Monday, June 25, 2007

أنا عاوز ريس ..... ؟

أنا عاوز ريس صايع
لف ودار ع المسمار
وع القهاوى ماتلاقيهوش
تلاقيه فى جامع
مرة ساجد ومرة راكع
ومرة شايل كتاب علوم
ومرة يتأمل النجوم
يساعد كبير
يرحم صغير
وقنوع وصادق
تشوفه وزير
فى الحته جامد
حلال مشاكل
وفى الجامعة ناصح
دكتور قرير
فى الشغل فاهم
حازم وصارم
ينفع مدير
نظره ثاقب
صاحب واجب
يعمل الخير
بيعه حلال
من غير فصال
ده غير النضال
لك خادم وأسير
معروفه باين
على مالك صاين
جمايله كتير
* * *
أبوه وداه مدرسة حكومية
ووقف كمان فى طابور العيش
وجاب مجموع فى الثانوية
من غير لا واسطة ولا بقشيش
وكان متفوق فى الكلية
وعارف الى بيحصل فى أبو الريش
وأدى واجب الوطنية
من غير ما يهرب من الجيش
وراح بنفسه السجل المدنى
وطلع بطاقة رقم قومى
وراح الحي والمرور
وعملولو رخصة بسرور
وطلع م الآخر
واد مصرى بسيط
مش زي اخينا المغرور
طبعا للتوضيح صايع مش معناه حاجة وحشة معناه انه يكون ابن بلد مخربش يعنى
مش أستغفر الله يكون من غير شغل ولا حاجة وحشة
وجدت ان التوضيح مهم
هابقى أكلم على اخينا المغرور فى البوست الى جاي ان شاء الله
وأتمنى انه يكون مقالا وزجلا
hapasa
معنى الكلمة ده حباصة، وحباصة دلع منذر
الى هو أصلا مش أنا ههههههههههههههه :)

39 comments:

Alaa said...

طلبك موجود يا باشا
تعالى يوم الجمعة و هاتك معاك الرجالة و نتفق :)

ايه ياعم الشغل الجامد ده
امال كنت فين ساعة الهتافات :)

ربنا يحميك يارب

مـحـمـد مـفـيـد said...

مرة ساجد ومرة راكع
ومرة شايل كتاب علوم

دي صعبه اوي يا نجم مع الموجود
بس انت فعلا جامد يا حباصه

مش عارف ايه جاب حباصه لمنذر بس يالا
واحشني جدا

انـتــصار عــبـد الــمـنـعـم said...

منذر
كلامك رائع ولكن شروطك في الزعيم
مستحيلة
ولكن ما باليد حيلة
الأمل موجود
ولكن ممكن سؤال لما حباصة دلع منذر ومنذر موش أنتى يبقى أنت مين

صاحب البوابــة said...

هههههههههههه

اعجبتني كلماتك للغاية

لكن اكثر ما اضحكني

هي تعليقات الاخوة الاعزاء علاء ومحمد مفيد

:)

اضحك الله سنكم جميعاً

تحياتي

Anonymous said...

منذر ازيك يابنى تعبان ولا ايه

طيب ازاى يعنى
الريس بتاعنا يبقى كدة
حتى عيب
مين يطلع عينا ويقعدنا فى البيت ويخلينا مش طايقين نفسنا ولا طايقين البلد
وبعدين مكان حد بالوصف ده
هو المعتقل ياباشا
يعنى تضيف على مواصفات الريس الخيالى ده انه يكون معتقل


ازاى حباصة دلع منذر يعنى
على فكرة اول كام مرة مكنتش عارفة مين حباصة

المهم ربنا يبعت ريس كدة ونشوف

حلوة

غمض عينيك said...

كلامك جامد جدا ياباشا
بجد حلوة

محمد سمير

Mohamed Abdelgeleel said...

الله ينور يا ريت نلاقي واحد كدا بس لو واحد مش لاقي واسطة في الثانوية حيلاقي واسطة توصله لرئيس جمهورية

حياة تستحق الانقاذ said...

اسلوب جميل..
دمت بخير.
أم المييس
www.omelmees.blogspot.com

Anonymous said...

ماشى يا منذر
زعيم اونطة انا بقه ولا ايه
لا لا لا نمسك الخشب....اسلوب جميل وكلام وقعه اجمل ومعناه هادف
موضوع المجلة بعتلك دعوة الى الايميل بتاعك اقبلها عشان تقدر تنشر مقالاتك هناك شد حيلك شوية مش كسلان
على فكرة انت طلبت منى شيئ وانا مكسرتش كلامك
شوف وقولى ايه رايك
http://bloggersforchange.blogspot.com

جهاد خالد said...

هل أنت مسلم مهتم لأخواتك المسلمات؟
هل تؤمن بدور المرأة في تربية وإصلاح المجتمع؟
هل تحلم بجيل من الفتيات كالخنساء ورفيدة؟

إذا شاركنا مقترحاتك وآراءك ورؤيتك
على مدونة
بـنـاتـيـت
www.banateet.blogspot.com

mo'men mohamed said...

يا سلااااااام
بس كده
انت تأمر يا باشا
كل ما عليك
انك تجيب آلة زمن
وترجعها ألف ربعميت سنه وراء
حتلاقى اللى انت عايزة
السلام عليكم

احمد الجيزاوى said...

ازيك يا منذر عمل ايه يبنى ابقه رن حته
عموما انا شيف انى مصر فى المرحله القادمه محتاجه رئيس من تمام زى منت قلت رئيس صايع مقطع السمكه ودله
احمد الجيزاوى

عازف الناى said...

عايز رئيس جمهوريه يكون وقف فى طابور العيش
ده ولا حتى رئيس مراجيح سوق العيد
كلماتك رائعه جدا
انا اول مره ادخل مدونتك ولانها اعجبتنى فلن تكون الاخيره
وشكرا

Rania Lelah said...

ايه بس يا عم منذر اللخبطة دى
هو فعلا مفيش علاقة بين حباصة و منذر بس يلا ما علينا
كلامتك جامدة و عارف لو فى ريس كدة كان حالنا اتصلح اكيد باذن الله علشان هيبقى عارف بنحس ايه و عايزين ايه
و اييييييييييييه
متفكرنيش بقى
مش قلتلك جاى
و غلاوتك للاجى
:)))

مشروع انسان said...

طلبك مش عندى يا مزازجنى
ايه يا عمى ده انت عايزه منين بس نجيبلك واحد من اهل الجنة تعرف بجد والله الواحد نفسه يرجع لايام سيدنا عمر وعدله كفاية انك ممكن تكلمه فى اى وقت وتمشى جنبه نقول ايه بس
يا بالحاج انا كان قصدى فانكى عشان اسم حباصة بس مش عشان الاغانى متفهمنيش غلط وكويس انك شلتها يا راجل بس شكلك والله محترم جدا وعاقل واكبر من سنك مش عارف انت وعلاء وانا عواجيز ليه ربنا يسهل ونتقابل قريب

فقاقيع كلام ـ شروق الشمس said...

السلام عليكم ورحمة الله وبركاته..

على فكرة في ريس.....

بس مختلف تمامًا عن الحاجات اللي قولتها..

وحكاية الصلاة هتكون صعبة أوي بالنسبة له

يعني يسيبلنا شئون البلاد وبنوك سويسرا ويقعد يصلي..

Alaa said...

منذر أنا محتاج رأيك بخصوص الموضوع ده

تجمع مدوني مصر .. حقيقة قابلة للتنفيذ أم حلم بعيد عن الواقع

Anonymous said...

أخي حباصه
حلم جميل
بسيط
هادي
شقي
مزيج غريب...بس جميل
تحياتي
منى

نقطة مية said...

ازيك يا منذر...
اللي انت كاتبه ده هتروح تلاقيه في الصيدلية او اي سوبرماركت كبير...او ممكن توصي حد يجيبهولك من برة...!!!
بس مش هتلاقي ريس بالمواصفات دي...
بوست جميل و دمه خفيف..."و فانتازيا"..اصل لازم يكون كدة
:-)

بن توفيق said...

بص يا ريس

لو عايز البتاع اللى انت بتقول عليه

روح شارع عبد العزيز او العتبة .. مش هتلاقيه هناااك

Monzer said...

علاء باشا
لو على يوم الجمعة ماشى ان مستعد
وبدل الراجل مية
عين شمس نازلة بكره يا رجالة
انت تامر
تحياتى ليك يا جميل

Monzer said...

أستاذ محمد بجد فيه كلام كتير أوى عاوز أحكى معاكم فيه
ربنا يسهل ويكون فيه لقاء قريب

وسلامى لعبد الله

Monzer said...

أستاذتى انتصار
هاعمل ايه مش هتنازل ومش هاطلب حاجة تايوانى
عاوزه ريس لوز لوزجى مانجالاوز

ومشيها منذر مؤقتا عقبال ما ننزل اسكندرية

Monzer said...

أخى العزيز صاحب البوابة
سعد جدا بزيارتك ودايم ا الشعب بيحب يهزر معايا

Monzer said...

ايه ده يا سارة
هو ريس يكون رد سجون
والشعب يكون برده رد سجون
كلنا لازم نكون حبسجية كدا

ماشى لو على معتقلات يبقى فيه كتيييييييييييييييييير قوى

ومشيها عبد العال كان دلع هانى
:)

Monzer said...

حبيبى محمد سمير
فيك يا جميل
وحاشتنى زيارتك بجد
وشكرا على إطرائك الجميل

Monzer said...

اخويا العزيز محمد عبد الجليل
هو لازم يكون بواسطة
ياخوفى لا يبقى كده
يبقى اتعشقلنا ريس حمصانى

Monzer said...

تحياتى لك اختى العزيز ام الميس

Monzer said...

والله يا أيمن
انا كاتب التوضيح ده مخضوص علشانك
علشان ماتزعلش من كلمة صايع ده
علشان تعرف انت ريسمش اونطة يتعمل حسابك دايما يا جميل
دمتم بخير صحة
وترجع بالسلامة ان شاء الله

Monzer said...

اختى النجمة الصامدة
مدونة رائعة للغاية

Monzer said...

اختى النجمة الصامدة
مدونة رائعة للغاية

Monzer said...

اخى العزيز مؤمن
انت جبت المفيد هيى آلة الزمن
شكرا على تعليق الاكثر كمن رائع

Monzer said...

احمد الجيزاوى
يبقى مافيش غيرك
أنا بلاقيك فى كل حاجة ما شاء الله
ياخوفى لا تطلع حزب وطنى فى الآخر
ههههههه
تحياتى ليك يا جميل

Monzer said...

عازف الناي
صعب شوية انه يقف فى طابو العيش
تصدق صح
بس أنا وقفت حصلى ايه :)
سعدت جدا بزايرتك وتمنياتى بدوام التواصل

Monzer said...

انا شايف كده برده
لازمي كون عارف الى بيحصل لبقيت الشعب علشان يقدر يحل كل المشاكل الى بتواجهنا
سعدا جدا بيزارتنك يا رانيا
وماتغبيش كتير كده

Monzer said...

إمامان إمام الجيل
بجدبتنور
بسعد جاد لما بشوف تعليقك
فعلا أتمنى ان اشوف بعينى عصر زي عصور الخلافة الراشدة
اتمناها أقبل ما أتنقط وانشل واموت

وطبعا أتمنى أقابلك فى أي وقت
ده طلبنا من زمان
دمت بخير صحة

Monzer said...

wa7dania

هو فعلا حلم
وماليش بصراحة غير الاحلام
بس بجد أتمنى تحقيقه
سعدت جدا بزيارك

Monzer said...

الغالية نقطة مية
ان هافصله
أو هاركب حاجة كده
أو أقولك نجيبه تجميع اوفر
نعمل ايه بس
هايجنا الراجل ده باين عليه

Monzer said...

أستاذ بن توفيق
يعنى حتى لو روحت هناك مش هلاقى برده
ده هناك بتلاقى أي حاجة
هههههههه
سعدت جدا بزيارتك وتمنياتنى بدوام التواصل