Thursday, June 21, 2007

وقفة لابد منها



منصة المؤمتر او الندوة

كلمة الأستاذ منعم










أستاذ محمد عبد القدوس كان اول الحاضرين هو ومجموعة الإخوان المدونين ثم حضر الشرقاوى والجيزاوى واحمد يوسف وميدو وسارة وكش ملك
علاء يا عينى صوته اتنبح بميكروفون ومن غير صراحة
الجيزاوى كان بيهتف لو معاه ميكروفون ولو معاهوش برده بيهتف
كنت مبهور جدا لما رحت النقابة وقابلت شباب المدونين، بجد شباب هايل، شباب يفرح شباب بيحب مصر قوى، شباب عنده استعداد يموت علشان مصر ، شباب مثقف وواعى وفاهم وسابق سنه ومتفوق فى دراسته وعمله وعنده مواهب، منهم الى شاعر والى قاص والى زجال والى كاتب

وانبهرت أكتر لما بدأنا الوقفة ولما شفت إن المدونين الى كانوا بيهزروا ويتعرفوا على بعض من شوية بأو زي خلية النحل مثلا كش ملك بيكتب هتافات وبيجمع الهتافات من المدونين الآخرين ويديهم للى بيهتفو فى المظاهرة، واحمد الجيزاوى وعلاء ما شاء الله عليهم قعدوا يهتفوا لغاية ما كل واحد فيهم صوته اتنبح ومابقاش طالع، بس كانوا صراحة خطباء ممتازين وارتجلوا حلو قوى

طبعا
صاحب البوابة كان عمال يحسنا اننا نعلى صوتنا، وما شاء الله مجموعة الإخوان كانوا هايلين ومنهم كان أخونا قاوم كان صوته اكثر من رائع وغنى أنشودة جميلة جدا كانت ختام الوقفة

وبعد كده طلعنا صلينا المغرب وابتدت الندوة ، واتكلم منعم وعلاء وشاهيناز وخديجة مالك وكادت ان تبكى القلوب قبل العيون من شدة ماحدث لخديجة مالك ابنة رجل الأعمال حسن مالك الذى تم إعتقاله مع بقيت الإخوان فى الاحداث الأخيرة ، وأخذت تقص ما حدث لها ولعائلتها ولكنها كانت صابره ومحتسبة، وعندها حس للفكاهة عالى جدا، كنت كل ما آجى اعيط تقول كلمة نقعد نضحك كلنا، واتكلم برده اخونا
عمر الشرقاوى، برده كان ناكر لذاته بطريقة كبيرة جدا وماكلمش عن نفسه ولا عن تجربته المريرة اتكلم عن صحابه اكتر من كلامه عن نفسه، وجارى تنزيل الفيديو، وعلاء وكش ملك قالوا كلمة ، لكن انا كنت خرجتللأسف لأن كان فى معاد آخر مع جروب مجموعة القلوب البريدية

وانتهت الندوة بلقاء يجمع المدونين كلهم فى روف النقابة وكان رؤساء الجلسة منعم وعلاء، اتعرفنا على بعض الأول كل واحد فينا قال نبذة عن نفسه، طبعا اتقفنا فى حاجت واختلفنا فى حاجت تانية وكانت مناقشات حامية

لكن انقسمنا على كذا موضوع ومنهم التضمان مع كريم وامثاله ممن يتخذون من السب والشتم وإهانة العقائد حرية للتعبير، وفى هذا الموضوع بالذات كان الإنقسام فالفريق الاول كان يرى أننا نرفض كلام كريم لكن نتضامن مع سجنه واعتقاله وكان من الغريب أن مجموعة من الإخوان كانوا موافقون على هذا الراي، أما الفريق الثانى فكان يرى عدم منطقية التضامن مع شخص اتهمنا بالغباء والجهل والتطرف والتعصب والإرهاب والإنغلاق فى الآخر اتضامن معه وكنت أنا وكش ملك وآخرين فى هذا الفريق

طبعا هناك كانت أول مرة أشوف هذه العدد من المدونين ، وبصراحة مش عاوز أذكر أسماء علشان مانساش حد، لكن
علاء ما شاء الله عليه عمل حصر لأغلب المدونين الشباب الى كانوا موجودين ممكن ترجعوا لتغطيته، لكن الغريب ان فى أي لقاء جمعنى مع مدون او ناشط إنترنت فى إحتفال مجموعة القلوب البريدية الاخيرة إنى شعرت إن هذه ليست المرة الاولى التى أرى فيها هذا الناشط او المدون ومقدار الحب والود والصداقة والحميمية بيكون موجود، وكنت سعيد جدا بمقابلتهم جميعا

وهناك تغطية احمد الجيزاوى وعلاء وكش ملك و نقطة مية هي صراحة تغطيات وافية أفضل من هذا البوست، لكن شعرت إنى لازم أعطى إنطباعى الشخصى


طبعا انا مش عارف أرتب الصور وطلعت كلها متلخبطة ومش بالترتيب الزمنى ، فاعذرونى لو سمحتم، لغاية ما ييجى حد ابن حلال ويظطبنى فى الموضوع ده

hapasa
معنى الكلمة الخنيقة الى فوق ده حباصة أو منذر، وعندك صراحة حق لو اتلخبطوا فيها

34 comments:

مـحـمـد مـفـيـد said...

منذر
بجد ده من اجمل الايام اللي قضيتها منذ دخولي التدوين شوفت قد ايه في ناس بتحب مصر علشان عايزه تغيرها ومن غير مصلحه
بجد كنت سعيد جدا رغم المده القصيره اللي قعدتها لكن بجد المره الجايه هكون اول واحد

مـحـمـد مـفـيـد said...

منذر
بجد ده من اجمل الايام اللي قضيتها منذ دخولي التدوين شوفت قد ايه في ناس بتحب مصر علشان عايزه تغيرها ومن غير مصلحه
بجد كنت سعيد جدا رغم المده القصيره اللي قعدتها لكن بجد المره الجايه هكون اول واحد

barbie girl said...

جزاكم الله خيرا على اللى عملتوه

Alaa said...

ايه التغطيات الجامدة دي :)
ربنا يتقبل منا و منك يا حبيبي و يرزقنا الاخلاص
و اكيد هاشوفك يوم 15/7 ان شاء الله
عايز ودع :)

خليك فى البيت said...

بجد احنا سعداء بحماسك لمساعدتنا وأكيد أحنا عايزين ناس تنشر الفكر وتساعدنا والفكرة مش بس منتشرة فى المدونات دى منتشرة فى أماكن كتير وأنا نقلتها من منتدى الكرامة لهنا علشان أنشرها للمدونين وكمان الفكرة محتاجة تتوسع فى الشارع كمان ويسعدنا أنك تساعدنا
ولو فعلا تقدر تساعد أبعت لنا على الأيميل ده
rohbosbos@gmail.com
علشان نقدر ننسق معاك أكتر

AHMED SAMIR said...

ايه النشاط دة كله ياعم
ربنا يوفقك
اللهم لا حسد
تحياتي واحتراماتي

Anonymous said...

تغطية ممتازة يا حباصة

كنت معاكم واتشرفت بمعرفتك فوق السطح ههههههه

واتنمي اشوفك تاني ونعرف بعض اكتر واكتر

اخوك مصراوي اوي

احمد الجيزاوى said...

انا لسه داخل اشوف مدونتك الان معنى كنت معاك النهرضه مقلتليش على التغطيه الجمدة ديه ليه ياشقى
تغطيه فوق ممتازة
وبصراحه انا كنت بحس بلحظه خوف وانا بهتف بس كنت ببص فى عيون المدونين كانت بترجعلى الشجاعه على طول
وبصراحه الى حصل يوم 20 / 6 / 2007 جوبلى على سوال مهم هو من كان هيدافع عن مصر لو حصل بها مثل العراق لا قدر الله هل شباب المخدرات ام شباب المواقع الاباحيه ام شباب الافلام الحب الهيفه بتاعته السلمه ام شباب يعمل مصلحه جماعه او طيفه دون مصر
والاجابه كانت فى عينك انت وعيون كل المدونين
الحمد الله
وبارك الله فى المدونين
ولانك صحبى الانتيخ يا منذر ادعولك بتوفيك دعوة خاصه ربنا يبارك فيك يا صديقى
احمد الجيزاوى

صاحب البوابــة said...

أخي الكريم منذر

أصدقك القول أن هذا الجو المفعم بحب مصر

قد أعاد لي الأمل الكبير

تحياتي لك عزيزي وصديقي الحبيب

نقطة مية said...

السلام عليكم و رحمة الله
يا سيدي نورت مدونتنا المتواضعة..و ايه التغطية القوية دي..انت و احمد عقدتوني بالصور اصلي منزلتهمش كلهم...بس بعد اذنك عملت لينك من عندك..للاستزادة...
شرفت بمعرفة سعادتك و نشوفك ان شاء الله في حب مصر دايما
تحياتي

حزيــــــــــــــــــن said...

انا بجد كان نفسى اكون معاكم

مشروع انسان said...

منذز طب ايه حباصة دى منذر احلى بكتير يا جدع كان نفسى اكون موجود واشوفك والله بس الظروف قهرية جدا ومقدرتش اجى بس ان شاء الله نلتقى ربنا يسهل وربنا يتقبل منكم تلكم الخطوات وانا رايى مع رايك حرية الراى لا تمس الدين باى شكل دى تبقى قلة ادب مش حرية

Anonymous said...

بجد ممتاز التغطيه دى بارك الله فيك انا ما ستفدش بحاجه الا بمعرفه الاشخاص المدونين ومدى حبهم وتعاطفهم للبلد وحبهم للحريه ربنا يزيدك فين بقى الصور بتعتى ياراجل بقالى كام يوم مش عارف اكلمك

Anonymous said...

منذر
تحياتى لك ومجهود مشكور بصراحة مريت على كل المدونات اللى عملت تقرير عن المؤتمر كلهم ماشاء الله ذاكرينك بالخير
صور وتواصل مع الاخريين فعلا انا فخور بك وكل اخواتنا الاعضاء بصراحة حاجة تفرح
على العموم انا كنت بعتلك على الماسنجر اسل عليك كان نفسى احضر وياكم بس بقه الظروف ان شاء الله ملحوقة لما ارجع
بس انت اوعى تنسى اخوك
طبعا كلكم وحشنى حتى ولو لسه مشفتكمش
متنساش اخوك محتاج دعواتك

Monzer said...

والله يا أستاذ محمد كان عندى نفس الشعور الى عند حضرتك
وبرده كانت ده أول تجربة ليا وكنت سعيد بيها جدا
وان شاء الله هناك وقفة فى الهايكستب يوم 15/7 ضد المحاكمات العسكرية

Monzer said...

الاخت باربى
وجزاكى مثله ان شاء الله
وده تجربة مثير للاهتمام وزي ما قلت هناك وصقفة ضد المحاكمات العسكرية فى الهايكشتب يوم 15/7

Monzer said...

حبيبى علاء
فعلا انا اتكلمت فى ىخر اليوم مع صاحب البوابة وقلتله نفس الكلمىة اللهم ارزقنا الإخلاص ده أهم شيئ
وان شاء الله على معادنا

Monzer said...

خليك فى البيت
فعلا هى فكرة جميلة
وهابعتلكم أكيد ان شاء الله نشوف ممكن نعمل ايه
جزاكم الله خيرا

Monzer said...

أحمد باشا سمير
والله واحشنى جدا
وبجد ياريتك كنت موجود نفسى بجد اشوفك
المرات الجاية كتير ان شاء الله

Monzer said...

مصراوى أوى
انا بجد الى اتشرفت بمعرفتك ومعرفت كل الى كانوا موجودين
وكان يوم جميل فعلا
وان شاء الله فيه لقاءات كتير

Monzer said...

احمد باشا الجيزاوى
انت فاهم ماكانش فيه وقت انى أقولك
بس انت الى ما شاء الله عليك تغطيتك كانت قوية جدا
جزاكم الله خيرا
وسلملى على كل ناسك أحمد يوسف وميدو

Monzer said...

أخى العزيز صاحب البوابة
انا كنت طاير بالشباب اليوم ده
وكنت مبهور وكنت بقارنه ببتوع القهاوى والعياذ بالله المحدرات والحات ده
وده عاد إلى الامل من جديد
جزاك الله خيرا

Monzer said...

والله يا نقطة مية
انا كنت سعيد جا لما شوفت
وبرده زي اي مدون فوجئت انك بنت
وبجد مدونتك اكثر من رائعة

Monzer said...

اخى العزيز حزين
فعلا ياريتك كنت موجود علشان نتعرف عليك
بس ان شاء الله الجايات كتير
فيه يوم 15/7 هانكون فى الهايكست وقفة ضد المحاكمات العسكرية وان شاء الله تكون هناك ونشوفك
وجزاكم الله خيرا على اهتمامك

Monzer said...

ازيك يا إمامنا
فعلا امتى هانشوفك باه
بجد عاوز أتعرف عليك فعلا
الله يقويك فى مشغولياتك والجايات اكتر ان شاء الله
وجميل اننا نتبنى نفس الموقف
جزاكم الله خيرا

Monzer said...

أخى العزيز عمر الشرقواى
بجد كل مرة أشوفك أو نتقابل
اكتشف فيك ميزات كتيرة جدا
هدوئك ورزانتكوحبك لمصر وانكارك لذاتك وتواضعك وعد حبك للشهرة ولا المظاهر الكذابة
مع انى ممكن أي واحد يستغل الى حصله اعلاميا لكنت انت ربنا رزقك الغخلاص وربنا يسبتك يا عمر
بجد سعيد جدا ان اتعرفت عليك واتمنى دوام الاخوة

Monzer said...

والله يا أيمن انت واحشنى أكتر
بجد نفسى أقالك ونقعد نحكى فى حاجت كتير
وان شاء الله ترجع عن قريب
ولازم ساعتها نقعد مع بعض
وبجد الأيام الى فاتت كانت محتاج مجهود زي مجهودك
وربنا يوفقك ويرجعك بالسلامة
تحياتى ليك دائما وامنياتى ليك بالتوفيق

Anonymous said...

كمان عايزين يمنعوا التدوين ويحظروا كلماتنا
ده ايه اللى احنا فيه ده
الحمد لله ان لسه فيه رجال بيدافعوا عن ثوابتهم ومواقفهم
كان نفسى اكون معاكم
بس انتم الخير والبركة
ربنا معاكم ومعانا

Anonymous said...

منذر
ايه ياعم التغطيات الجامدة ده
خد بالك بقى عشان معايا صورة وانت رافع لافتة كدةمكتوب عليها مدونون ضد التعذيب
يعنى اى حركة هطلع الصورة على طول
اه احنا جدعان اوى

بس بجد المؤتمر كان حلو اوى
واحلى مافيه الناس اللى حضروا وروحهم مع بعض

Anonymous said...

أخي الحبيب ...كان نفسي أشارككم هذه الوقفه ولكنني كنت مشغول جداً ...تحياتي للجميع .....
هيثم أبوخليل ..مدونة متر الوطن بكام ...؟؟

Monzer said...

أستاذة نيفين
بجد احنا مابقاش لينا غير المدونات نقدر نتكلف فيه على راحتنا من غير ماحد يكبت حريتنا

وربنا يستر على الأيام الى جايه

Monzer said...

سارة
هي بقت كده عاوزة تلغى عننا
بس بجد ابقى ورينى الصورة
انا ماكنتش شطر زيك ماعرفتش أصورك بس ملحوقة ان شاء الله
انت كمان كنت شايفك عمالة بتصورى هما فين باه الحاجت ده
تحياتى ليكى

Monzer said...

أستاذ هيثم ان شاء الله الجايات كتير
كفاية شعورك الطيب
تحياتى ليك أستاذى الغالى

Anonymous said...

سلامٌ من الله عليك ورحمته وبركاته ..

مشكلة مكتوب الكبرى هي قطعاً حديث الساعة للمدونين الذين شُلت حركتهم ..

فماذا حدث للمدونات؟

هل هي لعنة المدونة الإسرائيلية؟؟ طبعاً أمزح

أم هي مشكلة سيرفرات في مكتوب/مشكلة تقنية؟

أم هي مشكلة هاكرز؟؟

هذا ما سنعرفه في الساعات القادمة...

أدعوك لموضوعي البسيط (ماذا حدث للمدونات؟)...

والله من وراء القصد ...