Tuesday, June 5, 2007

يا ولاد ....... الكبش






ايه يا ريسنا
تقبل انك تبات فى الشارع
تقبل ان قصرك يولع
وتروح النهضة فى مدينة السلام
والى عمل ده العملة يفلسع
وتبات يعينى فى الظلام
والنوم فى خيمة مافهوش امان
فى الصبح تطلع تملى مية
ومراتك تجيب صحن الفول
وعيالك يروحوا المدرسة
من غير باص ... الاسكول
ويرجعوا يا عينى مطحونين
زي السردين المقفول
ويشوفوا بالليل الحرامى
على انه أكبر غول
جاي ياكولهوم أو حتى
طمعان فى بقيت صحن الفول
* * *
وانت ياعينى تنزل تفتش
على أي شغلانة نقاشة
ومراتك تنزل تخدم
فى بيت فلانة وعلانة
ويقولوا ده ست زنانة
جايه تقر وعيانة
* * *
ترجع ع المحافظ وع الوزير
وع الحي وع الغفير
وبعديها يجيلك نزير
من بتاع الأمن المدير
ويشيلوك ويطردوك
وبالشلوت كمان يدوك
كل ده عشان شقة فى عمارة
أو حتى قودة مدارية بستارة
ويقولوك عملى غارة
تقولهم ده انا عايش فى مغارة
ده انت أحسن من غيرك
ده غيرك عايش ف خرارة


ـــــــــــــــــــــــــــــــــــــــــــــــــــ


يا ولاد الكبش
حرقوا قلعة الكبش
ورموا الناس فى الشارع
والمستقبل بأه ضايع
والى راح مش راجع
م الحرايق والولايع
استكتروا عليهم العشة
ولا استكتروا عليهم العيشة
ده احنا والله مش طيشة
علشان يبيعوا ويشتروا
ويحطوا رجل ويتأمروا
وناس تتطبل ويزمروا
وان شا الله تاكلنا طريشة
* * *
أوعى تاخد الدنيا قفش
بعد نهب قلعة الكبش
ده البلد هاتبقى هبش فى هبش
ولو عاوز تقش... لازم ترش
بس بلاش ترش بالنار
حرام عليك العيال الصغار
دول والله مالهمش ذنب
كفاية عليهم تعذيب وضرب
ده مافيش حد ولو مرة
يدوقهم حنان الأب
دول اتنين فى واحد بمناسبة انى خلصت امتحانات النهاردة
يوم خمسة يونيو وربنا يستر على اليوم ده، ويعديها على خير

36 comments:

Anonymous said...

ماشى يا عم منذر

بالتوفيق فى النتيجة ويا رب يكرمك وتنجح بتفوق.
بقه يا ولاد الكبش!!! مقبوله منك يا سيد منذر
عاوز اشوف برنامج للقاء مواضيعك اللى عاوز تناقشها ايه؟؟؟ايه اللى بيشغل بالك

تحياتى

غمض عينيك said...

بجد فعلا ربنا ينتقم منهم
ناس ظلمة
تحياتي لكلامك المعبر

محمد سمير

مـحـمـد مـفـيـد said...

منذر باشا
والله انت مش سايب لي حاجه اقولها
حسبي الله ونعم الوكيل

في انتظار مكالمتك بجد لانك والله وحشني

Anonymous said...

أخى منذر
عاوز مدام الريس تنزل تجيب فول , يا أخى دة يبقى عيب , طيب وعاوز الكتاكيت ولاد الريس , يروحوا المدرسة حتى من غير "باص" أهو دة بقى ما يصحش ابدا , على العموم هو بابا!!! الريس قلبه كبير!!! واكيد هايسمع كلامك , وهايسيب قصر الرئاسة ويروح يسكن فى النهضة
وسلملى على سكان قلعة الكبش والمناطق النائية , وربنا عالظالم
حمادة زيدان

Anonymous said...

منذر
أولا كل امتحانات وانت طيب
ثانيا وثالثا وأخيرا
كلماتك رائعة
واحساسك بالمعنى عال جدا
بس ياريت بلاش حكاية مدام الريس وولاده
معقول يعني انهم ياكلوا فول
ولا أصلا يعرفوا حاجة اسمها فول
أنا أسمع عن حاجات كدة اسمها جاتووه
وسيمون فيلية
وماعرفش أسمه ايه
بالتوفيق

مشروع انسان said...

سبحان الله ان فعلا شعروا بهؤلاء الناس وشعروا بماسيهم لاستقالوا فورا وتركوا كراسيهم تلك ولكن ماذا نقول لمن باع كل شئ حتى دينه من اجل كرسيه
حسبنا الله ونعم الوكيل

AHMED SAMIR said...

في حد يا راجل
يخلص امتحانات يوم 5 يونيو؟
انا لو منك اروح اللجنة يوم 6 يونيو حتى لو مفيش امتحانات بس علشان كسر النحس مش اكتر
ربنا يوفقك يا منذر
تحياتي

Anonymous said...

خلصت امتحانات
مبروك
عقبال النتيجة ان شاء الله

بقى عايز الريس يعيش فى خيمة يامنذر
لا وصحن فول وطنط سوزان تشغل فى البيوت

يابنى لما هما يعيشوا هناك
الشعب يعيش فى مصر الجديدة ولا ايه

تحياااااااتى

Ahmed Elmasry said...

وطني الجريح لك الله

Anonymous said...

صديقى/منذر
لقد اسمعت لو ناديت حيا ولكن لا حياة لمن تنادى
ونار لو نفخت فيها اضاءت ولكنك تنفخ فى رماد
تحياتى لك وبالنجاح ان شاء الله

Anonymous said...

اخى الفاضل
منذر انا جيت ارد على تعليقك بعد ما رديت عليه فى مدونتى وان كنت زعلان علشان انت لم ترشح مدونتى ضمن افضل 100 مدونة
--------------------------------
جزاك الله كل خير اخى منذر
معك حق فى كل ماجاء بكلامك مع تحفظى طبعا على بعض ما جاء مثلا عدم وجود بعض الخدمات سهل يتحل دى مش مشكلة بخصوص المدن الجديدة اما حكاية الجامعة دى مقدور عليها مش هنعمل جامعة فى كل مدينة لازم ناس تسافر ولازم ناس تسكن وما الى ذلك يعنى فى العاشر من رمضان بينك وجامعة عين شمس قد ايه كانك جاى من الهرم رايح عين شمس
وبخصوص العاشر انا كنت براقب فى امتحانات الثانوية العامة منذ سنتين هناك هى فعلا جميلة وهناك نادى تقريبا اسمه الرواد بتوع القاهرة بيجو يقضوا الليل به ويمكن الامن صحيح ما تحسش به وتخاف علشان بالليل تحس المدينة فاضية
المهم يا اخى الحوادث مثلا التى حضرتك تكلمت عليها 90 فى المائة منها غلط بشرى صح ولو جاء ضابط المرور يسحب الرخصة من مخالف نجرى كلنا نقوله معلش
يعنى احنا مشاركين فى الخطا
اخى منذر الموضوع كبير ولكن الفكرة وصلت هناك العديد من السلبيات مثلما هناك العديد من الايجابيات
وانا ادعو الى البناء على الايجابيات وتلافى السلبيات
شكرا وارجوك لا تحرمنى الزيارة

والضغط على الايقونة

Anonymous said...

ولاد الكبش صحيح هى بقت شتيمه يامنذر انا خايف تطلع شتيمه يعنى كل واحد يحصلو مصيبه يقولوا عليه يااولاد الكبش مع ان عيله الكبش دى عيله كبيره

Mohamed Abdelgeleel said...

الله ينور بجد كلمات فيها ايحاء جامد

رينـــــــــــا said...

السلام عليكم
اولا مبروك على خلاصك من الامتحاااااااااناااااااات
حمد الله على السلامه

ثانيا حضرتك فى مصر
واللى حصل فى قلعه الكبش
واهلها
ممكن يحصل ليا وليك فى اى وقت
ووقتها مش هكون مستغربه
لانى خلاص عينى اخدت على الظلم

منهم لله وحسبنا الله ونعم الوكيل
لنا الله يا اخى لنا ولهم الله

Anonymous said...

رائع موضوع فى الصميم السهل الممتنع
كل تحياتى لك واتمنى لك دوام التقدم
تقبل شكرى على هذا الموضوع الجميل
تحياتى

Anonymous said...

ولاد كبش بس
قول ولالالالالالالالالالالاد

Monzer said...

أخويا أيمن
ربنا يتقبل نك صالح دعائك ان شاء الله
طبعا انت عارف مين الى هما ولا الكبش صح
خليها علينا أحسن :)
وان شاء الله بس أقفشك أون ولو مرة واحدة وربنا يسهل
وربنا يجيبك بالسلامة ان شاء الله

Monzer said...

أستاذ محمد سمير
انا عرفت اسمك
وفعلا ربنا ينتقم م الظلمة ولاد الكبش الى ظلموا ولاد الكبش
تحياتى ليك ويسعنى دوام تواصلك

Monzer said...

أستاذنا محمد مفيد
ده الواحد بيتعلم من حضرتك بس مش اكتر
وحسبى الله ونعم الوكيل

Monzer said...

حبيبى حمادة

هههههههه أضحكتنى وقلبى يدمى
بس تخيلها كده ههههههه

Monzer said...

صح انا بقول برده فيه سيمون فيله وفيه جاتوه وفيه حاجات غريبة كده
بس ليها المقابل الكبشى الى قدامها
يعنى مثلا الباتون سليه، ينذاظره حته لقمة نشفة
الجاتوه حته فطيرة م الفرن وياسلام لو كانت بالعسل تبقى اشطة قوى
بس بجد ايه هو السيمون فيليه ده معرفهوش بجد

Monzer said...

إمامنا إمام الجيل
فعلا هؤلاء عباد كراسى أرأيت من اتخذ إلهه هواه
دول اتخذوه الكراسى والمناصب والاموال والسلكة من دون الله واستحلوا الدماء والأموال
جزاكم الله خيرا

Monzer said...

نعمل ايه يا يا دكتور أحمد سمير
لو بايدنا ماروحش ولا حتى يوم 6 اكتوبر
ايه رأيك يجه

Monzer said...

ما هو لازم يصيف يا سارة
ماهو لما بيروح للقذافى بيقعد فى خيمة
اسمعزة
وماله الإيجار الجديد
شقة لوز ب 400 جنيه على الشارعوتامين تلات آلاف جنيه
ايه رأيك

Monzer said...

احمد يا جميل
كلنا لينا الله
د الحجر والشجر بيشتكى يا راجل
تحياتى ليك

Monzer said...

لقد اسمعت لو ناديت حيا ولكن لا حياة لمن تنادى
ونار لو نفخت فيها اضاءت ولكنك تنفخ فى رماد
ما اجمل هذه الكلمات
لا أجد مايعبر عن شكرى وامتنانى لك اخى النورس

Monzer said...

أستاذى الغالى حسن
بالتأكيد سأضغط على الأيقونة

Monzer said...

ايه يا عمر هو انت من عيلة الكبش ولا ايه
اوعى تزعل
كلنا من قلعة الكبش

Monzer said...

شكرك على مجالملتك استاذ محمد عبد الجليل

Monzer said...

المباركة ان شاء الله تكون يوم النتيجة
ادعولنا يا جماعة
وطبعا الى حصل فى قلعة الكبش ممكن يحصل مع أي حد فى مصر وفى أي مكان وفى أي وقت
في ناس جاهزة للحاجات ده
منهم لله

Monzer said...

أستاذة نيفين
يسعدنى تشجعيك ليا دائما

Monzer said...

أحمد يا جميل
معلش خليها عيك المرة ده
مشيها ولاد الكبش بس
هههههههههه
تحياتى ليك يا جميل

ibn nasser - ابن ناصر said...

منذر
ايه المواضيع الجامده دي
بعدين يا راجل انت مالك بحسني ده بيعيش في عالم من خيال في شارم.. اه اقصدي يعني سهران في شرم لشيخ علي ..
راحتك وانت مش بتشتغل وفي خيال
.. واحنا هتقدم وانا ان شاء الله بناء علي تعيمات الريس وهنبقي كويسين جدا جدا .وممكن اقتصادنا يبقي زي السودان كده
...
تحياتي

ibn nasser - ابن ناصر said...

وبعدين نسيت اقولك حاجه الست اللي انتبتتكم عليها د -سوزي-في قمة التواضع تصدق انها ارادت من الصحفين والاعلامين حذف كمة سيدة مصر الاولي ..شفت الكرم والتواضع !!!
تحياتي

Anonymous said...

الاخ الكريم
لثقتنا في رأيكم و مصداقيتكم في تناول الموضوعات الجادة بالقراة.
نرجو متابعة نقدنا رقم 5 لمدونة الاخت الزميلة شيرين العقاد . بناء علي دعوتها
كما و نأمل وضع بصمتكم فيما ترونها من خلال تعليقكم الذي نعتز به
علي وعد برد الزيارة و التعليق علي مقالكم الرائع اعلاه
مودتي
فريق النقد الادبي بمدونات مكتوب
abcd1.maktoobblog.com

Anonymous said...

عزيزى منذر
انا بالفعل مدين لك باعتذار لانى اخطات فى حقك وحقى وحق المجموعة ليس بانتقادى لشعرك على الملا ولكن لانى استخدمت كلمات واسلوب مرفوض من اى انسان ولو كنت فى مكانك فعلا لاحسست بالغبن وتهجمت على من قاله.
انا بالفعل اسف بدرجو شديدة ولا تبرير له مطلقا
وانا نشرت اعتذارى على موقع المجموعة
ومستعد لاى قرار تتخذه عقابى لى وحتى لا تعتقد انه كما قال عمر تحقير او استهانة
الموضوع والله كان هذار
ولكنى اعتقد انى مخطأ وكما ذكرت لا تبرير للخطأ.
وخير الخطائيين التوابون...فهل تكون ممن قدر وعفى؟؟؟ام تريد حق عرب؟؟؟
وانا فى انتظار ردكم زسيكون الرد على رؤوس الاشهاد كما كان النقد ايضا