Thursday, September 6, 2007

التيه فى محاكمة إسلام نبيه

عذرا على رداءة الصور، فأنا صورت بالموبايل 2 ميجا بكسل وتخيلوا، لما أعمل زوم الصور هايطلع شكلها ايه









لحظة دخول إسلام نبيه ع الفيديو ده

طبعا العنوان مش مفهوم، بس هو تيه فعلا، ولانك ولأول وهلة، وانت بتسمع كلام الدفاع بتاع إسلام، تشعرأن إسلام نبيه ، هو من تم تعذيبه على أيدى عماد الكبير، وليس العكس، وهو من تم إهانته وهتك عرضه، وسبه وشتمه وضربه وفضحه وليس العكس
تشعر أيضا انك ممكن تلبسلك تهمة وانت قاعد فى بيتكم فى أمان الله وتتعاقب عليها وتنفذ الحكم كمان، بس كل ده مش مش مهم ، الاخطر انك هاتقتنع فعلا انك الى عملت الجريمة ده
اعتقد ده شعور جه لكل الاخوة الى حضروا لمحاكمة بتاعة يوم الأربعاء
كانت أول مرة أحضر المحاكمة ده، وأول مرة أشوف عماد، وأشوف إسلام نبيه، وأشوف جو القضية بنفسى
بس زي ما قلت خفت ع القضية جدا، من تلبيس إبليس
وإبليس ده المحامى بتاع إسلام نبيه



أقام دفوعه الخطيرة الى مش خطيرة فى كذا نقطة
أول حاجة سبت النيابة وشكر فيها شكرانية من هنا لاسبوع جاي، بس بين التارة والتارة ، من تحت لتحت كده بخباسة ينقدها من غير ما يغلط فيها
مثلا ان النيابة قالت ، يجب الضرب بيد من حديد، وقال ووجه كلامه للقاضى، ان ساحة عدل حضرتكم مافهاش يد حديدة تضرب بيها، وساحة رحمة حضرتكم، لا تملك مثل هذه الأيدى، وهكذا لغاية ما كنا هانعيط والله
الدفوع باه كالآتى



ان الخبير لما جه يحلل الشريط المصور، استعان بحواسه سمعه وبصره فقط، ولم يستعن بأي جهاز تقنى، ولما ساله هل بتكشف دوريا على حواسك ده، قاله آه، راح سأله اجميل آخر مرة كشفت فيها امتى، راح قايله مش فاكر
تناقض فى أقوال الخبير اثناء تحقيق النيابة، لما سأله وكيل النيابة وقاله هل استعنت بأي حد لما جيت تحلل الشريط المصور، قاله آه استعنت بزميل، ولما جه قدام القاضى وساله المحامى حد ساعدك فى تحليل الشريط ، راح الخبير قاله لا مافيش حد ساعدنى
وأ صلا المحامى بيقدم الخبير على انه مش خبير، هو بيقدمه على انه دبلوم صنايع كهروبائى مايفهمش فى الشغلانة ده أصلا، وانه خارج نطاق التقييم من أصله، ومقدم مرجع فيه انه لا يعتد خبيرا من استعان بحواسه فقط دون انا يتسعين بأجهزة تقنية
وهنا تنتهى نقط الخبير وندخل فى نقطة تانية
انه قال ان عماد الكبير، عنده تناقد فى كلامه بخصوص انه مرة قال على اسم أمين الشرطة رضا ومرة قال فيه كام واحد ماعرفهومش، وانه فى أول القضية خالص اتنازل عن البلاغ، ورجع غير أقواله قدام المحكمة
ده حتى الشريط المصور، شكك فيه وقال ان الأودة الى حصلت فيها الحادثة ده، ماتستوعبش العدد ده كله
وكان مركز قوى، فى واقعة ين خلع هدوم عماد الكبير، يعنى مين أصدر الامر ده، ويرجع تانى لنقطة التناقد فى كلام عماد، ان عماد قال انه شافهم وهما بيكلموا وبعد كده جم خلعوه ملابسه، فأكيد إسلام هو الى قالهم يقلعوه، ومرة تانية قال ان إسلام نبيه دخل عليه لقاه قالع
ولما ساله سمعت بودنك مين الى قال قلعوه، عماد قاله ماعرفش
كله كلام فارغ ولعب على الألفاظ، واستخدام ثغرات تافهة وهايفة
الأمر لم يخلى من كوميديا



منها ان النيابة استخدمت بيت شعر كده، راح جمال قايل أنا مش هاتناول الشعر وكلام الشعراء، أنا هتلواكلام ربنا
وراح قايل آية ان الشعراء يتبعهم الغاوون ومكمل الآيات، واستخدم إشارات خطيرة، نوارة قالت عليها وخدت بالها منها، انه لما جه عند آية الا الذين امنوا وعملوا الصالحات وانتصروا من بعد ما ظلموا شاور على إسلام، وبعدين شاور على محامى عماد وهو بيكمل الآية وسيعلم اللذين ظلموا اي منقلب ينقلبون
موجودة ومصورة على الفيديو ده، والحمد لله انى لحقتها






كانت حته خطيرة قوى، انه فسر الآيات وفصلها على مقاس مقاس جنابه
وبعيدين، فى النهاية وعلشان يختم قال مقولة لشيخ المحامين عبد العزيز فهمى وهي منقولة من مراسل أبناء مصر تامر
عندما يطل شبح الاعلام علي القضاء تفزع منه ملائكة
وقال ان فيه فرق بين الوقاحة والصحافة
وراح معقب وبعلو حسه قال سامعه يا نوارة
كلنا بصراحة اتفاجانا ، للأسباب الآتية
لاننا وقبل ماتبدأ المحاكمة، لقيناه جاي كده ورايح لنوارة وسلم عليها وقالهاازيك وازي بابا، وكلام جانتيه كده
فمتخيلناش انه يعمل كده معاها هي بالذات،بعد ما جه وسلم
وكمان تواجد فى قاعة المحاكمة جميع وكالات الانباء والصحف والفضائيات، سابهم كلهم وادير على نوارة
وبعد كده راح دافع عن جهاز الشرطة المصرية ككل وقال انهم ولادنا ولاد مصر صناعية مصرية مش ميد ان تيوان ولا كوريا، وان ولادنا ولو فيهم عيب ،... لو ... فاكرين لو يبقى عيب المجتمع ككل، وايه يعنى حادثة ولا تنين من ملوين، ده نسبة نرفع لها القبعة انحنائا واحتراما، والله قال كده وعقب وقال لو صحت أصلا، وقال امبارح عن محاكمة ظابط شرطة سراي القبة الى خد براءة، واستشهد بحاجات من كده كتير


وقال ان جهاز الشرطة بيتعرض لحملة بشعة واستشهد ببورنامج تسعين دقيقة ع المحور، لما اتصل الراجل الكويتى قال لا تعايرنى ولا اعايرك، وقال ان الراجل ده رد على مصطفى بكرى، ان المصرى فى مصر بياخد بالجزمة ومابياخدش فلوس، لكن المصرى فى الكويت بياخد بالجزمة وبياخد فلوس
وان لما القطار عندنا بيولع بناسه بركابه، بيدو للضحية ألفين جنيه، يعنى مايسواش فى الكويت غسالة عادية مانويال يعنى


وان المصرين لو كانوا ساعدو فى تحرير الكويت، فكانوا جنود مرتزقة ، وبياخدو معونات من الكويت وفلوس مقابل ده
وطبعا قال ان كلام الكوايتة ده بسبب الصحافة الصفراء المشوهة لسمعة مصر، وتساعدهم فى ذلك جمعيات حقوق الحيوان أقصد الإنسان



وعقب وخدته الجلالة أوى، وقال ان الهجمة ده تطول جهاز الشرطة ورجا الشرطة أمثال وإسلام الى بيحمينى ويحميك، يروحوا يشطروا على جرائم عماد وعيلة عماد من سنة كذا، وتارهم الى مش هاينسى مع جهاز الشرطة علشان هم مجرمين و-حشين مش زي إسلام نبيه الى دخل كلية واكاديمية محترمة وهي اكاديمية الشرطة .... يوووووه آسف أقصد اكاديمية مبارك للامن وراح مكمل ان الهجمة ده طالت كمان المحامين وغيرهم، وكانت عوازة تطول القضاء
وهنا كان زعق ووشه احمر، واتقلب يوسف وهبى،وراح قايل لا وألف لا إلا ده ، مش ممكن يحصل أبدا مهما يكون .. مهما يكون
وقال كفاية ان رئيس الجمهورية بيتشتم، قال ان لو حد شتم أبوه هايديه بالجزمة ـ آسف ع التعبير ـ ولكن هكذا ورد فى هذا الفيديو
انا ماكملتش بعيدها وسمعت شوية من مرافعة محامى امين الشرطة رضا فتحى


محامى أمين الشرطة رضا فتحى
وبعدين فكيت، بس كان على عين عينى والله
بس قصة خروجى من قاعة المحكمة كانت مثيرة على الأقل بالنسبة ليا .. ازاي
آه أصل انتم مش عارفين ، فجاة كده واحنا واقفين قبل ما المحاكمة ما تبدأ لقيت نوارة جارية ووراها الشباب والبنات جري ، اخترقوا صفوف العساكر الى كانوا واقفين ساددين المنصة، هما اتخضوا من الاقتحام المفاجأ ده،
وانبطحوا ع الأرض، وقعدنا تحت منصة القاضى بالظبط، كأنه بينج الجامعة، القاضى دخل، وراجل زعق وقال محكمة، لقيت نوارة بتدى تعليمات تنظيمية اوعى حد يقف، أصل محسوبكم كان هايقف :)))))
وبقينا فى وش المحامين لزق، ببص قدامى لقيت المحامين ، قلت عادى وايه المشكلة، يمينى لقيت النيابة، اتخضيت شوية ، بس ايه ثابت برده ، شمالى لقيت الأخوة اطمئنيت، وقلت نبقى فى السليم،
ببص باه لفوق عرفت ان ورايا القاضى


قلت لو امحامى إسلام نبيه يبلغ عننا ولا حاجة، بس لقتهم كلهم قاعيدن وتصوير ايه وفيدوا ايه، وشاويش معاه زمزمية، تقولش طالعين رحلة :))
بس بعد انتهاء مرافعة جميل سعيد، كانت وقتى ازف، وكنت لازم أروح للحاج الوالد، بس ازاي هاقتحم ممر الخروج كده وصف العساكر زي ما هو، وأقوم وأقف وادى ظهرى للقضاة الى فوق دول
وبقيت فى حيرة من امرى خايف أقوم، يكون فيه مشكلة، وفى نفس الوقت لازم أقوم، وكل ما أتشجع وأقول أقوم ، شاويش يقولى اوعى تقوم وتقف وتمشى اوعى
بس لقيت واحدة خرجت وبعديها واحد، ... مش عراف انا الستات عليها جراة
قلت ما بيقوموا اهو، روحت قايم، وقايل يا فكيك، وجالى شعور، ان لو حد نده عليا مش هابصله حتى لو كان القاضى وهاطلع اجرى
ده الواحد جبان جبن يا جدعان
أصل لو انا مكان القاضى، كنت هاقول ده هو الجدع ده طلع منين ، كان قاعد فين ده علشان يطلعلى من تحت الأرض كده
الحمد لله ربنا سلم ، ويارب يكملها على خير

وطبع الحكم تأجيل علشان المحامى وراه قضايا فساد اخرى، رايح قضية العبارة فى الغردقة، أصله محامى ممدوح إسماعيل .. رشوة تلاقى قتل تلاقى تعذيب تلاقى هو بتاع الفساد
يعنى اقتل اسرق ازنى ووكل جميل سعيد وعذب واحرق وافنى ووكل جميل سعيد
وهنا تنتهى فصل آخر من فصول تلبيس إبليس فى محاكمة إسلا نبيذ

28 comments:

عصفور المدينة said...

ه ينفع اسم كتاب اسود
والمحتوى أسود منه
وسيعلم الذين ظلموا أي منقلب ينقلبون

حسبنا الله الإله
حسبنا نعم الوكيل

اللي فوق ده بيت شعر للواد المبدع صديقي ض خالد/

عازف الناى said...

حمدلله على السلامه
من محاكمه المغامرات
اسلام نبيه هيطلع براءه
او هياخد حكم مخفف
اصل احنا فى زمن العجايب



مجهود رائع
يستحق التحيه

مريم said...

حسبنا الله و نعم الوكيل

بجد احنا فى زمن عجيب

بس الحمدلله انك رحت عاشان تكون شاهد عليهم يوم القيامه

نيفين عمر said...

الحقيقه لازم اهنيك على نشاط الغير عادى فى متابعه ونقل احداث هذه المحاكمة
انت ممتاز يا صديقى الجميل
لكن تفتكر حايتحكم على اللى اسمه اسلام نبيه ده بحكم ؟؟؟
خسارة فيه اسمه مليون مرة
ده مش انسان زينا مش بشر
اعوذ بالله
ربنا ينتقم منه لو لم يكن فى الدنيا يكون فى الآخرة
والآخرة امر وافظع ان شاء الله
رمضان كريم يا صديقى العزيز

سكوت هنصوت said...

والله يا منذر تعطية اكتر من رائعة

والصور خطيرة جدا

مش ممكن اصدق انها بكاميرا 2 ميجا بكسل ابدا

تسلم ايدك يا بطل

وما يهمكش ابقى اطلع اجري ولا يهمك

الجري نص الجدعنة

محمد مارو said...

ايه يا عم الحلاوه دى
جميل اوى الوصف ده
و عندى طلب انا عوزك تجيب لى عنوان المحامى ده لانى ناوى اعملها معاك و و و و و و لا بلاش

مـحـمـد مـفـيـد said...

التيه في محاكمه أسلام نبيه
الله
الله
جامد جدا
مش بقولك انت يا ابني خلاص مش هنعرف نكلم
تغطيه بديعه وسطور مميزه
مش ممكن
عايزين قاعده قبل رمضان شو وانا جاهز

برافو يا منذر

صاحب البوابــة said...

كل عام وأنتم بخير

يهل رمضان من بعيد

حاملاً لي أحلى الذكريات دائماً

أصدق العبرات حتماً

أخلص العبادات دوماً

لرمضان عندي مكانة خاصة

ولكم أنتم أيضاً

يا أحبابـــي

فكل عام وأنتم بخير

وأنتم إلى الله أقرب وعلى طاعته أدوم

امام الجيل said...

منذر
انا تقريبا كنت علقت هنا
انت بتخش تمسح التعليقات وتطلع ولا ايه
:)
ربنا يكرمك ويبارك جهدك
وامشى جوا الحيط اليومين دول بقى
رمضان داخل الاسوار بيبقى مش لطيف
:)
بلغك الله رمضان

صانعة الحرية said...

السلام عليكم
لا تعليق
وحسبنا الله ونعم الوكيل
ادعوكم للمشاركه فى حملة
معا لحرية المعتقلين..معا لادخال السرور على اسرهم
http://sona3al7iah.blogspot.com/2007/09/blog-post_08.html

سارة said...

الله ينور يامنذر

والله الوصف بس يحرق الدم
يلا حسبنا الله ونعم الوكيل

بس عارف احسن حاجة
وانت خارج من القاعة
هههههههههههههههه

كل سنة وانت طيب

انتصار عبد المنعم said...

انت مشروع صحفي أو مراسل صحفي راااائع
لو في بلدنا عدل كان من المفروض كل الصحفيين في الأهرام يجيلهم قرار ازالة
ويأخذ المدونون من أمثالك يامنذر اماكنهم
تحياتي وامنياتي بالتوفيق
بالنسبة لعماد الكبير طبعا هو حايكون الغلطان
ولو اخذ حقه برضة ظلم لأن العدل البطئ ظلم
دا لو كان في عدل

غمض عينيك said...

مش هقول اكتر من اللي انت قلته

تلبيس ابليس

أحمد التابعى said...

الجميل أوى أخى/منذر
والله يابنى دى مغامرة كبيرة لكن حقيقى عشنا المحاكمة كأننا فيها
وربنا يهلك كل ظالم جبار

تسلم الإيد والكاميرا
والإخراج
----------------------------
حبيب قلبى منذر صدقنى أنت دشنتنى مدونا بإضافتلى لأسماء المدونيين فى مدونتك
ياعم منذر صدقنى إحنا تلاميذ صغيريييين فى مدرسة تدوينك
والله الواحد بينكسف لما يزور مدونتك ويحس إنه فى أولى حضانة تدوين
لكن بشعر بالسعادة للتميز الرائع الممتع المتجدد لمدونتك ياعم منذر
صدقنى كلامى ده من القلب
ودامت مودتك وأخوتك يا عم منذر
تحياتى وودى

شـــــهــــروزة said...

كل سنة وانت بخير
ورمضان كريم


وكأن كلمات صحفى كشك الكويت
ستؤخذ ضد الضحية
وتحتسب نقطة لصالح الجلاد


سنين اية السودا دى؟؟؟؟؟؟؟؟

sara said...

أعناب ونخيل*
وعين سلسبيل*
وشراب وزنجبيل*
وأشجار تتراقص وتميل*
وخدام تغرف وتكيل*
وقصور تحتها الانهار تسيل*
جعلها الله حدود ملكك في جنة النعيم
"أسعدك الله بشهر شعبان
وبلغك صيام رمضان وأهل بيتك أجمعين"


+ . * . * .
* . رمضان + +
. * كريم. * .
+ . * + . *

مدونه انا بحبك يا مصر said...

كل عام وانتم بخير وعادة الله عليكم وعلى الاهه الاسلاميه بكل خير
كل عام وانتم منصورين واقوياء
كل عام ومصر بخير
احمد الجيزاوى

النورس said...

هو فعلا تيه يا اخى ، المحامى دو وامثاله متأكدين انهم بيدافعوا عن الفساد ومتأكدين برضه ان موكليهم فاسدين
اعتقد ان دول همه اصل الفساد
حسبنا الله ةونعم الوكيل
كل سنه وانت طيب

A.SAMIR said...

ياسلاااااااااااااااام
فرق الاتنين محامين واضح قوي يا منذر
الفلوس برضة بتعمل شغل يا راجل
هل برضة هنساوي بين عربيتين واحدة مرسيدس عيون والتانية زيستافا
في فرق سرعات يا سيدي القاضي
عموما يا سيدي
ابو نبيه براءة يا ريس...ومش علشان حاجة بس علشان ثغرات القانون اللي ما بيستغلهاش غير الناس اللي بشيء وشويات زي المحامي الفاضل دة
لا عزاء للفقراء في هذا البلد
تحياتي لك

أمــانــى said...

كــل رمضان وحضرتك بخير وربنا يبغلك رمضـان
ويجعلك نافع للامة ياااااااااارب آمــــــــــين
ويبغلك رمضــان ياااااااااارب آمــــــــــين

ياسر سليم said...

السلام عليكم ورحمة الله وبركاتة

كل عام وانت بخير

غفر الله لنا ولك فى رمضان

و ثبتنا على الخير بعد رمضان

انتصار عبد المنعم said...

منذر
كل عام وأنت وكل الأسرة بألف خير
متعك الله بالصحة والعافية

Monzer said...

آسف على التأخير فى الردود
اعذرونى
بس رمضان هالبد ع النت ان شاء الله
أستاذنا وشيخنا عصفور المدينة
فعلا والله هو كتاب اسمود
ده ولا كتاب حياتى يا عين
******

أستاذى عازف الناي
تقريبا هاترسى على كده
بس بجد هابقى استهبال يعنى
********

والله يا مريم
كلمتك هابقى شاهد عليهم ده
خضتنى فعلا
ومحسسانى بمسئولية كبيرة
ونفسى يقروها ويحسوها بجد
كلمتك قوية اوى يا مريم
ربنا يثبتنا ويعصمنا يوم العرض عليها ىمين يا رب

*****

نيفين ربنا يخليكى والله ع الكلام الحلو ده
أما عن اسمه فخسارة فيه مليون مرة
بس ايه الى خلاه يتحول كده
ما كان انسان عادى
زينازيه
لحق فى الأربع سنين يتحةل كده
بيعملوا فيهم ايه

Monzer said...

يا سلام يا مها
ده كده رافعة من معنوياتى
ده جنا بنتعلم منك والله
بس خسارة اليوم ده الوحيد الى انتى ماروحتيهوش
علشان تعرفى وراكى أسود
بس هو فه أسد بيجرى
ههههههههههههه

*********

مارو ناوى تعمل ايه بالظبط
هاقلق منك يا لووووووووز
هههههههههه
ربنا يبارك فيك يا معلم

*************

محمد باشا مفيد أبو عبد الله
بجد لما بتقولى على حاجة حلوة
واحس انك مش مجالمنى بتبسط قوى والله
كله بتوجيهات معاليك

***********

وانت طيب يا صاحب كل البوابات الى فى الدنيا :)))

***********

امامنا إمام الجيل
احنا هاننصب ولا ايه
لا ماعلقتش يا سيدى
ايه رايك باه
علشان كده لازم تعلق باتنين أي خدعة
هههههههههه


**********

Monzer said...

صانعة الحرية
باك الله فيكى
وان شاء الله معاكم
شوفى ممكن أساعد بايه
وان شاء الله يشرفنى وجودى وسطكم
*********

سارة
ههههههههههه
هو ده الى عجبك
مسيرك تروحى المحاكمة ده ان شاء الله

***************
والله يا أستاذة انتصار، ده كلام كبير عليا قوى
كده هانتغر فعلا
اللهم ارزقنا الاخلاص فى الوقل والعمل
ربنا يبارك فى حضرتك

********
محمد باشا سمير
مش صح برده
تلبيس إبليس
ربنا يستر

***********

Monzer said...

أحمد باشا التابعى
على فكرة كلامك ده اكبر منى بكتييييير جدا يا صديقى
ماتقولش كده أبدا
ده يشرفنى ان أحط مونتك المتميزة عندى وهذه حقيقة أخى الكريم
وتلاميذ ايه ومدرسة ايه، يا باشا ربنا يكرمك وكل سنة وانت طيب وبخير حال


*************

شهروزة هانم
انا مش مصدق نفسى انا فى حلم ولا فى علم، بحالك بشخصك، ده والله كتير عليا
أنا عديت ولا ايه
الغريبة فعلا مش عارف ايه دخل ده فى ده، ايه الى يعيب عماد ولا قضيته لما يدخل حكاية الكاتب الكويتى ده، ولا لما يقول ان فيه ظابط تانى اخد براءة
هو لعب ع الإجراءات والضبط والحاجات ده
ربنا يستر ع الأيام الى جاية
وكل سنة وانتى بخير حال

**********


سارة، ايه الراسيل الجامدة ده
كل سنة وانت مية مية
*******

عمونا وعم عمونا
وانت طيب يا معلم

*******
أخى العزيز النةورس
مش عارف كلية حقوق ايه ده الى تخرج ناس بالشكل ده
طب هو بيكدب علينا ولا ع القاضى ولا على نفسه ولا على مين وايه ولا هو فى ايه بالظبط
هاجنن فعلا وانت طيب اخى الغالى

************

Monzer said...

احمد باشا سمير
انت بجد اكلتلى دماغك
بتروح فين يا عم الحاج نفسى أعرف
ابقى ابتعلى ميل كده طمنى عليك فعلا

بص يا سيدى
انا خايف ان يتكرس الشعور ده، وطبعا كلنا خايفين
علشان كده لازم نفضحهم ونفضح أساليبهم ده
علشان عيب بصراحة
يعنى انا مش متخيل
ان القضية ده تتعمل ضد مجهول
مش افهم يعنى
مجهول ازاي
ومصورة فيديو وصت وصورة ومرعوفين الأشخا والاماكن كل حاجة موجودة
هايجننونا الناس ده ولا ايه
الله يخرب بيوتهم يا عم

*************


امانى ياسر وأستاذة انتصار
بنا يبارك فيكم وعليكم آمين يارب
وماتتنوناش من صالح دعائكم

اللهم تقبل

أنس الشامي said...

رمضان كريم

كل عام و أنتم بخير