Tuesday, April 7, 2009

ده احنا هانشوف أيام سودا

ليه فشل الإضراب بتاع السنة دي

طب بتاع السنة الى فاتت هل نجح؟
لا مانجحش .. هو نجح فى المحلة لكن فى القاهرة وبقيت مصر كلها ماكانش فيه إضراب أصلا

طب ازاي نجح فى المحلة الى هما عمال وماعندهمش نخب سياسية وقيادات حزبية و لاعندهم نقابة الصحفيين ولا نقابة المحامين ولا مجلس الدولة .. نجح ليه هناك وفشل فى القاهرة؟ الى هي فيها كل الحاجات الى فاتت دي

يبقي الى بيخلي أي إضراب ينجح هما الناس الحقيقيين الى تعبانيين ..مش النخبة ولا رموز المعارضة ولا قيادات الاحزاب
الناشطين أخوهم هايحركوا كوادر تعرف تهتف.. تعرف تصور ... تعرف تكلم ... ممكن يكونوا دروع بشرية .. يقفوا فى الصفوف الأولي علشان يكون شكلهم حلو .. ولما يتسجن الناس الغلابة يبقي فى وسطهم كوادر فاهمة تقدر ترد علي زبالين الشرطة .. لكن الحشو الأساسي هما الناس .. وقود الإضراب هم الناس الى بجد.
طب ليه الناس مش بتتحرك؟
ممكن يكون ماعندهمش مشاكل تخليهم يتحركوا .. ماتخلنيش أقولك كلمة وحشة L

جايز ولو كده يبقي لامؤاخذة كل واحد يحط صرمة قديمة ومايفتحش خاشمه بكلمة

لكن الى يغيظ ان كل الناس مطحونين وقرفانين وزهقانين ومخنوقين وتعبانين وشقيانين وجوعانين ومتبهدلين وقرفانين تاني بس مش بيعملوا حاجة
الغريبة ان اليوم ده أطلقوا عليه يوم الغضب .. علي فكرة الغضب كلمة جميلة ليها وقع ع الودن كده لوز .. غ ض ب كلها حروف سخيفة كده وانت بتقولها تغتضب ولو يوم فرحك
بس الناس مغضبتش ولا حتي عيطت
طب هل الناس مش غضبانة مممكن أقولك نفس الكلمة الوحشة الى فوق علي فكرة ... الناس اكيد غضبانين لكن المشكلة انهم مش بيعبروا عن الغضب ده

يعني مثلا لو مراتك بتصبحك بعلقة وتمسيك بعلقة .. اكيد هاتزعل .. كلنا بنزعل الحقيقة J لكن فى النهاية لازم تاخد موقف .. مش تضرب عن الأكل .. يعني تبقي انت الى شقيان وطلعان تربنتينك وجايب خيرات ربنا .. ومراتك تصبحك وتمسيك .. والموقف الى تاخده انك ماتكلش من الاكل الى انت جايبه .. دي ما هتصدق يا عم الحاج .. نسوان هم انت هاتقولي .. ده انت تبقي راجل لامؤاخذة ... الصح انك تضرب مش مراتك طبعا .. ممكن تقرا المدونة فى أي وقت .. هو فيه حد أصلا يقدر يضرب مراته .. دي تنقطع ميت حته وتاكلها القطة السودة لو حصل كده .. لا أنا قصدي يعني انك تضرب عن مجايب الأكل أصلا

طاخ طيخ طوخ

الناهية علشان مفيد بيقولي اني مش بعرف أكتب وانى بطول فالفكرة بتوه مني
انا كنت موافق ان أصحاب المعاشات يحتلوا ميدان التحرير ومش مهم لو ماروحتش الشغل او اتاخرت ساعة او ساعتين أو حتي أربعة .. وان الصيادلة يقفلوا صيدلياتهم .. حتي لو مالقتش دوا لهيام .. ولو الاطباء قفلوا عيادتهم ماعنديش مشكلة ان أستحمل أي ألم او اغور فى داهية
علشان احنا لازم نطبل أنانيية وضعف وجبن شوية .. يبقي الى مش اناني والى مش ضعيف ولا جبان من حقه انه يطالب بحقه وانا مازعلش لما يعمل كده .. مش المفروض نستني ان الخيرات تتنزل علينا من السما .. ولا نقوم ونصبح نلاقي مبارك عمل انتخابات نزيهة وطلع الناس من السجون .. والى بيسرق يبطل سرقة .. والوزرا والمسئولين المأنتيخن يبطلوا انتخة ويشتغلوا زي بقيت مخاليق ربنا .. ونلاقي الشرطة بطلت تضرب الناس علي قفاها .. وألاقي اختراع جديد بدل البامبرز ويكون مش غالي

لازم آخد موقف علشان آخد حقي

ولازم لما أحس ان فيه فئة من الشعب مظلومة انى أقف جنبها وأساندها بكل ما اوتيت من قوة

مش أسيب الى غرق غرق ولا الى اتحرق اتحرق ولا الي بيتهان يتهان ولا الى اغتصب اغتصب

والله الدور جاي علينا كلنا

والله لا يخدونا من بيوتنا عاطل بباطل

والله لنشوف أيام سودا

يا عالم يا سو

فانا مش هشارك فى أي إضراب غير لما يشارك فيه سواقين هيئة النقل العام ومش مهم الكمسرية علشان بيبقوا رخمين شوية .. وسواقين مترو الانفاق لازم يشاركوا وشباب هندسة وتجار ونظم معلومات الى شغالين فى البنزينات .. والناس الى مخنوقة من ظباط الشرطة لازم يشاركوا .. وطلبة الجامعة لازم يفكهم باه من تامر وحماقي ويركزوا فى هياف وإلياس قصدي يركزوا فى منير واسكندريلا .. ياعم يركزوا فى خدمة البلد ... والعنمل والفلاحين والفقرانين والبوابين والى عندهم عربيات والى بيركبوا مواصلات .. وسكان العشوائيات وهانبقي نضحي بسواقين الميكروباظ ونسيبهم يتخانقوا مع سواقين التاكسي

بس أهم ناس سواقين النقل العام ومترو الأنفاق .... ماهينجحش اضراب من غيرهم

ويالا باه بالسلامة كفاية عليكم كده

6 comments:

طال الليل said...

موضوعاتك أكبر من التعليق عليها غير أنى وفى الواقع أخى حباصة لا أجد مناصا من تشجيع فكرتك

بمناسبة الإضرابات الفئوية أخى الفاضل وبوصفى صيدلانياأنبئك بأن بأن الجمهور يتحرك دوما وراء مصالح ضيقا ويساق خلف شعارات جوفاء وأن محركيه غالبا ما يكونون حنجوريين النزعة

المهم وحتى لا أطيل عليك يوم تبرز لدينا قيادات لها كاريزما شعبية ويتوافر لها الإخلاص فى العمل الميدانى
يومها يمكن لنا أن نتصور عملا جماعيا رفيع المستوى نتوقع له النجاح فى تغيير الواقع المؤلم
ولابد فى رأيى من تحقق مسائل لضمان المشاركة الفاعلة من الجموع المحتشدة حلوةدى مش كدة
أولا شرح المسائل السياسية مربوطة بتأثيرها على الواقع اليومي المعاش للناس فى لغة بسيطة يفهما سواق الميكروباص هداهم الله ووعامل الترحيلات وطالب الجامعة و التاجر الصغير
يعنى الموضوع يحتاج إلى تأسيس وعى جديد لدى العامة بعيدا نضال الأفندية من النخبة قبالة شاشات الفضائيات
لا يهم أن تنقلب البلد رأسا على عقب غدا بل من الصحى ان تتحول لا أن تتبدل فجاءة

مش هطول عليك هاروح أكتب تدوينة مخصوص
وقريب إن شاء الله تنزل قريب واتشرف بزيارتك

حزيــــــــــــــــــن said...

وتقولى مش بتعرف تكتب يا راجل روح
هتعمل الكتاب غصب عنك
--------
على فكره موبايلى اتسرق وعليه كل النمر
مش عارف اباركلك على البت ربنا يخليهالك

سكوت هنصوت said...

يا أخي الي يسمعك بتتكلم عن الستات يقول مراتك مطلعة عينيك

والبنت يا ولداه متبهدله معاك...تجيبلها جيش يتغدى ولا فتحت ببقها بكلمة وكل الي على لسانها...ربنا يخليك يا بو هيام...يا اخي خلي عندكو دم بقى وبطلوا افترا على الستات :-))

________________


عن موضوع بقى الإضرابات الفئوية

فانا معاك قلبا وقالبا

الإضرابات هي الحل لكن الناس لسة ما وصلتش لمرحلة الجوع المطلق

يعني لسة فيه ناس خايفة,والخايف عنده الي يخاف عليه

انا نفسي الحكومة تبجح اكتر...تفتري اكتر

تعمل مثلا اتاوة على المشي في الشارع

واتاوة على الي يقف يكلم الي جنبه

واتاوة على الي ياكل مثلا في عربيته

يمكن ساعتها الناس يبقى عندها دم ويفكروا بقى يتحركوا بجد

يفكروا ان الكل يتضامن مش مجرد اتنين تلاته سخنين

بيتهيألي ساعتها بس الدنيا هتتغير

لما الناس تتوجع بجد

مش كده وكده

ولم بقى نفسك في الكلام عن الستات بدل ما ابعت للمدام لينك المدونة وانت عارف الي فيها (وش بيغمز بشررررر )

يا مراكبي said...

وأنا من موقعي هذا وبعد قراءة البوست الإيجابي جدا ده ومن خلال خبرتي بسلبية الشعب المصري أقدر أؤكد ليك إننا هنشوف أيام كحلي

أسما عواد said...

يا عالم ياسو
أنا كنت بدور على ناس أكثر مني تفاؤل لكن الظاهر انو مفيش أمل
أهرب من غلبي وأروح على فين ليالينا السودا في كل مكان
مع الاعتذار لام كلثوم
الله يرحمها لو كانت عاشت اللي احنا فيه مكنتش عرفت تغني أمل حياتي
شكرا لترسيخ الحالة

احمد الجيزاوى said...

اولا وحشنى كتير
يا ندل الجواز خباك وله ايه
طبعا الاضرار فشل بثلاثه
والايام اى جيه ميعلم بيه لا الله
ربنا يستر
احمد الجيزاوى