ريس مصر مسجون فى قصر

تحديـــــــــــــــــــــــــــــــــــــــــــث

أوعاك تحلم انك تكون ريس
وخصوصا ريس لمصر
لازم عقلك يميز
ان ريس مصر محبوس فى قصر
والسجان هو الحرس
والحاشية ماسكاله جرس
لو لف يمين ولا شمال
يجيله عسكرى راكب فرس
وهو مخنوق بالأغلال
وتشوفه تقول شيال
من القميص الواقى
فاكر مشنقة العراقى
وهو ده الباقى
انه يعيش جوه قفص
* * *
عمرك شفته على قهوة
طب امتى شفته فى جامع
لكن أكيد لمحته فى سهوة
وهو رايح أو راجع
مقفلين له السكة
كأنه راح يفتح عكا
وهو اطرش ومش سامع
مش لاقى راحته ولا حتى فمكة
وشرم بقت فيها مواجع
* * *
طب ياعم ماتروح سيما
ولا اضربلك أكله فى مسمط
ولا ده كمان مش قيمة
وآل ايه كل متخطط
طب ماتنزل شبرا الخيمة
وقولى على طعمية ام نعيمة
ودوس فى طبق كشرى متظبط
وحلى وراه ببسيمة
* * *
آخر مرة اتمشى ع الكورنيش
أكيد كان من زمان
طب امتى راح الحسين
من غير لا غفر ولا تقفيل ميدان
لو راحها ... الدنيا هاتتقلب
والى هايقعد هايضرب
خليه يروح لبنان
ويشوف الوزرا ويا الغلمان
من غير لا حرس ولا تقفيل ميدان
* * *
لكن لو فيه محبة
ونزلت بيها الحسين
هاتلاقى الناس ع الصفين
فارشة الأرض ليك مربى
والى يقولك خد حجرين
والى يعزم بكوبايتين
ومش هاتفرق بين جرجس وحسين
وكل الناس ليك حرس شخصيين
ومش هتلاقى امان غير وسط المصريين

أنا جالى المعنى بتاع العصيدة ده أو الخاطرة ه، فى يوم كان عسل قوى قضيته صح،

كنت أنا واصحابى، ع الصبح فيه ناس ضربت طعمية من عند ام سماح ، وفيه ناس ضربة كبدة وسجق من عند تلوث القذر

وفيه ناس ضربت ساندويشتات ديناميت من عند جاد (بيض وفول وطعمية وبطاطس ومسقعة)

وبعد ما قعدنا شوية فى الكلية، جه معاد الغداء وقعدنا نفكر نروح فين ونيجى منين، طبعا ماكانش فيه أحلى من بيبيتو الى فى باب الشعرية، ضربنا طاواجن لحة بالبصل وبطاطس فرن وروز وسلطة ، وبعديها كان لازم نحلى ، فرحنا على القبيصى الى فى غمرة ضربنا مانجه لوز لوزجى مالاوز

وبعدين رحنا على شقة واحد صاحبنا فاضية مهجورة نمنا وارتحنا شوية، ونزلنا على بليل، وطبعا مافيش أحلى م الكورنيش

وطبعا الكورنيش اشتكى م البرم واللف، وركبنا الأتوبيس النهرى بس المميز آه مش أي حاجة أبو خمسة جنيه

وطبعا طالما كنا فى وسط البلد يبقى لازم زيارة لأبو طارق، والدقة شعشعة معانة أوى

طب نحلى فين كان لازم زيارة للعائلات الى فى سفير طبق فواكه حمصانى بالأيس كريم، وناس ضربة بوريو، وفيه ناس أخدت من عند أبو حمامة حاجة خفيفة كده، مولوتوف رز بلبن عليه بسبوسة وكنافة ـ والله جعت ـ وعليه قشطة ومكسرات

جاتلى الخنقة لما واحد رزل وقال أنا عاوز آكل أيس كريم من عند قويدر وطبعا كنا لازم نعدى على القصر، وبعد نظرة طويلة وعميقة للقصر

بجد حسيت أنا مميز جدا وسعيد جدا وفرحان جدا جدا جدا انى مش ريس ولا أبويا ريس

أخيرا بطلب منه انه ينزل للناس الحقيقيين للجامعات ، للمستشفيات، للمصالح الحكومية لأقسام الشرطة،

ينزل الميادين والشوارع والقهاوى والقرى والنجوع ويتمشى بعربية 28 علشان مايلفتش النظر ليه ويوشف أحوال البنءادمين الى بيحكمهم

علشان هو مابيشوفش غير سواقه الغلبان ولا الطباخ، وده طبعا بالنسبة لينا صاحب نفوذ واسع جدا، سواق الريس يا جدعان

الخلاصة عاوزه يبص على الناس بعينين مواطن مش بعينين التقارير

الطلب ده مش ليا انا ده ليه هو

تاج لوز لوزجى مانجالاوز

جالى اول تاج يا جدعان من ساعة ما قلنا يا تدوين، ومنشكح بصراحة على الآخر واتأخرت فيه لأن كنت بحضر لحاجة عن معتقل برده للاخوان وهو مدون محترم الأستاذ عبد المنعم انا إخوان ربنا يفك أسره، وجالى كمان من مين من اختى العزيزة سارة وبجد بشكرها جدا جدا جدا وأنا أول ما قرت التاج كنت باحسبه زي التاجات العادية ده؟، طلع تاج لوز لوزجى مانجالاوز

بس ربنا يسهل ونعرف نرد عليه

التاج بيقول، .....ماذا استفدت من حمله اعتقال االاخوان الاخيرة........
هل استفدت معنوياكسبت اصدقاء جددعرفت حاجات مكنتش عارفهايعنى حاجات من دى؟؟؟؟؟؟

أنا أرى إن الأخوان يحملون هم وقضية وعبئ عظيم على أكتافهم وهو الإسلام السياسى ليس بمصر فقط ولكن فى العالم كله، فهو التنظيم الوحيد السلمى الذى يحمل هذا العبئ ويحاول تطبيقه فى سائر أنحاء العالم الإسلامى، وأيضا يتمتع بحضور فى الشارع حضور عظيم جدا،

المطلوب منهم، تقديم بديل إقتصادى إسلامى للنظام الاقتصادى القائم يشمل تقديم بديل للنظام المصرفى والضريبى والجمركى، حل مشكلة البطالة والتصنيع والزاعة وغيره. يمكن الإستعانة بخبراء الإقتصاد الإسلامى ودراسة رسائل الدكتوراة والماجسيتر والبحوث التى قام بها الباحثين والتى تقبع فى غيابات الأدراج لا تجد من يطبقها

نظام حكم إسلامى وانا أعلم أن الإسلام لم يحدد نظام معين سواء كان جمهورى او ملكى أو برلمانى فعليهم وبمساعدة العلماء وأساتذة الجامعات المختصين بتقديم نظام حكم يكون فى إطار مبادئ الشريعة الإسلامية الغراء من شورى وعدل ومساواة وخلافه، وأيضا تحديد منصب المرشد من النظام الجديد،

مذا سيفعولن بالتعليم ما هي خطواتهم للارتقاء بالعلم والتعليم والمتعلمين والعلماء والباحثين

إقامة عقد إجتماعى جديد، تسود فيه روح الإسلام الحقيقة مثل المساواة والحربة والعدل والحق والسلام والأمن وغيره

والإخوان يملكون ولديهم وكثير من العلماء ممكن الإستعانة بهم لعمل هذه الخطوات وتقديمها لعامة المسلمين فى مشارق الأرض ومغاربها، وليرى العالم كله أن الإسلام، لديه من المقومات ما تمكنه ليغير أحول كثيرة

طبعا الى بيهاجم الإخوان والى بيهاحم برنامج حزبهم بيقول انهم هايجبروا الستات على الحجاب وهايجروا ورا الى مابيصليش بعصاية فى الشارع، وهايتبدوا بالحكم، وهايبهدلوا الأقباط، وهايدخلوا مصر فى حروبوهايعملوا عداوات وهانعيش فى جحيم، لكن الحقيقة انهم مابيفكروش فى الفرعيات ده، لكن بيفكروا فى النقاط الى انا اتكلمت عليها من اقتصاد وسياسة وتعليم وامن وسلم اجتماعى مثل هذه الأشياء أهم، لأن متى تتحقق هذه الأشياء وينشغل الناس بالعمل ، لن يطفوا على السطح هذه الانحرافات وستزل مع نفسها

وأتمنى عند نشر البرنامج الحزبى للإخوان ان شاء اله أن يشتمل على هذه النقطا الهامة، وأن يستعينوابكل الفئات من كل الجنسيات وكل التخصصات وألا يتسرعوا فيه، لأنه هايكون يقظة جديدة للإسلام والمسلمين

حملة اعتقالات أي فئة من الناس بمجرد انهم يحملون هم او فكر او عقيدة أو أيديولوجية معينة ، ده كفيل انه يجمع كل الناس حوليهم، فمابالنا بأناس يحملون قضية عظيمة مثل الإخوان ويعانون ما يعانونه من أيام الاحتلال حتى الآن، وفعلا كثير من الناس ممكن نختلف معاهم لكن عند الاعتقالات ده الكل بيتفق على رفضها جملة وتفصيلا

وفى النهاية بعد التاج الدسم ده من اختى سارة، و اوديه

إلى الريسة إيمي رئيسة جمهورية إيمان

وإلى المنتصرة دائما الأستاذة انتصار وهى من المعلمون الأحرار

وإلى كتابات الأستاذة القديرة نيفين عمر

وإلى حبيبى وصديقى الأستاذ محمد مارو فى كلام وفش غليل

وإلى الأستاذ المتميز والجريئ جدا ابن بهية

وإلى الأستاذ المحترم محمد مفيد فى الصميم

أنا إخوان حتى إشعار آخر

وقع فى مدونة انسى للتضامن مع عبد المنعم وجميع المعتقلين

أقدم هذه القصيدة للأستاذ عبد المنعم ، ولكل الإخوان المسلمين ولكل المدونين

المحترمين، وأدعوا الله تعالى أن يفك أسره وأسر جميع المأسورين

أنا إخوان حتى إشعار آخر

أنا م الفرسان
متضامن مع الإخوان
أنا إخوان
معاهم ضد الشيطان
كلنا إخوان
ضد الظلم والطغيان
ضد القهر والعصيان
إحنا إخوان
عباد الرحمن
أنا نفر مسلم ... م الإسلام
مع أخويا عبد المنعم... القبطان
خلف القضبــــــــــــــــــــــــــــــــان
ده مش زي ابن عامر سليمان
أنا إخوان
ومش هاكون تانى غفلان
ومش هاسكت على السجان
أنا إخوان
ومابقتش زي زمان
ولا هافضل علطول جبان
ولا هارضى بالهوان
أنا إخوان
اسمعنى لحسن يجيلك طرشان
احذر .... صرختى هاتوصل كل مكان
ده مكاننا بره القضبان
والسجان هو الخسران
أنا أخوان
أنا كسبان
أنا إخوان أنا إخوان وكلنا أعوان
ضد السجان... ضد السجان
ضد الشيطـــــــــــــــــــــــــــــــــان
أنــــــــــــــــــا إخـــــــــــــــــــــوان

مش ده المصرى الأصيل

سيب نفسك للغضب
وعيش الحياة بالحرية
ده انت من بنى العرب
وحفيد جيل الفرسية
لا ترضى أبدا بالتبعية
وتعيش فى الدنيا ذليل
مهما كانت الدنيا غالية
ده انت برده ابن النيل
عمرك عشت بحرية
ولا رضيت بكونك ذليل
مش ده بجد امنية
ولا انا عقلى أصبح عليل
هو طريقها مش معروف
ولا تكونش عاوز دليل
انك متهان ومضروب ومش ف البال
ولا تساوى عندهم أوسخ نعال
ده انت ع القسية حمال
هو انت ايه الى قعدك بس جنب الرجال
روح يا أخويا وربى العيال
وشوف الى ذاكر ولا الى سقط
ولا استنى لما يطلقوك من منال
ما هو ده الى ناقص انهم
يجوزوا مراتك وانت تبقى شاهد
ع العقد ويا المأذون تبقى ارسال
هاتقولى على جستى ده انا راجل
يعنى لو جه اليوم ده هاتتحرك
آه هاتحرك وهازيط
هو انت فاكر لما يحرقوك ولا يغرقوك
مش كده بيبقوا بيستغفلوك
لا طبعا هو أنا عبيط
مش برده لما يغلوا اليهود ويرخصوك
مش يبقوا كده كانهم لامؤاخذة ظبطوك
لا مش قوى كده ... هو انت ليه سليط
الله ماشفتش عملوا ايه فى الكبير عماد
ولا ماخدتش بقالك من العصاية
لو انت مكانه يا ضناية
مش كان زمانك مجنون فى السراية
ايه... هيا وصلت لغاية كده
آه ...روح البس مع الى لبس العباية
واوعى تقعد تانى معايا
خليك قاعد جنب الولايا
ده لو رضيوا بيك يا قُلة من غير قنايا

سيبوهم لحسن تولع اكتر ماهية مولعة

الدستور اتعدل ليه (المادة 5) ، ايه الفايدة الى هانستفيد منها او مصر هاتستفيد من إقصاء التيار الإسلامى المتمثل فى الإخوان المسلمين، تخيلوا كده معايا، المادة الخامسة من الدستور اطبقت وحبسوا أعضاء مكتب الإرشاد وكمان أعضاء الجماعة والكوادر وطلبة الجامعة وماخلوش، وكمان أخدوا فلوسهم، وحرقوا كتبهم،

مش ده بجد الى هما عاوزينه، هما عاوزين حاجة أكتر من كده، ايه بقى الى ممكن يحصل؟

باختصار شديد هايبقى فرصة للتيار الإسلامى الجهادى الذى يفسر الجهاد على هواه ليس بجهاد النبى (ص) والصحابة وجهاد الدعوة والنفس وجهاد المحتل والغاصب ـ وأقصد بالجهادى هنا الموجه إلى صدر أخوك المسلم أو شريكك فى الوطن الغير مسلم فى الوطن المسلم ، وليس الجهاد فى أرض مسلمة محتلة مغتصبة على أيدى محتلين مغتصبين فى كافة أرجاء العالم الإسلامى ـ الفكر الذى يعتبرونه جهادى هايكون الجهادى الفردى الى مش منظم العشوائى انه ينتشر، يعنى الخلاية الصغيرة الى ماتمكنتش منها قوى الأمن فى حلمتهم على الجماعة، هايتحول الجزء الأكبر منها إلى استخدام العنف، ودول ولا منظمين ولا عندهم لا فكر ولا عقل حكماء الجماعة ولا يحملون الإسلام الصحيح ـ ويوجهون جهادهم لا إلى المحتل الأجنبى بل إلى أركان السلطة أو أفراد المجتمع الإسلامى على حد سواءـ كل الى بيحكمهم العواطف والانتقام، وكمان هايكونوا شايفين ان الى مشى سلمى ماكسبش لا ده خسر واتسجن ولا اتشنق واتاخد فلوسه، فموته بموته بأه،أموت زي ما انا عاوز مش زي ما هما عاوزين، وكمان هايبقى ليهم شركاء من أبناء الى اعتقولا او استجنوا دول وصحابهم وقرايبهم وجيرانهم وأي حد عرف قصتهم هايتعاطف معاهم كمان، ومش هايكون فى جماعة بتضم ناس لا ده هاتبقى ناس وبتضم جواها جماعة، بمعنى ان الشخص فى حد ذاته تنظيم، ومش هايستنى لما يعمل تنظيم كبير، ولا هايحب ينضم لأي تنظيم لأن مافيش غير تنظيم العنف والقوة، الأشخاص دول هايتحركوا فى كل اتجاه ومع أي شخص وتحت أي راية مدمرة.

ندى أمثلة طالب هندسة الزقازيق الى فجر نفسه فى الأزهر لا تبع الاخوان ولا سافر أفغانستان، ده شاب عادى جدا متدين تدين برده عادى، يقال انه تراسل مع أعضاء من القاعدة أقنعوه بأفكار معينة وتعلم ازاي يصنع متفجرات، وتحرك لوحده ولا حاول يعمل تنظيم ولا غيره، ونفس الموقف ده مع بنتين بتوع أتوبيس السيدة عائشة، أنا شايف ان ده أخطر من تفجيرات شرم الشيخ، لان ده كانت ممكن تجهض لو فيه استنفار أمنى قوى، وكان من السهل اكتشافهم لأنهم بيتحركوا فى سلسلة بشرية متتالية ممكن يكون فيا أكثر من ثغرة ممكن كان يتكشفوا من خلالها، أما الشاب ده لا ملاحق ولا مراقب وقدامه أهداف سهلة وعناصر بشرية كتيرة، ومتحرك أكثر، ومن ناحية التكنيك فمن الممكن أن يتطور فى المستقبل، (نسال الله العفو والعافية).

أنا شايف انى لو أنا مثلا باحمل فكر اسلامى وعاوز أعبر عنه، فعندى جماعة الاخوان جماعة معتدلة تنبذ العنف والإرهاب، متفهمة اللعبة الديمقراطية كويس، أقدر من خلالها ومن موقعى خدمة الإسلامة، كطالب وكتاجر وكموظف، وهما هايقدروا يوجهوا تفكيرى وجهدى وحماسى ده كويس لخدمة الإسلام والوطن والجماعة، أما لو عندى حماس ولقيت حماسى ده مافيش متنفس انه يشوف النور يبقى هاكون صيدة سهلة للفكر الجهادى العنيف الموجه لصدر الوطن لا لصدر المحتل ، او أي فكر يستخدم حماسى ده للتدمير لا للبناء والتعمير.

أخير أقول يتعامل المسؤولون المصريون مع كل اجناس وديانات الأرض الملحد والمؤمن الضال والمضل والهادى مع كل الأصناف والأجناس والألوان، حتى تعاملوا مع أعدائنا، ياريت يتعاملوا مع اخوتهم المسلمين المصريين، ده أحسن ليهم ولينا ولمصر.

هما عاوزين ايه بالظبط؟

الطبخة كانت فى أواخر عهد كلينتون وباراك، جابو ياعينى أبوعمار وزنقوه فى كامب ديفيد، وقعدو واحد من هنا وواحد من هناك لإسقاط باقى ثوابته الى أصلا معظمها سقط من نفسها من زمان،وهى التنازل عن حق العودة والتنازل عن القدس وغيرها، لكن الحمد لله الراجل ثبت ورفض وقاوم كل الضغوط الى مارسوها عليه، بعد كده جه شارون الملعون وعمله عملته المشهورة بتدنيس المسجد الأقصى ومعاه ألفين جندى احتلال إسرائيلى، وكان فى نفس الوقت كان بيسلم كلينتون مفاتيح البيت الأبيض لبوش، وسلم معاه نصيحة ان عرفات ده لا يمكن التعامل معاه، وإنه عقبه على طريق السلام، من الآخر انه دوره انتهى، فى نفس التوقيت الفلسطينيين قاموا بالانتفاضة الثانية، وشارون الملعون كسب الانتخابات وبأه رئيس وزارة، ودخل جامد وفاتح دراعاته وقال هاقضى على الانتفاضة فى 100 يوم، وأديه هو صابه الى صابه والانتفاضة مازات مستمرة، المهم،كانت جت احداث حداشر سبتمبر ، الملعون شارون وصّل لأمريكا الى هي أصلا عاوزه يوصلها كلامه ان ماتتعرض له أمريكا تتعرض له إسرائيل، وانهم بيحاربوا نفس القوى الإرهابية.
أمريكا فاقت من الأقفا بتاع سبتمبر، وإسرائيل ماقدرتش تعمل حاجة فى الانتفاضة، والمقاومة الإسلامية حققت نجاحات عظيمة داخل الخط الأخضر، وجه وقت الى بيقولوا عليه العملية السلمية، حصل ايه؟ شارون قال مافيش شريك فلسطينى ممكن اتكلم معاه أو أجلس قدامه على طربيزة واحدة، وطبعا كان أبو عمار كل ما عملية استشهادية تحصل يقوم ويندد ويشجب ويستنكر، واتحاصر فى قودة النوم بتاعته، وماباقاش يخرج من باب المقاطعة، وأشقائه سابووووووه، وماقدروش كالعادة يفتحوا بؤهم، ماعلينا، بعد الرغى بتاعهم انه مافيش شريك مافيش شريك، الراجل قال يعمل منصب رئيس وزراة علشان يبقى زي ما هما عاوزين يبقى ديمقراطى، وبردوا قعدوا يغلسوا وشالوا جيلو (عباس) وحطوا الجوهرى (قريع)، وجه الملعون وقال انه هايعمل انفصال من جانب واحد.
عرفات مات الراجل اتسمم أو اتقتل م الآخر خلصوا منه، بصوا بأه الحركة ده ، كان سبحان الله فى نفس الوقت شارون الملعون كان بيتكل هو كمان، المهم (بوش ايست وود) أمر انه لابد وحتما انه يكون فيه رئيس السلطة الفلسطينية يكون منتخب انتخاب حر، بسم الله ما شاء الله ، الانتخابات جابت محمود عباس، منتخب وانتخابات حرة ونزيهة كانت حماس قاطعت الانتخابات ده، حلو لغاية كده، دلوقتى يهى بوش رجل سلام وشارون رجل سلام ومحمود عباس رئيس سلطة منتخب انتخابات حرة ونزيهة وديمقراطية ورجل سلام برده، والكل جاهز انه يطبق أي حاجة، كانت أي حاجة يجيبوها كان ممكن يطبقوها وقتى،
جم وقالوا ايه لازم يكون فيه رئيس وزراة وانتخابات نيابية حرة، بص الشقلبة ده، جت الكونديسة ليزا للمنطقة وقابلت القيادات الإسلامية المختلفة، سواء اخوان فى مصر أو أيمن نور، ويقال انه قابلوا أعضاء من المكتب السياسى لحماس، وقالت كام تصريح انه الإدارة الأمريكية يمكن أن تتعامل مع الإسلاميين طالما انهم منتخبين ديمقراطيا، الناس كلها تشجعت ودخلوا العملية السياسية سواء فى مصر أو فلسطين، حماس نجحت فى الانتخابات، وبأه مطلوب منها تشكيل الوزارة، ماتفهمش بعد تشكيل الوزارة الدنيا اتقلبت، ست الكونتيسة بعد كلامها عن الإسلاميين بأوو متطرفين وإرهابيين، وعملوا حصار ومقاطعة ، والفتحاويين قطعوا هما كمان قوالوا احنا مالناش دعو بيكم ، والأخوة والأشقاء العرب ونعم الأخوة وزيرنا المصرى رفض مقابلة الزهار والتانى بتاع الأردن حلقله بعد ما كان فى بينهم ميعاد، ومابقوش يستقبلوه استقبال ديبلوماسى يليق به، المهم الحصار من كله، وباه مطلوب منهم انهم يتنازلوا عن حاجات مش ممكن يتنازل عنها أصلا دحلان، بصوا بأه الشقلبة ده، أمريكا بقت حبيبة فتح وعملت حركة ... بعتت للأجهزة الأمنية وللحرس الشخصى لعباس سلاح، من امتى يا ست أمريكا، واستخدمت ناس زي دحلان علشان يشعلولوها، والمهم حصل الى هما عاوزينه وحصل اقتتال داخلى من اطراف كلهم فلسطينيين كلهم مسلمين كلهم سنة كلهم زي بعض شبه بعض، اخوات وعائلة واحدة اتخانقوا علشان ايه ومين ماحدش عارف، المهم حصل اتفاق مكة وكله دخل جحوره وكله اتكن فى مكانه، وقالت امريكا وإسرائيل والغرب انهم لازم يكون فى حكومة وحدة وطنية تضم كل الأطراف، اتعملت الحكومة ده، وأمريكا وإسرائيل برده رفضوا التعامل معاها، وهددت إسرائيل انها لوحد اتعمال مع الحكومة ده مش هاتكلمه تانى وهاتشتكيه لماما أمريكا،
أنا بصراحة مش فاهم حاجة من الى انا كاتبها ده ومش عارف بجد هما عاوزين ايه؟
هو انا الى فاهمه ده صح ولا غلط ؟
آخر سؤال، ايه الى جاي؟

يا الى على كتفكم دبورة ولا و حداية ولا حتى الغربان ما تنسوش الأكفان

طالب فى الثانوية
وجاب خمسين فى المية
مالقاش معهد ولا كلية
راح جاب واسطة من الى هية
ودخلوه الكلية الحربية
* * *
كان عنده سكر وضغط
وحواجبه بتوجعه
ولا يقدر ياكل بط
ولا حتى يبلعه
* * *
تقوله اجرى ..... مابيجريشى
وعوم فى الماية .... مايجيشى
اضرب بالنار ..... مايصحش
امه تعمل زار العفريت من فقره مايحضرشى
* * *
تلاقيه تخين وبكرش
نضارة كبيرة فى الوش
والصحة م الدخان والدش
ماتسألش
* * *
يقولك دايما هو انت تطلع مين
قوله أنا مواطن
أصل الناس عنده خدامين
أصل الناس عنده معادن
وتشوفوه تقول ولا يهادن
طول بعرض زي الحيطة
مخبى ورا البدلة مفاتن
وهو أصل عيلته عبيطة
وتشوفه تقول ولا باين
أما الذكاء ده عنده صفر
ممكن يجرى ورا طفل
قال ايه فيه اشتبه
أصل حدفه بكوره ولا انتبه
* * *
أما عن حمايته ليك
فيجرى ساعة الجد ولا يحميك
مع إن جسمه ممكن يخبيك
شاطر بس ... يقول للباشا
شبيلك لبيك
عبدك وملك ايديك
نظره عينه تفليك
وشخطته ربنا يعافيك
* * *
يسحل ويضرب ويلطش
بس على مين
والله بس ع الغلبان
اما الباشا والبيه
وصاحب الاطيان
صوته لا يظهر ولايبان
وايديه فى جنبه
واقف ددبان
لا يرمش ولا يحرك جفن
قبل الباشا مايدى الإذن
كل ده عشان الدبورة
ولا عشان حداية وشوية غربان
ايه خلاص بقينا غربا فى بلدنا
ولا ناخدها من قاصرها من غير كلام
وندور على وطن وسط الأوطان
وطن مايعرفش دبورة ولا غربان
وطن يبصلك على انك انسان وبس انسان
لا دبورة ولا سيف ولا غربان