افيونتي اليومية .. جبهة التهييس الشعبية

علي فكرة أنا فيا شئ لله كده، كنت حاسس انهم هايلغوا حاجة فى البلد ... وكنت حاسس انهم هايلغوا الشعب .. بس الحمد لله عدت علي خير ... المرة الجاية يبقوا يلغوه علي رواقة ... هما بحمد الله وباحمد عز مفجر ثورة التوريث الى أبوه لسه ميت من يومين، لغوا الانتخابات قصدي لغوا الترشيح علي الانتخابات ،، ييييييي هما لغوا حاجة كده مش مفهومة بس متعلقة بالنخاع الشوكي بتاع الانتخابات

وأهو الراجل جابها من الآخر علي كبر أهو .. وقال ايه احنا الى كنا خايفين يتقلب ويسيبنا لجمال ... كده نطمن انه هايدفنا كلنا ابن اللذينه ده، وبأه مجلس الشعب كله حزب وطني ونسوان لا معارضة فيها ولا اخوان والله حلوة والله وايه ... ومن غير تزوير أصل البلطجة والعنف وتسويد الورق والحاجات دي كلها الى حصلت لا تؤثر علي العملية الانتخابية تؤثر فقط علي القب والجاهز الهضمي والتنفسي ... امال ايه الى ممكن يؤثر نفسي اعرف ... والكلامنجية يقولولك ده الحجم الطبيعي للاخوان والمعارضة والحاجة الساقعة فى نفس الوقت لا ونسبة المشاركة حاجة وتلاتين فى المية من 40 مليون قفا هههههههه

واكبر قفا هو السيد البدوي صعبان عليا قوي .. وشباب الاخوان الى تعبوا وعدوا علينا فى البيوت صعبانين عليا برده ... ومحمد مفيد صعبان عليا وهو رايح ينتخب ويبطل صوته مراقب اللجنة يهبشه ويقوله مش فيه ناس أولي بالصوت بتاعك ده .. مال اهلك انت هو انت صحيح هاتفهم احسن منه .. فعلا تلامة وغتاتة المصريين مش علي حد أبدا بس هو السؤال التاني ليه الناس ماتقفش الفلوس من المرشحين وينتخبوا حد تاني ولا بيحصل كده فعلا والحزب الوطني هو برده الى بيفوز .. لا دي أنا أقع فيها والله مش ممكن يعني توصل لكده سحر يعني ولا ايه

واحمد عز يقولك اهم حاجة فى الانتخابات هي خطة مواجهة الاخوان .. هو انتم محتاجين خطة ولا نيلة ... ولا كان ليها لازمة الزفة الزفرة بتاعة الدي جي ووجع القلب والازعاج والخايلة الكدابة فى العيد الكبير واليفط والمصاريف ... ده من غير يافطة واحدة .. من غير يافطة واحدة ممكن تعملوا الى انتم عاوزينه .. يالا تتعوض فى الانتخابات الجاية انشاء الله يديكم انتم طولت العمر احنا ممكن نتشل فى استفتاء الرئاسة السنة الى جاية ، طب ما نعملكم توكيل عادي يعني مافيهاش حاجة ولا بالاش خالي البلد تاخد اجازة يوم من نفسهامن وجع قلب وزحم المدارس واهو رزق برده .. امال البلطجية الغلابة ياكلوا منين والحرامية المساكين يشتروا مطاوي منين نفسي افهم .. حد يفهمني الى حصل ده حصل ازاي .. بس عادي عادي اربع فرخات ودجاجة وماحدش فاهم حاجة مقطع من " اغنية سعد حاحة اغبياء عين شمس"

سؤال صغير كده الجيش بتاعنا فين والله واحشنا قوي .... البهوات الى مفيمين الفيرنا والتيمبرا والكرولا 95 بيهببوا ايه ... نسوانهم قاعدين فى نادي الجلاء .. حلو نادي الجلاء مافيهوش حاجة .. بس مافيش منشور يوحد ربنا يهدد ولا يوعد بكسر الياء الحكومة يقولهم احنا هنا ..
طب ماحد يزور منشور كده ويمضيه حتي باسم الظباط الفُشار عادي يعني .. ايه يعني ماعندهمش مشاكل
مستشفي غمرة وحدايق القبة ونوادي المدرعات والاشارة والمشاة مكفية معاهم خلاص .. اكلوا وحلوا ولاد الهرمة وسيابنا للمر .. بكرة يشربوا ويشيلوا ابح

ناس مش لاقية مستشفيات وبياخدوا من الغلابة ضرايب علشان يبنوا ليهم نوادي ومستشفيات

ده الى بيعيا بيتعالج فيهم حسب رتبته مع انهم فى النهاية كلهم المفروض يعني جنود

وطبعا ماحدش يقولي الحزب الوطني فيه إصلاحيين مابقاش خلاص لا الشعب ولا الحزب ولا حاجة ياريت نفكنا من الحوار ده ...لان لو فيه عضو شريف وصاحب مبدا فى الحزب الوطني المفروض كان قدم استقالته .. والى قال ان الامن المركزي الجناح العسكري للحزب الوطني كداب وعوض لان وزارة الداخلية كلها مليشيا تبع الحزب الوطني وحرس مسلح لقصر الرياسة

سايبنا لشوية حرامية وقوادين وبرشمجية وتجار مخدرات ... ده فيه لواءات بتعمل عصابات مسلحة لسرقة العربيات ــ ولاد هرمة ــ والي يبكي انه بيبقي خارج من خدمة مكافحة سرقة السيارات .. ده الى بيعوز حشيش نضيف بيوصي ظابط شرطة معروفة يخلصله المصلحة دي

الجدع الشهادة لله عامل شغل فى آخر أيامه يتحسد عليه والله ... بسك السيد البدوي علي الدستور والمصري اليوم والشروق مش محتاجين بسبسبة ... و سافر قطر ظبطها والجزيرة بقت بسم الله ما شاء الله بقت حاجة مشرقة ... والمذيعيين الى كانوا بيظيطوا ويسخنوا لما حد بيشتم بقوا يقفلوا عليهم التليفونات ويألفلموا بعديها .. والعربية والحرة تتفرج عليها كانك بتفرج علي قناة النيل للأخبار معتز رفعوله السلك الى ماشي عليه أكتر واكتر ... وطبعا لبني وشريف هي عسل وهو عامر .. البنية بتلبسلي فراشة بمبمي
اما الشيئ العجيب فهي مني الشاذلي بقيت مش فاهمها .. بقت متحفظة شوية يمكن حاسسها متوترة حبتين جايز ... بس الناهية ان مش دي مني الى انا بعرفها .. حاسس ان عليها ضغوط جامدة حبتين مش ده ادائها والغريب انه مأثر علي طلتها .. ماحدش كتير ممكن يحس بكده
أنا بس الى بحس بكده وكلام نوارة عنها زعلني منها شوية .. لان مدونة نوارة بقت بصراحة افيونتي اليومية
بس خلاص

أحداث حزينة - 1

قُبل الطعن فى قضية اختطاف ربة منزل من منزلها وتناوب عشرة كلاب الاعتداء عليها، وصرح محامي الكلاب بان السيدة هي التى دفعتهم لارتكاب الجريمة لما كانت ترتديه من ملابس، وهو قول ان سمعته من صاحبه لقتلته، وان كنت قاضي وسمعته من محامي وانا من علي المنصة لكان كفيل لي لرفض الطعن.
المصري اليوم بتاريخ 17/3


طالب يطعن زميلة بمطواه ، ويأتي أهل القتيل ويقتحموا المدرسة وينفذوا قصاصهم بأيديهم داخل المدرسة وامام التلاميذ والمدرسين فهي الغابة بعينها

يعقد حزب الوفد صفقة مع الحزب الوطني بموجبها يحصل علي23 مقعد من مقاعد برلماننا الموقر ، وينكر رفعت السعيد علي البرادعي عدم تحمسه للأحزاب، فهو التبجح بعينه والوقاحة بوجهها

أن نرمم الآثار والمعابد اليهودية ونسمح " للإسرائيليين" الاحتفال علي أرضنا وتحت حمايتنا، وهم يدمرون المسجد الأقصي ويهودون القدس ويطردون أهله ويضمون الآثار الإسلامية إلي تراثهم المزعوم فهو العهر والعري بذاته

أن يعلن الديكتاتور وابن الديكتاتور وأمين عام حزب الديكتاتور أن لا نية لتعديل الدستور فهي منتهي الصراحة والبجاحة وإعلان منهم عن الاستعلاء والاستغناء عن الشعب المقهور

ان يعلم " الشعب المصري" أنه ظل يأكل طيلة عشرون عاما من ري مياه الصرف الصحي وغير الصحي ومياه المجاري ولا يحرك ساكنا ولا يسكت متحركا فهو بمثابة إعلان وفاة هذا الشعب

أن نري بأعيننا كل صحاب العمال وهم يفترشون شارع القصر العيني ويبيتون فى العراء ونمر بسيارتنا وأقدامنا علي أحلامهم وآمالهم وحقوقهم ولا نفعل شيئا فهو منتهي الجبن والأنانية والتبلد والتوحش

حزين اني من هذا الجيل

ده احنا هانشوف أيام سودا

ليه فشل الإضراب بتاع السنة دي

طب بتاع السنة الى فاتت هل نجح؟
لا مانجحش .. هو نجح فى المحلة لكن فى القاهرة وبقيت مصر كلها ماكانش فيه إضراب أصلا

طب ازاي نجح فى المحلة الى هما عمال وماعندهمش نخب سياسية وقيادات حزبية و لاعندهم نقابة الصحفيين ولا نقابة المحامين ولا مجلس الدولة .. نجح ليه هناك وفشل فى القاهرة؟ الى هي فيها كل الحاجات الى فاتت دي

يبقي الى بيخلي أي إضراب ينجح هما الناس الحقيقيين الى تعبانيين ..مش النخبة ولا رموز المعارضة ولا قيادات الاحزاب
الناشطين أخوهم هايحركوا كوادر تعرف تهتف.. تعرف تصور ... تعرف تكلم ... ممكن يكونوا دروع بشرية .. يقفوا فى الصفوف الأولي علشان يكون شكلهم حلو .. ولما يتسجن الناس الغلابة يبقي فى وسطهم كوادر فاهمة تقدر ترد علي زبالين الشرطة .. لكن الحشو الأساسي هما الناس .. وقود الإضراب هم الناس الى بجد.
طب ليه الناس مش بتتحرك؟
ممكن يكون ماعندهمش مشاكل تخليهم يتحركوا .. ماتخلنيش أقولك كلمة وحشة L

جايز ولو كده يبقي لامؤاخذة كل واحد يحط صرمة قديمة ومايفتحش خاشمه بكلمة

لكن الى يغيظ ان كل الناس مطحونين وقرفانين وزهقانين ومخنوقين وتعبانين وشقيانين وجوعانين ومتبهدلين وقرفانين تاني بس مش بيعملوا حاجة
الغريبة ان اليوم ده أطلقوا عليه يوم الغضب .. علي فكرة الغضب كلمة جميلة ليها وقع ع الودن كده لوز .. غ ض ب كلها حروف سخيفة كده وانت بتقولها تغتضب ولو يوم فرحك
بس الناس مغضبتش ولا حتي عيطت
طب هل الناس مش غضبانة مممكن أقولك نفس الكلمة الوحشة الى فوق علي فكرة ... الناس اكيد غضبانين لكن المشكلة انهم مش بيعبروا عن الغضب ده

يعني مثلا لو مراتك بتصبحك بعلقة وتمسيك بعلقة .. اكيد هاتزعل .. كلنا بنزعل الحقيقة J لكن فى النهاية لازم تاخد موقف .. مش تضرب عن الأكل .. يعني تبقي انت الى شقيان وطلعان تربنتينك وجايب خيرات ربنا .. ومراتك تصبحك وتمسيك .. والموقف الى تاخده انك ماتكلش من الاكل الى انت جايبه .. دي ما هتصدق يا عم الحاج .. نسوان هم انت هاتقولي .. ده انت تبقي راجل لامؤاخذة ... الصح انك تضرب مش مراتك طبعا .. ممكن تقرا المدونة فى أي وقت .. هو فيه حد أصلا يقدر يضرب مراته .. دي تنقطع ميت حته وتاكلها القطة السودة لو حصل كده .. لا أنا قصدي يعني انك تضرب عن مجايب الأكل أصلا

طاخ طيخ طوخ

الناهية علشان مفيد بيقولي اني مش بعرف أكتب وانى بطول فالفكرة بتوه مني
انا كنت موافق ان أصحاب المعاشات يحتلوا ميدان التحرير ومش مهم لو ماروحتش الشغل او اتاخرت ساعة او ساعتين أو حتي أربعة .. وان الصيادلة يقفلوا صيدلياتهم .. حتي لو مالقتش دوا لهيام .. ولو الاطباء قفلوا عيادتهم ماعنديش مشكلة ان أستحمل أي ألم او اغور فى داهية
علشان احنا لازم نطبل أنانيية وضعف وجبن شوية .. يبقي الى مش اناني والى مش ضعيف ولا جبان من حقه انه يطالب بحقه وانا مازعلش لما يعمل كده .. مش المفروض نستني ان الخيرات تتنزل علينا من السما .. ولا نقوم ونصبح نلاقي مبارك عمل انتخابات نزيهة وطلع الناس من السجون .. والى بيسرق يبطل سرقة .. والوزرا والمسئولين المأنتيخن يبطلوا انتخة ويشتغلوا زي بقيت مخاليق ربنا .. ونلاقي الشرطة بطلت تضرب الناس علي قفاها .. وألاقي اختراع جديد بدل البامبرز ويكون مش غالي

لازم آخد موقف علشان آخد حقي

ولازم لما أحس ان فيه فئة من الشعب مظلومة انى أقف جنبها وأساندها بكل ما اوتيت من قوة

مش أسيب الى غرق غرق ولا الى اتحرق اتحرق ولا الي بيتهان يتهان ولا الى اغتصب اغتصب

والله الدور جاي علينا كلنا

والله لا يخدونا من بيوتنا عاطل بباطل

والله لنشوف أيام سودا

يا عالم يا سو

فانا مش هشارك فى أي إضراب غير لما يشارك فيه سواقين هيئة النقل العام ومش مهم الكمسرية علشان بيبقوا رخمين شوية .. وسواقين مترو الانفاق لازم يشاركوا وشباب هندسة وتجار ونظم معلومات الى شغالين فى البنزينات .. والناس الى مخنوقة من ظباط الشرطة لازم يشاركوا .. وطلبة الجامعة لازم يفكهم باه من تامر وحماقي ويركزوا فى هياف وإلياس قصدي يركزوا فى منير واسكندريلا .. ياعم يركزوا فى خدمة البلد ... والعنمل والفلاحين والفقرانين والبوابين والى عندهم عربيات والى بيركبوا مواصلات .. وسكان العشوائيات وهانبقي نضحي بسواقين الميكروباظ ونسيبهم يتخانقوا مع سواقين التاكسي

بس أهم ناس سواقين النقل العام ومترو الأنفاق .... ماهينجحش اضراب من غيرهم

ويالا باه بالسلامة كفاية عليكم كده

لن أنسي لكم هذا الموقف .. الي هايقولي قول كلمة هابطحه

طبعا قرفان من الى حصل امبارح، امبارح كان ايه يعني، امبارح حفل توقيع كتاب هما انثي، انا أصلا قلت ماقابلش حد وانا فى حالتي دي، سايب شغلي والإضافي ومراتي تعبانة وعند الدكتور، وأبويا فيه الى فيه وورايا شغل هاستلمه من المطبعة وأروح حفل توقيع.. لا وايه كمان أقول كلمة ... انا أقول كلمة ينعل ديك امر الديك علي فكرة

وطبعا اول ما ايناس لطفي قدمتني وقالت بس منذر، ماتتخيلوش التصفيق الحاد، وقعدوا يبرئو يبرئو يبرئو لدرجة ان كنت خايف علي جوهرة عنيهم لتقع من مكانها وإلا التصفيق ايديهم اتبرت وإلا الانصات مش ممكن كأن علي رؤوسهم الطير، تجمدوا وتخشبوا كده، قوم ايه انا فى وسط ده كله أنسي الكلام الى كنت هاقوله

احيه يا أبو سوسو أحيه ،، اختك هاترقص وانت هتمز يا أبو سوسو
غطوني وصوتوا غطوني وصوتوا
ايه ده .. انا ايه الى وداني مكان زي ده

متنيل مابقتش اتابع مدونات زي الاول، انزل ليه هاتعرف علي مين، طبعا اعتمدت علي الاخ مفيد وماعبرنيش، كل شوية يجيلوا واحد يقوله انا مندهش ويخلع التاني يعرف نفسه يقوله انا مجنون ويخلع ويسيبني طيشة لغاية ماجم حبايبي واخواتي وصحابي من أبناء مصر ... هم الى سيحوا الجليد شوية

لازم الى ينزل تجمع للمدونين يبقي متابع للمدونات يبقي بيقرا مدونات علشان يبقي عنده شغف انه يتعرف علي ده ودي وعلشان يقدر يستمتع بالناس الموجودة

أي نعم حسيت ان فيه مدونين رجالة صيع ، صيع صيع يعني، مش عارف مش راضية تركب معايا مدون بيشرب سجاير وبيكلم لغة شوارع ويدون

أينعم انا عارف ان التدوين مش محتاج مؤهلات بس برده مش عارف أستسيغ حاجة زي كده

كان تامر جمال بيشرب سجاير بس كنت بحسه ابن ناس ومؤدب وعند فكر

مش عارف هاتفهموني ولا لأ ولا بخبط ولا لأ بس علي فكرة مش مشكلة

كمان فيه حاجة، كان فيه راجل قليييييييييييييط جدا ومخنق جدا وراسم نفسه بطريقة غريبة وام سماعة البلوتوث – بتنرفز منها قوي – ويمشي يا أرض انهدي ما عليكي قدي ، وطلع فى الآخر صاحب دار نشر، امال لما يبقي زي الحاج مدبولي الله يرحمه هايبقي عامل ازاي ، وواحدة تانية برده صاحبة دار نشر مخنقة كده، هي العالم حصل فيها ايه

بس أرجع وأقول انا الغلطان

وكمان مفيد بعد ما خلصت الناس الى تتكلم ومشيت مها واحمد عبد الفتاح والساعاتي، مابقاش حد اعرفه غير مفيد

قبل ما هاشرد لمفيد بعد شوية أحب أقول اني شوفت سلمي انور الى كان نفسي أشوفها وعندها حضور طاغي كما توقعت وكلمتها كانت قوية جدا هي وشمس الدين وطبعا انا بس نسيت اسمي والله الى هايقولي اعمل حاجة زي كده تاني هابطحه ... ينعل .... يحرق .. ايه الي فكرني تاني

نرجع لمفيد سابني ملطوع زي قرد قطع ماعرفش حد وهو عارف ان واقف لوحدي زي قرد قطع ماعرفش حد وقعد يتعرف علي ناس اول مرة يعرفهم أنا مندهش وانا مجنون .. بس أرجع وأقول ان انا كان لازم ماروحش معاه فى حته غير لما يكون جمعة معايا هو الى فاهمني، بس معلش غلطة وتتعوض

وشوفوا الغلاسة بعد ماستنيته قد ايه رجع قالي انا هاركب من هنا لامبابة .. بيهزر البيه .. ماشي يا مفيد .. بس قطعت نفسه قعدنا نزق سواق تاكسي عطلان من مطلع كوبر الجلاء لغاية كوبري قصر النيل .. أحسن يا مفيد ... وطلعنا علي عبد المنعم رياض لقي الميكروباصات زحمة .. ده ذنبي يا مفيد علي فكرة

لا وبكلمه فى موضوع مهم هو الى فتحه يسيبني ويعمل نفسه مشغول فى قراية ماعرفش ايه .. ولما أهبش فيه يقولي انا كنت قاصدها علشان اعرف انت بقيت عصبي ولا لأ .. طب ما أي حد هايتعمل فيه كده هايتعصب .. حاجة عجيبة والله

بس خلاص .. حاجة تقرف

لو لم اكن مصريا لوددت ان أكون ؟

كل الأشياء تدعوا للإحباط

ومافيش حاجة مضمونة

مافيش منطق .. ولا بديهيات ولا مسلمات

يعني.. واحد زائد واحد بيساوي اتنين .. مع ناس ممكن يساوي ملايين وناس تانية ممكن مايسوش حاجة، يساوي صفر

ماحدش حاسس بالامان ولا بالاطمئنان

الغابة مثلا معروف ايه هي احكامها وقوانينها ، ومعروفة كمان عناصرها ومعروفة ادوارهم ووظائفهم، مثلا فيه أسد ونمر وديب وتعلب وفيه غزال وجاموس وبقر وحمير .. معروف مين المفترس ومين الفريسة .. مثلا الغزالة طبعا واكيد مش عاوزة تتاكل فبتدافع عن نفسها قدام الأسد بالجري والهرب من وشه، ولما بقيت الحيوانات يشوفوا مشهد المطاردة ده ماحدش بيستغرب وكل واحد بيبقي منتظر دوره .. فى الغابة معروفة طبيعة الأشياء وقانونها فطري وبديهي ومسلم بيه ، ورغم من كده عمر ما الغزالة حاولت تبقي أسد .. وعمر ما الضبع حاول يبقي أسد ولا الغزالة حاولت تطور قدرتها ومهارتها انها تبقي أسد

أنا حاسس اننا فى غابة بس قوانينها مش قوانين غابة .. يعني يمكن كنت أستريح لو حسيت ان ربنا خلقني غزالة أو أسد ، علي الأقل كنت هاعرف دوري ووظيفتي كويس ومش هاقفز عليها .. بس ازاي نيعش لو الناس كلها كانت اسد .. والى مش أسد بيحاول بكل الطرق والكباري انه يبقي أسد

ببلطجة بفتونه بنفوذ بسلكان بهمبكة بقلة أدب .. المهم يعمل ضوافر وأنياب يدافع بيها عن نفسه وعن منطقة نفوذه
مش عارف هل أنا قادر أوصل الي أنا حاسس بيه ولا لأ

والأسد فى مصر لاما يبقي ظابط أو وكيل نيابة او مستشار أو دبلوماسي أو أي حاجة من الحاجات الى بتخض دى ،علشان يبقي أسد لازم يبقي كارنيه لامؤاخذة .. او يبقي غني جدا وبعلاقاته يخلي البشر يعملوله ألف حساب، ويقدر لو وقع فى مشكلة أو لو وُضع فى أي صراع انه يدافع عن نفسه ويأذي خصمه .. يقدر يجيب حقه وماحدش يدوسله علي طرف ويبقي ماشي مطمن ومامن نفسه .. والنوعين دول ماشيين مع بعض ماحدش بيشوفهم او بيتعامل معاهم كتير مش بيختلطوا بينا مش بيركبوا مواصلاتنا ولا بيمشوا فى شوارعنا .. راكبين عربيتاهم المتفيمة والى عليها النمر السودا .. متعلمين لابنجمة لا بلوحة سودة عليها قبة برلمانية او نسر او حتي دبور

كل الناس بتستخبي ورا شعار ورا لوجو يحميها

ولو علي دول يبقي مقدور عليهم بنوسع عادي وربنا يبعدنا عنهم وبيعدهم عننا

بس الاخطر ان بقيت البشر المطحون برده عاوز يبقي اسد ... بيحاول يدرب نفسه علشان يبقي أسد

تقريبا نسيوا انا احنا مش فى غابة وان احنا مش حيوانات

مش قادرين يعيشوا مع بعض بمنطق التكافل ، لازم منطق الافتراس

بتخيل لو اتحطيت فى موقف وكنت فيه خصم مع حد مسنود هايعمل فيا ايه

ده فى مرة مع سواق ميكبروباص خبط عربيتي عند قسم السلام وجبتله امين شرطة وكان يعرف الى مسرحه طلعه مش غلطان ... ولولا انى استقتلت فيها وأصريت انى اعمل محضر قدام الرائد ماكنش خلاه يصلحلي العربية علي حسابه
بس لو ماكنش مع سواف ميكروباص لو كان مع الباشا أبو عيون الى رخمنا علي بعض فى غياب أي عنصر أمني محايد .. ولو موجود ولقي خصم برنس بعربية ستة متر والى قدامه شاب مطحون بحته فيات هايعمل ايه

مين ممكن يخلق امان وعدل فى الشارع

الكافتيريا الى فتحت قدام بيت أبويا العيال الى شغالة فيها بيبيعوا حشيش وبانجو للشباب جوه العربيات وبيركنوا عربيتهم فى أي حته فى الشارع مكان عربياتنا احنا .. فتحول الشارع الى كان اهدي ما يمكن لوكر مخدرات ولعب بالعربيات وضاق الشارع الواسع وباه كل يوم فيه خناقة .. والشارع الي كان بينام من العشا بأه يصحي المغرب وينام الفجر

مين فى البلد ممكن يجيب حقه بما يرضي الله وبالقانون من غير ما يجور علي حق حد

مين حاسس ان ممكن يجيله حقه من غير واسطة ولا محسوبيه ولا نفوذ

مين بيحكم بين الناس بالعدل

أنا شايف ان فساد الاوضاع فى مصر خرج بره دايرة الكبار وباه مترسخ فينا احنا كمان ، باه فى كل ذرة فى كل نسمة هوا .. فيه فساد وظلم وقهر وخوف

سلوك الشرطة المصرية صايبني بذعر حقيقي

بجد انا حاسس انى عندي مرض نفسي زي فوبيا من الشرطة

حالة عدم منطقية الأحداث وعبثية الحوادث ولامعقولية الامور تصيبني بالخوف

بس انا عاوز اعرف مين خايف ومين حاسس بالأمان

الحادثة بتاعة نادي الصيد مأثرة عليا قوي ، أنا بعدي من هناك كتير الدكتور الى بيعالج أبويا عيادته هناك، لو الموقف ده حصل معايا، كان ممكن يحصل ايه ، انا مش خايف من الموت انا خايف من الاهانة والبهدلة والتنكيل، أنا عارف انه غلط انى أقول خايف بس أنا فعلا كده، ليه كل واحد بيحاولي نفسه بطريقته هو، ليه الناس شايلة فى عربياتهم مسدسات صوت وكرابيج وشوم وحديد، ليه واحد صاحبي شايل ترسانة أسلحة فى عربيته، استعداداً لأي خناقة فى الشارع مع تاكسجي ولا سواق ميكروباص او سواق ملاكي برده معاه نفس الترسانة

سألت مرة عبقرينو علشان كان فى الامارات قلتله لما بتحصل هناك حادثة ايه الى بيحصل ، هل بينزلوا يسمكوا فى بعض زينا؛ قالي لأ طبعا الاتنين بيقفوا يطمنوا علي بعض يتصلوا بالشرطة تيجي تحقق ويتصلوا بشركات التامين والى ليه حق بياخده ، والكل بيبقي مطمن ومتامن عليه

انا نفسي فى كده

حزنت تاني لما اتفرجت علي العاشرة مساء لما كانت مستضيفة علماء من الطاقة الذرية .. مهندسين واطباء بيطريين وبشريين وخريجين علوم معاهم ماجستير ودكتوراه ومتاكله حقوقهم ، وكان فيه مهندسة عاملة دكتوراه فى الطاقة الذرية والاشعاع والحاجات الغريبة دي بتقول ان مرتبها 1600 جنيه، حاجة عملتلي صدمة، وزعلانة علشان اكلوا منها درجة وظيفية كانت هاتوصل مرتبها لـ أربع تلاف جنيه ، ايه التهريج ده ، واحدة مهندسة خريجة هندسة 5 سنين عملة دبلومة وماجستير ودكتوراه وأبحاث فى الطاقة الذرية وتكنولوجيا الاشعاع بتقبض 1600 جنيه فى الشهر بعد عشرين سنة شغل ، حاجة يعني تخرج من الملة، دول بياعين كروت الشحن بيقبضوا اكتر منها، مندوبين المبيعات وخدمة العملاء الى بيردوا علي التليفونات بيقبضوا اكتر من كده، فيه موظفين عندنا فى الشغل بياخدوا المرتب ده بالدولار وخريجين تجارة مابيعملاش حاجة غير انهم قرايب الكبار .. الكبار قوي

ده مش اسمه قهر وكبت وظلم وفساد ، ليه اسم تاني .. انا مش عارف ألاقي توصيف حلجاة زي كده .. بجد مش لاقي

نفسي أخرج كل الى جوايا بس مش عارف اخرجه


بجد انا قرفان وساخط وزهقان ونفسي أغور من وش البلد المقرفة دى، جايالي حالة من عدم الانتماء الخطيرة ، فعلا بتمني أهج من البلد دي وأعيش فى أي بلد محترمة، أسمع عن سويسرا انها محترمة بس ازاي أسافر هناك ، وخصوصا بعد ما اتجوزت فى الأيام الضنك دى

يارب اصلح حالنا بأه، وهيأ لنا من أمرنا رشدا