Friday, April 4, 2008

يا تطبطب يا تقطف يا مسهوك

أول تعليق جالى على التدوينة الى فاتت من د. أجدع بنوته بتقولى فيه شوف ازاي نثأر وأنا معاك .. السؤال ده أحرجنى قوى ... وخوفنى قوى .. وقلت فى سرى ايه يا جدعان هو الموضوع بجد ولا ايه، لا مش أنا الى هاشيل الليلة لوحدى .. ولا أعرف حد :)

بس بجد مش عارف ان كنت قادر للاشتراك فى آلية للثأر ولا لأ .. بس الى أنا عارفه كويس وعاوزه وواثق فيه ومؤمن بيه ونفسى فيه إنى أثأر ... إنى أشوف الى بيحصلنا بيحصل لطواغى النظام

أصل أكتر حاجة بكرهها ، التبلد .. التبلد بيخنق قوووووووووووى وبعد ما بيخنق بيطلب معاك انتقام والانتقام يطلب زي ما يطلب ... بالذات لما تبقى انت تعبان والنظام يبقى عارف انك تعبان .. وبتعيط وبتبربر وبتتألم .. عارف كل الحاجات دى وعادى برده .. ولا يطبطب عليك لا ده ممكن يقولك مال شكلك مقرف كده والبربور على وشك .. روح اغسل وشك كده هو أنا قاطع عليكم الماية ولا إيه .. عالم معفنة ، مخهم صغير .. مش فاهمين الى بيحصل .. لو كانوا مكانه كانوا عملوا كده .. معلش بكرة الصغير يكبر

المهم أنا عارف إزاي نثأر .. الثأر مرتبط بالتغيير .. والتغيير بييجى من طريقين .. لاما بالطريقة الصعيدى بالقوة والحديد والنار وما شابهها من انقلاب عسكرى يقوم بيه حته عقيد وممكن كمان يكون مقدم .. وفى لحظة وثانية يبقى رئيس جمهورية ويطلع عقد الدنيا ونواقصها كلها فينا

لاما بطريقة غاندى مثلا .. زي عدم الامتثال للأوامر والعصيان المدنى والاضرابات والاعتصامات السلمية .. وعدم استخدام العنف بل ورفضه مع الاستعداد لتنفيذ العقوبة .. يعنى هايعدموا الشعب كله ولا هايسجنوه مثلا

كنا بنكلم من فترة أنا ومجموعة أصدقاء .. عن أفضل طريقة من طرق التغيير .. فانقسمنا فريقين .. واحد عاوز يغير بالقوة يروح على الروس الكبيرة يقطفهم ... ويطبق النظام الى هو عاوزه .. وتعالوا نقدم حسن النية .. ونفرض إن الجدع ده هايبقى زي ولد فال بتاع موريتانيا .. هايعمل فترة انتقالية كام سنة ودستور جديد وانتخابات حرة ونزيهة مايشاركش فيها خالص .. ويرجع العسكر لثكناته ... وتبتدى نهضة حقيقية .. وتبقى الدنيا كلها بتتغير والشعب شاكت .. شالوا جيلى والشعب ساكت جابو الجوهرى والشعب ساكت مافيش استقرار سعادتك .. مرة يحمد ربنا .. ومرة يسب الدين ويقول حسبى الله ونعم الوكيل .. وكمان لو ضمنا واحد من الى هايعملوا التغيير ده مش هانضمن الشلة كلها .. ده الواحد لما بيشم الورقة أم 200 جنيه دى بيزنهر كده وبيبان على مشيته .. أمال لو بقوا على عرش مصر هايعملوا ايه

ألا صحيح الورقة أم 200 جنيه دى لا بنعرف نشيلها وبيصعب علينا نصرفها زي البيت الوقف كده .. بس بتصرف .. تيجى ويبقى يحلها الحلال

المهم

الفريق التانى كان مثالى شوية .. طبعا أنا كنت على رأسه .. عمال يقول لازم الناس هي الى تعمل التغيير .. علشان تقدر تحافظ عليه.. لازم الشعب يتربى ويتعلم، والحرية تمشى فى عروقه زي الدم .. علشان مايبقاش لعبة فى ايد شوية عسكر مخهم أضيق من راس الابرة .. والاعتصامات والاضرابات والعصيان المدنى هو الحل .. ولازم الناس كلها تشارك فيه .. وكل واحد عاوز يحسن حاله وحاسس ان النظام هو السبب فى الى هو فيه لازم يشارك فى العصيان المدنى ده .. والناشطين الى زينا لازم ينشروا الثقافة دى .. حتى الشباب الى عاوز يغير بالقوة لازم يجرب يساعد الناس قبل ما يروح ع الروس الكبيرة ..

بس بعد شوية ..حسيت انى غلطان .. الأسرع اننا نقطف الروس الكبيرة .. علشان الشعب ده مات .. أصل لما المرتبات تفضل زي ما هي .. وأسعار السلع الأساسية تزيد 200 المية يبقى الشعب ده تمام التمام وغنى وعنده فلوس وأطيان فى البنك .. ازاي شايل أطيان فى البنك مش عارف .. بس الأكيد مش فارق معاه غلو الأسعار .. ولما يشوف عماد الكبير متعشق فيه عصاية .. ومايعملش حاجة ويبربر الموضوع ده .. يبقى الشعب ده لامؤاخذة بيتكيف من الحاجات دى .. يبقى الشعب خلاص شذ وباظ وانحرف خلاص .. ولما تكلمه يكلمك بكل بجاحة ووقاحة غير معهودة ويقولك ده زواق ميكروباااااااااااظ وبلطجيييييييييى ياما روع الناس .. فليه ما تيييييييييييييييييييت ويتربى

فآجى أنا وأقوله بأه يا تييييييييييت يتيييييييييييت ده انت إلى تيت و ابن تيت وشعبك الى هو شعبى شعب ابن ستين تيييييييييييت

وأحب أقوله شكرا يا عم الشعب كتر خير خيرك .. خليك متكيف زي ما انت .. مش هانقطع عليك تظبيطك ... بس سيب الى عاوز يعمل يعمل من غير ما تسفسط عليه ولا تنظر عليه ولا ترجع عليه


البوست الجاي هاحكيلكم على موقف حصل معايا .. خلانى أقول كده .. وكمان نكون شوفنا يوم 6 أبريل حصل فيه ايه

أدينى مش رايح الشغل لما نجيب آخر الناس دى معانا

13 comments:

No Fear said...

السلام عليكم
أزيك يا منذر
الواحد و الله أتخنق مش عارف التغيير هيحصل إزاي و هو أصلا التغيير ممكن يحصل
الناس حالها بقة سئ قوي يعني ممكن واحد يموت أبنه و لا أخوه و لا أيبوه مقابل عشرين جنيه الناس أخلاقها في الضياع و معندهاش مبادئ يعني مش مستبعد تلاقي البلطجية تتدخل علي كل الناس اللي في البيوت يوم الإضراب البلطيجة بقوا كتير مش قلة و ده شئ محبط قوي يا منذر و الله يعني زمان الظلم كان عن طريق قلة دلوقتي الظلم من ناس كتير مش عارف بجد حلها أية بس الواحد بيخبط و و إن شاء الله مش هنيأس و إن شاء الله ربنا مش هيخذلنا طول ما بنحاول

رفقة عمر said...

عارف رئىس الوزرا بىقول لازم نواكب الاسعار العالمىه
فساله المذىع طىب لازم كمان المرتبات تواكب الاجور العالمىه
رد وقال مش ىنفع علشان التضخم
شوفت البرووود

kol-eldonia said...

د 6 ابريل يعتبر تغير كبير بسبب انتشارة الكبير شوف الفيس بوك فى قد اية عن 6 ابريل شوف الجرايد شوف حاجات كتير التغير فى الاجتماع و القدرة على الاتصال

حزيــــــــــــــــــن said...

واضح انك متأثر اوى ودا باين على اسلوب كلامك ... حاسس انك عايز تخرج عن هدوءك وادبك وانك عايز تشتم ... انا حاسس انك نفسك تكون قليل الادب ولو لساعه واحده تشتم فيها كل اللى انت مخنوق منهم بكل الشتايم اللى فى الدنيا وبعدين ترجع مؤدب تانى
بس اصبر هانت
موضوع البربور اللى انت ذكرته دا انا حاسس انك قتبسه من كاتب او كاتبه ما ... عموما فى كل مره بدخل مدونتك بازداد اعجابا باتجاهك فى الكتابه
ابقى طمنى عليك
صاحبك احمد مهنى

حمادة زيدان said...

حبيبي منذر
أكبر حاجة طلعنا منها من الاستفتاء أنه الشباب المصري قادر على التغيير , وهى فكرة واتنفذت والعالم كله عرفها ... يعني أحنا كشباب لو عندنا الحماس ممكن نغير حجات كتير في الشعب المصري , وعموما هى تجربة ولازم تستمر إلي النهاية

أنا وصاحبى said...

انا جاى اقولك الف مبروك صغيرة كده وعلى جنب لحد بس مانتقابل
ولما نتقابل ان شاء الله هبقى اعلق على اخر بوستين عندك
ـــ
اخوك احمد البوهى

أنا وصاحبى said...

على فكره كلمة تيييييييييت دى مشهورة من زمان
وفى راديو اسمه راديو تييييييييييييت
ولو على الشتيمه هتلاقى عندنا شتيمه بس من نوع مختلف
غير اننا نغلط فى حد
لأ هنشتم بالذوق
تحياتى
ياريت لو تعمل موقف جدعنه وتبعت لكل اللى عندك على الفيس بوك تقولهم على المدونه الجديده

سكوت هنصوت said...

الكلام ده انا عارفاه كويس :-)))

والمجموعتين دول انا عارفاهم برضة

بس ايه الي حصلك يا منذر...لغتك بقت غريبة

الي حصل في منذر الحساس الرومانسي

منذر بقى بيقول بربور ويخوزقوه و يشتم بالأب والأم!!!!


ممم...لا ادرى لما افتقد منذر القديم

و ان كنت معجبة بنشاطك التدويني الجديد

مصطفى محمود said...

انت قريت بيان مجموعة تضامن ؟


الناس هى الطريق

انكسارات .. احمد البوهى said...

خليك معانا بقى شوية
وربنا يقدم الى فيه الخير
ــــ

مدونات مصرية للجيب
ــــ
عنوان الجروب عالفيس بوك

Anonymous said...

بجد ساعات بحس ان الشعب ده مات و مش هيقوم تانى

بجد اللى بيحصل كتير اوى

و الناس اغلب الوقت ساكته

!!!!!!!!!!!!!!!!!!!!

لازم يفوقوا عاشان لو جه نظام تانى حررنا من الاولانى هتفضل نفس المشكله

ان مش احنا اللى عملنا الحريه و التغيير

القاهرة - said...

منذر وحشنى جدا
اخى منذر لك فى قلبى منزلة
يعلمها الله وحده

اخى منذر لما أشم رائحة اليأس فى كلماتك
ان شاء الله الخير أت والنصر لنا
ثقةويقينا ايمانا بالله لا حلم
حبيبي ابشر

ما ضاقت حلقاتها الا فرجت
وكن اظن انها لا تفرج

وكن كالسحاب تنتهج المعالى
لا يضرها نبح الكلاب ومقالع الاوغاد

أخوك المناضل الى بيحيك فى الله / أسامه جابر البشبيشي
صاحب مدونة سجين الحرية

انجلز said...

التغيير اللى انت واحنا كلنا عاوزينه هيجى من ةالناس من غير منحس ولا نشارك فية فكل الاضربات والاعتصامات اللى حصلت كانت نتاج الجماهير ولم يساهم فيها السياسيون الا عن طريق النزول اليها بالبرشوت وخلاص مهمتنا اننا ننزل للناس ونكون معاهكم كتف بكتف بنضالتهم مش نقول دول متغلفين ونرحو نجرى على سلالم نقابة الصحفيين او نقابة المحامين انا شايف ان الفترة دى الناس هتعمل حاجة لان الموضوع وصل لرغيف العيش فهما طول عمرهم ملهمش دعوى بحاجة الا باكل العيش
يزوروا الانتخابات يقولوا ملناش دعوى ناكل عيش يسرقوا بنوك وقروض ملناش دعوى ناكل عيش اكياس دم ملوث ملناش دعوى ناكل عيش اعتقلات بالجملة ملناش دعوى ناكل عيش لكن لما تشيل منهم لقمة العيش هيكلوك وهو ده اللى حاصل واللى لسة هيحصل بس واجبنا اننا نتعلم من نضالات الناس دى مش نعمل من نفسنا صفوة على الفاضى قولك حاجة انا طول عمرى بفخر انى اشتراكى تصور ان عامل عادى علمنى ازاى اتعامل مع الناس اسمة الشيخ كمال وهو شيوعى الناس بتحبة وبتسمع كلامة بس لنة منفصلش عنهم ولكن كتفة بكتفهم ولم يشذ عن مجتمعة