Monday, March 16, 2009

صعبان عليا حالي





صعبان عليا حالي، أغنية شعبية تلاقي جمعة بيحبها

هو مش حالي الى صعبان عليا .. لكن الفكرة الذهبية بتاعة أبناء مصرهي الي صعبانة عليا

كنت بتفرج فى يوم علي مني .. حد يسالني ويقولي مين مني .. طبعا مني الشاذلي .. هو فيه ميت مني يعني .. ومني الشاذلي دي بالنسبة لي هي الست .. لانها ست بما تحمله الكلمة من معاني وعبر وعظات لأي ( إمرأة) أخري يدور بخاطرها أنها ست

المهم مش هاطول علشان لو مراتي فى يوم من الأيام عرفت طريق المدونة ماتخنقنيش .. أصلها قربت تكره مني وقناة دريم كلها والساعة عشرة كمان
فلما بتيجي الساعة عشرة من هنا ألاقي البيت اتقلب من هنا، وفجاة أحس انى بقيت فى كافتيريا ينزل شوب بيبسي بالتلج مشبر .. أقول قشطة هاتبقي سهرة زي الفل مع مني .. تكتم غيظها وتجيبلي باكو شمعدان الشبح ... يا عيني يا عيني .. تاكلهولي يا سلام يا سلام .. بعدين فجاة تقولي انت كلمت عمو النهاردة .. أقولها آه طبعا .. طب سألت علي ماما .. أقولها ليه هي عيانة.. هي بتعيا أبدا .. تجز علي سنانها وتقولي مش مامتي انا مامتك انت .. أحرج كده وأقولها وماله نكلم الاتنين .. جبرا للخواطر ودفعا للشرائر.. عبال ما أكلمهم ألاقي معلقة أيس كريم فى بوقي و وفجاة ألاقيها بتقولي الله الفيلم ده حلو قوي ده الى مش عارف بيحصل فيه ايه وايه فى لحظة وثانية ألاقي القناة اتقلبت علي أي قناة أفلام أجنبي وكان الله بالسر عليم



نرجع لمني وف يوم خطة المدام بائت بالفشل الذريع نظراً للنفاذ السريع للحاجات الحلوة، لقيت مني مستضيفة دكتور فى الجامعة وكام شاب لووز بيتكلموا عن حركة جديدة اسمها مش عارف حركة 14 فبراير .. مصر أولا .. و المؤسسين ليها زعلانين من الناس الى طلعت فى مظاهرات ضد مصر أيام حرب غزة، وكلامهم موجه ضد الإخوان بالأساس ، ورافعين شعار مصر أولا، وهو شعار حق يراد به باطل من وجهة نظري ، المهم لما اتكلموا كمان مع مني حسيت انهم بيتكلموا فى امانة الشباب فى الحزب الوطني مثلا .. نفس البوئين ونفس الشعارات ونفس الخطاب بتاع الحزب الوطني المعادي للمعارضة ومصدر الاخوان فى الوش

المهم وانا بتفرج حسيت بحسرة، ان فكرة فكسانة زي دي تطلع مع مني، وفكرة تانية زي أبناء مصر تتاقل بالدهب يتردم عليها بالتراب من أصحابها، لو اتعرضت الفكرة دي فى منبر زي ده كانت لمت مريدين بالمئات علي الأقل، لكن احنا أصلا ماكانش هدفنا نطلع فى برامج .. كان بس هدفنا اننا نشتغل من سكات مش جنب الحيط لا ده جوه الحيط وماحدش يسمعلنا حس علشان نستمر، وفعلا عملنا شغل حلوقوي، الفكرة كانت تستاهل والناس يستاهلوا ان الواحد يشتغل معاهم ويعرض نفسه للخطر علشان خاطر الفكرة الذهبية الى آمن بيها والى فى الآخر أشوف فكرة زي دي بتتعرض مع مني ويتقالي من عضو مؤسس وعزيز فى أبناء مصر لما قلتله هل عملت كل الى نفسك فيه فى أبناء مصر رد وقالي بعدم اكتراث لا طبعا .. بس فى النهاية أبناء مصر دي مظلة زي أي مظلة وهلاقي مظلة تانية أشتغل فيها

رحت قلبت مني وقلت لمراتي تجيبلنا طبقين جيلي بالموز واتفرجنا علي فيلم غباء فى غباء لجيم كاري ع الفوكس موفي

7 comments:

No Fear said...

السلام عليكم
من دواعي سروري إني الأقيك بتكتب أساسا بجد حاجة مستغربها اساسا
بس جميلة قوي
الحمد لله انا حاسس إنك فعلا أحسن دلوقتي
.
المهم علشان أبناء مصر تعرف أنا فرحان قوي باللي بيحصل لكم دلوقتي قوي و فرحان أكتر إن معظمكم بدا يفوق تاني إن شاء الله و عند عودة أبناء مصر تاني قريب زي ما أنا حاسس هأنضم لكم إن شاء الله
طبعا أنت عارفني في كلمتي سيف
:)
سعيد كمان إنك في كل بوست لازك تجيب سيرة أهلي مش فاهم ليه و دايما بتشكر فيا الحقيقة الناس هتاخد فكرة مش تمام عني ياتتكلم خير يا تسكت
.
أخيرا بقة علشان رغيت كتير
نفسي بقة كمان في اليوم اللي أشوف تعليق من المدام هنا بقة
يبقي كده فل قوي
سيبك من أي حاجة مش في الصميم ها فاهمني
سلام

مـحـمـد مـفـيـد said...
This comment has been removed by the author.
مـحـمـد مـفـيـد said...
This comment has been removed by the author.
مـحـمـد مـفـيـد said...
This comment has been removed by the author.
مـحـمـد مـفـيـد said...

وانا اقول النهارده مالي حد بيجيب في سيرتي اتاري جمعه مقطع فروتي هنا
:))))))
عارف يا منذر بجد
وقلت لك كده يومها
قلت يا الف خساره

علي فكره تم ابلاغ المدام بعنوان المدونه
وجاري الاعداد للاكياس والسكاكين

طيب انت دورك فين لما كانت المنظومه بيتردم عليها من اصحابها
مش كنت احد المؤسسين فيها
هان عليك الحلم كده ؟

عبقرينو said...

السؤال الأخير من مفيد هو اللى محتاج إجابة صادقة منك ومن مفيد ومن كل عضو من اعضاء ابناء مصر المؤسسين والمنضمين حديثا ولا مجال لأعذر من اى نوع لأنه كما قلت يجب المخاطرة والتضحية من اجل فكرة يعتنقا الغنسان
ولكننى اقول لك ايها الصديق ابناء مصر سترجع كموقع بصورة جديدة كما وعدنا قرائنا ومتابعينا على الانترنت قريبا الجمعة القادمة كبث تجريبى مع نهاية شهر مارس كبث يومى ومحدث بطريقة مستمرة هذا بجهد ومتابعة بعض من ابناء مصر القدامى والمنضمين حديثا

Anonymous said...

شكراً للانامل ياابو منذر
قلبت علي المواجع