
....

مشروع انسان said...

مبروووووووووووووووووووووووووووووووووووووووووووووووووووووووووووووووووووك
يا عم منذر وعقبال الشهادة الكبيرة
وعقبال ما اشوف ولادك يا رب

Anonymous said...

معلي يامنزر اتاخرت ويه في التعليق ب غصب عني المهم ياباشا الحمد الاول علي انك جيت لينا بالسلامه
ثانيا بقه ياعم تغطيه اكتر من راعه تقبل تحياتي اخي العزيز

حزيــــــــــــــــــن said...

انا ضيفتك على الماسنجر من امبارح
كنت عايز اخد رأيك فى اخر بوست عندى

مشروع انسان said...

شكرا يا سيدى على المكالمة كده انت زلت كل شكوك عندى فى عودتك الى اصلك معلش بقى الواحد بيحن برضه
وطبعا يا بنى انت ملكش ذنب محدش بيختار يتولد فين ويعيش فين ده قدرك
هههههههههههههههههههههه
بهزر طبعا بجد اتصالك اسعدنى ومصدقتش والله وانت كان مالك متلخبط كده ليه مش عارف اتمنى لقائك قريبا

Anonymous said...

جميل يا عم منذر التغطية الرائعة دي ...

بارك الله بك


لك كل الود

Rehab Saber said...

جزاكم الله خيرا على التغطية

7ntklm said...

منذر عذراً لتأخيرى فى التعليق على التغطية الرائعة للاحداث يوم المحاكمة

مجهود جيد صديقى العزيز

Monzer said...

بلال الجميل
والله كنت سعيد لما شوفتك
ربنا يبارك فيك يا رب

**************

إمامنا إمام الجيل
ربنا يبارك فيك يا رب
مانتحرمش من دعواتك أبدا يا جميل
جزاكم الله كل خير

**********

فارس باشا أبو الفوارس
ده انت متاخر من زمن
بقالك كتير ش عارف بتهدى ولا تعدى ولا ايه
ربنا مايحرمناش منك يا رب
ربنا يبارك فيك داميا

**************

أخى الغالى حزين
لا ياباشا مافيش حد ضافنى ضيفنى تانى يا صاحبى، مالقتكش خالص
مستنيك فعلا
وموضوع فعلا جميل


***************

Monzer said...

إمامنا إمام الجيل
والله انت جميل فعلا
جزاكم اللهكل خير
انا سعيد جدا ان عرفت أوصلك أصلا
هتلاقينى فى كل حته
فى الماسنجر فى التليوفن
غلاية ماتزهرق :))))

رربنا يبعزك يا رب

*************


صاحب المضيفة
والله أنا سعيد جدا بزيارتك
واتمنى دوام التواصل معك يا جميل
وكنت سيد أكتر لما شوفتك
ربنا يبارك فيك
وياريت نتثقابل تانى

***********

الأخت كات
جزاكم مثله وخيرا منه ان شاء الله
ربنا يبارك فى حضرتك

************

الأخ والصديق الغالى الى تاعبه جدا

كل تأخيرة وفيها خيرة ان شاء الله
ربنا يبارك فيك
انت برده بذلت مجهود اكثر من رائع فى الاتصالت وغيره وعلمت شغل عالى
كفاية ان تاعبك الايم الى فاتت ده بالبلوج
ربنا يتسر ومايضعش البلوج ده