Thursday, June 28, 2007

هو ليه الجدع ده مش عاوز يبقى مصرى؟؟؟؟؟

كلمتك لأهل البوابة، على رجوع والد صاحب البوابة بألف سلامة
وألف حمد الله على السلامة، وان شاء الله فى ميزان حسناته
ــــــــــــــــــــــــــ
مش عاوز أفهم انى بحقد على الأغنياء
وانه لا يصلح أن ياتى رئيس غنى
ولكن كل ما أرجوه أن ياتى رجل وقد خبر كل صغير وكبيرة فى هذا البلد
تعرف على كل ذلك من خلال عينيه المجردة وليس من خلال التقارير الأمنية، والبيانات الإحصائية
التى تقول أن نسبة الفقر بلغت كذا وكذا ومتوسط الدخل كذا وكذا، ومعدل الدخل اليومى أقل من دولار فى اليوم
ولكن يجب عليه أن يعلم تأثير الأقل من دولار فى اليوم على المواطن، كيف يعيش به حياة
وهي نكرة أي أية حياة
رئيس ليس مسجون فى القصر الجمهورى طيلة عمره ، لم يتعرف على شعبه رئيس تعرف فقط على الخدام والسفرجى والسواق
ودول فى منظورنا احنا ذوى نفوذ ضخم، لا يعبرون عن المواطن المصرى الحقيقى
لم يذهب إلى مدرسة حكومية وقعد على دكة حديد ورجع بنطلونه مقطوع وأبوه ضربه علقة علشان لسه البنطلون جديد، وفضل بالبنطلون المقطوه ده الترم كله وهو متخيط
وماقعدش فى فصل مكسور شبابكيه ورجع واخد برد فى معدته، وهو كان لسه لحمة حمره عمره سبع سنين
مرجعش مخنوق فى يوم حر علشان درجة الحراة أربعين وهو قاعد فى فصل تعداده تمانين
دهره ماتقطمش من شيل شنطته التقيلة، الى مليانة كتب من كل لون وصنف
ماقعدتش واقف على رجليه زنهار بيجيب بتلاتة جنيه عيش من أبو شلن، والراجل يقوله مافيش غير بتنين جنيه
وهو يبقى مخنوق لأنه هايضطر ينزل مرة تانية
لما حب يعمل بطاقة ماقعدتش ييجى أسبوع من هنا لهنا يعمل مستخرج لشهادة الميلاد ويجيب ورقة من المدرسة ولا الكلية ويميضيها ويقولوا انت مكانك مش هنا ولايقولوا انت ميت من 36 سنة وهو يكون عمره أصلا كله على بعضه
مايكملش 18 سنة
مارحش مستشفيات قصدى السلخانات الحكومية ولا شاف الزبالة والقرف المعاملة السيئة وعدم الإهتمام، وتدنى مستوى العلاج
ماشافش عيشة الفلاح المصرى الى قاعد ف غيابات الصعيد، ولا الى قاعد فى الدلتا
مايعرفش حاجة عن بيوت الصفيح والعيشة فيها
بياكلوا منين وبيشربوا ازاي وبيستحموا فين، وصرفهم فين
ليه ماجربش يدخل قسم شرطة ويعمل محضرزي أي مواطن
ليه ماحاولش يتصل بالاسعاف ويشوف هايجيله بعد قد ايه، ولا المطافى
ليه الجدع ده مش عاوز يتعرف على مصر
ليه الجدع ده قابل انه يشوف مصر من ورا ازاز عربية فاميه اسود مكيفة وماشية بسرعة 120كم/للساعة
كده انا طولت أوى
بس كلمة أخيرة قبل الزجل
ليه الجدع ده مش عاوز يبقى مصرى
!!!!!!!!!!!!!!!!!!!!!!!
من غير تبجيح ولا تجريح
هو احنا ليه مش عاوزينه
أصلى زهقت م التسييح
وم الفشر وسنينه
هو لإما أبقى أبيح
او أتغزل فى جمال عينه
هو شاب طويل وعريض
ولسه مجوز من يومين
بعد ما عدا الأربعين
وطول عمره مع والده
محبوسين فى القصر من سنين
ولا راح مدرسة حكومية
تعداد طلابها تمانين
طب دخل أنه كلية
علشان يبقى ريس ع المصريين

* * *
قضى جيشه فى الحرس الجمهورى
يعنى ... قضاها بيات
ولا خد إعفا صورى
ولا درس استراتيجيات
ده كان موظف فى بنك عادى
ورجع منها أمين للسياسات
طب ياترى شاف بعينه
الى حاصل فى المستشفيات
والسجون والمعتقلات
وداق غلاسة الظباط
والوقفة بالساعات
فى الشوارع والإشارات
كل ده بسبب مسئول
كان بيعدى الطريق وفات

* * *
طب ممكن فى عشة تبات
وتعيش فى خيمة للممات
وتقرف منك الستات
وم الجوع تقول ما أنام
وتصرف فى أي مكان
والحمى فى أي ميدان
تقدر تقدر ده الإنسان
ولا ده كله فى الآخر كلام

هي ده عيشة المصرى
لازم تحس وتشعر بيها
لو كنت عاوز تعيش فى قصرى
يبقى لازم تحاول تغير فيها

36 comments:

غمض عينيك said...

كلام في الصميم...هي دي المشكلة...الراجل ده ماعاش في مصر وماحسش بالناس ولا اهل البلد ولا شال هموم ولا عاش مشاكل
مولود في بقه معلقه دهب
ازاي يبقلى ريسنا وهو مش عارفنا

تحياتي
محمد سمير

mo'men mohamed said...

كلام عشرة على عشره
بس معلش بقى
اللى انت عايزه يتحقق ده يبقى المشمش ان شاء الله
وبعدين انت بتتكلم ازاى
وجيمى ابن بابا يروح فين لما نجيب واحد زى ده
وكمااحنا لو جيبنا واحد زى ده حيحالو يصلح البلد من اللى شافه و طبعا حباينا فى البيت الأبيض يزعلوا
السلام عليكم

علاء said...

كلمااااااااتك روعة و الله العظيم
فنان يا ولدي فنااااااااااان :)

و الحلم هيتحقق باذن الله
خليك متفائل
هو صعب
بس هنفضل نحاول
لحد ما نموت :)

sara said...

شوف يا منذر يابنى
يعنى مبارك باشا اتعلم فى مدارس حكومة واهله كانوا متوسطين الحال مش اغنيا يعنى وعرف ناس فقرا وناس غلابة وناس مصرية بجد
وبيتعامل معانا كدة

المحروس ابنه
اتربى فى القصر جه وابوه نائب رئيس جمهورية يعنى تانى راس فى البلد واتعلم فى مدارس اجنبية وطبعا كل رغباته مجابة
ابن الريس بقى

تفتكر المحروس بقى هيحس بالناس ليه وازاى

قصيدة جامدة كالعادة
تحياتى

واحد مصرى said...

ومنذ متى يختار الشعب المصري حكامه؟ لكن لازم ده احنا اللي نعمله ... اليوم ده مش هاييجي .. اليوم ده لازم احنا اللي نصنعه يعن بيدي لا بيد عمرو

و دمت بخير أخي العزيز

امام الجيل said...

يا بنى مالك بالرس بس هو كل شوية مش كفاية بقيت منذر يعنى ارهابى كمان تسيئوا للراجل الطاهر ده حرام عليكو بقى مش اد ابوك ده هههههههه لا اكبر اكيد

مـحـمـد مـفـيـد said...

الف الف مبروك لعوده ابونا جميعا
وجعلها الله في ميزان حسناته

عارف يا منذر بجد انت جيت تكحلها عميتها
هي خربانه خربانه

انتصار عبدالمنعم said...

منذر
والله انت بتتكلم كلام غريب
أنت عايز جيمي يروح الجيش
هو كان تامر حسني أحسن منه
وعايزه كمان يسيب القصر
بصراحة عيـــــــــــــــب
طيب مين يسكن في القصر

ايمن مصطفى said...

مندر
مشكلة كيبورد بس تتعالج قريب
جمال قضى جيشه فى البيت وبعدين هى تفرق معانا بكره يبقى القائد الاعلى للقوات المسلحة ونطبع نحارب العدو بالعصى او بالانطلاقة الجديدة
انسى الرئيس وابنه وخلينا فى موضوع الشعب اللى عاوز ريس يحكمه
تحياتى

A.SAMIR said...

شكلك كدة يا منذر مش هتجيبها البر
انا بقى نفسي في رئيس اختاااااااااره
هموت على رئيس الشعب هو اللي اختاره
تفتكر هيحصل كدة في يوم من الايام؟
يطلع بقى غني يطلع فقير مش مهم
المهم
ان الناس هي اللي تجيبه

أحمد المصري said...

الراجل حتى مش عايش في القصر الجمهوري00ده قاعد في شرم الشيخ00مين قال إنه مش مصري ومش عارف عيشة مصر00عارف معظم الحاجات 00بس قاصد ينسى00شعرك جميل00
مع تحياتي00
والسلام عليكم0

هاني جابر said...

ما شاء الله عليك ربنا يباركلك
بس ده كلام ولا في الاحلام
وبعدين اخونا ىالحالي شكله مابد فيها ياعم ده بقالي 26 سنة
حقق اكبر رقم قياسي علي مستوي العالم
ولسه بأه تكملة وكالة البلح
انا سعيد جدا بزيارة مدونتك
واكون سعيد جدا لو اتعرفت بيك شخصيا
لا تنساني من دعائك

صاحب البوابــة said...

اشكرك

اشكرك

اشكرك

على هذه اللفتة الرقيقة عزيزي منذر

تحياتي أخي الحبيب

النورس said...

يخرب بيتك يا منذر ..ايه ياوله اللى انت كاتبه ده؟
اعمل حسابك محدش حيعمل لك حملات تضامنيه..انت حر
بس على فكره....برافو
اما عنى انا معلهش اختفيت شويه لظروف غصب عنى وحرجع قريب ان شاء الله

عازف الناى said...

اولا -اسجل اول زياره لمدونتك
ثانيا -اسجل اعجابى الشديد بالمدونه
ثالثا -اسجل من الان رفضى لجمال واقول
لالالالالالالالالالالالالا

sokoothansawat said...

يا أخي بطلوا حقد بقى...بقوا انتو عشان شعب بيئة..بياكل العيش ابو مسامير..و فقرا..عايزين الناس كلها تبقى كده.اختشوا على دمكوا بقى..مش كفاية الراجل مستحملكو و معيشكو جنبة في البلد..غيركو في كاشمير ولا العراق بيموتو في الشارع برصاصة بشلن..احمدوا ربنا بقى انكو عايشين و بتتنفسوا نفس الأكسوجين الي هو بياخدة..ربنا يعينك علينا يا ريس..ماحنا شعب ما يسواش نكلة..و سامحوة يا ناس..جاهل ما يفهمش..
قال ريس يعيش زي الشعب قال....ده الي ناقص كمان..ادب يوك..اخلاق يوك
فلاح خرسيس نارسيس
جتنا البلاوي ملينا البلد

Monzer said...

محمد باشا سمير

هو فعلا ذلك، وذلك هو
والمشكلة انه مش عاوز يعرفنا

تحياتى ليك يا جميل
ـــــــــــــــــــ


أخى العزيز مؤمن
انت تعرف انموضوع البيت الأبيض ده وقع من دماغى خالص
انا قلت كفاية مؤثرات داخلية

تحياتى ليك اخى الغالى
ــــــــــــــــــــ

علاء الجميل

بجد انت الامل أيوه كده ادينى امل وحاجات حلوة كده

تحياتى لك أخى الكريم
ـــــــــــــ

سارة
تصدقى فعلا ان احنا جربنا الاتنين
الى معدوم العافية
والى مولود فى قصر


ايه ده يعنى مافيش حاجة نافعة

نفصل يعنى
يلا يا جدعان نرجع للبوست الى فات

ههههههههههههه تحياتى لكى أختى الغالية

ـــــــــــــ

أخى واحد مصرى

بجد مش عارفنفسى أكون من الجيل الى يغير بايديه
ومايجيش عيالنا يقولوا علينا زي ما قلنا على جدودنا انهم سبب الوكسة الى احنا فيها

ان شاء الله ربنا يكرم
سعدت جدا بيزارتك الجميلة وتمنياتى بدوام التواصل

ـــــــــــــــ

Monzer said...

إمامنا إمام الجيل
هههههههههه
بجد تعليقات غاية فى الروعة والجمال
تخيل من بعد حباصة إلى منذر
ومن بعد سلام يا بلدى
بلادى بلادى اسلمى وانعمى

ممكن يحصل ايه تانى
آه صحيح بعد كده يقولولى انت تعرف إمام الجيل منين، ده تهمة صح ههههه

بجد تمنياتى فى لقاء قريب ان شاء الله

ـــــــــــ
أستاذنامحمد مفيد

فيه اغنية جديدة عملوها اسمها خربانة، أنا باسمعها كتير

ممكن تكون إسقاط سياسى ولا حاجة

ـــــــــــــــ

أستاذتنا إنتصار

انا بجد باه مخنوق من حوار الجيش ده
اشمعنى هو ، أنا قريت قبل كده انه كان فى سلاح الحرس الجمهورى، يعنى تهريج
ع العموم ربنا يجعل كلامنا خفيف عليهم
مش عاوز اطول فى النقطة ده
لكن لو دخلت الجيش والله لو فضحهم كلهم لو لقيت حاجة بس
ويان لهما
تحياتى لك أستاذتى واختى الغالية

ــــــــــــــ

أخى العزيز أيمن

تصدق صحيح
انه هايبقى القائد الاعلى
يعنى ايه مافيش فايدة

وكمان هاخاطب شبنا منين من خلف الكيبورد، اونت مسافر فى طرق كتير عرفتها هانخاطبه بيها
بس تعالى انت بأه ما تتأخرش اكتر من كده
لاما تبعتلنا عقد عمل حلو كده بكام ألف درهم انا مش طماع أف كفاية

حسد ونق باه بتاع المصريين ههههههه

ربنا يجيبك بالسلامة

ـــــــــــــــ

أحمد باشا سمير

طب ايه
ما حانا فيها
اطلع كده على مدونتك زي الشاطر وكده
وقول أرشح منذر ضد المخبر رمز البانجر ايه رايك فى الاقتراح ده، ولا تزعل نفسك خالص هههههههه (((:
بجد واحسنى جدا وفيه ميل فى نتظار رد منك
وفيه كام مشروع مجتاجين تعاونك يا جميل

ـــــــــــــــ


اخى العزيز أحمد عبد الفتاح

أنا عاوز أمشيها انه مش عارف بدل انه عارف ومنفض ولا مش هامه
ممكن فى حالة زي كدجه انى اتنقط

سعدت جدا بزيارتك الغالية وتمنياتى بدوام التواصل

Monzer said...

أخى العزيز هانى جابر

هو ايه مش كفاية كده
محتاج يستريح بالتأكيد
ما هي المريسة برده خنيقة اكيد مش حاجة لطيفة بأي حال
وكمان لو ريح شوية
مش هايحصله حاجة وحشة لاسمح الله
ده اسمه هايتنقشمن نور وهايبقى مثل يضرب

يلا عمر، والعيد الصغير بييجى قبل العيد الكبير

بجد أنا أتشرف بمعرفتك وبلقائك
ع العموم
ejymejy@yahoo.com
hapasat@hotmail.com
دول الايميلين بتوعى
اكون سعيد لو عملتلى آد

ــــــــــــــــ

أخى العزيز صاحب البوابة
احنا مافيش بنا شكر ولا حاجة من ده خالص
والدى وادلك ووالدك والدى
ده أقل ما يعمل
المهم انه يكون بخير

ــــــــــــــ
يااااااااه النورس
بجد ليك واشحة خاصة جدا جدا جدا
التدوين وحش من غيرك جدا
بجد كنت بكون زعلان أوى لما بدخل مدونت ومالقيش جديد
طب كنت تقول أي حاجة نطمن بيها عليك

وع الحملات يا نهار أبيض هو الموضوع كبير ولا ايه((:
ان شاء الله ربنايستر
والبعيد هما الى هايعملولوا حملات ان شاء اله مش احنا (((: بحلم صح مش مشكلة
المهم ابقى طمنى عليك انا سايب الميل بتاعى
تحياتى ليك ولعلك تكون بخير

ـــــــــ
عازف الناي
معلش ده تانى زيارة باه
فيه واحد بيعد هههههههههه
بس جميل انك ترفضه عندى
بس أنا مليش دعوة لو حصل حاجة أهو أدينى قلت

بجد مدونتك جميلة واسمك أكثر من رائع
وان شاء الله الناي مايكونش حزين
تحياتى لك اخى الكريم

Monzer said...

أختى الغالية سكوت

هههههههههههههه

بجد والله عندك حق
زمانهم مستغربين ان الشعب بتاعنا بيقول عليه كده
ولا بيطالبو بالمطالب ده
انه يكون زي شعبه
زي ما عمل الخليفة الراشد عمر بن عبد العزيز

بجد كنت سعيد جدا لما قابلتك وطاقتك الهايلة وكل الخوة الى كانوا موجودين
واسمحلى أن أعتذر عن أي نرفزة أو أي صمت او هدوء وهو غير عادتى ولكن حدثت مفاجأة هي الى خلت معايا يحصل كده

بس ان شاء الله نشوف هانعمل ايه

ودمتى بخير حال

عصفور المدينة said...

عربية الفول والنوم في البلاط في الخدمة في الجيش والست بتاعة الشاي اللي اتعلمت اشرب شاي لأول مرة في حياتي عشان اعرف أواصل 36 ساعة واقف على رجلي
وقطر الساعة 2:45 عشان أوصل الساعة 8ونص
والساندوتش الاحتياطي اللي كنت باحطه في جيبي
وطابور توثيق الشهادات اللي استمر 72 ساعة على ماوصلت
وطوابير العيش
وبحبك يا مسكين

حسن توفيق said...

اخى العزيز
منذر
انا ارى فى نفسى رئيس كويس
مش عايش فى قصر بس نفسى اعيش فى قصر
ممعييش فلوس بس نفسى ابقى غنى متجوز واحدة ونفسى اعك واشوف بتوع السيما
معنديش عجلة وبمشى على رجلي نفسى اركب عربيات عيون وشبح وما الى ذلك
ان كنت فى حاجة لريس مستعد اخذ اجازة بدون مرتب وطظ فى الكادر الى هيزلونا به
اخى
ادعوك الى زيارة مدونتى للاطلاع على ادراجى الجديد ( يوميات ملاحظ فى الثانوية )
وارجو دعمى فى انتخابات اتحاد المدونين العرب ان رايت انى استحق ولك كل الشكر فى كل الاحوال
الى لقاء قادم ان شاء الله لكم السلام

بن توفيق said...

مالك يا عم ومال الراجل

متسيبه فى حاله .. ولا اقولك

لأ انت خطير قووول اللى انت عايزه وانا اقول معاك :)

نقطة مية said...

ايه يا منذر ده..انت جاتلك لحظات صفاء جامدة خلتك تقول الكلمتين دول...بلاش حقد بقى و نفسنة...
:-)
و هو اللي هيدخل مدرسة حكومة هيطلع ريس !!؟
هي البلد ناقصة هرتلة...
:-)
يا ابني احنا"مهمشييييين"

الحمدلله

بوست جامد جدا..ربنا يحميك

ibnyosry said...

منذر انت كده خبطت فى الحلل
وشكل الايام الجاية بلاك
ربنا يستر

ابن الإسلام said...

أخي الكريم منذر :

السلام عليكم ورحمة الله وبركاته ...

أحلامك جميلة .. وشجاعتك رائعة .. وأفكارك أروع ..
وإن شاء الله تأتي الأيام التي تتحقق فيها هذه الأحلام وتصبح حقيقة لنعيش في أمان ...

والله من وراء القصد

امام الجيل said...

ايه ده مين اللى قالك تعرف امام ده هى حصلت قولى انا عايز اعرف هما وصلولى ولا ايه طيب يا بنى ابعد عنى وربى عيالك احسن

عمر الشرقاوى said...

حبيبى وصديقى منذر الكلام دا كبير والله ان جيت للحقيقه هو ايه اللى مخليه متنيل وماسك ومتبت وى كده فى الحكم عشان الدنيا كلها تحت رجليه دلوقتى وهو لو تنازل عن الحكم مش هايتنازل كده عشان خايف من حركه كفايه اللى اخظات وقالت هانحاكم الريس فقام الريس وقال فى عقل بالو طيب عشان كده مش هتنازل ويانا يانتوا

قومى الى الابد said...

ا عم العيب مش فى الجدع دى حاجة الحاجة التانية مش المشكلة فى غنى او فقير المشكلة فى النفس الامارة بالسوء والجشع والطمع واللى مايعهرفش يعنى ايه كلمة وطن والحاجة التالة انت ناسى ان احنا اتقنا على الاختلاف واختلفنا على الاتفاق

حزيــــــــــــــــــن said...

ياعم انا مليش دعوى بالكلام دا ههههههههههههههههههههههه
متشكر على مرورك فى مدونتى تسمحلى اعملك لينك عندى ونتابع بعض باستمرار
ابقى زور مدونتى التانيه عشان هى اللى بكتب فيها باستمرار

ibn nasser - ابن ناصر said...

لا ويطلع عينا ازاي !!؟ ماينفعش
تحياتي

break said...

يعنى حسنى مبارك ماهو خريج مدارس حكومية ومتشحطط اخر شحططة طول عمره وفقران ودايق المر
عملنا ايه ؟!!
البلد دى مش محتاجة ريس اصلا :D


كتاباتك حلو اوى اوى بجد
تحياتى

Monzer said...

الأستاذ عصفور المدينة
ده بشرة خير
روربنا يستر أنا داخل على جيش وباين علينا هانتروق جامد
بس بصراحة كان لازما يتروق زينا كده
تحياتى لكاستاذة الغالى

ـــــــــــــــــ

أستاذ حسن توفيق
يلا رشح نفسك وكلنا وراك ان شاء الله

*************

بن توفيق الغالى

صح كده نقول شوية
احنا بقينا خطر أصلا فنعمل الى يخطر على بالنا
تحياتى لك يا جميل

**************
نقطة مية الغالية

ده مش لحظات صفاء دخ لحظات غل وحقد وغلاسة زي ما بتقولى والله
انت ماشتفيش عصفور المدينة قال ايه
قال طبور استمر 72 ساعة

والله لفجرها لو اتروقت كده
تحياتى لكى اختى الغالية


***************

ان يسرى الغالى
بلاك بلاك
هو احنا بيهمنا
مش انت معايا ولا ايه ((:

***********



أخى العزيز ابن الأسلام
زيارتك ليا جميلة
وإطرائك وسام على صدرى وان شاء الله تتحقق
وسعدت أكتر بزيارة مدونتك
دمت بخير حال

Monzer said...

اممنا امام الجيل
والله ما أعرفه يا باشا
هو الى بيجى عندى أنا مابروحش
ههههههههههه
م هو احنا لانعيش سوا لنموت سوا
وبعد الشر عليك
وربنا يسلمك من كل شر
تحياتى لكى يا إمامنا


**********


هو مش هايتنازل خوفا من كفاية
هو هايتنازل خوفا منى لو دخلت الجش واتبهدلت هناك
ههههههههههههه
وربنا يستر

*************

قومى إلى الأبد

هما فعلا تلات حاجات
والثلاث حاجات دولمهمين اوى اوى اوى
وهما بيت القصيد
بس برده هو السبب امال خياله

بجدت سعد جدا بزيارتك وتمنياتى بدوام التواصل

***********

أخى حزين
بجد اسعدنى جدا التعرف على مدونتك
وده شرف ليا اننا نتباع مع بعض
وان شاء الله هاتابع فى مدوناتك الاتنين
وربنا يزيد ويبارك
ودمت بخير حال

Monzer said...

ابن ناصر
لو مالقناش حد يطلع عينا نبقى نطلع عين بعض
هههههههههه
تحياتى يا معلم


***********


break

بس ده جديدة اننا مش محتاجين ريس خالص
والله فكرة
نبقى كده مع نفسنا
هههههههههه
عاوزين نجربها بجد
بجد أسعدنى جدا زيارتك وتمنياتى بدوام تكرارها

حسن توفيق said...

اخى الحبيب الغالى
منذر
والاخوة الزوار الكرام
اسمحوا لى ان يكون تعليقى خارج الموضوع مع شديد اسفى لذلك ولكنها الانتخابات التى بدء التصويت لها فادعوكم الى الذهاب الى مدونة اتحاد المدونين العرب واختيار الاصلح والذى امل ان اكون من بينهم كل الشكر لك والى لقاء قريب ان شاء الله لكم كل الشكر
اخوكم
حسن توفيق